1. Mazibu gahi banji ba muli rhwe bajira?

 KA HALI amango wacihirireho omuhigo gw’ekiroho cikone wayabirwa okuguhikira? b Akaba ntyo, orhali wene. Kwa lwiganyo, Philip al’ilonzize okujira amasala gage gabe minja bwenene n’okukasalira ngasi mango, cikone akayabirwa okuba n’akasanzi k’okusalira. Erika al’igwerhe omuhigo gw’okukahika embere oku ntimanano y’amahubiri; ciru akaba ntyo, agendekera akacerehwa hofi oku ngasi ntimanano. Tomáš apimire kanji-kanji okusoma Ebibliya yoshi. Adesire ntya: “Ntal’ishagalukire okusoma Ebibliya. Napimire kasharhu, cikone ngasi mango nakacihangana okuhika oku citabu ca Bene-Levi na buzinda ndekere aho.”

2. Bulya gurhi rhurhashinganini rhuvunike omurhima erhi akaba hali omuhigo gw’ekiroho rhwacihirireho cikone rhurhaciguhikira?

² Erhi akaba hali omuhigo gw’ekiroho wacihirireho cikone orhaciguhikira, orhavunikaga omurhima. Ciru n’okuhikira omuhigo musungunu kanji-kanji kunahûne akasanzi n’obushiru bunji. Okubona oku olonzize okuhikira omuhigo gwawe kuyerekine oku onabone obwîra bwawe haguma na Yehova oku buli bwa bulagirire n’oku olonzize omukolere n’obuhashe bwawe boshi. Yehova anashagalukire obushiru bwawe. Kobinali, arhakakuhûna ojire ebirhalusire obuhashe bwawe. (Enna. 103:14; Mik. 6:8) Cikone oshinganine ocihirireho omuhigo gw’olugero, kushimbana n’akanga kawe. Enyuma z’okucihiriraho omuhigo, bici wakajira ly’oguhikira? Rhuganirirage mahano malebe.

3. Bulya gurhi okuba n’irala linji ly’okuhikira omuhigo gwawe kuli kwa bulagirire?

³ Okuba n’irala ly’okuhikira emihigo yawe y’ekiroho kuli kwa  bulagirire bwenene. Erhi akaba ojira irala linji ly’okuhikira omuhigo gwawe, wanajira okwawe koshi ly’oguhikira. Rhwanashushanya irala ly’okuhikira omuhigo gwirhu n’empusi esukuma e bato egendesibwa n’empusi ly’ehika emunda yaja. Erhi empusi yakagendekera yahusa, oli walongoza eyo bato anahika emunda ayerekire. N’erhi empusi yakaba nyinji, nkaba ciru anahika duba-duba. Ko n’oko, erhi akaba irala lirhu liri linji bwenene, ko rhwakanahikira duba emihigo yirhu. David, mwene wirhu muguma w’omu El Salvador adesire ntya: “Erhi wakaciyumva ogwerhe irala linji ly’okuhikira omuhigo gwawe, wanacihangana bwenene. Orhakalonza akantu ciru n’akaguma karhume orhahikira omuhigo gwawe.” Co cirhumire, gurhigi wakajira ly’ociyumva ogwerhe irala linji ly’okuhikira omuhigo gwawe?

4. Bici rhwakahira omu masala girhu? (Abafilipi 2:13) (Olole n’enfoto.)

⁴ Okahûna Yehova akuhe irala linji. Kugerera iroho lyage, Yehova anakuha irala ly’okuhikira omuhigo gwawe. (Osome Abafilipi 2:13.) Mango maguma na maguma rhunacihirireho omuhigo bulya rhumanyire oku rhushinganine rhujire ntyo, n’oko kuli kwinja. Cikone, nkaba kobinali rhwanaba rhurhagwerhi irala linji ly’okuguhikira. Ako ko kali kanga ka mwali wirhu Norina w’omu cihugo c’e Ouganda. Al’icihirireho omuhigo gw’okulongoza ifunzo ly’Ebibliya, ciru akaba arhal’igwerhe irala linji ly’okujira ntyo bulya akag’iciyumva nk’arhagwerhi obuhashe bw’okuba mwalimu mwinja. Bici byamurhabire? Adesire ntya: “Narhondera okuhûna Yehova ngasi lusiku antabale nyushule irala lyani ly’okulongoza ifunzo ly’Ebibliya. Kushimbana n’amasala gani, nacihangana okukubûla obulenga bwani bw’okuyigiriza. Enyuma za myezi misungunu, nabona oku nal’ikola ngwerhe irala linji ly’okulongoza ifunzo ly’Ebibliya. Mw’ogo mwaka go n’ogo narhondeza mafunzo abirhi g’Ebibliya.”

