ECIGABI C’OKUYIGA CA 14
LWIMBO 56 Acha Kweli Ikuongoze
“Rhucîseze Rhuhike oku [Nyigirizo] z’Abâkuzire”
“Rhucîseze rhuhike oku [nyigirizo] z’abâkuzire.”—HB. 6:1, Mashi Bible.
EBI ECI CIGABI CISEGIZE
Oku Omukristu okuzire kiroho arhanya n’oku ajira ebintu omu njira epatine n’obulonza bwa Nnâmahanga n’okurhôla emihigo y’obwenge.
1. Bici Yehova arhuhûnyire rhujire?
OMULUME n’omukazi banashagaluke bwenene erhi baburha omwana. Cikone, ciru akaba ababusi banashagalukire akabonjo kabo, barhaba balonzize kagendekere kabêra kabonjo ensiku zoshi. Kobinali, banayoboha bwenene erhi kakabula bwakula. Ko n’oko, ciru akaba Yehova anashagaluke bwenene erhi rhurhondera rhwayiga okubimuyerekire, arhaba alonzize rhugendekere rhwabêra bana kiroho. (1 Kr. 3:1) Lubero n’oko, arhuhûnyire rhube Bakristu ‘bakuzire.’—1 Kr. 14:20, Mashi Bible.
2. Bici rhwaganirira mw’eci cigabi?
2 Okuba Mukristu okuzire kiroho ko kuderha gurhi? Gurhi rhubamwo Bakristu bakuzire kiroho? Gurhi ebiryo bizibu by’ekiroho birhurhabalamwo lyo rhuba Bakristu bakuzire kiroho? Na bulya gurhi rhurhashinganini rhukarhanya oku rhukola rhuli Bakristu bakuzire kiroho n’oku rhurhacishinganini rhushibirire obwîra bwirhu haguma na Yehova? Mw’eci cigabi, rhwaganirira amashuzo g’ago madoso.
OKUBA MUKRISTU OKUZIRE KIROHO KO KUDERHA GURHI?
3. Okuba Mukristu okuzire kiroho ko kuderha gurhi?
3 Omu Bibliya, oluderho lw’Ecigiriki lwahindwirwe “okuzire” lwanacib’ihugûla “mwimana” na “oyenire.” a (1 Kr. 2:6) Nka kula omwana agendekera akula, kuhika abe muntu mukulu, ko na nirhu rhushinganine rhugendekere rhwakuza obwîra bwirhu haguma na Yehova. Omu kujira ntyo, rhwanaba Bakristu bakuzire kiroho. Kobinali, ciru n’enyuma z’okuba Bakristu bakuzire kiroho, rhushinganine rhugendekere rhwajira amajambere. (1 Tm. 4:15) Rhweshi, kuhiramwo n’abaciri misole, rhwanaba Bakristu bakuzire kiroho. Cikone gurhi rhwakamanyamwo oku rhuli Bakristu bakuzire kiroho?
4. Bici biyerekana Omukristu okuzire kiroho?
4 Omukristu okuzire kiroho ali Mukristu ojira ngasi kantu Yehova amuhûnyire ajire. Arhajira kone ebi analonzize. Kobinali, bulya arhaba mwimana, anajira amagosa. Cikone, anayerekane kugerera akalamo kage ka ngasi lusiku oku anarhanye n’okujira ebintu bipatine n’obulonza bwa Nnâmahanga. Ayambirhe obumuntu buhyahya ananagendekere ajira okwage koshi ly’arhanya nk’oku Yehova arhanya. (Ef. 4:22-24) Acikomerezize okukarhôla emihigo minja eyimangire oku marhegeko n’amakanuni ga Yehova, ntyo arhaba alagirire oku liste ndîri y’amarhegeko g’okumubwira ebi ashinganine ajire. Erhi arhôla omuhigo, anacihangane bwenene ly’aguhikiriza.—1 Kr. 9:26, 27.
5. Mazibu gahi Omukristu orhakuziri kiroho ajira? (Abefezi 4:14, 15)
5 Lubero n’oko, kuba kulembu oku Mukristu orhakuziri kiroho okurhebwa n’‘obunywesi’ n’“obulyalya . . . bw’okurhebana” ananavunika omurhima enyanya z’abagoma. b (Osome Abefezi 4:14, 15.) Anarhondera ayumviza abandi obumvu, anakavurugana nabo, erhi kukagayira obusha. Kwananaba kulembu kuli ye okujira ebintu bibi erhi akaja omu marhangulo.—1 Kr. 3:3.
