ECIGABI C’OKUYIGA CA 18
LWIMBO 1 Sifa za Yehova
Olangalire “Omuzuzi w’er’Igulu Lyoshi” w’Olukogo!
“Omuzuzi w’er’igulu lyoshi bushinganyanya akolêsa.”—MURH. 18:25, Mashi Bible.
EBI ECI CIGACI CISEGIZE
Carhurhabala rhuhugûkwe bwinja olukogo lwa Yehova n’obushinganyanya bwage lugenda obufûke bw’abantu barhali bashinganyanya.
1. Isomo lihi ly’okurhuliriza Yehova ayigirizize Abrahamu?
ZALI nganîro Abrahamu arhakayibagire ciru n’ehitya. Kugerera malahika, Mungu abwira Abrahamu oku akola ashereza loshi-loshi evile ya Sodoma na Gomora. Oko kwabulisa oyo mulume mushinganyanya omurhûla. Aderha ntya: “Orhankahash’ijira ntyo, n’okuj’iyirha abashinganyanya haguma n’ababi . . . Omuzuzi w’er’igulu lyoshi bushinganyanya akolêsa.” Omu njira y’obulembedu, Yehova ayigiriza oyo mwîra wage muzigirwa er’isomo lirhudwirhire obunguke n’okurhurhuliriza rhweshi: Nta mango Mungu akashereza abantu bashinganyanya.—Murh. 18:23-33, Mashi Bible.
2. Bici birhuyemezize n’obwalagale oku enjira za Yehova z’okutwa emanja ziba za bushinganyanya na za lukogo?
2 Bulya gurhi rhwanayemera n’obwalagale oku enjira za Yehova z’okutwa emanja ziba za bushinganyanya na za lukogo? Bulya rhumanyire oku “Nyamubaho yehe murhima abona.” (1 Sam. 16:7) Kobinali, ayishi “omurhima gw’abantu boshi.” (1 Bam. 8:39; 1 Nga. 28:9) Oko kuli kwa kusomeza. Yehova aba wa bwenge bwenene kurhulusha, co cirhumire ensiku zoshi rhurhakahash’ihugûkwa bulya gurhi arhôzire mihigo milebe. Entumwa Paolo yadesire ntya lugenda Yehova Mungu: “Emihigo yage erhamanyikana.”—Rm. 11:33.
3-4. Bici rhwakacidosa mango maguma na maguma, na bici rhwaganirira mw’eci cigabi? (Yowane 5:28, 29)
3 Ciru akaba ntyo, hali amango rhwakaderha enderho ziri nk’ezi Abrahamu aderhaga. Nkaba rhwanacidosa ntya: ‘Ka hali obulangalire boshi-boshi lugenda abantu Yehova atwiraga olubanja, kwa lwiganyo nk’abantu b’omu Sodoma n’e Gomora? Ka byanahashikana baguma muli bo babe n’“obufûke bw’ . . . abarhali bashinganyanya”?’—Ebj. 24:15, NWT.
4 Lekagi rhuganirire kwa bofofi ebi rhuba rhuhugûsirwe lugenda obufûke. Rhwazindig’ihâbwa amahugûlo mahyahya lugenda abantu “bafûkire obuzine” n’abantu “bafûkire olubanja.” a (Osome Yowane 5:28, 29.) Ago mahugûlo mahyahya galongozize oku zindi mpindulo omu nyigirizo zirhu. Rhwaganirira ezo mpindulo mw’eci cigabi n’omu cigabi cikulikire. Lugenda enjira za Yehova nshinganyanya z’okutwa emanja, burhangiriza rhwaganirira ebi rhumanyire n’ebi rhurhamanyiri.