5. Bici rhwakarhanyako bwenene lyo rhuyushula irala ly’okuhikira omuhigo gwirhu?

⁵ Okarhanya bwenene kw’ebi Yehova akujirire. (Enna. 143:5) Paolo akag’irhanya bwenene oku lukogo lurhashinganinwi Yehova amuyeresire, n’oko kwamushumya ajire binji omu mukolo gwa Yehova. (1 Kr. 15:9, 10; 1 Tm. 1:12-14) Ko n’oko, erhi wakakarhanya bwenene kw’ebi Yehova akujirire, oko kwanakushumya obe n’irala linene ly’okuhikiriza omuhigo gwawe. (Enna. 116:12) Olole ebyarhabire mwali wirhu muguma w’omu Honduras ly’ahikira omuhigo gwage gw’okuba painiya w’akasanzi koshi. Adesire ntya: “Nakarhanya bwenene lugenda kunganaci Yehova aba anzigire. Antabire mbe muguma w’omu bantu bage. Ananshibirire n’okunnanga. Okurhanya bwenene kw’ebyo kwayushwire obuzigire bwani kuli ye kwanarhuma naba n’irala linji ly’okuhikira omuhigo gwani.”

6. Bindi bici byakarhurhabala lyo rhuyushula irala ly’okuhikira omuhigo gwirhu?

⁶ Osegeze obwenge oku migisho wakaba nayo omu kuhikira omuhigo gwawe. Olole ebyarhabire Erika, rhwaganiriraga embere ly’ahikira omuhigo gwage gw’okukahika embere oku ntimanano y’amahubiri. Adesire ntya: “Nahugûkwa oku okuhika enyuma oku ntimanano y’amahubiri kwakag’irhuma nabula binji bwenene. Cikone omu kuhika  embere, nakabire n’obulyo bw’okulamusa bene wirhu na bali birhu n’okugeza akasanzi haguma nabo. Kandi nakabire n’obulyo bw’okuyumvirhiza amahano g’obulagirire g’okuntabala nshagalukire omukolo gwani gw’amahubiri n’okugujira bwinja.” Erika asegize obwenge oku bunguke bw’okuhika embere, anahikira ogo muhigo gwage. Migisho ehi nawe wakasegezako obwenge? Erhi akaba omuhigo gwawe guli gwa kujira obusomi bw’Ebibliya erhi okujira amasala gawe gabe minja bwenene, okarhanya lugenda gurhi oko kwakasezamwo obwîra bwawe haguma na Yehova. (Enna. 145:18, 19) Erhi akaba omuhigo gwawe guli gwa kuyerekana borhere bulebe bw’Ecikristu, osegeze obwenge lugenda gurhi oko kwakakurhabala obe n’obwîra bwinja haguma n’abandi. (Kl. 3:14) Kwanaba kwinja ojire eliste y’ebirhumire olonzize okuhikira omuhigo gwawe. Okalola kw’eyo liste ngasi mango. Tomáš, rhwaganiriraga embere, adesire ntya: “Okuba na birhumire binji by’okuhikira omuhigo gwani, kwanarhuma nacihangana bwenene lyo nguhikira.”

7. Bici byarhabire Julio na mukage lyo bahikira omuhigo gwabo?

⁷ Okageza akasanzi haguma n’abantu bakakuha omurhima ly’ohikira omuhigo gwawe. (Mig. 13:20) Orhanye lugenda ebyarhabire Julio na mukage lyo bahikira omuhigo gwabo gw’okuyushula omukolo gwabo gw’amahubiri. Adesire ntya: “Rhwacishoga abîra bal’ilunzire okuboko omuhigo gwirhu, rhwanakaganirira ogo muhigo gwirhu haguma nabo. Banji mulibo bali bamahikira emihigo eshushine n’ogwirhu, muli ntyo bakarhuha amahano g’okurhurhabala. Kandi abîra birhu bakag’irhudosa gurhi emipango yirhu egendekire, banakag’irhuha omurhima amango rhwal’ilagirire oku kuhabwa omurhima.”

8. Gurhi byakaba erhi akaba rhunacihangane okuhikira omuhigo gwirhu amango gone rhuyumvirhe irala linji ly’okuguhikira? (Olole n’enfoto.)

