1-2. Muhigo guhi gw’obulagirire Abayahudi bal’ilamire omu Babiloni bal’igwasirwe barhôle? (Ezr. 1:2-4)

 MWAMI ali amaderha oluderho! Abayahudi bal’igwasirwe mpira omu Babiloni myaka 70 ntya, bal’ikola bagwerhe oluhuma lw’okugaluka omu cihugo cabo, e Israheli. (Osome Ezra 1:2-4.) Yehova yene wakahikirizize oko. Bulya gurhi rhwakaderha ntyo? Abababiloni barhakag’ilikûla abantu bakag’igwarha mpira. (Iz. 14:4, 17) Ecihugo c’e Babiloni cali camahimwa, n’omurhegesi muhyahya abwira Abayahudi oku bakola bagwerhe oluhuma lw’okurhenga mw’eco cihugo. Enyanya z’oko, Abayahudi boshi, ci bwenene ebirhwe by’emilala, bal’igwasirwe barhôle omuhigo: erhi barhenga e Babiloni erhi bayibêra. Ogo muhigo gurhakabire mulembu okurhôla. Bulya gurhi?

² Bayahudi banji bal’ikola bashosi bwenene barhakahashire okujira ogo mubalamo. Na bulya banji baburhiragwa eyo Babiloni, nta cindi cihugo bal’imanyire. Bakag’ibona oku ecihugo c’e Israheli ciri cihugo ca bashakuluza babo. Bibonekine oku Bayahudi baguma na baguma bal’ikola bagwerhe buhirhi bunji omu Babiloni, na muli ntyo bakabwine oku kuli kuzibu okuleka enyumpa zabo nyinja erhi emikolo yabo n’okugend’ilama omu cihugo barhamanyiri.

3. Mugisho guhi Abayahudi bishwekerezi bal’icisigire bakabire nago omu kugaluka e Israheli?

³ Abayahudi bishwekerezi bal’imanyire oku emigisho bakabire nayo omu kugaluka e Israheli yali minji bwenene kulusha ngasi kantu bakaciyimire lyo bagaluka eyo munda. Omugisho munene bwenene kulusha eyindi yali nterekêro yabo. Ciru akaba hali hekalu 50 na kulusha z’abapagani omu Babiloni, nta hekalu ya Yehova ciru n’enguma yali mw’eyo vile. Nta mazabahu galiho Abaisraheli bakahânyireko enterekêro zal’ihûnyirwe n’Irhegeko lya Musa, na nta cikundi cipanzirwe c’abakuhani caliho cakahânyire ezo nterekêro. Kandi, abantu ba Yehova bal’izungulusirwe n’abalume n’abakazi banji bapagani, barhakag’ikenga  Yehova erhi amakanuni gage. Co cirhumire, ebihumbi by’Abayahudi bakag’ikenga Nnâmahanga bakag’icifinja okugaluka omu cihugo cabo lyo bagalula enterekêro ecîre.

4. Burhabale buhi Yehova al’ilaganyize okuha Abayahudi bakagalusire e Israheli?

⁴ Omubalamo mudarhi gw’okunali gw’okurhenga e Babiloni kuja e Israheli gwakajijire hofi myezi ini, cikone Yehova al’ilaganyize oku akarhenzizeho ngasi cihanzo coshi cakarhumire barhagaluka. Izaya ayandika ntya: “Omu irungu murheganyize Nyakasane [Yehova, NWT] enjira! . . . Ngasi hakubire hakubûlwe, na ngasi rhubanda-rhubanda zibe njira nnongêdu!” (Iz. 40:3, 4) Obone aka kanga omu bwenge bwawe: ibarabara ligali lije omw’irungu, enjira egalagire eje egarhi k’entondo. Ogo gwakabire mugisho bwenene oku babalama! Kwakabire kulembu bwenene kuli bo okubalama mw’er’ibarabara ahali h’okuj’asoka-soka n’okuhonoka erhi kuzunguluka ebirhondo, orhurhondo erhi rhubanda. Na kandi bakagenzire duba-duba.

5. Izino lihi ibarabara ligali ly’olwiganyo lyali egarhi k’ecihugo c’e Babiloni n’e Israheli lyahabirwe?

⁵ Ene, mabarabara manji g’okunali ganamanyikane kugerera izino erhi nimero. Ibarabara ly’olwiganyo Izaya ayandikaga okubiliyerekire nalyo lyal’igwerhe izino. Rhusomire ntya: “Hayish’ibâ omulimbwa [ibarabara ligali] gwakâz’iderhwa njira ntagatifu. Abarhacîri barhakayigeramwo.” (Iz. 35:8) Bici eco ciragane cali cihugwîre oku Baisraheli muli ago mango? Na bici cihugwîre kuli rhwe ene?

