ECIGABI C’OKUYIGA CA 17
LWIMBO 111 Mambo Yenye Kufanya Tukuwe na Furaha
Orhahiraga Okarhenga omu Paradizo Yirhu y’Ekiroho
“Mushagaluke munahame n’omwishingo ensiku n’amango erhi ebi nalema birhuma.”—IZ. 65:18.
EBI ECI CIGABI CISEGIZE
Oku rhuyungukamwo n’eparadizo yirhu y’ekiroho n’oku rhwakashumyamwo abandi nabo bayijemwo.
1. Eparadizo y’ekiroho byo bici, na bici rhushinganine rhuhige okujira?
ENE, hali ahantu h’olwiganyo okw’igulu habamwo bantu banji bwenene bali bajira mikolo minji minja. Muba emiliyoni y’abantu bashagalukira omurhûla gw’okunali. Abakola bali mw’eyo paradizo bahizire oku barhakahira barhengamwo. Kandi baba balonzize bantu banji bwenene nk’oku binahashikine bacilunge haguma nabo mw’ako kanga kago-kago. Ako kanga ko kahi? Yo paradizo y’ekiroho! a
2. Bici bisomezize lugenda eparadizo y’ekiroho?
2 Eby’okusomeza kuli kubona oku Yehova alemire aho hantu h’olwiganyo, aha abantu bage bali balama omu murhûla n’omu cinyabuguma ciru akaba bali omw’igulu lya Shetani liri libi na ligalugalu, hantu abantu bashombine bwenene. (1 Yn. 5:19; Maf. 12:12) Nnâmahanga wirhu w’obuzigire ali abona gurhi er’igulu libi liri lyashereza abantu, cikone ali ajira abantu bage baciyumve bali omu bulanzi lyo bagendekera bamukolera n’omwishingo. Akanwa kage kaganirire eparadizo y’ekiroho nka hantu ha ‘kuyakira’ na nk’‘ishwa lidômirwe.’ (Iz. 4:6; 58:11) Kugerera emigisho ya Yehova, abalamire mw’eyo paradizo bali baciyumva bali omu bulanzi banagwerhe omwishingo muli ezi nsiku nzinda ndarhi.—Iz. 54:14; 2 Tm. 3:1.
3. Gurhi obulebi buli omu Izaya cigabi ca 65 bwahikirizibwemwo oburhangiriza?
3 Kugerera omulebi Izaya, Yehova ayerekine gurhi akalamo kakayosire oku bantu balamire mw’eyo paradizo y’ekiroho. Wanabona ebi Ebibliya edesire lugenda ako kalamo omu Izaya cigabi ca 65, byahikiriraga oburhangiriza omu mwaka gwa 537 Embere za Kano Kasanzi Kirhu (E.K.K.K.). Ago mango, Abayahudi bal’iciyunjuzize balikulwa omu Babiloni banagaluka omu cihugo cabo. Yehova agisha abantu bage anabarhabala bacib’iyubaka bwinja evile ya Yeruzalemu yal’isherezibwe banagalula ehekalu hacib’iba hantu h’enterekêro ecîre omu Israheli.—Iz. 51:11; Zak. 8:3.
4. Gurhi obulebi buli omu Izaya cigabi ca 65 buli bwahikirizibwamwo muli zino nsiku zirhu?
4 Obulebi bwa Izaya bwacib’irhondera okuhikirizibwa obwa kabirhi omu mwaka gwa 1919 Kano Kasanzi Kirhu (K.K.K.), amango abakozi ba Yehova ba muli gano mango girhu balikulagwa kurhenga omu buja bwa Babiloni Mukulu. Enyuma z’aho, eparadizo y’ekiroho yarhondera yalumira omw’igulu lyoshi. Abahubiri b’Obwami bal’igwerhe obushiru barhondeza bigamba binji banayana amalehe g’ekiroho. Abalume n’abakazi bal’igwerhe oborhere bw’obuminya n’olugenzi lw’eby’enshonyi ‘bacihundikire omuntu muhyahya, olya Nyamuzinda alemaga oku nshusho yage.’ (Ef. 4:24) Kobinali, migisho minji omu migisho Izaya aganiriraga yahikirizibwa omu njira y’okunali omw’igulu lihyahya lyayisha. Cikone ciru n’ene rhuli rhwayunguka omu njira nyinji enyanya z’okuba omu paradizo y’ekiroho. Lekagi rhuganirire obunguke eparadizo y’ekiroho eri yarhulerhera na bulya gurhi rhurhahiraga rhukayirhengamwo.