EBI RHURHAMANYIRI
5. Bici ebicapo birhu byadesire omu mango gageraga lugenda abantu basherezibagwa omu Sodoma na Gomora?
5 Omu mango gageraga, ebicapo birhu byaganirire ebihikira aba Yehova atwira olubanja oku barhali bashinganyanya. Rhwadesire oku abantu ba ntyo basherezibwe na Yehova nk’abantu b’e Sodoma n’e Gomora barhagwerhi bulangalire bw’obufûke. Cikone okucib’ijira isala n’okuyiga bwenene kwadwirhe er’idoso, Ka kobinali rhwanaderha ntyo n’obwalagale?
6. Ohâne nyiganyo ndebe z’abantu Yehova atwiraga olubanja oku barhali bashinganyanya, na bici rhurhamanyiri?
6 Rhuganirire nyiganyo ndebe ziri omu Bibliya. Myanzi milebe y’Ebibliya eba eganirire emanja Yehova atwiraga abantu barhali bashinganyanya, nk’omubalè gurhamanyikini gw’abantu bafâga amango g’Ecihonzi, erhi amashanja nda g’omu Cihugo c’Amalaganyo Yehova ahûnaga abantu bage oku bashereze, erhi abasoda Baasiriya 185000 malahika anigaga omu budufu buguma bone. (Murh. 7:23; Lush. 7:1-3; Iz. 37:36, 37) Lugenda eyo myanzi, k’Ebibliya erhuhîre mahugûlo manji gakarhuma rhwaderha oku Yehova atwirire abo bantu boshi olubanja lw’obuhererekeze bw’ensiku n’amango, buzira bulangalire bw’obufûke? Nanga, Ebibliya erhahânyiri mahugûlo manji. Bulya gurhi rhudesire ntyo?
7. Bici rhurhamanyiri lugenda abantu basherezibagwa amango g’Ecihonzi erhi abasherezibagwa amango Abaisraheli bagwarhaga ecihugo c’e Kanani? (Olole eri oku cijalada.)
7 Rhurhamanyiri gurhi Yehova atwirire ngasi muntu olubanja; rhurhanamanyiri erhi abo bantu banigagwa babire n’obulyo bw’okuyiga lugenda Yehova n’okuciyunjuza. Lugenda amango g’Ecihonzi, Ebibliya edesire oku Nuhu ali “muja-bugo [erhi muhubiri] w’obushinganyanya.” (2 Pt. 2:5) Cikone erhadesiri oku amango akag’iyubaka esafina nnenene, kandi acihanganyire okuganira na ngasi muntu okw’igulu. Ko n’oko, lugenda amashanja g’omu Kanani, rhurhamanyiri erhi abantu babi boshi babire n’obulyo bw’okuyiga lugenda Yehova n’okushanja olugenzi lwabo.
Nuhu n’abantu b’omulala gwage bali bayubaka esafina nnenene. Rhurhamanyiri erhi Nuhu ajijire akampanye k’okuhubiri kapanzirwe bwinja amango akag’iyubaka esafina ly’ahubiri abantu boshi okw’igulu embere Ecihonzi cirhondere (Olole ecifungo ca 7)
8. Bici rhurhamanyiri lugenda Abantu b’e Sodoma n’e Gomora?
8 Gurhigi lugenda abantu b’e Sodoma n’e Gomora? Omulume mushinganyanya wakag’ihamagalwa Loti akag’ilama egarhi kabo. Cikone, ka rhumanyire erhi Loti abire n’obulyo bw’okubahubiri boshi? Nanga. Kobinali bali bantu babi, cikone ka ngasi muguma muli bo al’imanyire ebinja n’ebibi? Okengere oku ecigusho c’abalume b’omu vile y’e Sodoma balonzagya okubaka ebigolo bya Loti. Ebibliya edesire oku eco cigusho c’abantu babi cacipanga “kurhenga oku misole kuhika oku bashosi.” Oko kuyerekine oku boshi bal’ikulire ahantu bal’ikomire olugenzi lubi bwenene byananahashikana oku barhabaga n’obulyo bw’okuyiga lugenda amakanuni ga Mungu okubiyerekire ebinja n’ebibi. (Murh. 19:4; 2 Pt. 2:7) Ka kobinali rhumanyire erhi Yehova, Mungu w’olukogo, atwirire ngasi muguma muli bo olubanja lw’olufû buzira bulangalire bw’obufûke? Yehova ayemezize Abrahamu n’obwalagale oku harhali ciru bantu ikumi bashinganyanya mw’eyo vile. (Murh. 18:32) Muli ntyo, barhali bashinganyanya, na Yehova agwerhe ehaki y’okubashereza enyanya z’ebijiro byabyo. Ka rhwanaderha buzira karhinda oku nta muguma muli bo wayish’ifûlwa omu ‘bufûke bw’ . . . abarhali bashinganyanya’? Nanga, rhurhakaderha ntyo n’obwalagale!