6. Bulya gurhi er’ibarabara lyal’ihamagirwe litagatifu?

⁶ “Njira ntagatifu,” eryo liri izino linja bwenene ibarabara lyakahabwa! Bulya gurhi er’ibarabara lihamagirwe litagatifu? Egarhi k’Abaisraheli bagalukaga e Yeruzalemu, harhakabire enafasi y’“abarhacîri,” ko kuderha Abayahudi boshi bal’ihizire okujira eby’enshonyi, okuharamya enshushano, erhi okujira ebindi byaha bizibu. Abayahudi bagalukaga bal’igwasirwe babe “lubaga lugoshôlere” Nnâmahanga wabo. (Lush. 7:6, Mashi Bible) Cikone, oko kurhali kuderha oku nta mpindulo abarhengaga e Babiloni bal’ishinganine bajire lyo bashagalusa Yehova.

7. Mpindulo zihi Bayahudi baguma na baguma bal’ishinganine bajire? Ohâne olwiganyo.

⁷ Nk’oku rhwabonaga embere, Bayahudi banji bal’iburhirwe e Babiloni, binabonekine oku banji muli bo bali bamakomêra ntanya nguma na nguma n’amakanuni g’olugenzi g’Abababiloni. Myaka minji enyuma z’Abayahudi barhanzi okugaluka e Israheli , Ezra ayumva oku Bayahudi baguma na baguma bali bamarhôla abakazi bapagani. (Lub. 34:15, 16; Ezr. 9:1, 2) Ciru n’enyuma z’aho, Guvernere Nehemiya asomerwa bwenene erhi abona oku abana baburhiragwa e Israheli ciru barhal’iyizire olulimi lw’Abayahudi. (Lush. 6:6, 7; Neh. 13:23, 24) Gurhi abo bana bakayiziremwo okuzigira Yehova n’okumuharamya erhi akaba barhakahugûsirwe Ecihabraniya, lo na lulimi ecigabi cinene c’Akanwa ka Nnamahânga cal’iyandisirwemwo? (Ezr. 10:3, 44) Co cirhumire abo Bayahudi bal’igwerhe empindulo z’obulagirire bal’ishinganine bajire, cikone kwakabire kulembu kuli bo okujira ezo mpindulo e Israheli, bulya eyo munda yo enterekêro ecîre yakag’igalulwa bunyi-bunyi.​—Neh. 8:8, 9.

8. Ene, bulya gurhi rhwakasimisibwa n’ebintu byajirikanaga mîra? (Olole enfoto eri oku cijalada c’eyi gazeti.)

⁸ Bantu baguma na baguma banarhanya ntya: ‘Ebyo biri bya kusimisa bwenene, cikone ka hali akantu ebyahikiraga Abayahudi mîra bwenene byakarhuyigiriza ene?’ Neci, hali akantu byakarhuyigiriza, bulya, omu njira ndebe rhuli rhwabalama omu “njira ntagatifu.” Rhube rhuli b’omu bashige amavurha erhi b’omu “bindi bibuzi,” rhushinganine rhubêre omu “njira  ntagatifu” bulya enarhulongoze omu paradizo y’ekiroho na kandi yayish’irhuhisa oku migisho y’Obwami omu mango gayisha. b (Yn. 10:16) Kurhangira omu mwaka gwa 1919 Kano Kasanzi Kirhu (K.K.K.), emiliyoni y’abalume, abakazi, n’abana barhenzire omu Babiloni Mukulu, ko kuderha amadîni goshi g’obunywesi, banarhondire okulambagira mw’eyo njira y’olwiganyo. Byanahashikana oli muguma muli bo. Ciru akaba er’ibarabara lyayigulagwa hamagera myaka 100 ntya, omukolo gw’okulirheganya gwarhonderaga magana g’emyaka embere z’aho.

9. Kushimbana n’olwandiko lwa Izaya 57:14, omu njira nci omukolo gw’okurheganya ‘enjira ntagatifu’ gwajijirwemwo?

⁹ Yehova akûlire Abayahudi barhengaga e Babiloni ebihanzo byali omu njira. (Osome Izaya 57:14.) Gurhigi lugenda ‘enjira ntagatifu’ ya muli gano mango girhu? Omu magana g’emyaka embere z’omwaka gwa 1919, Yehova akolesize abalume bal’imukenzire lyo barhabala okurheganya enjira y’okurhenga omu Babiloni Mukulu. (Oshushanye na Izaya 40:3.) Bajijire omukolo gw’obulagirire gw’okurheganya ibarabara ly’ekiroho, lyo buzinda bahashisa abantu b’emirhima minja barhenge omu Babiloni Mukulu n’okuja omu paradiso y’ekiroho, hantu enterekêro ecîre ya Yehova yagalulagwa. Bici ogo “mukolo gw’ibarabara” gwal’ihiziremwo? Rhuganirire mikolo miguma na miguma y’okurheganya yajijirwe.