OKU ABALI OMU PARADIZO Y’EKIROHO BACIYUMVA
5. Nk’oku olwandiko lwa Izaya 65:13 lulaganyize, bici rhuli rhwashagalukira omu paradizo y’ekiroho?
5 Banaciyumve balisibwe bwinja banagwerhe emisi. Obulebi bwa Izaya buyerekine olubero lunene luli egarhi k’abantu bali omu paradizo y’ekiroho n’akalamo k’abantu barhalimwo. (Osome Izaya 65:13.) Yehova anahikirize bwenene amalagirire g’ekiroho g’abakozi bage. Rhugwerhe iroho lyage litagatifu, Akanwa kage kayandike, n’ebiryo binji bwenene by’ekiroho lyo ‘rhulya, rhunywe, rhunahame n’omwishingo.’ (Oshushanye n’Amafulûlo 22:17.) Lubero bwenene n’oko, abarhali omu paradizo y’ekiroho baba bagwerhwe “n’ishali . . . , n’enyorha . . . , n’enshonyi.” Amalagirire gabo g’ekiroho garhali gahikirizibwa.—Am. 8:11.
6. Gurhi olwandiko lwa Yoweli 2:21-24 luganirire omuhako gwirhu gw’ebiryo by’ekiroho, na gurhi rhwakayunguka nabyo?
6 Omu bulebi bwage, Yoweli akolesize bintu bilebe by’obulagirire omu kalamo, nk’emogomogo, idivayi, n’amavurha g’omuzeituni ly’ayerekana oku Yehova anahe abantu bage ebi balagirireko byoshi, kuhiramwo n’ebiryo by’ekiroho. (Yow. 2:21-24) Anajire ntyo kugerera Ebibliya, ebicapo birhu biyimangire oku Bibliya, esite yirhu y’e Enternete, entimanano zirhu z’ecigamba, n’entimanano zirhu nkulu. Rhwanayunguka n’ogo muhako gw’ebiryo ngasi lusiku, n’oko kunarhume rhwaciyumva rhulisibwe bwinja rhunagwerhe emisi bwenene.
7. Bici birhuma rhwaba n’“omwishingo” omu murhima? (Izaya 65:14)
7 Banaciyumve bagwerhe omwishingo banarhimusirwe. Abantu ba Yehova ‘banabanda orhubuli’ bulya baba bavuzire Yehova omunkwa bwenene. (Osome Izaya 65:14, Mashi Bible.) Okuli kw’Ebibliya kuzibuhya obuyemere, ebiragane by’okurhuliriza biba omu Kanwa ka Mungu n’obulangalire bwirhu buzibu buyimangire oku nterekêro y’engombôlo ya Yezu binarhume rhwaba n’“omwishingo” omu murhima. Okuganirira ebyo bintu haguma na bene wirhu na bali birhu b’ekiroho kunarhume rhwashagaluka bwenene!—Enna. 34:8; 133:1-3.
8. Bici biba bimanyiso bibirhi bikulu by’eparadizo y’ekiroho?
8 Obuzigire n’ecinyabuguma egarhi k’abakozi ba Yehova biba bimanyiso bibirhi bikulu by’eparadizo yirhu y’ekiroho. Er’‘ifundo ly’ecinyabuguma’ linarhuyerese gurhi akalamo kayish’iyorha omw’igulu lihyahya, amango abakozi ba Yehova bayish’iba na buzigire bunji bwenene n’ecinyabuguma cinene kulusha oku biyosire ene. (Kl. 3:14) Mwali wirhu muguma aganirire ebi acibwinire lugenda Abahamirizi ba Yehova erhi arhimanana nabo oburhangiriza. Adesire ntya: “Ntal’imanyire oku nakabamwo n’omwishingo, ciru n’omu mulala gwani. Oburhangiriza naciboneraga obuzigire bw’okunali, gali mango narhimananaga n’Abahamirizi ba Yehova.” Ngasi yeshi olonzize okuba n’omwishingo kobinali n’okurhimukwa ashinganine aje omu paradizo yirhu y’ekiroho. Ciru igulu lyakaba na ntanya zihi lugenda abakozi ba Yehova, baba bagwerhe izino ly’olukengwa, erhi irenge linja, haguma na Yehova n’abantu boshi bamuharamya.—Iz. 65:15.
