1. Bici Yehova ahûnyire abakozi bage bakajira? (Olole n’enfoto.)

 NDI rhwakahûna obulongozi n’oburhulirize amango rhubulagirireko? Rhumanyire ishuzo ly’er’idoso. Rhwanayegera Yehova Mungu kugerera isala. Ntyo ko Yehova arhuhûnyire rhukajira. Alonzize rhukasalira ngasi mango erhi ‘kushenga burhahusa.’ (1 Ts. 5:17) Rhwanamuyegera buzira boba kugerera isala n’okumuhûna obulongozi omu ngasi cigabi c’akalamo kirhu. (Mig. 3:5, 6) Bulya Yehova aba Mungu muhânyi bwenene, arharhubwiziri kanga kone rhushinganine rhumuyegere kugerera isala.

2. Bici rhwaganirira mw’eci cigabi?

² Rhuba rhushagalukire engalo y’isala. Cikone bulya rhujira bintu binji bya kujira, kwanaba kuzibu okubona akasanzi k’okusalira. Kandi rhwanabona oku kuli kwa bulagirire rhujire amasala girhu gabe minja kulusha. Rhushagalusire okubona oku amandiko ganarhuha omurhima bwenene ciru n’obulongozi. Mw’eci cigabi, rhwaganirira gurhi olwiganyo lwa Yezu lwakarhurhabala rhukacihiriraho akasanzi k’okusalira. Na kandi rhwaganirira gurhi rhwakajiramwo amasala girhu gabe minja kulusha omu kukahira bintu birhanu by’obulagirire omu masala girhu.

3. Bici Yezu al’ihugûsirwe lugenda isala?

³ Yezu al’ihugûsirwe oku Yehova anabone isala oku liba lya bulagirire. Myaka minji embere ayishe hanw’igulu, abwine gurhi Ishe akag’ishuza oku masala g’abalume n’abakazi bishwekerezi kuli ye. Kwa lwiganyo, Yezu ali aha burhambi bw’Ishe erhi ashuza oku masala g’okurhenga oku murhima ga Hana, Daudi, Elisha n’abandi. (1 Sam. 1:10, 11, 20; 1 Bam. 19:4-6; Enna. 32:5)  Birhasomezizi okubona Yezu ayigirizize abanafunzi bage bakasalira ngasi mango erhi banagwerhe obulangalire oku Yehova ashuza amasala gabo!​—Mt. 7:7-11.

4. Bici amasala ga Yezu garhuyigirizize?

⁴ Kugerera amasala Yezu akag’isalira Yehova, ayeresire abanafunzi bage olwiganyo bashinganine bakulikire. Omu mango g’omukolo gwage hanw’igulu, Yezu akag’isalira ngasi mango. Bulya kanji-kanji akag’iba agwerhe bintu binji bya kujira anazungulusirwe na bantu banji, akag’icihiriraho akasanzi k’okusalira. (Mk. 6:31, 45, 46) Akag’izuka sezi-sezi ly’abona akasanzi aba ali yene ly’asalira. (Mk. 1:35) Mango maguma asalira obudufu boshi embere arhôle omuhigo gw’obulagirire. (Lk. 6:12, 13) Kandi Yezu asalire kanji-kanji omu budufu bw’embere z’okufâ kwage, embere ahikirize ecigabi cizibu bwenene c’omukolo gwage hanw’igulu.​—Mt. 26:39, 42, 44.

5. Gurhi rhwakayiga olwiganyo lwa Yezu lugenda isala?

⁵ Olwiganyo lwa Yezu lurhuyigirizize oku ciru rhwakaba rhugwerhe bintu binji bya kujira, rhushinganine rhukacihiriraho akasanzi k’okusalira. Aka Yezu, rhushinganine rhukacihiriraho akasanzi k’okusalira, nkaba rhwanazuka sezi-sezi erhi rhurhôle kasanzi kasungunu k’okusalira embere z’okugwishira. Omu kujira ntyo, rhwanayeresa Yehova oku rhushagalukire eyo ngalo yago-yago arhuhîre. Mwali wirhu muguma ohamagalwa Lynne akengire gurhi avuzire omunkwa bwenene erhi ayiga lugenda olukengwa rhujira lw’okusalira. Adesire ntya: “Erhi mmanya oku nanaganira na Yehova akasanzi nandonzize, oko kwantabire nkamubona nka mwîra wani wa hofi-hofi n’okulonza okujira amasala gani gabe minja kulusha.” Buzira karhinda, banji muli rhwe banaciyumve ntyo. Rhuganirirage bintu birhanu by’obulagirire rhwakahira omu masala girhu.

