1. Gurhi Ebibliya ehugwîre obuzigire bw’okunali?

 “EMYAMPI [y’obuzigire] guba muliro, ngulumira ya Nyamuzinda. Amîshi galuge kurhi, garhazimiza buzigire, nanga obuzigire burhahêkwa na lwîshi.” b (Lwi. 8:6, 7) Ezo ziri nderho nyinja bwenene zihugwîre obuzigire bw’okunali! Ezo nderho zihîre omurhima omulume n’omukazi barhôline: Mwanayerekana obuzigire bw’okunali.

2. Bici omulume na mukage bagwasirwe bajire ly’obuzigire bwabo burhanyihaga?

² Biba bihûnyire omulume na mukage bajire bushiru bunji lyo bagendekera bazigirana omu kalamo kabo koshi. Kwa lwiganyo, omuliro gwanagendekera gwayaka erhi akaba hali oli waguhirako enshali. Erhi akaba nta muntu oli waguhirako enshali, gwanahikira aha gwazima. Ko n’oko, obuzigire egarhi k’omulume na mukage bwanagendekera bwasêra ensiku zoshi, erhi akaba bali basêza obwîra bwabo. Hali amango omulume na mukage bakayumva nk’obuzigire bwabo buli bwanyiha, bwenene erhi akaba bagwerhe amazibu g’okubula ensaranga, amazibu g’obulwala, erhi amazibu g’okulera abana. Co cirhumire erhi akaba wajire omu buhya, gurhi wakagendekera wayasamwo ‘engulumira ya Nyamuzinda’ omu buhya bwawe? Mw’eci cigabi, rhwaganirira njira isharhu mwakazibuhyamwo obwîra bwinyu n’okushagalukira obuhya bugwerhe omwishingo. c

3. Gurhi obwîra busezire haguma na Yehova bwakarhabala omulume na mukage bagendekere bayasa obuzigire bwabo? (Omuhanûzi 4:12) (Olole n’enfoto.)

³ Lyo bagendekera bayasa ‘engulumira ya Nyamuzinda,’ omulume  na mukage bashinganine bajire okwabo koshi lyo baba n’obwîra busezire haguma na Yehova. Gurhi obo bwîra bwakabarhabala omu buhya bwabo? Erhi akaba omulume na mukage bali babona oku obwîra bwabo haguma n’Ishe w’omu mpingu buli bwa bulagirire, banabe babidu okukolesa amahano gage n’oko kunabarhabale bakayaka n’okuhima amazibu gakarhuma obuzigire bwabo bwanyiha. (Osome Omuhanûzi 4:12.) Kandi abantu b’ekiroho banajire okwabo koshi lyo bayiga Yehova n’okuba n’amorhere ayerekana nk’olukogo, obulembêdu, n’okubabalira. (Ef. 4:32–5:1) Erhi omulume na mukage bakayerekana ago morhere, kwanaba kulembu obuzigire bwabo buyushuke. Mwali wirhu muguma ohamagalwa Lena, okola ogwerhe myaka 25 na kulusha omu buhya, adesire ntya: “Kuba kulembu okuzigira n’okukenga omuntu w’ekiroho.”

4. Bici byarhumire Yehova acishoga Yozefu na Mariya lyo baba babusi b’omwana wayishir’iba Masiya?

⁴ Rhuganirire olwiganyo lw’omu Bibliya. Erhi Yehova acishoga omulume n’omukazi lyo baba babusi b’omwana wayishir’iba Masiya, acishoga Yozefu na Mariya kurhenga omu bantu banji b’omw’iburha lya Daudi. Bulya gurhi? Bulya bombi bal’igwerhe obwîra bwinja haguma na Yehova, na Yehova al’imanyire oku bakamuhizire oku nafasi ntanzi omu buhya bwabo. Mwe balume n’abakazi barhôline, bici mwakaciyigiriza kugerera olwiganyo lwa Yozefu na Mariya?