10-11. Gurhi okucapisa n’okuhindula Ebibliya omu zindi ndimi kwarhabire okulumiza obumanye bw’Ebibliya? (Olole n’enfoto.)

¹⁰ Okucapisa. Kuhika hofi omu mwaka gwa 1450, ekopi z’Ebibliya zakag’iyandikwa n’okuboko. Ogo mukolo gwakag’irhôla kasanzi kanji, n’ekopi z’Ebibliya zirhakag’ibonekeraho zanali z’ibeyi bwenene. Cikone erhi haba amashini gakahamisibwa g’okucapisa ebitabu, kwaba kulembu okucapisa Ebibliya nyinji n’okuzigabira abantu.

¹¹ Okuhindula ebicapo birhu omu zindi ndimi. Omu magana g’emyaka, Ebibliya yali omu lulumi lw’Ecilatini mwone, n’abantu basomire bwenene bone bakag’ihugûkwa olo lulimi. Cikone erhi omukolo gw’okucapisa ebitabu gugendekera bwenene, abantu bal’ikenzire Nnâmahanga bajira bushiru bunji omu kuhindula Ebibliya omu ndimi abantu barhalengeriri bakag’iganira. Muli ntyo, abantu bakag’isoma Ebibliya bakahashire okushushanya enyigirizo bakag’iyigirizibwa n’ebirongozi by’amadîni n’ebi Ebibliya eyigirizize kobinali.

12-13. Ohâne olwiganyo luyerekine gurhi abanafunzi b’Ebibliya b’omurhima mwinja b’omu myaka egarhi ka 1801-1900 barhonderaga okufulûla enyigirizo z’obunywesi z’amadîni.

¹² Ebicapo by’okurhabala okuyiga Ebibliya. Abanafunzi b’Ebibliya bali masu bayiga binji kugerera ebi bakag’isoma omu Kanwa ka Nnâmahanga. Na ciru akaba abakulu b’amadîni banji barhasimaga, abo banafunzi b’Ebibliya barhalekaga okubwira abantu ebi bakag’ivumbula. Kwa lwiganyo, kurhangira omu mwaka gwa 1835, balume balebe b’omurhima mwinja barhondera okucapisa etrakte zakag’iyerekana enyigirizo z’obunywesi z’amadîni.

¹³ Hofi omu mwaka gwa 1835, mulume muguma wal’ikenzire Nnâmahanga wakag’ihamagalwa Henry Grew acapisa etrakte yal’iganirire oku biba erhi omuntu afâ. Mw’eyo trakte, ayerekana n’obwalagale kugerera Amandiko oku omuntu anabe n’obuzine burhakafâ erhi Nnâmahanga akamuhabo, ci arhali mpu bulya anaburhwe n’iroho karhafâ nk’oku makanisa manji gakag’iyigiriza. Omu mwaka gwa 1837, muhubiri muguma wakag’ihamagalwa George Storrs abona eyo takte erhi ali atembeza e train. Asoma eyo trakte anayemera n’obwalagale  oku anapasire enyigirizo z’obulagirire bwenene. Ahiga okuganirira abandi ebi ayigaga mw’eyo takte. Omu mwaka gwa 1842, ajira ehotuba zikulikirine zagwerhe ecirhwe cidesire “Idoso: K’Abantu Babi Barhafâ?” Ebi George Storrs ayandikaga byahûma musole muguma gwakag’ihamagalwa Charles Taze Russell oku murhima.

14. Omu njira zihi Mwene Wirhu Russell n’abal’icilunzire haguma naye bayungusire kugerera omukolo gw’ibarabara ly’ekiroho gwajiragwa embere? (Olole n’enfoto.)

¹⁴ Omu njira zihi Mwene Wirhu Russell n’abal’icilunzire haguma naye bayungusiremwo kugerera omukolo gw’ibarabara ly’ekiroho gwajiragwa embere? Amango bakag’iyiga, bakag’ilonza emyanzi omu madiksionere, omu makonkordanse, n’omu mpindûlo mberuluka z’Ebibliya, n’ebyo byoshi byali erhi byarheganyizibwe n’abandi embere barhondere omukolo gwabo. Kandi bayungusire kugerera obusagasi bwajiragwa omu Bibliya n’abalume nka Henry Grew, George Storrs, n’abandi. Mwene Wirhu Russell n’abal’icilunzire haguma naye nabo bone bajijire binji omu mukolo gw’ibarabara ly’ekiroho omu kucapisa bitabu binji na trakte nyinji ziganirire emyanzi y’Ebibliya.