9. Bici olwandiko lwa Izaya 65:16, 17 lulaganyize lugenda ebintu birhulerhera amababale omu kalamo?
9 Banaciyumve bwinja banarhulirire. Olwandiko lwa Izaya 65:14, Mashi Bible, ludesire oku abacishozire okurhaja omu paradizo y’ekiroho ‘ndûlu bakâbanda, bakâlumba banakola batwisire omurhima omu nda.’ Cikone, gurhigi lugenda ebintu byoshi bilerhera abakozi ba Nnâmahanga amalumwa n’amababale? Buzinda, ebyo bintu byoshi byayish’ihikira aha ‘byayibagirwa, bifulikwe kuli n’amasu [ga Mungu].’ (Osome Izaya 65:16, 17.) Yehova ayish’iyusa amazibu girhu goshi, n’enyuma za kasanzi kalebe, amalumwa rhuyumva enyanya z’okukengera ago malibuko gayish’ihwa loshi-loshi.
10. Bulya gurhi orhanyize oku guba mugisho okuba haguma na bene winyu na bali binyu Bakristu? (Olole n’enfoto.)
10 Ciru n’ene, rhunaciyumve rhurhulirire amango rhuli oku ntimanano zirhu z’Ecikristu, hantu rhuciyumva bwinja n’okuyibagira amahangayiko g’obukengere galerhwa n’er’igulu libi. Rhunashangire okulerha oburhulirize omu paradizo yirhu y’ekiroho erhi rhuyerekana obuzigire, omwishingo, omurhûla, olukogo, n’obutûdu: morhere g’ilehe ly’iroho litagatifu. (Gl. 5:22, 23) Guli mugisho bwenene kuli rhwe okuba omw’ikubuliro lya Nnâmahanga! Ababêra omu paradizo y’ekiroho bayish’ibona okuhikirizibwa loshi-loshi kw’eciragane ca Nnâmahanga c’“amalunga mahyahya [erhi mpingu mpyahya] n’igulu lihyahya.”
Guba mugisho okuba cigabi c’omulala gwa Yehova omu paradizo y’ekiroho (Olole ecifungo ca 10) c
11. Kushimbana na Izaya 65:18, 19, gurhi rhushinganine rhuciyumve lugenda eparadizo y’ekiroho Yehova alemire?
11 Banaciyumve bavuzire omunkwa banashagalusire. Izaya agendekire ayerekana bulya gurhi rhugwerhe ngasi cirhumire c’‘okushagaluka n’okuhama n’omwishingo’ omu paradizo yirhu y’ekiroho. Yehova ye walemaga eyo paradizo y’olwiganyo. (Osome Izaya 65:18, 19.) Buzira karhinda, ali arhukolesa lyo rhurhenza abantu omu makubuliro g’er’igulu galimwo omwizimya gw’ekiroho n’okubahêka omu paradizo yirhu y’ekiroho nyinja bwenene! Rhushagalukire emigisho rhugwerhe bulya rhuli omu okuli, rhunanashumibwe okuyiganirira abandi.—Yer. 31:12.
12. Gurhi ebiragane biganirirwe omu Izaya 65:20-24 birhumire waciyumva, na bulya gurhi?
12 Nka bacikala b’eparadizo y’ekiroho, kandi rhuvuzire omunkwa oku bulangalire rhugwerhe rhunabushagalukire. Orhanye hitya oku bintu byoshi rhwayish’ibona n’okujira omw’igulu lihyahya lya Nnâmahanga! Ebibliya elaganyize ntya: “Murhakacibonekana hibonjo hyalama nsiku nsungunu, nisi erhi mushosi orhayunjuze ensiku zage zoshi.” Kandi ecibir’iderha ntya: “Bakaz’iyûbaka enyumpa banazibêremwo, bakaz’irhwera olukoma lw’emizabibu banalye amalehe gayo. . . . Barhakacirhamira busha” bulya baba ‘bagishwa ba Nyakasane [Yehova, NWT].’ Arhulaganyize akalamo k’omurhûla, k’okurhimusa, kagwerhe omuhigo gw’okunali. Ciru ‘embere bamuhamagale,’ ayish’ikaba amanyire amalagirire ga ngasi muntu n’‘okuyigusa n’obugale bwage ngasi coshi cibâmwo omuka.’—Iz. 65:20-24; Enna. 145:16.