6. Kushimbana n’olwandiko lw’Amafulûlo 4:10, 11, bici Yehova ashinganine okuhâbwa?

⁶ Okakuza Yehova. Omu cibonekerezi c’okusomeza bwenene, entumwa Yowane yabwîne bagula 24 bali baharamya Yehova omu mpingu. Bakuza Nnâmahanga banaderha oku ashinganine okuhâbwa “irenge, n’obukuze n’obuhashe.” (Osome Amafulûlo 4:10, 11.) Bamalahika bishwekerezi nabo bajira  birhumire binji by’okuha Yehova obukuze n’irenge. Baba omu mpingu haguma naye banahikire aha bamumanya bwinja. Banabone amorhere gage gabonekana mw’ebi ajira. Erhi babona ebi Yehova ajira, oko kunabashumye bamukuze.​—Ayu. 38:4-7.

7. Bici byakarhushumya rhukuze Yehova?

⁷ Nirhu rhushinganine rhukakuza Yehova omu masala girhu. Rhwanajira ntyo omu kumubwira ebirhuma rhumuzigira na bulya gurhi rhumukenga. Amango oli wasoma n’okuyiga Ebibliya, okacihangana okubona amorhere Yehova ayerekine oshagalukire bwenene. (Ayu. 37:23; Rm. 11:33) Enyuma z’aho, obwire Yehova gurhi oli waciyumva lugenda ago morhere. Kandi rhwanakuza Yehova enyanya z’oburhabale arhuha n’oburhabale aha omulala gwirhu goshi gw’ekiroho. Anarhushibirire n’okurhulanga ngasi mango.​—1 Sam. 1:27; 2:1, 2.

8. Birhumire bihi biguma na biguma birhushumya rhukavuga Yehova omunkwa? (1 Abatesalonika 5:18)

⁸ Okavuga Yehova omunkwa. Rhugwerhe birhumire binji by’okuvuga Yehova omunkwa omw’isala. (Osome 1 Abatesalonika 5:18.) Rhwanamuvuga omunkwa kuli ngasi kantu kinja rhujira; kobinali ngasi ngalo nyinja emwage erhenga. (Yk. 1:17) Kwa lwiganyo, rhwanamuvuga omunkwa enyanya z’igulu lirhu linja bwenene n’ebintu binja bwenene alemire. Kandi rhwanamuvuga omunkwa enyanya z’obuzine rhujira, omulala gwirhu, abîra birhu n’obulangalire bwirhu. Kandi rhunavuge Yehova omunkwa bulya arhuyemerire okuba n’obwîra bwinja haguma naye.

9. Bulya gurhi byanahûna rhucihangane bwenene lyo rhuba ba kuvuga Yehova omunkwa?

⁹ Byanahûna rhucihangane bwenene lyo rhurhanya lugenda ebirhumire rhugwerhe byakarhushumya rhube ba kuvuga Yehova omunkwa. Bantu banji ene barhaba ba kuvuga omunkwa. Kanji-kanji abantu banasegeze obwenge kw’ebi balonzize ahali h’okubusegeza kw’ebi bakajira lyo bavuga omunkwa kw’ebi bagwerhe. Erhi rhwakarhondera okuyiga oborhere bwa ntyo, amasala girhu ganakaba nsengero zone. Ly’oko kurhag’irhuhikira, rhushinganine rhugendekere rhwacihangana lyo rhuba ba kuvuga omunkwa kw’ebi Yehova arhujirira byoshi.​—Lk. 6:45.

10. Gurhi okuba wa kuvuga omunkwa kwarhabiremwo mwali wirhu muguma ly’alembera amazibu? (Olole n’enfoto.)

¹⁰ Okuba ba kuvuga omunkwa kwanarhurhabala rhulembere amazibu. Rhuganirire olwiganyo lwa mwali wirhu Kyung-sook, luganirirwe omw’Ilabiro ly’Akalalizi ly’omu nsiku 15/1/2015 (omu Ciswahiri c’e Congo). Avumbulwamwo endwala yalikola ekuzire bwenene y’akansere k’amahaha. Adesire ntya: “Ago mazibu g’endwala garhuma navunika omurhima bwenene. Naciyumva nka mpezize ngasi kantu, nanakayoboha bwenene.” Bici byamurhabire ly’alembera? Adesire oku ngasi budufu embere agwishire, akag’isoka oku cigabi c’enyanya c’enyumpa yage  n’okusalira n’izu linene lugenda bintu birhanu avuzireko Yehova omunkwa mw’olo lusiku. Oko kwakag’irhuma arhaciyoboha bwenene kwanamushumya akayeresa Yehova oku aba amuzigire. Acibonera gurhi Yehova arhabalamwo abakozi bage bishwekerezi amango bali balwisa akanga kazibu, anahikira aha ahugûkwa oku emigisho rhujira omu kalamo kirhu yo minji kulusha amazibu garhuhikira. Aka Kyung-sook, rhugwerhe birhumire binji byakarhushumya rhube ba kuvuga Yehova omunkwa, ciru n’amango rhuli omu mazibu. Okumuvuga omunkwa kugerera isala kwanarhurhabala rhulembere n’okugendekera rhwarhulirira.

