ECIGABI C’OKUYIGA CA 21
LWIMBO 107 Tuonyeshe Upendo Kama Mungu
Oku Wakapatamwo Omulume Erhi Omukazi Waja Naye omu Buhya
“Omukazi nkana [w’obuhashe] ndi wankamubona? Agwerhe ecitwîro cilushire ec’amagerha.”—MIG. 31:10.
EBI ECI CIGABI CISEGIZE
Cisegize amakanuni g’Ebibliya gakarhabala omuntu ly’apata omulume erhi mukazi mwinja na gurhi abandi omu cigamba bakarhabala abalamba balonzize okuja omu buhya.
1-2. (a) Bici Omukristu ociri mulamba ashinganine arhanyeko embere arhondere okusheba? (b) Bici “okushebana” kuhugwîre? (Olole “Amahugûlo ga Luderho Luguma.”)
K’OLI walonza okuja omu buhya? Ciru akaba obuhya burhali bwa bulagirire ly’omuntu aba n’omwishingo, Bakristu banji baciri balamba, babe baciri misole erhi bakola bakuzire, banalonze omulume erhi mukazi bakaja naye omu buhya. Kobinali, embere orhondere okusheba, oshinganine obe ocirheganyize okubiyerekire eby’ensaranga, omu hali y’ekiroho n’ey’ekandalala. a (1 Kr. 7:36) Erhi wakajira ntyo, oko kwanakuhashisa obe n’omwishingo omu buhya bwawe.
2 Cikone, ensiku zoshi kurhaba kulembu okupata omulume erhi omukazi oshinganine okuja naye omu buhya. (Mig. 31:10) Na ciru amango obwine omuntu wakalonza mumanyane naye bwinja, nkaba kurhakaba kulembu okurhondeza okushebana. b Mw’eci cigabi, rhwaganirira ebyakarhabala Abakristu baciri balamba okupata omulume erhi omukazi baja naye omu buhya n’okurhondeza okushebana. Na kandi, rhwabona gurhi abandi omu cigamba bakarhabala abali balonza okuja omu buhya.
OKU WAKAPATAMWO OMULUME ERHI MUKAZI MWINJA
3. Bintu bihi Omukristu ociri mulamba ashinganine arhanyeko lugenda omuntu arhôlana naye?
3 Erhi akaba oli walonza okuja omu buhya, kuli kwinja orhang’imanya amorhere olonzize omuntu waja naye omu buhya abe nago embere orhondere okusheba. c Erhi akaba orhajijiri ntyo, wanagayaguza omuntu wakarholine naye, erhi orhondere okusheba omuntu orhakushinganini bwinja. Okuderha okuli, omuntu yeshi-yeshi wakarhôlana naye ashinganine abe Mukristu obatizibwe. (1 Kr. 7:39) Cikone, arhali ngasi Mukristu obatizibwe wakaba mulume erhi mukazi mwinja kuli we. Co cirhumire oshinganine ocidose ntya: ‘Emihigo yani eri ehi omu kalamo? Morhere gahi nakalonza oku muntu nakaja naye omu buhya? Ka ndi nalonza ebintu birhalusire olugero?’
4. Bici Bakristu baguma na baguma baciri balamba bahizire omu masala gabo amango bali balonza omuntu barhôlana naye?
4 Erhi akaba oli walonza okuja omu buhya, buzira karhinda washenzire lugenda oko. (Fl. 4:6) Kobinali, Yehova arhalaganyizi omuntu yeshi-yeshi oku amulongeza omulume erhi omukazi barhôlana naye. Cikone anashibirire amalagirire gawe n’oku oli waciyumva, ananakurhabala amango oli walonza okupata omulume erhi omukazi mwinja. Co cirhumire, ogendekere wamubwira ebi olonzize n’oku oli waciyumva. (Enna. 62:8) Omuhûne obulembedu n’obwenge. (Yk. 1:5) John, d mwene wirhu muguma ociri mulamba w’e États-Unis, ahugwîre ebi ahira omu masala gage: “Nambwire Yehova amorhere nonzize omuntu narhôlana naye abe nago. Nanshenge lugenda obulyo bw’okurhimanana n’omuntu narhôlana naye. Na kandi, nanshenge Yehova antambale nkuze amorhere gakarhuma naba mulume mwinja.” Tanya, mwali wirhu muguma w’e Sri Lanka, adesire ntya: “Omu mango ndi nalonza okupata omulume, nampûne Yehova antabale ngendekere nabêra mwishwekerezi, ngendekere naba n’entanya nyinja n’omwishingo.” Na ciru akaba orhapatiri duba omuntu warhôlana naye, Yehova alaganyize oku agendekera ashibirira amalagirire gawe g’omubiri n’ag’ekandalala.—Enna. 55:22.