6. Bulya gurhi rhwanashushanya oku rhuja rhwakula kiroho n’oku omwana murho aja akula? (Olole n’enfoto.)
6 Nk’oku rhwabonaga embere, Amandiko gashushanyize okukula kiroho n’oku omwana akula kuhika abe muntu mukulu. Hali bintu binji bwenene omwana arhaba amanyire, co cirhumire aba alagirire oku muntu mukulu w’okumulanga n’okumulongoza. Kwa lwiganyo, omuzire anagwarhira omwali ociri murho oku kuboko amango bakola bayikira ibarabara. Erhi oyo munyere akula, nnina anamuyemerera arhondere ayikira ibarabara yenene, cikone anamukengeza akalabiriza eburhambi amango akola ayikira. Erhi omwana akula, anamanya gurhi akayakamwo obuhanya yene. Nka kula omwana aba alagirire oku burhabale bw’abantu bakulu ly’ayaka obuhanya, kanji-kanji Abakristu barhakuziri kiroho baba balagirire oku burhabale bw’Abakristu bakuzire kiroho lyo bayaka obuhanya bw’ekiroho n’okurhôla emihigo y’obwenge. Lubero n’oko, erhi Abakristu bakuzire kiroho barhôla emihigo, banarhanye oku makanuni g’Ebibliya lyo bamanya entanya za Yehova lugenda kanga kalebe n’okujira ebintu bipatine n’ezo ntanya.
Abakristu barhakuziri kiroho bashinganine baciyigirize okurhôla emihigo minja omu kukolesa amakanuni g’Ebibliya (Olole ecifungo ca 6)
7. K’Abakristu bakuzire kiroho baba balagirire oku burhabale bw’abandi?
7 K’oko kuli kuderha oku Omukristu okuzire kiroho arhaba alagirire oku burhabale bw’omuntu yeshi-yeshi? Nanga. Hali amango Omukristu okuzire kiroho naye aba alagirire oku kuhûna oburhabale. Cikone omuntu orhakuziri kiroho analonza abandi bamubwire ebi ajira erhi barhôle emihigo yene anal’ishinganine arhôle. Lubero n’oko, erhi Omukristu okuzire kiroho ahûna abandi bagwerhe obwenge banahugûsirwe binji oburhabale, aba amanyire oku yene oshinganine arhôle emihigo n’oku ashinganine “okubarhula omuzigo gwage yene.”—Gl. 6:5, Mashi Bible.
8. Omu njira zihi Abakristu bakuzire kiroho babamwo lubero muguma n’owundi?
8 Nka kula abantu bakulu barhaba bashushine, Abakristu bakuzire kiroho nabo bajira amorhere g’ekiroho gali lubero, nk’obwenge, oburhwali, okuba bahanyi, n’okuba ba bwonjo. Kandi, Bakristu babirhi bakuzire kiroho bali omu kanga kaguma, banarhôla emihigo eri lubero cikone eyimangire oku Mandiko. Oko kunakalug’ihikira amango Abakristu barhôla emihigo eyimangire oku zamiri zabo. Okuhugûkwa ntyo n’obwalagale, kunabarhabale bayake okutwira abandi olubanja erhi bakarhôla emihigo eri lubero n’eyabo. Lubero n’oko, banasegeze obwenge bwabo oku kubêra omu cinyabuguma.—Rm. 14:10; 1 Kr. 1:10.
GURHI RHUBAMWO BAKRISTU BAKUZIRE KIROHO?
9. Ka rhwanakula kiroho buzira kujira bushiru boshi-boshi? Ohugûle.
9 Byanahashikana enyuma za kasanzi kalebe omwana ahikire aha aba muntu mukulu, cikone birhakahashikana okukula kiroho buzira kujira bushiru boshi-boshi. Kwa lwiganyo, bene wirhu na bali birhu b’e Korinti bayemera omwanzi mwinja, babatizibwa, bahâbwa iroho litagatifu, banayunguka bwenene omu kuyigirizibwa n’entumwa Paolo. (Ebj. 18:8-11) Cikone, myaka milebe enyuma z’okubatizibwa kwabo, banji muli bo barhal’icikula kiroho. (1 Kr. 3:2) Gurhi rhwakayakamwo okurhakula kiroho?
