1-2. Bici rhwakacidosa lugenda amasala girhu?

 KA HALI amango okola ocidosize erhi Yehova ali ashuza amasala gawe? Akaba neci, arhali wene ocidosa ntyo. Bene wirhu na bali birhu banji nabo badesire oku banacidose ntyo, ci bwenene amango bali balwisa amazibu. Erhi akaba rhuli rhwalibuka, rhwanabona nka kuli kuzibu okuhugûkwa gurhi Yehova ali ashuza amasala girhu.

² Rhuganirirage bulya gurhi rhwanayemera n’obwalagale oku Yehova anashuze amasala g’abakozi bage. (1 Yn. 5:15) Kandi rhwaganirira aga madoso: Bulya gurhi hali amango rhwakabona nka Yehova arhali ashuza amasala girhu? Gurhi Yehova ashuzamwo amasala girhu ene?

3. Bulya gurhi Yehova alonzize rhukamuyegera kugerera isala?

³ Amandiko garhuyemezize n’obwalagale oku Yehova aba arhuzigire bwenene n’oku rhuba ba ngulo ndarhi kuli ye. (Hag. 2:7; 1 Yn. 4:10) Co cirhumire arhuhûnyire rhukamuhûna oburhabale kugerera isala. (1 Pt. 5:6, 7) Aba alonzize okurhurhabala lyo rhugendekera rhwamuyegera n’okulembera amazibu girhu.

4. Gurhi rhumanyiremwo oku Yehova anashuze amasala g’abakozi bage? (Olole n’enfoto.)

⁴ Omu Bibliya, kanji-kanji rhunasome oku Yehova ashuzize amasala g’abakozi bage. Ka hali olwiganyo orhanyizeko? Lwiganyo luguma ali Mwami Daudi. Agwerhe bashombanyi banji babi bwenene omu kalamo kage, na kanji-kanji akag’ilonza oburhabale bwa Yehova kugerera isala. Mango maguma, asengera Yehova ntya: “Waliha yumva omusengero gwani, oyumve amingingo gani bulya we Mudahemuka, onyumvirhize  bulya we Mushinganyanya.” (Enna. 143:1) Yehova ashuzize amasala ga Daudi g’okumuhûna amucize. (1 Sam. 19:10, 18-20; 2 Sam. 5:17-25) Co carhumaga Daudi aderha ntya buzira karhinda: “Nnâmahanga ali hofi ha ngasi yeshi omusengera.” Nirhu rhwanayemera ntyo n’obwalagale.​—Enna. 145:18.

5. Ka ngasi mango Yehova akag’ishuza amasala g’abakozi bage ba mîra omu njira bal’irhanyizeko? Ohâne olwiganyo. (Olole n’enfoto.)

⁵ Hali amango Yehova arhashuza amasala girhu omu njira rhwal’irhanyizeko. Oko kwahikire entumwa Paolo. Ahûna Nnâmahanga amukûle “akababo omu mubiri.” Kasharhu koshi-koshi, Paolo ashenzire Yehova lugenda ago mazibu madarhi. Ka Yehova ashuzize ago masala gage? Neci, cikone arhagashuzagya omu njira Paolo al’ilangalire. Ahali h’okuyusa ago mazibu, Yehova amuha emisi al’ilagirireko ly’agendekera amukolera n’obwishwekerezi.​—2 Kr. 12:7-10.

6. Bulya gurhi hali amango rhwakabona nka Yehova arhali ashuza amasala girhu?

⁶ Nirhu hali amango Yehova akarhushuza omu njira eri lubero n’eyi rhwal’irhanyizeko. Rhwanayemera n’obwalagale oku kobinali Yehova amanyire enjira nyinja bwenene y’okurhurhabala. Ciru ‘anarhujirira ngasi kantu rhwankashenga erhi kugerereza, ciru analushise.’ (Ef. 3:20) Co cirhumire, ishuzo lyage oku masala girhu lyanayisha omu kasanzi erhi omu njira rhurharhanyizi.