5. Omu bulyo buhi Abakristu baciri balamba kakarhimananamwo n’omuntu ozigire Yehova? (1 Abakorinti 15:58) (Olole n’enfoto.)
5 Ebibliya erhuhire omurhima oku ‘rhukazija embere [rhube na binji bya kujira, NWT] omu mukolo gwa Nyakasane.’ (Osome 1 Abakorinti 15:58.) Amango ogendekire waba na binji bya kujira omu mukolo gwa Yehova n’okugeza akasanzi haguma na bene wirhu na bali birhu bali lubero, orhashagalukire kone okugeza akasanzi haguma nabo, cikone kandi waba n’obulyo bw’okurhimanana n’abandi bene wirhu na bali birhu baciri balamba, basegize obwenge bwabo oku mukolo gwa Yehova akawe. N’amango ogendekire wajira okwawe koshi ly’oshagalusa Yehova, waba n’omwishingo gw’okunali.
Erhi wakagendekera wajira binji omu mukolo gwa Yehova n’okugeza akasanzi haguma n’Abakristu bali lubero, nkaba wanabuganana n’abandi balonzize okuja omu buhya (Olole ecifungo ca 5)
6. Amango Omukristu ociri mulamba ali alonza oyu arhôlana naye, bici ashinganine akengere?
6 Cikone, obe masu lugenda oku: Orhalekaga okulonza omuntu warhôlana naye kabe ko kantu k’obulagirire bwenene omu kalamo kawe. (Fl. 1:10) Obwîra bwawe haguma na Yehova bo bwakakulerhera omwishingo gw’okunali, cikone arhali okuja omu buhya erhi okuba mulamba. (Mt. 5:3) N’amango ociri mulamba, wanaba na luhuma lunji lw’okujira binji omu mukolo gw’amahubiri. (1 Kr. 7:32, 33) Okolese bwinja ako kasanzi. Jessica, mwali wirhu muguma w’e États-Unis, waherukaga erhi akola agwerhe hofi myaka 40, adesire ntya: “Nagendekire naba na binji bya kujira omu mukolo gw’amahubiri, n’oko kwantabala ngendekere narhimukwa ciru akaba nal’ilonzize okuheruka.”
ORHÔLE AKASANZI K’OKULABIRIZA OYO MUNTU
7. Bulya gurhi kuli kwinja okurhôla akasanzi k’okulabiriza omuntu embere omubwire oku omusimire? (Emigani 13:16)
7 Gurhi wakajira erhi akaba orhanyize oku muntu mulebe anaba mulume erhi mukazi mwinja? K’oshinganine obwire oyo muntu duba-duba oku oli waciyumva? Ebibliya edesire oku omuntu w’obwenge analonze okuba n’obumanye embere ajire kantu kalebe. (Osome Emigani 13:16.) Co cirhumire kuli kwa bwenge okulabiriza omuntu kasanzi kalebe buzira kumumanyisa embere omubwire oku omusimire. Aschwin w’omu Pays-Bas, adesire ntya: “Amasime ganayisha duba-duba cikone kandi ganahwa duba-duba, co cirhumire, erhi wakaciha akasanzi k’okulabiriza muntu mulebe orhakarhondera wamusheba enyanya z’oku oli waciyumva kone kwakahwa omu kasanzi kalebe.” Na kandi, amango oli walabiriza omuntu, nkaba wanabona oku arhali ye mulume erhi mukazi mwinja kuli we.