⁸ Cikone, okuderha okuli, rhweshi hali ensiku rhuciyumva rhurhagwerhi irala linji ly’okuhikira emihigo yirhu. K’oko kuli kuderha oku rhurhakacihangana lyo rhuhikira omuhigo gwirhu? Nanga. Kwa lwiganyo: Empusi yanakola nka misi minene ly’esukuma ebato ehêkwa n’empusi ly’ehika emunda eyerekire. Cikone hali amango empusi eba nnene erhi nsungunu, hali n’ensiku empusi eba erhahali. Ka kuli kuderha oku oli walongoza eyo bato arhakagendekera? Nanga. Kwa lwiganyo, bato nguma na nguma zijira omotere; ezindi zijira engasi. Oli walongoza eyo bato anakolesa omotere erhi engasi ly’agendekera emunda ayerekire. Irala ly’okuhikira omuhigo gwirhu lyanashushanyizibwa n’empusi; hali ensiku rhwakaba rhugwerhe irala kulusha ezindi nsiku. N’ezindi nsiku rhwanaciyumva rhurhagwerhi irala lyoshi-lyoshi ly’okuhikira omuhigo gwirhu. Co cirhumire erhi rhwakakacihangana okuhikira omuhigo gwirhu amango gone rhuyumvirhe irala ly’okujira ntyo, nta lusiku rhwakaguhikira. Cikone nka kula oli watembeza ebato akolesa ezindi njira ly’ahika emunda ayerekire, rhwanajira okwirhu koshi lyo rhuhikira omuhigo gwirhu ciru n’amango rhurhayumvirhi irala linji ly’okuguhikira. Kobinali, oko kurhali kulembu. Ciru akaba ntyo,  wanashagaluka erhi wakahikira omuhigo gwawe. Embere rhuganirire ebi rhwakajira, rhurhang’iganirira idoso rhwakacidosa.

9. Ka kuli kubi okucihangana lyo rhuhikira omuhigo gwirhu ciru n’amango rhurhagwerhi irala linji ly’okujira ntyo? Ohugûle.

⁹ Yehova alonzize rhumukolere n’omwishingo n’obulonza. (Enna. 100:2; 2 Kr. 9:7) Co cirhumire, ka rhwanacihangana okuhikira omuhigo gwirhu gw’ekiroho erhi akaba rhurhayumvirhi irala linji ly’okujira ntyo? Orhanye oku lwiganyo lwa Paolo. Adesire ntya: “Ndi nakolesa omubiri gwani buzibu zibu nnangulibuzize bwenene.” (1 Kr. 9:25-27, Mashi Bible) Paolo akag’iciseza okujira ebintu binja ciru n’amango akag’iciyumva arhagwerhi irala ly’okubijira. Ka Yehova akag’ishagalukira ebi Paolo akag’ijira? Neci! Na Yehova amuhemba enyanya z’obushiru bwage.​—2 Tm. 4:7, 8.

10. Bunguke buhi rhwakaba nabo erhi rhwakakacihangana okuhikira omuhigo gwirhu ciru n’amango rhurhagwerhi irala linji ly’okuguhikira?

¹⁰ Ko n’oko, Yehova anashagaluke erhi abona rhuli rhwacihangana okuhikira omuhigo gwirhu ciru n’amango rhurhayumvirhi irala ly’okujira ntyo. Anashagaluke bulya ciru akaba ensiku zoshi nkaba rhurhajira ntyo enyanya z’obuzigire bwirhu kuli ogo mukolo, amanyire oku rhunabe rhuli rhwajira ntyo enyanya z’obuzigire bwirhu kuli ye. Nk’oku Yehova agishaga Paolo, nirhu agisha obushiru bwirhu. (Enna. 126:5) N’erhi rhwakabona gurhi Yehova ali arhugisha, rhwanacib’irhondera okuyumva irala linji ly’okuhikira omuhigo gwirhu. Mwali wirhu Lucyna w’omu cihugo c’e Pologne adesire ntya: “Hali amango nciyumva ntalonzizi okuja omu mahubiri, ci bwenene amango ntamire. Cikoki, omwishingo nyumva enyuma z’okuja omu mahubiri eba ngalo y’okusomeza.” Co cirhumire, lekagi rhubone bici rhwakajira amango rhurhagwerhi irala ly’okuhikira omuhigo gwirhu.