13. Gurhi olwandiko lwa Izaya 65:25 luganiriremwo empindulo abantu bajira omu kalamo kabo erhi barhondera bakolera Yehova?
13 Bayish’iba bantu ba murhûla na ntaco cabayobohya. Kugerera iroho lya Mungu, bantu banji bal’igwerhe amorhere mabi bwenene bajijire empindulo z’okusomeza omu kalamo kabo. (Osome Izaya 65:25.) Bacihanganyire bwenene okuleka engeso zabo mbi. (Rm. 12:2; Ef. 4:22-24) Kobinali, rhuli bakozi ba Nnâmahanga rhurhaciba bimana, co cirhumire, rhwagendekera rhwajira amagosa. Ciru akaba ntyo, Yehova agushire haguma “abantu boshi [ba ngasi lubero, NWT]” omw’ifundo lizibu bwenene ly’obuzigire n’omurhûla. (Tt. 2:11) Mungu ogala-byoshi yene ogwerhe obuhashe bw’okuhikiriza ecisomerine ca ntyo!
14. Gurhi olwandiko lwa Izaya 65:25 lwabonekine oku ludesire okuli omu kanga ka mwene wirhu muguma?
14 Ka kobinali abantu banashanja oborhere bwabo? Rhuganirire olu lwiganyo. Musole muguma gwakag’ikwebwa omu prizo ene n’irhondo erhi anac’igwerhe myaka 20 enyanya z’olugenzi lwage lubi bwenene n’obuminya. Akwebirwe omu prizo enyanya z’okuzimba emituga, okubasa enyumpa za bene, n’ebindi bijiro bibi bwenene. Ali mubidu okulwisa ngasi muntu. Erhi ayumva oburhangiriza okuli kurhenga omu Bibliya anarhondera okuja oku ntimanano z’Abahamirizi ba Yehova, ayemezibwa n’obwalagale oku anapatire omuhigo gw’akalamo, ko kuderha kuja omu paradizo y’ekiroho. Enyuma z’okubatizibwa n’okuba Muhamirizi wa Yehova, akarhanya kanji-kanji lugenda gurhi olwandiko lwa Izaya 65:25 lumuyerekire. Ali muntu muminya nka ntale, cikone ajira empindulo aba muntu wa murhûla nka mwana-buzi.
15. Bulya gurhi rhulonzize rhulalike abandi bacilunge haguma na nirhu omu paradizo y’ekiroho, na gurhi rhwakajiramwo ntyo?
15 Olwandiko lwa Izaya 65:13 lurhondire n’ezi nderho: “Aderha ntyâla Nyakasane Nyamubâho.” Omulongo gwa 25 guhwire n’enderho “kwo Nyakasane [Yehova, NWT] adesire.” Ebi adesire binahikirire ensiku zoshi. (Iz. 55:10, 11) Ene, eparadizo y’ekiroho ekola eri ho. Yehova ajijire omulala gwago-gwago gw’abakozi bage. Bulya rhuli cigabi c’omulala gwage, rhugwerhe omurhûla munji nk’oku byakanahashikana ene, rhunanaciyumve rhuli omu bulanzi mw’er’igulu ly’obuminya. (Enna. 72:7) Co cirhumire, rhulonzize rhurhabale bantu banji bwenene nk’oku binahashikine bacilunge haguma na nirhu mw’ogo mulala gwirhu gw’Ecikristu. Rhwanajira ntyo omu kusegeza obwenge bwirhu oku mukolo gw’okujira abanafunzi.—Mt. 28:19, 20.
OKU RHWAKASHUMYAMWO ABANDI LYO BAJA OMU PARADIZO Y’EKIROHO
16. Bici bikulula abantu lyo baja omu paradizo y’ekiroho?
16 Ngasi muguma wirhu anajira kantu kalebe ly’ashumya abandi balonze okuja omu paradizo yirhu y’ekiroho. Rhwanajira ako kantu erhi rhwakayiga olwiganyo lwa Yehova. Arhakululira abantu omw’ikubuliro lyage barhanalonzizi. Lubero n’oko, ‘anakulule’ abantu emunda ali omu njira y’olukogo. (Yn. 6:44; Yer. 31:3) Abantu b’emirhima minja bayiga lugenda obuzigire bwa Yehova n’amorhere gage minja bwenene, banakululwe emunda ali buzira kusezibwa. Gurhigi rhwakashumyamwo abantu bayishe omu paradizo y’ekiroho kugerera amorhere girhu minja n’olugenzi lwirhu lwinja?