8. Gurhi Omukristu ociri mulamba akalabirizamwo omuntu akalonza arhôlane naye? (Olole n’enfoto.)
8 Gurhi wakalabirizamwo omuntu buzira kumumanyisa? Oku ntimanano z’ecigamba erhi amango murhimanine n’abandi, nkaba wanabona bintu bilebe lugenda ehali y’ekiroho y’oyo muntu, amorhere gage n’olugenzi lwage. Bandi baba bîra bage, na bici aganirira? (Lk. 6:45) K’emihigo yage epatine n’eyawe? Nkaba wanaganiza abagula b’omu cigamba cage erhi abandi Bakristu bakuzire kiroho bamumanyirire bwinja. (Mig. 20:18) Wanabadosa lugenda irenge ly’oyo muntu n’amorhere gage. (Rut. 2:11) Amango oli walabiriza oyo muntu, omanye orharhumaga aciyumva kubi. Okenge oku ali aciyumva, orhanalonzagya okumanya ngasi kantu okubimuyerekire.
Embere obwire muntu mulebe oku omusimire, orhôle akasanzi k’okumulabiriza buzira kumumanyisa (Olole ecifungo ca 7-8)
9. Embere oyegere omuntu wakalonza orhôlane naye, bici oshinganine oyemere n’obwalagale?
9 Kasanzi kanganaci oshinganine okulabiriza oyo muntu embere omubwire oku omusimire? Erhi wakabwîra muntu mulebe duba-duba, wanabonekana nka oba muntu orhôla emihigo buzira kurhanya. (Mig. 29:20) Oku bundi, erhi wakajira kasanzi kanji, wanabonekana nk’oba muntu oyabirwa okurhôla omuhigo, bwenene erhi akaba oyo muntu ahugûsirwe oku omusimire. (Muh. 11:4) Okengere oku, embere oyegere muntu mulebe, orhalagiriri oku kuyemezibwa n’obwalagale oku oyo muntu ye mwarhôlana naye. Cikone, oshinganine oyemere n’obwalagale oku oli tayari lugenda obuhya n’oku oyo muntu anaba mulume erhi mukazi mwinja kuli we.
10. Bici oshinganine ojire erhi wakabona oku muntu mulebe asimisibwe na nawe cikoki wehe orhasimisibwi naye?
10 Gurhigi wakajira erhi wakahugûkwa oku muntu mulebe asimisibwe na nawe? Erhi akaba wehe orhali waciyumva oku osimisibwe naye, ocihangane okuyerekana ntyo n’obwalagale kugerera ebijiro byawe. Kurhakaba kwinja okujira muntu mulebe arhanye oku hanaba obulyo bw’okurhondeza obwîra n’obo arhali ntyo kobiri.—1 Kr. 10:24; Ef. 4:25.
11. Omu bihugo abandi bajirirana emipango y’obuhya erhi y’okusheba, bici bashinganine barhanyeko?
11 Omu bihugo biguma na biguma, ababusi erhi abantu bakola bakuzire banahûnwa bashebere abantu b’omu milala yabo baciri balamba. Omu bindi bihugo, emilala erhi abîra banalongeza ociri mulamba omuntu bashebana naye na buzinda banajira emipango ly’omulume n’omukazi barhimanana balole erhi bapatine. Erhi wakahûnwa ojirire omulume n’omukazi emipango y’okushebana erhi kurhôlana, orhanye oku malagirire gabo bombi n’oku bintu basima bombi. Erhi wakabona muntu mulebe wakaba mulume erhi mukazi mwinja oku mwîra erhi muntu w’omu mulala gwawe, ocihangane omanye binji lugenda obumuntu bwage, amorhere gage, na kulusha byoshi, ehali yage y’ekiroho. Obwîra bwa hofi-hofi haguma na Yehova, bo bw’obulagirire bwenene kulusha ensaranga, amasomo erhi ecikono omuntu akaba agwerhe. Cikone okengere oku, mwene wirhu ociri mulamba na mwali wirhu ociri mulamba, bo bashinganine barhôle omuhigo muzinda lugenda erhi barhôlona erhi nanga.—Gl. 6:5.
