ECIGABI C’OKUYIGA CA 19
LWIMBO 22 Ufalme Unatawala—Tunasali Ukuye!
Bici Rhumanyire Lugenda oku Yehova Atwiramwo Abantu Olubanja Amango Gayisha?
“Nyakasane [Yehova, NWT] . . . arhalonza hajire owahera.”—2 PT. 3:9.
EBI ECI CIGABI CISEGIZE
Oku rhwakayemeramwo n’obwalagale oku enjira za Yehova z’okutwa emanja omu mango gayisha zaba za bushinganyanya.
1. Bulya gurhi rhwanaderha oku rhulamire omu mango g’okushagalusa?
RHULAMIRE omu mango g’okushagalusa! Ngasi lusiku, rhuli rhwacibonera oku obulebi buli omu Bibliya buli bwahikirira. Kwa lwiganyo, rhuli rhwabona oku “omwami w’e Mwené (Nord)” n’“omwami w’e mukondwé (Sud)” bali balwira okurhegeka igulu. (Dan. 11:40) Rhuli rhwabona oku omwanzi mwinja gw’Obwami bwa Mungu guli gayalizibwa kulusha agandi mango goshi, n’emiliyoni y’abantu eri yaguyankirira. (Iz. 60:22; Mt. 24:14) Rhunali rhwahâbwa biryo binji by’ekiroho “omu mango gashinganine.”—Mt. 24:45-47, NWT.
2. Bici rhwakayemera n’obwalagale, cikone bici rhugwasirwe rhuhugûkwe?
2 Yehova agendekire arhurhabala rhuhugûkwe bwinja-bwinja ebintu by’obulagirire byajirikana hano hofi-hofi. (Mig. 4:18; Dan. 2:28) Rhwanayemera n’obwalagale oku, kuhika amango amalibuko madarhi garhondera, rhwayish’imanya ebi rhulagirireko okumanya byoshi lyo rhulembera n’obwishwekerezi n’okugendekera rhwabêra omu cinyabuguma mw’ago mango mazibu. Cikone, rhugwasirwe rhuyemere oku hali bintu biguma na biguma rhurhamanyiri lugenda amango gayisha gali hofi-hofi. Mw’eci cigabi, rhwarhang’iganirira bulya gurhi rhwajijire empindûlo okubiyerekire ebi rhwadesire lugenda bintu biguma na biguma byaba omu mango gayisha. Buzinda rhwaganirira bintu biguma na biguma rhumanyire lugenda amango gayisha n’oku Larha wirhu w’omu mpingu ayish’ijira.
EBI RHURHAMANYIRI
3. Bici rhwadesire embere okubiyerekire amango Yehova ayusa obulyo bw’abantu okucilunga haguma na nirhu, na bici byarhumire rhwaderha ntyo?
3 Embere rhwadesire oku, hano amalibuko madarhi garhondera, nta muntu orhali mwemezi wayish’iba n’obuhashe bw’okuja eluhande lwa Yehova n’okuyokoka ivita lya Harmagedoni. Rhwadesire ntyo, bulya rhwal’ihugûsirwe oku omwanzi guganirire Ecihonzi guyerekine ebyaba omu mango gayishi. Kwa lwiganyo, rhwarhanyize oku nk’oku Yehova ayigalaga olumvi embere Ecihonzi cirhondere, “ayish’iyigala olumvi” lw’igulu lya Shetani oku murhondero gw’amalibuko madarhi, na muli ntyo nta wundi muntu wakaciba n’obulyo bw’okuyokoka—Mt. 24:37-39.
4. Ene, ka rhucishinganine rhubone oku ngasi kantu kabire omu mango g’Ecihonzi kashushanyize kantu kalebe kaba omu mango gayisha? Ohugûle.
4 Ka rhushinganine rhubone oku ngasi kantu kabire omu mango g’Ecihonzi kashushanyize kantu kalebe kaba omu mango gayisha? Ishuzo liri nanga. Bulya gurhi? Bulya nta lwandiko luyerekine ntyo n’obwalagale. a Yezu ashushanyize “amango ga Nuhu” n’amango g’okubaho kwage, cikone arhaderhaga oku Ecihonzi cal’ishushanyize ebyaba omu mango gayisha, oku ngasi muntu na ngasi kantu kabire kal’ishushanyize kantu kalebe kaba omu mango gayisha; arhanaderhaga oku okuyigalwa kw’olumvi lw’esafina kushushanyize kantu kalebe kaba omu mango gayisha. Ciru akaba ntyo, oko kurhayerekini oku rhurhakaciyigiriza kantu kalebe kugerera omwanzi guganirire Nuhu n’Ecihonzi.
5. (a) Bici Nuhu ajijire embere Ecihonzi cirhondere? (Abahabraniya 11:7; 1 Petro 3:20) (b) Okubiyerekire omukolo gw’okuhubiri, gurhi ogwa Nuhu gushushinemwo n’ogwirhu ene?