10. Bici rhugwasirwe rhujire lyo rhuhikira okukula kiroho? (Yuda 20)
10 Lyo rhuba Bakristu bakuzire kiroho, rhushinganine rhurhang’iba n’irala ly’okulonza okuba Bakristu bakuzire kiroho. Balya ‘baderha eby’obunganyi’ banalonza okugendekera babêra bana omu hali y’ekiroho, nta mango bakahash’ijira amajambere. (Mig. 1:22, Mashi Bible) Rhurhalonzizi ciru n’ehitya okuba ak’abantu bakola bakuzire cikone babusi babo bacibarhôlera emihigo. Lubero n’oko, rhulonzize rhurhôle rhwene kwa buzibu-zibu omukolo gw’okugendekera rhwakula kiroho. (Osome Yuda 20.) Erhi akaba ociri wacihangana ly’oba Mukristu okuzire kiroho, oshenge Yehova okuhe “irala n’emisi y’okujira” ebi alonzize.—Fl. 2:13, NWT.
11. Burhabale buhi Yehova arhuha lyo rhuhikira okukula kiroho? (Abefezi 4:11-13)
11 Yehova amanyire oku rhurhakakula kiroho kugerera obuhashe bwirhu rhwene. Balya bakola nka balungere na balimu omu cigamba c’Ecikristu baba barheganyizibwe okurhurhabala lyo ‘rhukula’ omu njira y’ekiroho n’okuhika, ‘oku lugero lukwanine ishwinjiro . . . lya Kristu.’ (Osome Abefezi 4:11-13.) Kandi Yehova anarhuhe iroho litagatifu lyo lirhurhabala rhumanye ebi ‘Nyakasane agerereza.’ (1 Kr. 2:14-16) Na kandi, Nnâmahanga alongozize abantu bayandike e Injili ini ziyerekana gurhi Yezu akag’irhanya, oku akag’iderha, n’ebi akag’ijira amango ali omu mukolo gwage gwa hanw’igulu. Omu kuyiga enjira ya Yezu y’okurhanya n’okujira ebintu, wanahikiriza omuhigo gwawe gw’okuba Mukristu okuzire kiroho.
GURHI EBIRYO BIZIBU BY’EKIROHO BIRHURHABALAMWO LYO RHUBA BAKRISTU BAKUZIRE KIROHO?
12. “Enyigirizo [kuli Kristu] ziyigirizibwa abacirhondera” zo zihi?
12 Lyo rhuba Bakristu bakuzire kiroho, kandi rhugwasirwe rhumanye binji ahanyuma n’“enyigirizo [kuli Kristu] ziyigirizibwa abacirhondera,” ko kuderha enyigirizo z’omusingi z’Ecikristu. Nyiganyo ndebe lugenda ezo nyigirizo z’omusingi zihiziremwo okuciyunjuza, obuyemere, obubatizo, n’obufûke. (Hb. 6:1, 2, Mashi Bible) Ezo nyigirizo go guba musingi gw’obuyemere bw’Ecikristu. Eco co carhumaga entumwa Petro yaziganirira amango yayigirizagya abantu oku Pentekoste. (Ebj. 2:32-35, 38) Rhugwasirwe rhuyemere ezo nyigirizo z’omusingi lyo rhuba banafunzi ba Kristu. Kwa lwiganyo, Paolo arhonzire oku omuntu yeshi-yeshi walahira enyigirizo lugenda obufûke anaba alahire obuyemere boshi bw’Ecikristu. (1 Kr. 15:12-14) Ciru akaba ntyo, rhulonzize rhumanye binji kulusha enyigirizo z’omusingi lyo rhuba Bakristu bakuzire kiroho.
13. Bici rhugwasirwe rhujire lyo rhuyunguka n’ebiryo bizibu by’ekiroho biganirirwe omu Abahabraniya 5:14? (Olole n’enfoto.)