OKU WAKARHONDERA WASHEBAMWO
12. Erhi wakabona oku osimire okushebana na muntu mulebe, gurhi wakamumanyisamwo ntyo?
12 Erhi wakalonza orhondere washebana na muntu mulebe, gurhi wakamubwiramwo oku omusimire? e Wanajira emipango lyo muba n’enganîro haguma n’oyo muntu aha nafasi y’abantu banji erhi kugerera etelefone. Omubwire n’obwalagale ebi olonzize. (1 Kr. 14:9) Akaba kuli kwa bulagirire, olekere oyo muntu akasanzi k’okurhanya lugenda oku akushuza. (Mig. 15:28) N’erhi akaba oyo muntu arhasimisibwi n’obo bwîra, okenge entanya zage.
13. Gurhi wakajira erhi muntu mulebe akakubwira oku akusimire? (Abakolosi 4:6)
13 Gurhigi erhi muntu mulebe akakubwira oku akusimire? Nkaba byahûnyire oyo muntu abe n’oburhwali ly’akuyegera, co cirhumire obe wa lukogo na wa bukenge. (Osome Abakolosi 4:6.) Erhi akaba olagirire oku kasanzi ly’obona erhi wayemera okurhondera mwashebana n’oyo muntu, omubwire. Cikone ocihangane okuhâna ishuzo duba-duba nk’oku byakanahashikana. (Mig. 13:12) Erhi akaba orhamusimiri, omubwire ntyo omu njira y’obwalagale na ya bukenge. Olole gurhi Hans, mwene wirhu muguma w’omu cihugo c’e Austrie, ajijire erhi mwali wirhu mulebe amubwira oku amusimire: “Namubwira omuhigo gwani omu njira y’obukenge cikone ya bwalagale. Najijire ntyo buzira kulegama bulya ntalonzagya muhe obulangalire bw’obunywesi. Na kandi, nakaba masu lyo ntaderhaga erhi kujira akantu kakarhumire arhanya oku nashanjire entanya zani.” Oku bundi, erhi akaba olonzize okushebana n’oyo muntu, omuganirire entanya zawe n’ebi olonzize mujire mw’ako kasanzi mwaba muli mwashebana. Ebi olonzize byanaba lubero n’eby’owundi muntu, kushimbana n’enkomedu yage erhi ebindi bintu.
GURHI ABANDI BAKARHABALAMWO ABAKRISTU BACIRI BALAMBA?
14. Gurhi rhwakarhabalamwo Abakristu baciri balamba kugerera enderho zirhu?
14 Gurhi rhweshi rhwakarhabalabamwo Abakristu baciri balamba balonzize okuja omu buhya? Njira nguma kuli kuba masu lugenda ebi rhuderha. (Ef. 4:29) Rhwanacidosa ntya: ‘Ka nanjire izala n’abantu balonzize okuja omu buhya? Erhi nakabona mwene wirhu ociri mulamba na mwali wirhu ociri mulamba bali baganira, ka ho n’aho nantanye oku bali bashebana?’ (1 Tm. 5:13) Na kandi, rhurhashinganini rhujire Abakristu baciri balamba barhanye oku hali kantu kalebe babulirwe nako bulya kone barhacija omu buhya. Hans, rhwaganiriraga embere, adesire ntya: “Bene wirhu baguma na baguma banandose erhi, ‘Mwana bici ociri walinda, k’omanyire mpu eburho washubira?’ Enderho za ntyo zanarhuma abaciri balamba barhanya oku barhasimirwi, zananarhuma baciyumva oku basezibwe bwenene okuja omu buhya.” Kuli kwinja bwenene okulonza obulyo bw’okuvuga Abakristu baciri balamba omunkwa!—1 Ts. 5:11.
15. (a) Kushimbana n’akanuni kali omu Abaroma 15:2, bici rhushinganine rhurhanyeko embere rhurhabale omuntu okupata oyu arhôlana naye? (Olole n’enfoto.) (b) Masomo gahi g’obulagirire wayizire kugerera eyo video? (Olole amahugûlo g’idako.)