5 Erhi Nuhu ayumva omwanzi gwa Yehova gw’oburhonde, ayerekana oku al’igwerhe obuyemere omu kuyubaka enkugè erhi safina. (Osome Abahabraniya 11:7; 1 Petro 3:20.) Ko n’oko, abantu bayumva omwanzi mwinja gw’Obwami bwa Mungu bashinganine bakolese ebi bayumvirhe. (Ebj. 3:17-20) Petro ahamagire Nuhu “muja-bugo [erhi muhubiri] w’obushinganyanya.” (2 Pt. 2:5) Cikone, nk’oku rhwabonaga omu cigabi c’embere, rhurhamanyiri erhi Nuhu ajijire akampanye k’okuhubiri ly’ahikira ngasi muntu wal’ilamire okw’igulu embere z’Ecihonzi. Ene rhuli rhwajira omukolo gw’okuhubiri omw’igulu lyoshi, rhunali rhwacihangana okugujira n’obushiru. Cikone cirhu rhwakajira gurhi, rhurhakaba n’obuhashe bw’okuhubiri ngasi muntu okw’igulu embere obuzinda buyishe. Bulya gurhi?
6-7. Bulya gurhi rhwanaderha oku rhurhakahash’ihubiri ngasi muntu okw’igulu embere obuzinda buyishe? Ohugûle.
6 Rhuganirire ebi Yezu adesire lugenda aha omukolo gwirhu gw’okuhubiri gwakahisire. Alebire oku, omwanzi mwinja gwakayalizibwe “omw’igulu lyoshi, lyo buba buhamirizi oku bantu b’amashanja goshi.” (Mt. 24:14, NWT) Obo bulebi buli bwahikirizibwa ene kulusha agandi mango goshi. Omwanzi gw’Obwami guli gwayalizibwa omu ndimi zilushire 1000, na kugerera esite y’e Enternete jw.org, hofi abantu boshi b’omw’igulu banagupata.
7 Cikone, kandi Yezu abwizire abanafunzi bage oku ‘barhâyuse okugera omu bishagala byoshi [erhi ngo zoshi],’ erhi kuhubiri ngasi muntu, embere ayishe. (Mt. 10:23, Mashi Bible; 25:31-33) Enderho za Yezu zahikirira muli gano mango girhu. Ene, emiliyoni y’abantu elamire omu maeneo omukolo gw’okuhubiri guhirirhweho bihanzo binji. Na kandi, amagana g’abana gali gaburhwa ngasi muniti. Rhuli rhwajira okwirhu koshi lyo rhuhubiri abantu ba “ngasi bûko, na ngasi lulimi, na ngasi ishanja.” (Maf. 14:6) Cikone okuderha okuli, rhurhabe n’obuhashe bw’okuhubiri ngasi muntu okw’igulu embere obuzinda buyishe.
8. Idoso lihi rhwakacidosa lugenda enjira za Yehova z’okutwa emanja omu mango gayisha? (Olole n’enfoto.)
8 Oko kwanarhuma rhwacidosa ntya: Gurhigi byaba lugenda abantu barhabe n’obulyo bw’okuyumva omwanzi mwinja embere amalibuko madarhi garhondere? Gurhi Yehova n’Omugala, ahîre omukolo gw’okutwa olubanja, bayish’ibajirira? (Yn. 5:19, 22, 27; Ebj. 17:31) Olwandiko lw’omusingi lw’eci cigabi ludesire oku Yehova “arhalonza hajire owahera.” Cikone, alonzize “boshi baciyunjuze.” (2 Pt. 3:9; 1 Tm. 2:4) Nk’oku rhwabonaga, rhugwasirwe rhuyemere oku Yehova arhacirhufululira ebi ayish’ijira ly’ashuza kw’er’idoso. Okuderha okuli, arhasezibwi arhubwire ngasi kantu lugenda ebi ajijire erhi ebi ayish’ijira.
Gurhi Yehova ayish’ijirira abantu boshi barhabe n’obulyo bw’okuyumva omwanzi mwinja embere amalibuko madarhi garhondere? (Olole ecifungo ca 8) c
9. Bici Yehova arhufululire omu Bibliya?
9 Omu Kanwa kage, Yehova arhufululire bintu biguma na biguma ayish’ijira. Kwa lwiganyo, Ebibliya erhubwizire oku Yehova ayish’ifûla “abarhali bashinganyanya” barhabaga n’obulyo bw’okuyumva omwanzi mwinja n’okushanja akalamo kabo. (Ebj. 24:15; Lk. 23:42, 43) Oko kudwirhe agandi madoso g’obulagirire.