5. Bici abalume bajire omu buhya bakaciyigiriza kugerera olwiganyo lwa Yozefu?

⁵ Yozefu ali mubidu okuyemera obulongozi bwa Yehova, n’oko kwarhuma aba mulume mwinja. Kasharhu koshi-koshi, ahabirwe obulongozi kurhenga emwa Nnâmahanga lugenda omulala gwage. Ngasi mango, arhumikire duba-duba, ciru n’amango kwali kuzibu okujira ntyo. (Mt. 1:20, 24; 2:13-15, 19-21) Omu kukulikira obulongozi bwa Nnâmahanga, Yozefu alanga Mariya, amushibirira, anamuhikirigiza amalagirire gage. Orhanye gurhi ebijiro bya Yozefu bigwasirwe bibe byashumize Mariya ayushule obuzigire bwage kuli ye n’okumukenga bwenene! Mwe balume bajire omu buhya, mwanayiga olwiganyo lwa Yozefu omu kulonza amahano gayimangire oku Bibliya lyo mumanya gurhi mwashibirira omulala gwinyu. d Erhi mwakakolesa ago mahano, ciru akaba bihûnyire okujira empindulo, mwanayerekana obuzigire kuli bakinywe n’okuzibuhya obuhya bwinyu. Mwali wirhu muguma w’omu cihugo c’e Vanuatu okola ogwerhe myaka 20 na kulusha omu buhya adesire ntya: “Erhi ibanie alonza obulongozi bwa Yehova n’okubukolesa, namukenge bwenene. Nanciyumve ndi omu bulanzi nanangalire n’emihigo yage.”

6. Bici abakazi bakaciyigiriza kugerera olwiganyo lwa Mariya?

⁶ Mariya acijirire yene obwîra haguma na  Yehova; obuyemere bwage burhal’iyimangire kw’ebi Yozefu akag’ijira. Al’imanyire Amandiko bwinja. Kandi, akag’icihiriraho akasanzi k’okurhanya bwenene. (Lk. 2:19, 51) Buzira karhinda, obwîra bwinja Mariya agwerhe haguma na Yehova bwarhuma aba mukazi mwinja bwenene. Ene, bakazi banji banacihangane okujira nk’oku Mariya akag’ijira. Kwa lwiganyo, mwali wirhu muguma ohamagalwa Emiko adesire ntya: “Amango nali mulamba, nal’igwerhe eprograme yani niene y’ebintu by’ekiroho. Cikone enyuma z’okuja omu buhya, nabona oku bulya ibanie akag’ishenga enyanya zirhu n’okulongoza enterekêro y’omulala, obuyemere bwani bwal’ikola buyimangire kw’ebi akag’ijira. Nahikira aha nabona oku nshinganine mbarhule omuzigo gwani niene lugenda obwîra bwani haguma na Yehova. Lero nacihiriraho akasanzi k’okuba niene haguma na Mungu wani omu kusalira, okusoma Amandiko, n’okurhanya bwenene oku ntanya zage.” (Gl. 6:5) Mwe bakazi, erhi mwakagendekera mwaseza obwîra bwinyu haguma na Yehova, babalo banaba na birhumire binji by’okumukunga n’okumuzigira.​—Mig. 31:30.

7. Bici omulume na mukage bakaciyigiriza kugerera Yozefu na Mariya lugenda okuharamya Yehova haguma?

⁷ Kandi Yozefu na Mariya bakag’ikola haguma lyo bagendekera baseza obwîra bwabo haguma na Yehova. Bal’ihugûsirwe obulagirire bw’okuharamya Yehova haguma omu mulala. (Lk. 2:22-24, 41; 4:16) Nkaba kwakabire kuzibu okujira ntyo, bwenene erhi omulala gwabo gugendekera gwayushuka, cikone bahashire okujira ntyo. Olo luli lwiganyo lwinja oku balume na bakabo ene! Akaba mugwerhe abana, aka Mariya na Yozefu, nkaba kwanaba kuzibu okukaja oku ntimanano erhi okupanga akasanzi k’okujira enterekêro y’omulala. Nkaba ciru kwanaba kuzibu bwenene okupanga akasanzi k’okuyiga erhi kusalira haguma mwembi. Cikone, mukengere oku, amango muli mwaharamya Yehova haguma, munamuyegere bwenene n’okuyegerana mwene na nnene. Co cirhumire, muhebe enterekêro ya Yehova oku nafasi ntanzi omu kalamo kinyu.