7. Bulya gurhi hali amango byakahûna rhushanje ebi rhuli rhwahûna Yehova omu isala? Ohâne olwiganyo.

⁷ Hali amango byakahûna rhushanje ebi rhuli rhwahûna omu isala lirhu erhi rhwakahugûkwa bwinja bwenene obulonza bwa Yehova. Rhuganirire olwiganyo lwa Mwene Wirhu Martin Poetzinger. Kasanzi kasungunu enyuma z’okuja omu buhya, Mwene Wirhu Poetzinger ashwekerwa omu kambi k’amalibuko k’Abanazi. Oku murhondero, akashenga Yehova amurhabale arhenge mw’ako kambi k’amalibuko ly’ajishibirira mukage n’okucib’irhondera omukolo gwage gw’amahubiri. Cikone, enyuma za migobe ibirhi, abona oku nta kantu koshi-koshi kayerekine oku Yehova amurhabala ashwekulwe. Lero arhondera okusalira ntya: “Yehova, wekasinga onyerese ebi olonzize njire.” Buzinda arhondera okurhanya kw’ebi abandi bene wirhu bakag’ilembera mw’ako kambi. Banji mulibo bakag’irhanya bwenene lugenda bakabo n’abana babo. Buzinda, Mwene Wirhu Poetzinger akasalira ntya: “Yehova,  koko kw’ogu mukolo gwani muhyahya. Ontabale lyo nkazibuhya n’okuha bene wirhu omurhima.” Ageza eyindi myaka mwenda yakulikiraga mw’ezo kambi anali ajira ogo mukolo!

8. Kantu kahi k’obulagirire rhushinganine rhukakengera amango rhuli rhwasalira?

⁸ Rhugwasirwe rhukakengera oku Yehova agwerhe omuhigo, n’oku aguhikiriza oku kasanzi ahizireho. Ogo muhigo guhiziremwo okuyusa loshi-loshi amazibu goshi gali garhuma rhwalibuka bwenene ene, kwa lwiganyo, obuhanya bucilerha bone, endwala n’olufû. Yehova ayish’ihikiriza ogo muhigo gwage kugerera Obwami bwage. (Dan. 2:44; Maf. 21:3, 4) Cikone, embere ako kasanzi kahike, Yehova alesire Shetani arhegeke igulu. b (Yn. 12:31; Maf. 12:9) Erhi Yehova akayusa amazibu ga bene bantu ene, byanabonekana nk’oburhegesi bwa Shetani buli bwinja omu njira ndebe. Co cirhumire, ciru akaba rhugwasirwe rhulinde Yehova ahikirize ebiragane byage, oko kurhali kuderha oku arhulesire kone buzira burhabale. Lekagi rhuganirire njira nguma na nguma Yehova arhurhabalamwo.

9. Gurhi Yehova arhurhabalamwo amango bihûnyire rhurhôle emihigo? Ohâne olwiganyo.

⁹ Anarhuhe obwenge. Yehova alaganyize oku arhuha obwenge rhulagirireko lyo rhurhôla emihigo minja. Rhuba rhulagirire bwenene oku bwenge burhenga emwa Nnâmahanga erhi rhurhôla emihigo yahuma oku kalamo kirhu koshi, kwa lwiganyo, nk’okuhiga erhi rhwabêra balamba erhi rhwaja omu buhya. (Yk. 1:5) Rhuganirire olwiganyo lwa mwali wirhu muguma ociri mulamba ohamagalwa Maria. c Ali painiya w’akasanzi koshi wagwerhe omwishingo erhi arhimanana na mwene wirhu muguma. Adesire ntya: “Oku obwîra bwirhu bwagendekire bwasêra ko n’obuzigire bwirhu bwagendekire bwayushuka. Nal’imanyire oku nal’igwasirwe ntôle omuhigo. Nasalira bwenene lugenda ogo muhigo. Nal’ilagirire oku bulongozi bwa Yehova, cikone kandi nal’imanyire oku arhali Yehova ye wakantôlire omuhigo.” Anabone oku Yehova ashuzize ago masala gage g’okumuhûna obwenge. Omu njira nci? Erhi ajira obusagasi omu bicapo birhu, abona myanzi milebe yamurhabalaga abone amashuzo oku madoso akag’icidosa. Kandi ayumvirhiza amahano g’obwenge nnina amuhaga. Ago mahano garhabala Maria ly’alabiriza oku akag’iciyumva. Buzinda, ahasha okurhôla omuhigo mwinja.