11. Gurhi Yehova akarhurhabalamwo lyo rhuzibuhya oborhere bwirhu bw’okucihasha?

¹¹ Okashenga Yehova oborhere bw’okucihasha. Okucihasha kuli kuhash’irhegeka ebijiro byawe n’oku ociyumva. Kanji-kanji olo luderho lunahâne entanya z’okucihanza okujira akantu kabi. Cikone kandi, rhuba rhulagirire oku borhere bw’okucihasha lyo rhujira ebintu binja, ci bwenene erhi akaba omukolo guli muzibu erhi kandi rhurhagwerhi irala linji ly’okugujira. Okengere oku, okucihasha ciba cigabi c’ilehe ly’iroho litagatifu, co cirhumire okashenga Yehova iroho litagatifu lyo likurhabala obe n’obo borhere bw’obulagirire. (Lk. 11:13; Gl. 5:22, 23) David, rhwaganiriraga embere, ahugwîre gurhi isala lyamurhabire. Al’ilonzize akajira ifunzo lyage yene ngasi mango. Adesire ntya: “Nakag’ishenga Yehova antabale lyo mba n’oborhere bw’okucihasha. Kugerera oburhabale bwage, narhangira eprograme nyinja y’ifunzo nanakalijira ngasi mango.”

12. Gurhi akanuni kali omu lwandiko lw’Omuhanûzi 11:4 kakarhurhabala rhuhikire emihigo yirhu y’ekiroho?

¹² Orhalindaga mpu kuhika obe n’ehali nyinja bwenene. Mw’er’igulu, nta lusiku rhwakaba n’ehali nyinja bwenene. Erhi rhwakalinda mpu rhube n’ehali nyinja bwenene, nta mango rhwakahikira omuhigo gwirhu. (Osome Omuhanûzi 11:4.) Mwene wirhu muguma ohamagalwa Dayniel adesire ntya: “Harhaba ehali nyinja bwenene. Co cirhumire rhurhakazilinda, rhushinganine rhurhondere kone.” Mwene wirhu Paul w’omu cihugo c’e Ouganda ayerekine ecindi cirhumire cakarhuma rhwarhondera buzira kulegama. Adesire ntya: “Erhi rhurhangira ciru akaba hali amazibu, Yehova anarhurhabale.”​—Mal. 3:10.

13. Bunguke buhi rhwakaba nabo erhi rhwakarhangira n’emihigo misungunu?

¹³ Orhangire n’emihigo misungunu. Nkaba rhwanabula irala ly’okuhikira omuhigo gwirhu bulya gubonekine nka guli muzibu bwenene okuhikira. Akaba ko kanga kawe ako, ka wanagaba omuhigo gwawe omu mihigo misungunu-ngunu? Akaba omuhigo gwawe guli gwa kuba na borhere bulebe, bulya gurhi orhakacihangana okurhang’iyerekana obo borhere omu njira nsungunu-ngunu? Akaba omuhigo gwawe guli gwa kusoma Ebibliya yoshi, bulya gurhi orhakarhangira omu kupanga  orhusanzi rhusungunu rhusungunu rhw’okusoma Ebibliya? Tomáš, rhwaganiriraga oku murhondero gw’eci cigabi, al’igwerhe amazibu g’okuhikira omuhigo gwage gw’okusoma Ebibliya omu mwaka muguma. Adesire ntya: “Nahugûkwa oku ebi nakag’icipangira okusoma byali binji. Co cirhumire nahiga okucibipima, cikone lero, napanga okukasoma milongo misungunu y’ecigabi c’Ebibliya ngasi lusiku n’okurhanya bwenene kuli yo. Oko kwarhuma narhondera okushagalukira obusomi bwani bw’Ebibliya.” Erhi Tomáš’ aj’ashagalukira bwenene obusomi bw’Ebibliya, ayushula akasanzi kage k’okusoma Ebibliya. Ahikira okusoma Ebibliya yoshi. c

14. Bici byakakuhikira byakarhuma kwaba kuzibu kuli we okuhikira omuhigo gwawe?

¹⁴ Eby’okugayisa, kuli kubona oku ciru rhwakaba rhugwerhe irala linji erhi oborhere bw’okucihasha, hanaba ebintu byakarhuma kwaba kuzibu okuhikira omuhigo gwirhu. Kwa lwiganyo, “obuhanya [erhi bintu rhurhal’irhanyizeko, NWT]” bwanarhuma rhwabula akasanzi rhulagirireko lyo rhuhikira omuhigo gwirhu. (Muh. 9:11) Rhwanahikirwa n’amazibu gakarhuma rhwaciyumva rhuvunisire omurhima n’okunyihya emisi yirhu. (Mig. 24:10) Bulya rhurhali bimana, rhwanajira amagosa gakarhuma kwaba kuzibu bwenene kuli rhwe okuhikira omuhigo gwirhu. (Rm. 7:23) Erhi kandi rhwanaciyumva rhurhamire. (Mt. 26:43) Bici byakarhurhabala lyo rhuhima ebintu byakarhuma rhurhahikira omuhigo gwirhu?