13 Lubero n’enyigirizo z’omusingi, ebiryo bizibu by’ekiroho birhahizirimwo amarhegeko ga Yehova gone, cikone kandi bihiziremwo amakanuni gage garhurhabala rhuhugûkwe entanya zage. Lyo rhuyunguka n’ebiryo bya ntyo, rhugwasirwe rhuyige Akanwa ka Nnâmahanga, okukarhanyako bwenene, n’okukolesa ebi rhwayizire omu kalamo kirhu. Erhi rhujira ntyo, rhunacikomereze okurhôla emihigo eshagalusize Yehova. c—Osome Abahabraniya 5:14.
Ebiryo bizibu by’ekiroho binarhuyigirize oku rhwakarhôlamwo emihigo eshagalusize Yehova (Olole ecifungo ca 13) d
14. Gurhi Paolo arhabiremwo Abakristu b’e Korinti lyo bakula kiroho?
14 Abakristu barhakuziri kiroho banayabirwe okurhôla emihigo minja omu kanga kahûnyire okurhanya oku makanuni g’Ebibliya n’okugakolesa. Amango nt’irhegeko ly’Ebibliya lihali, baguma na baguma banarhanya oku banajira ebi banalonzize byoshi. Abandi banahûna babayerese irhegeko aha lirhali lya bulagirire. Kwa lwiganyo, bibonekine oku Abakristu b’e Korinti bahûnyire Paolo irhegeko liyerekine erhi bakalire ebiryo birherekirwe ensanamu. Ahali h’okubabwira ebi bakajijire, Paolo abayeresa omukolo gw’ezamiri n’oku ngasi muguma agwerhe “oluhuma lw’okucishoga.” Aganirira makanuni maguma na maguma g’Ebibliya gakabarhabire bahikire okurhôla emihigo yakabarhabire babêre n’ezamiri ecîre n’okurhasarhaza abandi. (1 Kr. 8:4, 7-9, NWT) Muli ntyo, Paolo akag’irhabala Abakristu b’e Korinti bahikire aha bakula kiroho lyo bakolesa obuhashe bwabo bw’okurhimanya, ahali h’okuyegemera muntu mulebe erhi kuhûna amarhegeko omu ngasi kanga.
15. Gurhi Paolo arhabiremwo Abakristu Bahabraniya bajire amajambere g’ekiroho?
15 Ebi Paolo ayandikiraga Abakristu Bahabraniya birhuyigirizize isomo ly’obulagirire. Baguma na baguma bali bamaleka okugendekera bakula kiroho; kobinali ‘bakag’ilonza amônka ahâli h’ebiryo bizibu [by’ekiroho].’ (Hb. 5:12) Bayabirwa okugendekera bashimba okuli, kwakag’ifûlulwa bunyi-bunyi kugerera ecigamba. (Mig. 4:18) Kwa lwiganyo, Bakristu banji Bayahudi bal’igendekire barhumikira Irhegeko lya Musa ciru akaba hali hamagera myaka 30 lirhenzibweho kugerera enterekêro ya Yezu. (Rm. 10:4; Tt. 1:10) Eyo myaka 30 kali kasanzi kanji bwenene ly’abo Bakristu bahugûkwa oku barhal’icihûnyirwe bagendekere barhumikira er’irhegeko! Muli ntyo, Paolo al’ilonzize abarhabale bayemere enyigirizo nzibu abayigirizagya. Ago maruba gabarhabire babone oku enjira mpyahya y’okuharamya Yehova kugerera Yezu yo yali nyinja bwenene na kandi gabahîre oburhwali bw’okugendekera bahubiri ciru akaba bakag’ihagalikwa n’Abayahudi.—Hb. 10:19-23.
BULYA GURHI RHUSHINGANINE RHUGENDEKERE RHWACIHANGANA OKUBA BAKRISTU BAKUZIRE EKIROHO?
16. Ahanyuma n’okuba Bakristu bakuzire kiroho, bici rhugwasirwe rhujire?
16 Rhugwasirwe rhucihangane bwenene lyo rhukula kiroho n’okugendekera rhwabêra Bakristu bakuzire kiroho. Co cirhumire rhushinganine rhube masu lyo rhurharhanyagya oku rhwakuzire kiroho n’oku nta kantu rhucishinganine rhujire. (1 Kr. 10:12) Rhushinganine ‘rhukacirhangula rhwenene’ lyo rhumanya erhi rhugendekire rhwajira amajambere.—2 Kr. 13:5.