10. Kushimbana n’Abafilipi 4:13, gurhi Yehova ajira ly’arhabala abakozi bage? Ohâne olwiganyo. (Olole n’enfoto.)

¹⁰ Anarhuhe emisi y’okulembera. Nk’oku ajiriraga entumwa Paolo, Yehova anarhuhe emisi  rhulagirireko lyo rhulembera amazibu girhu. (Osome Abafilipi 4:13.) Rhuganirire gurhi Yehova arhabalagamwo mwene wirhu muguma ohamagalwa Benjamin ly’alembera akanga kazibu alimwo. Omu myaka minji y’obusole bwage, Benjamin n’omulala gwage balamire omu makambi g’ababunga omu Afrique. Adesire ntya: “Nakayegera Yehova omw’isala ngasi mango n’okumuhûna ampe emisi y’okujira ebimusimisize. Yehova ashuzize amasala gani omu kumpa omurhûla gw’ekandalala, oburhwali bw’okugendekera nahubiri, n’ebicapo by’okuntabala lyo ngendekera naba n’emisi y’ekiroho.” Acibir’iderha ntya: “Okusoma lugenda ebyahikire bene wirhu na bali birhu n’okumanya gurhi Yehova abarhabiremwo lyo balembera kwazibuhya omuhigo gwani gw’okubêra mwishwekerezi.”

11-12. Gurhi Yehova akacishogamwo okukolesa omulala gwirhu gw’ekiroho ly’ashuza amasala girhu? (Olole n’enfoto.)

¹¹ Anakolese omulala gwirhu gw’ekiroho. Omu budufu bw’embere z’okuhâna akalamo kage, Yezu asalîre n’obushiru. Asemberera Yehova arhalekaga abantu barhanye oku ali muntu ojacira Nnâmahanga. Ahali h’okujira ntyo, Yehova arhabala Yezu omu kurhuma malahika muguma ly’amuha emisi. (Lk. 22:42, 43) Kandi Yehova anarhurhabala omu kukolesa muguma w’omu bene wirhu erhi bali birhu arhuhe omurhima omu kurhuhamagala oku telefone erhi kurhulambagirira. Rhweshi rhushinganine rhukalonza obulyo bw’okubwira abirhu bemezi “akanwa kinja.”​—Mig. 12:25.

¹² Rhuganirire ebyahikiraga mwali wirhu muguma ohamagalwa Miriam. Migobe misungunu enyuma z’okufâ kw’iba, Miriam ali aha kâ yene, akaciyumva ahwerirwe anavunisire omurhima. Akag’ilaka bwenene anal’ilagirire oku muntu akaganiza. Adesire ntya: “Ntal’igwerhe emisi y’okuhamagala omuntu ciru n’omuguma, na muli ntyo nayegera Yehova kugerera isala. Erhi mba nciri nalaka nnandi nasalira, etelefone yani yalaka. Mugula muguma, mwîra wani muzigirwa ye wampamagalaga.” Oyo mugula na mukage baha Miriam oburhulirize. Ayemire n’obwalagale oku Yehova ye washumyagya oyo mwene wirhu amuhamagale oku telefone.

13. Oganirire olwiganyo luyerekine gurhi Yehova akakolesamwo abantu barhamuharamya ly’ashuza amasala girhu.

 ¹³ Anakolesa abantu barhamuharamya. (Mig. 21:1) Hali amango Yehova ashuza amasala g’abakozi bage omu kushumya abantu barhali bemezi lyo babarhabala. Kwa lwiganyo, Yehova ashumize Mwami Artazerzesi ayemerere Nehemiya agaluke e Yeruzalemu ly’arhabala omu kucib’iyubaka olo lugo. (Neh. 2:3-6) Ene nalyo, Yehova anashumya ciru n’abantu barhamuharamya lyo barhurhabala amango rhuli omu bulagirire.

14. Bici oshagalukire lugenda ebi Soo Hing acibwinire? (Olole n’enfoto.)

¹⁴ Mwali wirhu muguma ohamagalwa Soo Hing acibwinire oku Yehova amurhabire kugerera doktere wage. Omugala analibuzibwe n’endwala nyinji z’irhwe. Erhi oyo mugala ajira e aksida ndarhi, ye n’iba baleka akazi kabo lyo bakamushibirira. N’oko, kwarhuma baba n’amazibu g’okubula ensaranga. Soo Hing adesire oku akaciyumva nk’arhakacihash’ilembera ago mazibu ciru n’ehitya. Ayigulira Yehova omurhima gwage n’okumuhûna oburhabale. Doktere wakag’ibuka omwana wabo ahiga oku alonza gurhi oyo mwali wirhu akapatamwo oburhabale ye n’omulala gwage. Oko kwarhuma oburhegesi bw’ecihugo bwabaha oburhabale n’ahantu hinja h’okulama. Enyuma z’aho, Soo Hing aderha ntya: “Rhwabwine okuboko kwa Yehova mw’ago mazibu. Kobinali ‘anakâyumvêrheza emisengero y’abantu.’”​—Enna. 65:2, Mashi Bible.