17. Gurhi rhwakashumyamwo abantu lyo baja omu paradizo y’ekiroho?
17 Njira nguma rhwakashumyamwo abandi balonze okuja omu paradizo yirhu y’ekiroho, kuli kujirira bene wirhu na bali birhu omu njira y’obuzigire na ya lukogo. Erhi abahyahya bakayisha oku ntimanano zirhu z’ecigamba, rhuba rhulonzize baciyumve ak’abantu barhali Bakristu nkaba bayishaga oku ntimanano omu Korinti ya mîra. Byanahashikana badesire ntya: “Okuli, Nnâmahanga ali ekarhî kinyu.” (1 Kr. 14:24, 25; Zak. 8:23) Co cirhumire, rhugwasirwe rhugendekere rhwarhumikira ihano lirhuhûnyire oku ‘rhube n’omurhula ekarhi kirhu.’—1 Ts. 5:13.
18. Bici byakasimisa abantu lyo baja omw’ikubuliro lirhu?
18 Ensiku zoshi, rhushinganine rhucihangane okubona bene wirhu na bali birhu nk’oku Yehova ababona. Rhunajire ntyo omu kusegeza obwenge oku morhere gabo minja ahali h’okubusegeza oku buzamba bwabo, bwayish’ihwa buzinda. Rhwanayusa ngasi mazibu g’okurhayumvikana egarhi kirhu omw’iroho ly’obuzigire omu kuba ensiku zoshi ‘binja na ba lukogo baguma oku bandi, omu kubabalirana rhwêne na nnene.’ (Ef. 4:32) Omu kujira ntyo, eparadizo y’ekiroho yanasimisa abantu balonzize okujirirwa omu njira ya ntyo. b
OBÊRE OMU PARADIZO Y’EKIROHO
19. (a) Nk’oku biyerekinwe omu cisanduku cidesire “ Barhenzire omu Paradizo y’Ekiroho Banagalukamwo,” bici bantu baguma na baguma badesire enyuma z’okugaluka omu paradizo y’ekiroho? (b) Bici rhushinganine rhuhige okujira? (Olole n’enfoto.)
19 Rhuba rhuvuzire omunkwa bwenene enyanya z’eparadizo yirhu y’ekiroho! Eri nyinja bwenene kulusha agandi mango goshi, enalimwo bantu banji bwenene kulusha agandi mango goshi bali bakuza Yehova. Lekagi ensiku zoshi rhube ba kuvuga omunkwa kw’eyo paradizo y’ekiroho Yehova arhulemire. Ngasi yeshi olonzize aciyumve agwerhe emisi, arhimusirwe, arhulirire, anali omu bulanzi agwasirwe ayishe omu paradizo yirhu y’ekiroho arhanahiraga arhengamwo! Cikone, obe masu bulya Shetani ali ajira okwage koshi ly’arhurhenzamwo. (1 Pt. 5:8; Maf. 12:9) Rhurhagwasirwi rhumuleke ahikirize ogo muhigo gwage. Lekagi rhujire okwirhu koshi ly’eparadizo yirhu y’ekiroho egendekera yaba nyinja, ecîre, na ya murhûla.
Ababêra omu paradizo y’ekiroho kandi bayish’ishagalukira eparadizo y’okunali omu mango gayisha (Olole ecifungo ca 19)
GURHI WAKASHUZAGYA?
-
Eparadizo y’ekiroho byo bici?
-
Migisho ehi rhushagalukira mw’eyo paradizo y’ekiroho?
-
Gurhi rhwakajira lyo rhushumya abandi bajemwo?
LWIMBO 144 Kaza Macho ku Zawadi!
a AMAHUGÛLO GA LUDERHO LUGUMA: Oluderho “paradizo y’ekiroho” luhugwîre ehali rhuharamyamwo Yehova. Mw’eyo paradizo, rhunashagalukire obwîra bwinja n’omurhûla haguma na Yehova na haguma n’abirhu bemezi.
b Oku jw.org, olole evideo edesire Wako Wapi Sasa? Alena Žitníková: Vile Ndoto Yangu Ilitimia, onabone emigisho mwali wirhu muguma abire nayo omu paradizo y’ekiroho.
c AMAHUGÛLO G’ENFOTO: Amango bantu banji bali bashagalukira okuba haguma n’abandi oku ntimanano, mwene wirhu muguma aciyegwire.