15. Erhi bintu bilebe byakaba byakarhuma kwaba kuzibu kuli rhwe okuhikira omuhigo gwirhu, ka ko kuderha oku rhuyabirwe okuguhikira? Ohugûle. (Ennanga 145:14)

¹⁵ Okengere oku erhi hakaba akantu kakarhuma kwaba kuzibu okuhikira omuhigo gwawe kurhali kuderha oku oyabirwe okuguhikira. Ebibliya edesire oku rhwanarhimanana n’amazibu kanji-kanji. Cikone kandi, eyerekine n’obwalagale oku rhwanacihangana okuhikira omuhigo gwirhu, bwenene oku burhabale bwa Yehova. (Osome Ennanga 145:14.) Mwene wirhu Philip, rhwaganiriraga embere, adesire ntya: “Ntasegeza obwenge oku  kasanzi nyabirwa okuhikira omuhigo gwani. Cikone nambusegeze oku kasanzi ncib’irhondera okucihangana lyo ncib’ihikira omuhigo gwani.” David, rhwaganiriraga embere, adesire ntya: “Ntabona ebintu birhuma kwaba kuzibu kuli nie okuhikira omuhigo gwani nka bihanzo, cikone nancihangane okubibona nka bulyo bw’okuyeresa Yehova kunganaci mba muzigire.” Kobinali, omu kugendekera embere ciru akaba hali amazibu gakarhuhanza okuhikira omuhigo gwirhu, rhunayerese Yehova oku rhulonzize okumushagalusa. Yehova agwasirwe abe anashagaluke bwenene erhi abona ogendekire wacihangana ly’ohikira omuhigo gwawe!

16. Erhi hakaba akantu kakarhuma rhurhahikira omuhigo gwirhu, bici kakarhuyigiriza?

¹⁶ Akantu kakarhuma orhahikira omuhigo gwawe kanakuyigiriza binji. Orhanye lugenda ebyalerhaga ako kantu, onacidose ntya: ‘Gurhi nakajira ly’ebi birhacibig’impikira?’ (Mig. 27:12) Cikone, mango maguma na maguma erhi hakaba ebintu byakarhuma kwaba kuzibu kuli rhwe okuhikira omuhigo gwirhu, oko kwanayerekana oku ogo muhigo gurhali gwa lugero nk’oku rhwal’irhanyize. Erhi wakabona oku nkaba ntyo ko biri omu kanga kawe, wanacib’irhanya lugenda ogo muhigo ly’obona erhi guciri gwa lugero kuli we. d Yehova arhakubone oku oli wa busha erhi wakayabirwa okuhikira omuhigo orhagwerhi obuhashe bw’okuhikira.​—2 Kr. 8:12.

17. Bulya gurhi rhushinganine rhukakengera ebi rhwamakahikiriza?

¹⁷ Okakengera ebi wamakahikiriza. Ebibliya edesire oku “Nyamuzinda arhali mubula burhondekezi [erhi bushinganyanya] mpu ayibagira ebijiro binyu.” (Hb. 6:10) Co cirhumire nawe orhashinganini oyibagire ebi wajijire. Okarhanya kw’ebi wamakahikiriza, kwa lwiganyo nk’okujira obwîra haguma na Yehova, okuganirira abandi oku bimuyerekire, erhi okubatizibwa. Nk’oku wajijire amajambere n’okuhikira emihigo y’ekiroho omu mango gageraga, wanagendekera wajira amajambere kuhika ohikire omuhigo gwawe.​—Fl. 3:16.

18. Bici rhushinganine rhukakengera okujira amango rhuli rhwacihangana okuhikira omuhigo gwirhu? (Olole n’enfoto.)

¹⁸ Kugerera oburhabale bwa Yehova, wanahikira omuhigo gwawe, nk’oku omuntu olongoza ebato ehêkwa n’empusi ashagaluka erhi ahika emunda ayerekire. Cikone kandi, okengere oku bantu banji balongoza ebato zihêkwa n’empusi kandi banashagalukire omubalamo. Ko n’oko, amango oli wagendekera wacihangana ly’ohikira omuhigo gwawe gw’ekiroho, orhayibagiraga okushagaluka omu kubona gurhi Yehova ali akurhabala n’okukugisha omu mango oli wacihangana okuguhikira. (2 Kr. 4:7) Erhi akaba orharhamiri, wayish’ihabwa ciru migisho minji bwenene.​—Gl. 6:9.