10. Gandi madoso gahi rhwakacidosa?
10 K’abantu boshi bafâ omu mango g’amalibuko madarhi basherezibwa loshi buzira bulangalire bw’obufûke? Amandiko gayerekine oku abantu bahagalika Yehova n’obwalagale, Yehova ayish’ibashereza haguma n’emirhwe yabo oku Harmagedoni, barhayish’ifûlwe. (2 Ts. 1:6-10) Cikone, gurhigi lugenda abantu bafâ omu mango g’amalibuko madarhi nkaba enyanya z’endwala n’obushosi erhi abafâ omu aksida erhi kunigwa n’abandi bantu? (Muh. 9:11; Zak. 14:13) Ka bantu baguma na baguma muli bo banaba omu ‘barhali bashinganyanya’ bayish’ifûlwa omw’igulu lihyahya? Rhurhamanyiri.
EBI RHUMANYIRE
11. Bici byayish’iyerekana oku abantu batwirwa olubanja oku Harmagedoni?
11 Rhumanyire bintu bilebe lugenda ebyaba omu mango gayisha. Kwa lwiganyo, rhumanyire oku, oku Harmagedoni abantu bayish’itwirwa olubanja kushimbana n’oku bajirire bene wabo Kristu. (Mt. 25:40) Abayish’iba bayerekine oku balunzire okuboko Abakristu bashige amavurha na Kristu bayish’itwirwa olubanja nka bibuzi. Rhunamanyire oku bene wabo Kristu bayish’iba baciri hanw’igulu enyuma z’amalibuko madarhi okurhondera, n’oku bayish’ihêkwa empingu hisanzi hisungunu embere ivita lya Harmagedoni lirhondere. Amango goshi bene wabo Kristu baba baciri hanw’igulu, abantu b’emirhima minja baba n’obulyo b’okubalunga okuboko n’omukolo bali bajira. (Mt. 25:31, 32; Maf. 12:17) Bulya gurhi eyo myanzi eri ya bulagirire?
12-13. Nkaba gurhi baguma na baguma bayish’ijira enyuma z’okubona obushereze bwa “Babiloni mukulu? (Olole n’enfoto.)
12 Ciru n’enyuma z’okurhondera kw’amalibuko madarhi, byanahashikana oku bantu baguma na baguma babona okusherezibwa kwa “Babiloni mukulu” bayish’ikengera oku hagezire myaka minji Abahamirizi ba Yehova bali baderha oku oko kwanabe. Ka bantu baguma na baguma bayish’ibona ebyo byajirikana bayish’iba n’obuyemere muli Yehova?—Maf. 17:5; Eze. 33:33.
13 Erhi byakaba ntyo, oko kwanashushana n’ebyabaga omu cihugo c’e Misri omu siku za Musa. Rhukengere oku “engabo erhali nyi y’abantu ba ngasi lubero” yacilunzire n’Abaisraheli erhi barhenga e Misri. (Lub. 12:38) Baguma na baguma barhondire okuba n’obuyemere muli Yehova erhi babona ebi Musa arhondaga lugenda Amahanya Ikumi byahikirira. Erhi byakaba ntyo enyuma z’okusherezibwa kwa Babiloni mukulu, ka rhwanavunika omurhima okubona abantu bamaba n’obulyo bw’okucilunga haguma na nirhu hisanzi hisungunu embere obuzinda buhike? Nanga ciru n’ehitya! Rhulonzize rhuyerekane obumuntu bwa Larha wirhu w’omu mpingu oba “Nnâmahanga w’olukogo n’obwonjo, orhakunîra duba onaba wa buzigire bunji bwishwekerezi n’okuli.” b—Lub. 34:6.
Byanahashikana oku bantu baguma na baguma bayish’ibona okusherezibwa kwa “Babiloni mukulu” bayish’ikengera oku hagezire myaka minji Abahamirizi ba Yehova bali baderha oku oko kwanabe (Olole ecifungo ca 12-13) d
14-15. K’obuzine bw’omuntu bw’ensiku n’amango buyegemire amango alamire erhi ahantu alamire? Ohugûle. (Ennanga 33:4, 5)
14 Hali amango rhwakayumva mwene wirhu erhi mwali wirhu aderha ntya: “Kwanaba kwinja omuntu w’omu mulala gwani afê embere amalibuko madarhi garhondere bulya haba hali obulangalire bw’obufûke.” Ezo nderho zanashumibwa n’entanya nyinja. Cikone, akalamo k’ensiku n’amango k’omuntu karhayegemiri amango afîre. Yehova ye ba muzuzi mwimana, emihigo yage eba ya bushinganyanya ensiku zoshi. (Osome Ennanga 33:4, 5.) Rhwanayemera n’obwalagale oku “omuzuzi w’er’igulu lyoshi” ajira ebishinganine.—Murh. 18:25.