15. Majambere gahi g’obulagirire gajijirwe omu mwaka gwa 1919?

¹⁵ Omu mwaka gwa 1919, Babiloni Mukulu aheza obuhashe agwerhe oku bantu ba Nnâmahanga. Mw’ogo mwaka, “mushizi mwirhonzi na mwikubagirwa” arhondera okujira omukolo ly’arhabala abantu b’omurhima mwinja barhondere okulambagira omu “njira ntagatifu.” (Mt. 24:45-47, NWT) Na kugerera oburhabale bw“abakozi b’omw’ibarabara” bishwekerezi b’embere, abalambagire mw’er’ibarabara bayushula obumanye bwabo lugenda emihigo ya Yehova. (Mig. 4:18) Kandi bajira empindulo omu kalamo kabo lyo balama kushimbana n’ebi Yehova ahûnyire. Yehova arhahûnaga abakozi bage bajire empindulo zal’ihûnyirwe zoshi caligumiza. Lubero n’oko, agendekera acêsa abantu bage bunyi-bunyi. (Olole ecisanduku cidesire “ Yehova Anacêse Abakozi Bage Bunyi-Bunyi.”) Rhweshi rhwayish’ishagaluka  bwenene amango rhwaba n’obuhashe bw’okushagalusa Yehova omu ngasi kantu rhuli rhwajira!​—Kl. 1:10.

16. Kurhangira omu mwaka gwa 1919, mukolo guhi gw’okushibirira abantu gwajijirwe omu “njira ntagatifu”? (Izaya 48:17; 60:17)

¹⁶ Ngasi ibarabara liba lishinganine likashibirirwa ngasi mango lyo ligendekera lyaba linja. Kurhangira omu mwaka gwa 1919, omukolo gw’ibarabara omu “njira ntagatifu” gwagendekire gwajirwa, lyo bahashisa bantu banji okurhenga omu Babiloni Mukulu. Mushizi mwirhonzi na mwikubagirwa wayusig’ihirwaho akola bwenene n’omu mwaka gwa 1921, acapisa ecitabu c’okuyiga Ebibliya cal’igwerhe omuhigo gw’okurhabala abahyahya bayige okuli kw’Ebibliya. Ecitabu La Harpe de Dieu cacapisibwa, na kopi hofi miliyoni ndarhu z’eco citabu zahikira aha zacapwa omu ndimi 36, na bantu banji bayiga okuli kugerera eco citabu. Omu nsiku zazindig’igera, rhwahabirwe ecitabu cihyahya c’okurhurhabala okulongoza amafunzo g’Ebibliya cidesire Oshagalukire Akalamo Ensiku n’Amango! Mw’ezi nsiku nzinda, Yehova akolesize ikubuliro lyage ly’arhuha biryo binji bwenene by’ekiroho by’okurhurhabala rhugendekere rhwalambagira omu “njira ntagatifu.”​—Osome Izaya 48:17; 60:17.

17-18. Ngahi ‘enjira ntagatifu’ yarhuhisa?

¹⁷ Rhwanaderha oku ngasi mango erhi omuntu ayemera ifunzo ly’Ebibliya, anabe n’obulyo bw’okulambagira omu “njira ntagatifu.” Bantu baguma na baguma banalambagire hisungunu hyone mw’eyo njira na buzinda bayirhengemwo. Abandi bahizire okugendekera bayilambagiramwo kuhika bahike emunda yabahêka. Ngahi eyo njira yabahêka?

¹⁸ Abagwerhe obulangalire bw’okuja e mpingu, ‘enjira ntagatifu’ yabahisa omu “paradizo ya Nnâmahanga” e mpingu. (Maf. 2:7, NWT) Abagwerhe obulangalire bw’okuyish’ilama hanw’igulu, eyo njira yabarhabala bahikire okuyish’iba bimana oku buzinda bw’emyaka 1000 y’oburhegesi bwa Yezu. Akaba oli walambagira mw’eyo njira ene, orhakabaganaga ebi wasizire enyuma. Na kandi, orhayirhengagamwo kuhika ohike ebuzinda bw’omubalamo gwawe omw’igulu lihyahya! Rhukulongize “omubalamo mwinja.”