8. Gurhi omulume n’omukazi bagwerhe amazibu omu buhya bwabo bakajira lyo bayunguka bwenene n’enterekêro y’omulala?

⁸ Gurhi mwakajira erhi akaba mugwerhe amazibu omu buhya bwinyu? Nkaba murhakashagalukira okuba haguma omu nterekêro y’omulala. Akaba ntyo, murhondere omu kuganirira mwanzi mulebe mofofi na gwa kushagalusa mwembi muyemire okuganirira. Okujira ntyo kwanaseza obwîra bwinyu n’irala linyu ly’okujira ebintu by’ekiroho haguma mwembi.

9. Bulya gurhi omulume na mukage bagwasirwe bakageza akasanzi haguma?

⁹ Mwe balume n’abakazi barhôline, kandi mwanagendekera mwayasa obuzigire bwinyu omu kukageza akasanzi haguma. Erhi mwakakajira ntyo, oko kwanarhabala ngasi muguma winyu akamanya gurhi owabo ali arhanya na gurhi ali aciyumva. (Murh. 2:24) Olole ebi Lilia na Ruslan bavumbwire hisanzi hisungunu enyuma z’okujira obuhya, hakola hali myaka 15 na kulusha. Lilia adesire ntya: “Rhwahugûkwa oku rhurhal’igwerhe kasanzi kanji ka kugeza haguma nk’oku rhwal’irhanyize. Akasanzi kirhu kakag’ihwera oku mukolo gw’okulonza ensaranga, oku mikolo y’aha kâ, na buzinda omu kushibirira abana birhu. Rhwahugûkwa oku, erhi akaba rhurhacihiririho akasanzi k’okukageza haguma, rhurhakaciyegerana.”

10. Gurhi omulume na mukage bakakolesamwo olwandiko lw’Abefezi 5:15, 16?

¹⁰ Gurhi omulume na mukage bakajira lyo bakageza akasanzi haguma? Byanahûna mucihirireho, erhi kupanga, akasanzi k’okukageza  haguma. (Osome Abefezi 5:15, 16.) Mwene wirhu muguma w’omu Nigeria ohamagalwa Uzondu adesire ntya: “Erhi mpanga emikolo yani, nampireho akasanzi nie na mukanie rhwayish’igeza haguma, n’ako kasanzi ko nshokoza omu mikolo yani yoshi.” (Fl. 1:10) Rhuganirire gurhi Anastasia, muka mwangalizi muguma w’omuzunguko w’omu cihugo c’e Moldavie, akolesamwo bwinja akasanzi kage. Adesire ntya: “Nancihangane okujira emikolo yani amango ibanie naye ali ajira emikolo yage. Muli ntyo, enyuma rhwanageza akasanzi rhweshi haguma.” Cikone, gurhigi mwakajira erhi akaba eprograme zinyu ziri zarhuma kwaba kuzibu kuli mwe okubona akasanzi k’okugeza haguma?

11. Mikolo ehi Akila na Prisila bakag’ijira haguma?

¹¹ Abalume na bakabo banayiga binji kugerera olwiganyo lwa Akila na Prisila, mulume n’omukazi bal’izigirwe na Bakristu banji b’omu myaka igana mirhanzi. (Rm. 16:3, 4) Ciru akaba Ebibliya erhadesiri binji lugenda obuhya bwabo, eyerekine oku bakag’ikola haguma, bakag’ihubiri haguma, n’okurhabala abandi haguma. (Ebj. 18:2, 3, 24-26) Kobinali, ngasi mango erhi Ebibliya eganirira Akila na Prisila, enabaganirire bombi haguma.