15. Bici byarhabire mwali wirhu muguma ly’ahugûkwa oku Yehova akag’ishuza amasala gage?

¹⁵ Kanji-kanji amasala girhu garhashuzibwa omu njira y’okurhangaza. Cikone amashuzo rhupata ganabe go rhunalagirireko lyo rhubêra bishwekerezi kuli Larha wirhu w’omu mpingu. Co cirhumire, okaba masu ly’omanya gurhi Yehova ashuzize amasala gawe. Mwali wirhu muguma ohamagalwa Yoko akag’iciyumva nka Yehova arhali ashuza amasala gage, cikone arhondera okuyandika ebintu akag’ihûna Yehova. Enyuma za kasanzi kalebe, alola mw’eco citabu akag’iyandikiramwo anahugûkwa oku Yehova ashuzize amasala gage manji, ciru n’agandi ali amayibagira. Kasanzi oku kandi, rhushinganine rhukarhanya lugenda gurhi Yehova ali ashuzamwo amasala girhu.​—Enna. 66:19, 20.

16. Gurhi rhwakayerekanamwo obuyemere okubiyerekire amasala girhu? (Abahabraniya 11:6)

 ¹⁶ Rhunayerekane obuyemere arhali omu kusalira Yehova kone cikone n’omu kuyemera ishuzo lyage oku masala girhu ciru akarhuha lyo omu njira nci. (Osome Abahabraniya 11:6.) Rhuganirire olwiganyo lwa Mike na mukage, Chrissy. Bal’igwerhe omuhigo gw’okukolera oku Beteli. Mike adesire ntya: “Rhwajijire myaka minji rhuli rhwayunjuza efomu rhwanakashenga Yehova kanji-kanji lugenda ogo muhigo, cikone nta lusiku rhwalalisirwe.” Mike na Chrissy bagendekera bayemera n’obwalagale oku Yehova amanyire enjira nyinja akabakolesamwo omu mukolo gwage. Bagendekera bajira ebi bakanahashire, omu kukola nka bapainiya b’akasanzi koshi ahali obulagirire bunji n’okulunga okuboko emikolo y’obubasi y’ikubuliro lya Yehova. Ene, bali omu mukolo gw’omuzunguko. Mike adesire ntya: “Ensiku zoshi Yehova arhashuzagya amasala girhu omu njira rhwal’irhanyizeko, cikone agashuzize, anajira ntyo omu njira nyinja bwenene ciru rhurhakarhanyizeko.”

17-18. Kushimbana n’Ennanga 86:6, 7, bici rhwakayemera n’obwalagale?

¹⁷ Osome Ennanga 86:6, 7. Omwandisi w’ennanga Daudi al’iyemire n’obwalagale oku Yehova akag’iyumvirhiza amasala gage anakag’igashuzako. Nawe wanayemera ntyo n’obwalagale. Enyiganyo ziganirirwe mw’eci cigabi zirhuyemezize n’obwalagale oku Yehova anarhuha obwenge n’emisi rhulagirireko lyo rhulembera. Anakolesa omulala gwirhu gw’ekiroho ciru n’abantu barhali bamuharamya ene ly’arhurhabala omu njira ndebe.

¹⁸ Ciru akaba ensiku zoshi Yehova arhakashuza amasala girhu omu njira rhwal’irhanyizeko, rhumanyire oku agashuza. Anarhuhe ebi rhunalagirireko n’omu mango rhubilagirireko. Co cirhumire ogendekere wasalira omu buyemere, onayemere n’obwalagale oku Yehova akushibirira ene n’oku omu mango gayisha, ‘ayish’ilambûla okuboko, ayiguse n’obugale bwage ngasi coshi cibâmwo omûka’ omw’igulu lihyahya.​—Enna. 145:16.