11. Bulya gurhi abanafunzi ba Yezu bal’ilagirire oku burhwali enyuma za Yezu okugaluka e mpingu?

¹¹ Okashenga Yehova akuhe oburhwali amango oli omu mukolo gw’amahubiri. Hisanzi hisungunu embere z’okugaluka e mpingu, Yezu akengeza abanafunzi bage lugenda omukolo gwabo gw’okuhâna obuhamirizi okubimuyerekire “omu Yeruzalemu, n’omu Yudeya yoshi, n’omu Samariya, na kuhika aha igulu lihekera.” (Ebj. 1:8; Lk. 24:46-48) Na kasanzi kasungunu enyuma z’aho, abakulu b’idîni ly’Eciyahudi bagwarha entumwa Petro na Yowane banabahêka embere z’e Sanhedrini, bahûna abo balume bishwekerezi oku baleke okuhubiri ciru banabayobohya. (Ebj. 4:18, 21) Gurhi Petro na Yowane bajijire?

12. Kushimbana n’Ebijiro by’Entumwa 4:29, 31, gurhi entumwa zajijire?

¹² Erhi abakulu b’idîni ly’Eciyahudi bayobohya entumwa, Petro na Yowane baderha ntya: “K’omu masu ga Nyamuzinda kukwanine okummuyumva kulusha Nnâmahanga? Mwêne mulutwage. Rhwehe oku bwirhu rhurhankahasha okurhaderha ebi rhwâbwine n’ebi rhwâyumvirhe.” (Ebj. 4:19, 20) Erhi Petro na Yowane bashwekulwa, abanafunzi basalira Yehova omw’izu linene ly’abarhabala bajire obulonza bwage. Basalira ntya: “Ohe abarhumisi bawe obuhashe bw’okuyigiriza akanwa kawe buzira bwoba.” Yehova ashuzize kw’er’isala lyabo basaliraga n’omurhima gwabo goshi.​—Osome Ebijiro by’Entumwa 4:29, 31.

13. Bici olwiganyo lwa Jin-hyuk lwakarhuyigiriza?

¹³ Rhwanayiga olwiganyo lw’abanafunzi ba Yezu omu kugendekera rhwahubiri ciru n’amango abarhegesi barhulahizize okujira ntyo. Rhuganirire olwiganyo lwa Jin-hyuk, mwene wirhu muguma washwekagwa enyanya z’okurhalunga okuboko oluhande loshi-loshi. Erhi ali omu prizo, ahabwa omukolo gw’okushibirira bashwekwa baguma na baguma bakag’iba bashwekirwe ngasi muguma omu cumpa cage yene, cikone arhal’iyemerirwe okubaganiza lugenda akantu koshi-koshi karhapatini n’ogo mukolo gwage, ciru arhakanabaganizize lugenda Ebibliya. Ashenga Yehova oburhwali n’obulenga ly’akolesa ngasi bulyo akag’ipata bw’okuganirira okuli. (Ebj. 5:29) Adesire ntya: “Yehova ashuza amasala gani omu kumpa oburhwali n’obwenge bw’okurhondeza mafunzo manji g’Ebibliya nakag’ilongoza omu miniti irhanu-irhanu oku nyumvi z’ebyumpa by’eprizo. Enyuma z’aho, ngasi budufu, nakag’iyandika amaruba naha abirhu bashwekwa olusiku lukulikire.” Nirhu rhwanayemera n’obwalagale oku Yehova arhurhabala lyo rhuhikiriza omukolo gwirhu gw’amahubiri. Aka Jin-hyuk, rhwanashenga Yehova oburhwali n’obwenge.

14. Bici byakarhurhabala amango rhuli rhwalwisa amazibu? (Ennanga 37:3, 5)

¹⁴ Okashenga Yehova oburhabale ly’olembera amango oli walwisa amazibu. Banji muli rhwe bali balwisa amazibu g’endwala erhi  g’ekandalala, okufîrwa n’omuzigirwa wabo, akanga kazibu omu mulala, okulibuzibwa erhi gandi mazibu. N’ebintu nk’endwala z’okuyahukira n’amavita byarhumire kwaba kuzibu bwenene okulembera ago mazibu. Okabwira Yehova ebikuli emurhima byoshi. Okamubwira lugenda akanga kawe nk’oku wakanabwira omwîra wawe wa hofi-hofi. Oyemere n’obwalagale oku Yehova “akurhabala.”​—Osome Ennanga 37:3, 5, Mashi Bible.