12. Bici omulume na mukage bakajira lyo bakageza kasanzi kanji haguma? (Olole n’enfoto.)

¹² Gurhi abalume na bakabo bakayigamwo olwiganyo lwa Akila na Prisila? Orhanye oku bintu binji we na balo erhi mukawe mulagirire okujira. Ka mwanakajira mikolo miguma na miguma haguma ahali ha muguma okuyijira yene? Kwa lwiganyo, Akila na Prisila bakag’ihubiri haguma. Ka ngasi mango munapange okujira ntyo? Kandi Akila na Prisila bakag’ikola haguma. Nkaba we na mukawe murhajira kazi kaguma, cikone ka mwanakola emikolo y’omu nyumpa haguma? (Muh. 4:9) Amango muli mwarhabalana okujira mukolo mulebe, nkaba mwanaciyumva bwenene muli nka ekipe mwananaba n’obulyo bw’okuganira. Robert na Linda bakola bagwerhe myaka 50 na kulusha omu buhya bwabo. Robert adesire ntya: “Kobinali, rhurhajira kasanzi kanji ka kugeza haguma omu kucishagalusa. Cikone amango ndi nashuka ebirugu by’omu masiga na mukanie aje abipanguza erhi amango ndi nakombeza e jardin yirhu embuga naye ayishe rhukole haguma, nanyumve nshagalusire bwenene. Okujira ebintu haguma kunarhume rhwayegerana. Obuzigire bwirhu bunagendekere bwayushuka.”

13. Ly’omulume na mukage baba omu cinyabuguma c’okunali, bici bashinganine bajire?

¹³ Cikone, okengere oku, okuba haguma arhali kone kwakarhuma mwaba omu cinyabuguma. Mukazi muguma w’omu cihugo c’e Brésil adesire ntya: “Ene, bulya hali bintu binji by’okuhêka obwenge, nabwine oku rhwanarhôgera omu murhego gw’okurhanya oku rhuli rhwageza akasanzi haguma mpu bulya kone rhuli rhwalama omu nyumpa nguma.  Naciyigirizize oku rhushinganine rhujire binji kulusha okuba haguma kone. Kandi nshinganine mushibirire omu njira alagirireko.” Alaga oku Bruno na mukage, Tays, bajira lyo ngasi muguma ashibirira owabo. Bruno adesire ntya: “Amango rhuli rhwageza akasanzi haguma, rhunabîke etelefone zirhu lyo rhushagalukira akasanzi kirhu haguma.”

14. Erhi akaba omulume na mukage barhashagalukira okugeza akasanzi haguma, gurhi bakajira?

¹⁴ Cikone, gurhigi erhi akaba we na mukawe erhi balo murhashagalukira okugeza akasanzi haguma? Nkaba mwembi murhashagalukira bintu biguma, erhi nkaba munakagayisanya. Gurhi mwakajira? Orhanye oku muliro rhwaganiriraga omu murhondero gw’eci cigabi. Gurharhondera gwagulumira ho n’aho. Biba bihûnyire omuntu agendekere ahirako enshali nnenene. Ko n’oko, kwanaba kwinja murhondere okugeza kasanzi kasungunu haguma ngasi lusiku. Mwanacihangana okujira kantu kalebe mushagalukire mwembi ahali h’okujira akantu kakagayisa muguma muli mwe. (Yk. 3:18) Omu kurhondera bunyi-bunyi, mwanacib’irhondera mwayasa obuzigire bwinyu.

15. Bulya gurhi obukenge buli bwa bulagirire ly’omulume na mukage bagendekera bayasa obuzigire bwabo?

¹⁵ Obukenge buba bwa bulagirire omu buhya. Ko buba nka hihusi hirhuma omuliro gwayaka bwenene. Buzira hihusi, omuliro gunazime duba-duba. Ko n’oko, buzira bukenge, obuzigire egarhi k’omulume na mukage bwananyiha duba-duba. Oku bundi, omulume na mukage bacihangana okuyerekana obukenge banabe bali bakola haguma lyo bagendekera bayasa obuzigire bwabo. Cikone, okengere oku, arhali we shinganine orhanye oku onakenge balo erhi mukawe, cikone balo erhi mukawe ye shinganine aciyumve oku onamukenge. Penny na Aret bakola bagwerhe myaka 25 na kulusha omu buhya. Penny adesire ntya: “Obukenge rhuyerekana bunalerhe ecidurhu omu mwirhu. Rhunaciyumve rhugwerhe oluhuma lw’okuganira bulya rhumanyire oku ngasi muguma wirhu abwine entanya z’owabo oku ziri za bulagirire.” Co cirhumire, gurhi wakajira ly’orhabala balo erhi mukawe aciyumve oku kobinali omukenzire? Rhuganirire olwiganyo lwa Abrahamu na Sara.