15 Kandi bipatine n’obwenge okuderha oku akalamo k’ensiku n’amango k’omuntu karhayegemiri ahantu alamire. Birhayumvikini oku Yehova anatwira olubanja emiliyoni y’abantu elamire omu bihugo birhasag’iba n’obulyo bw’okuyumva omwanzi mwinja gw’Obwami oku ziri “mpene.” (Mt. 25:46) Omuzuzi mushinganyanya w’er’igulu lyoshi aba ashibirire abo bantu ciru bwenene kurhulusha. Rhurhamanyiri gurhi Yehova ayish’ilongoza ebyajirikana omu mango g’amalibuko madarhi. Nkaba baguma na baguma muli abo bantu bayish’iba n’obulyo bw’okuyiga lugenda Yehova, okuba n’obuyemere muli ye, n’okuja eluhande lwage amango acêsa izino lyage embere z’amashanja goshi.—Eze. 38:16.
Enyuma z’okurhondera kw’amalibuko madarhi, . . . ka bantu baguma na baguma bayish’ibona ebyo byajirikana bayish’iba n’obuyemere muli Yehova?
16. Bici rhwahikire okumanya lugenda Yehova? (Olole n’enfoto.)
16 Kugerera ifunzo lirhu ly’Ebibliya, rhwahikire okumanya kunganaci Yehova abona obuzine bwa bene bantu oku buba bwa ngulo ndarhi. Ahânyire obuzine bw’Omugala lyo rhweshi rhuba n’obulangalire bw’obuzine bw’ensiku n’amango. (Yn. 3:16) Rhweshi rhunaciyumve oku Yehova arhuzigire. (Iz. 49:15) Aba amanyire izino lya ngasi muguma wirhu. Aba amanyire ngasi muguma muli rhwe bwinja-bwinja na ciru rhwakafâ anarhufûla bulya amanyire ngasi kantu okubirhuyerekire na ngasi kantu kali omu bukengere bwirhu! (Mt. 10:29-31) Okuderha okuli, rhugwerhe ecirhumire c’okuyemera n’obwalagale oku Larha wirhu w’obuzigire w’omu mpingu ayish’itwira ngasi muguma wirhu olubanja lwimana omu njira y’olugero, ya bushinganyanya na ya lukogo.—Yk. 2:13.
Rhwanayemera n’obwalagale oku Yehova ayish’itwira ngasi muntu olubanja lwimana, omu njira y’olugero, ya bushinganyanya na ya lukogo (Olole ecifungo ca 16)
17. Bici rhwaganirira omu cigabi cikulikire?
17 Ago mahugûlo mahyahya garhumire rhwabona oku omukolo gwirhu gw’okuhubiri guli gwa kujira duba-duba kulusha agandi mango goshi. Bulya gurhi rhwakaderha ntyo? Na bici birhushumya rhugendekere rhwahubiri omwanzi mwinja burhahusa? Rhwaganirira amashuzo g’ago madoso kwa buliri omu cigabi cikulikire.
LWIMBO 76 Sema Vile Unajisikiaka
a Ly’obona amahugûlo gayerekine bulya gurhi eyo mpindûlo yajijirwe, olole ecigabi cidesire “Ndiyo Njia Iliyokubaliwa Nawe” omu Ilabiro ly’Akalalizi ly’omu nsiku 15/3/2015 buk. 7-11 (Omu Ciswahiri c’e Congo).
b Enyuma z’okusherezibwa kwa Babiloni mukulu, abakozi ba Yehova boshi bayish’irhangulwa amango g’ecirhero ca Gogi w’Amagogi. Ngasi yeshi wayish’icilunga n’Abahamirizi ba Yehova enyuma z’okusherezibwa kwa Babiloni mukulu naye ayish’irhangulwa.
c AMAHUGÛLO G’ENFOTO : Hali isharhu ziyerekine bulya gurhi nkaba bantu baguma na baguma barhabe n’obulyo bw’okuhikirwa n’omwanzi mwinja: (1) Omukazi olamire ahantu idîni linene ligandazize limuhizire omu murhego gw’okurhayumva omwanzi mwinja, (2) omulume na mukage balamire ahantu oburhegesi bw’epolitike buliho bulahizize omukolo gwirhu gw’okuhubiri, na (3) omulume olamire omu eneo eri kulî bwenene n’omukolo gwirhu gurhakahikamwo.
d AMAHUGÛLO G’ENFOTO: Mukazi muguma ociri musole walesire okuli, amakengera ebi ayizire lugenda okusherezibwa kwa “Babiloni mukulu.” Amashanja omurhima n’okugaluka emw’ababusi bage Bakristu. Erhi ebintu bya ntyo byakahika, rhulonzize rhube aka Larha wirhu w’omu mpingu oba wa lukogo na wa bwonjo n’okushagaluka okubona omunya-byaha amagaluka.