15. Gurhi isala lyakarhurhabala lyo ‘rhurhadundaganaga omu mango g’amalibuko’? Ohâne olwiganyo.

¹⁵ Okushenga burhahusa kwanarhurhabala ‘rhurhadundaganaga omu mango g’amalibuko.’ (Rm. 12:12) Yehova aba amanyire ebi abakozi bage bali balembera, “anayumve emirenge yabo.” (Enna. 145:18, 19) Painiya muguma ogwerhe myaka 29 ohamagalwa Kristie acibwinire oko. Amazibu madarhi g’endwala gamuhikira buzira kulaliza. Oko kwarhuma avunika omurhima bwenene. Buzinda ayumva oku nnina anavumbwirwemwo endwala y’okumuyirha. Kristie adesire ntya: “Nakasalira Yehova bwenene ampe emisi nal’ilagirireko ngasi lusiku. Najira okwani koshi lyo ngendekera naba n’eprograme nyinja y’ebintu by’ekiroho omu kuja oku ntimanano n’okujira ifunzo lyani niene.” Acibir’iderha ntya: “Isala lyantabire okulembera ako kasanzi kazibu. Nal’imanyire oku Yehova ali aha burhambi bwani ngasi mango, n’okumanya ntyo kwakantuliriza bwenene. Ciru akaba amazibu gani g’obulwala garhahwaga ho n’aho, Yehova ashuzize amasala gani omu kumpa omurhûla gw’ekandalala n’omurhima gurhulirire.” Rhurhayibagiraga ciru n’ehitya oku Yehova “yene amanyire okw’alikûza abantu bacîshwekîre kuli ye omu marhangulo.”​—2 Pt. 2:9, Mashi Bible.

16. Bulya gurhi rhulagirire oku burhabale bwa Yehova lyo rhuhima amarhangulo?

¹⁶ Okahûna Yehova oburhabale ly’ohima enshumi z’okujira ebintu bibi. Bulya rhurhali  bimana, ngasi mango rhunalwise enshumi z’okujira ebibi. Shetani anajire okwage koshi lyo kuba kuzibu bwenene kuli rhwe okulwisa ezo nshumi. Njira nguma asherezamwo entanya zirhu kuli kugerera ebintu bigalugalu by’okucishagalusa. Ebintu bya ntyo byanayunjuza entanya mbi omu bukengere bwirhu, ezo ntanya zanashereza obumuntu bwirhu bw’ekandalala zananarhuma rhwajira ecaha cizibu.​—Mk. 7:21-23; Yk. 1:14, 15.

17. Enyuma z’okushenga Yehova oburhabale, bici rhugwasirwe rhujire lyo rhuyaka enshumi z’okujira ebintu bibi? (Olole n’enfoto.)

¹⁷ Rhulagirire oku burhabale bwa Yehova lyo rhuhima enshumi z’okujira ebintu bibi. Omw’isala ly’olwiganyo, Yezu adesire oku rhukashenga ntya: “Orhanarhuhiraga omu mashumi, ci orhulikuze oku Mubi.” (Mt. 6:13) Yehova aba alonzize okurhurhabala, cikone rhugwasirwe rhumuhûne oburhabale. Kandi rhugwasirwe rhujire kushimbana n’amasala girhu. Rhwanajira okwirhu koshi lyo rhuyaka okusoma n’okuyumvirhiza entanya mbi bantu banji bajira mw’er’igulu lya Shetani. (Enna. 97:10) Rhwanayunjuza entanya nyinja omu bukengere bwirhu omu kusoma n’okuyiga Ebibliya. Kandi, okukaja oku ntimanano n’omu mukolo gw’amahubiri nako kwanarhurhabala rhulange entanya zirhu. Na Yehova arhulaganyize oku arhakaleka rhurhangulwe kulusha oku rhwakahash’ilembera.​—1 Kr. 10:12, 13.

18. Lugenda isala, bici rhweshi rhushinganine rhujire?

¹⁸ Ngasi muguma wirhu ashinganine akasalira bwenene kulusha embere lyo rhubêra bishwekerezi kuli Yehova muli zino nsiku nzinda ndarhi. Ngasi lusiku, okacihiriraho akasanzi k’okusalira n’omurhima goshi. Yehova alonzize ‘rhukamuhira kw’omurhima’ erhi kumuyigulira omurhima kugerera isala. (Enna. 62:8) Okakuza Yehova n’okumuvuga omunkwa kw’ebi ajira byoshi. Okamuhûna akurhabale ly’oba n’oburhwali bw’okujira omukolo gw’amahubiri. Okamusemberera akurhabale okulwisa amazibu goshi wakaba ogwerhe n’okuhagalika ngasi nshumi z’okujira ebintu bibi. Orhalekaga akantu koshi-koshi erhi omuntu yeshi-yeshi arhume orhasalira Yehova ngasi mango. Cikone, gurhigi Yehova ashuza amasala girhu? Rhwaganirira er’idoso ly’obulagirire omu cigabi cikulikire.