15 Gurhigi erhi wakarhanya oku mwene wirhu mulebe na mwali wirhu mulebe banajira omulala mwinja? Ebibliya erhubwizire oku rhushinganine rhukashibirira entanya z’abandi. (Osome Abaroma 15:2.) Bene wirhu na bali birhu banji baciri balamba barhasima babarhondegeze obwîra, rhunashinganine rhukenge obulonza bwabo. (2 Ts. 3:11) Abandi banashagalukira oburhabale, cikone rhurhashinganini rhujire ntyo barhanarhuhûnyire oburhabale. f (Mig. 3:27) Bene wirhu na bali birhu balebe baciri balamba, baba basimire babarhondegeze obwîra omu njira erhali ya bwalagale bwenene. Lydia, mwali wirhu muguma w’omu Allemagne, adesire ntya: “Kwanaba kwinja okuhamagala mwene wirhu na mwali wirhu omu cigusho cinene c’abantu. Wanajira kone habe obulyo bwa mwene wirhu na mwali wirhu okurhimanana, buzinda obalekere oluhya.”
Omu cigusho c’abantu banji, Abakristu baciri balamba banaba n’obulyo bw’okurhimanana (Olole ecifungo ca 15)
16. Bici Abakristu baciri balamba bashinganine bakengere?
16 Rhweshi, rhube rhuciri balamba erhi rhwajire omu buhya, rhwanaba n’akalamo k’omwishingo na ka kurhimusa! (Enna. 128:1) Co cirhumire akaba olonzize okuja omu buhya cikone orhacipata omuntu waja naye omu buhya, ogendekere wasegeza obwenge bwawe oku mukolo gwawe kuli Yehova. Mwali wirhu muguma w’e Macao ohamagalwa Sin Yi, adesire ntya: “Akasanzi wageza oli mulamba kali kasungunu bwenene erhi wakakagerera oku kasanzi wageza na balo erhi mukawe omu paradizo. Oshagalukire ako kasanzi onakakolese bwinja.” Cikone gurhigi erhi akaba wapatire oyu mwarhôlana naye mwanarhondire okushebana? Omu cigabi cikulikire, rhwaganirira oku mwakashebana omu njira y’okulerhera Yehova obukuze.
LWIMBO 137 Wanamuke Wenye Imani
a Ly’omanya erhi oli tayari okuja omu buhya, olole oku jw.org ecigabi cidesire “Urafiki wa Kimapenzi—Sehemu ya 1: Je, Niko Tayari Kuanzisha Urafiki wa Kimapenzi?”
b AMAHUGÛLO GA LUDERHO LUGUMA: Mw’eci cigabi n’ecikulikire, “okushebana” kuhugwîre amango omulume n’omukazi bamanyana bwinja lyo bahiga erhi bapatine okuja omu buhya erhi nanga. Omu bihugo bilebe, oko kuhugwîre amango g’okumanyana erhi g’okujira obwîra bw’amasime. Okushebana kunarhondere erhi omulume n’omukazi bayerekana n’obwalagale oku basimine kunanagendekere kuhika amango bahiga okuja omu buhya erhi okuyusa okushebana.
c Omu kutwa bofofi, ebifungo bikulikire biyerekire bwenene bene wirhu. Cikone amakanuni galimwo ganakola na kuli bali birhu.
d Mazino maguma na maguma gashanjirwe.
e Omu nkomedu ndebe, kanji-kanji mwene wirhu ye yegera mwali wirhu lyo barhondera okushebana. Ciru akaba ntyo, kurhali kubi erhi mwali wirhu akaba ye murhanzi okuyegera mwene wirhu. (Rut. 3:1-13) Ly’obona myanzi minji lugenda oko, olole ecigabi cidesire “Vijana Huuliza . . . Nitamwambiaje Jinsi Ninavyohisi?” omu Amuka! y’omu nsiku 22/10/2004 (omu Ciswahiri).
f Olole oku jw.org evideo edesire Bahashire Okulwira Obuyemere Bwabo—Abakristu Balamba.