17. Gurhi amaruba Paolo ayandikiraga Abakristu Bakolosi gayerekinemwo obulagirire bw’okubêra Bakristu bakuzire kiroho?
17 Omu maruba ayandikiraga Abakolosi, Paolo acib’isegeza obulagirire bw’okugendekera babêra bakuzire kiroho. Ciru akaba bal’ikola Bakristu bakuzire kiroho, Paolo abarhonda oku babe masu lyo barhayahukiragwa n’entanya z’er’igulu. (Kl. 2:6-10) Na Epafra wal’imanyire bwinja Abakristu b’eco cigamba, agendekire abasengerera lyo ‘bazibuha,’ erhi kukula kiroho. (Kl. 4:12) Bici oko kurhuyigirizize? Paolo na Epafra bombi bal’ihugûsirwe oku ly’omuntu agendekera aba akuzire kiroho, agwasirwe acihangane yene n’okuhûna Yehova oburhabale. Bal’ilonzize Abakolosi bagendekere baba Bakristu bakuzire kiroho, ciru akaba bakag’ilwisa amazibu.
18. Bici byakahikira Omukristu okuzire kiroho? (Olole n’enfoto.)
18 Paolo arhonzire Abahabraniya oku Omukristu okuzire kiroho erhi akaba arhabiri masu analahirwa na Nnâmahanga loshi-loshi. Omurhima gw’Omukristu gwanahikira aha gwabiha n’oko kurhume arhacihasha okuciyunjuza n’okubabalirwa na Nnâmahanga. Eby’okushagalusa, Abakristu Bahabraniya barhali omu kanga ka ntyo. (Hb. 6:4-9) Ene, gurhigi lugenda Abakristu bahikira aha baleka emikolo y’ecigamba erhi kutengwa na buzinda baciyunjuze? Okuciyunjuza kwabo n’obwirhohye kunayerekane oku bali lubero n’aba Paolo aganiriraga omu maruba gage. Kobinali, erhi bagalukira Yehova, banabe balagirire oku burhabale ahâna. (Eze. 34:15, 16) Abagula banajira emipango ly’Omukristu mulebe okuzire kiroho arhabala abo bantu bacib’iba n’emisi omu hali y’ekiroho.
Yehova anahe oburhabale balya balagirire okucib’iba n’emisi y’ekiroho (Olole ecifungo ca 18)
19. Muhigo guhi rhushinganine rhube nago?
19 Erhi akaba oli wacihangana okuba Mukristu okuzire kiroho, wanahikira ogo muhigo gwawe! Ohige okugendekera wacilisa ebiryo bizibu by’ekiroho n’okupatanisa entanya zawe n’eza Yehova. N’erhi akaba okola oli Mukristu okuzire kiroho, ogendekere wajira okwawe koshi ly’ogendekera wabêra ntyo.
GURHI WAKASHUZAGYA?
-
Okuba Mukristu okuzire kiroho ko kuderha gurhi?
-
Gurhi rhwakabamwo Bakristu bakuzire kiroho?
-
Bulya gurhi rhushinganine rhugendekere rhwacihangana okuba Bakristu bakuzire kiroho?
LWIMBO 65 Fanya Maendeleo!
a Ciru akaba Amandiko g’Ecihabraniya garhakolesizi enderho “okuzire” n’“orhakuziri,” galimwo entanya za ntyo. Kwa lwiganyo, ecitabu c’Emigani ciyerekine olubero egarhi k’omuntu ociri musole arhanagwerhi bumanye n’omuntu ogwerhe obwenge n’oburhimanya.—Mig. 1:4, 5.
b Olole omwanzi gudesire “Jilinde Dhidi ya Habari za Uwongo” omu cigabi “Habari Zaidi” ciri oku jw.org n’omu JW Library.®
c Olole ecigabi cidesire “Ebi Wakayiga” ciri mw’eyi gazeti.
d AMAHUGÛLO G’ENFOTO: Mwene wirhu muguma ali akolesa amakanuni ayizire omu Kanwa ka Mungu amango ali acishoga eby’okucishagalusa.