16. Bici abalume bajire omu buhya bakaciyigiriza kugerera olwiganyo lwa Abrahamu? (1 Petro 3:7) (Olole n’enfoto.)

¹⁶ Abrahamu akag’ijirira Sara omu njira y’obukenge. Akag’iyumvirhiza bwinja entanya za Sara anakag’ikenga oku ali aciyumva. Mango maguma, Sara al’igayire anabwira Abrahamu oku akag’iciyumva, ciru anamutumuza enyanya z’ago mazibu. Ka Abrahamu abire burhe n’okumukalihira? Nanga. Al’imanyire oku Sara ali mukazi wa kurhumikira anakag’imulunga okuboko. Abrahamu amuyumvirhiza anajira okwage koshi ly’ayusa ago mazibu. (Murh. 16:5, 6) Bici oko kurhuyigirizize? Mwe balume,  mwe mugwasirwe mukarhôla emihigo eyerekire emilala yinyu. (1 Kr. 11:3) Ciru akaba ntyo, akantu kinja mwakajira kuli kurhang’iyumva entanya za bakinywe embere murhôle omuhigo, ci bwenene erhi akaba ogo muhigo gwahûma oku kalamo kabo. (1 Kr. 13:4, 5) Agandi mango, mukawe anaciyumva kubi analonze akuganirire gurhi ali aciyumva. K’onakenge oku ali aciyumva omu kumuyumvirhiza bwinja? (Osome 1 Petro 3:7.) Angela na Dmitry bakola bagwerhe hofi myaka 30 omu buhya. Angela ahugwîre gurhi iba amujirira ly’aciyumva oku akenzirwe. Adesire ntya: “Ngasi mango, Dmitry aba mubidu okunyumvirhiza amango ndi burhe erhi amango ndonzize kone okuganira. Anandembere, ciru n’amango nkalihire bwenene.”

17. Bici abakazi bakaciyigiriza kugerera olwiganyo lwa Sara? (1 Petro 3:5, 6)

¹⁷ Sara akag’ikenga Abrahamu omu kulunga emihigo yage okuboko. (Murh. 12:5) Mango maguma, Abrahamu ahiga okuyegereza ebigolo byamuyishiraga buzira kulaliza. Abrahamu abwira Sara aleke ebi akag’ijira byoshi anarheganye migati minji bwenene. (Murh. 18:6) Sara ajira duba-duba analunga ogo muhigo gwa Abrahamu okuboko. Mwe bakazi, ninyu mwanayiga olwiganyo lwa Sara omu kukalunga emihigo y’abalume binyu okuboko. Omu kujira ntyo, mwanazibuhya obuhya bwinyu. (Osome 1 Petro 3:5, 6.) Dmitry, rhwaganiriraga omu cifungo cishokwire, ahugwîre gurhi mukage ajira ly’aciyumva oku akenzirwe. Adesire ntya: “Nanshagalukire obushiru Angela ajira ly’alunga emihigo yani okuboko, ciru akaba entanya zage ziri lubero n’ezani. Ciru akaba ebintu birhagendesiri bwinja, arhanderha-derha kubi.” Kuba kulembu bwenene okuzigira omuntu okukenga!

18. Gurhi abalume na bakabo bayungukamwo omu kugendekera bayasa obuzigire bwabo?

¹⁸ Ene, Shetani alonzize azimye obuzigire buba omu buhya bw’Abakristu. Aba amanyire oku erhi omulume na mukage bakaleka okuzigirana, banarhondera okuciyegûla kuli Yehova. Cikone, obuzigire bw’okunali burhakahwa! Co cirhumire, muleke obuzigire omu buhya bwinyu bube nk’obuzigire buganirirwe omu Lwimbo lw’Enyimbo. Muhige okuhira Yehova oku nafasi ntanzi omu buhya bwinyu, mucihirireho akasanzi k’okukageza haguma, munakenge oku ngasi muguma ali aciyumva n’amalagirire gage. Erhi mwakajira ntyo, obuhya bwinyu bwanalerhera Yehova irenge, bulya ye Nshôko y’obuzigire bw’okunali, na nka kula omuliro gugendekera gwayasibwa omu kuguhirako enshali, obuzigire bwinyu bwanagendekera bwayaka ensiku zoshi.