9. Bici rhurhamanyiri lugenda Solomoni?
9 Oku bundi, kandi rhunasome omu Bibliya lugenda abantu bashinganyanya bahikire okuba barhali bashinganyanya. Mwami Solomoni ali muguma muli bo. Al’iyigirizibwe bwinja-bwinja enjira za Yehova na Yehova al’imugishire bwenene; cikone buzinda, arhondera okuharamya bamungu b’obunywesi. Ebyaha byage byagayisa Yehova bwenene byanarhuma ishanja ly’Abaisraheli lyalibuka omu magana g’emyaka. Kobinali, Amandiko gadesire oku Solomoni “agend’igwishira aha burhambi bwa bashakuluza bage,” bahiziremwo abantu bishwekerezi nka Mwami Daudi. (1 Bam. 11:5-9, 43; 2 Bam. 23:13) Cikone, k’enjira abishagwamwo eyerekine oku ayish’ifûlwa? Ntaco Ebibliya edesire lugenda oko. Cikone, hali abakarhanya oku Solomoni ayish’ifûlwa bulya Ebibliya edesire oku “owafîre erhi afumire ecaha.” (Rm. 6:7) Cikone oko kurhali kuderha oku abafîre boshi bayish’ifulwa, nka kuno akalamo kahyahya eri haki bagwerhe. Obufûke eri ngalo kurhenga emwa Nnâmahanga w’obuzigire. Anayihe abantu alonzize babe n’obulyo bw’okumukolera ensiku n’amango. (Ayu. 14:13, 14; Yn. 6:44) Ka Solomoni anahâbwe eyo ngalo? Yehova ye omanyire ishuzo; rhwehe rhurhamanyiri. Cikone rhumanyire oku Yehova ayish’ijira ebishinganine.
EBI RHUMANYIRE
10. Gurhi Yehova aciyumva lugenda okushereza abantu? (Ezekiyeli 33:11) (Olole n’enfoto.)
10 Osome Ezekiyeli 33:11. Yehova arhuyeresire gurhi aciyumva lugenda oku atwiramwo abantu olubanja. Omu kulongozibwa n’iroho litagatifu, entumwa Petro yagalukire ebi omulebi Ezekiyeli ayandikaga omu kuderha ntya: “Nyakasane [Yehova, NWT] . . . arhalonza hajire owahera.” (2 Pt. 3:9) Kugerera oko okuli kw’okuhâna omurhima, rhumanyire oku Yehova arhaba mubidu okushereza abantu loshi-loshi. Aba wa lukogo lunji bwenene, ananayerekane olukogo lwage ngasi mango bihashikine okujira ntyo.
Amango g’obufûke bw’abarhali bashinganyanya, bantu banji bwenene bali lubero bayish’ihâbwa obulyo bw’okuyiga lugenda Yehova (Olole ecifungo ca 10)
11. Bandi barhayish’ifûlwe, na gurhi rhumanyiremwo ntyo?
11 Bici rhumanyire lugenda abantu barhakafûlwa? Ebibliya eganirire nyiganyo nsungunu zone. b Yezu ayerekine oku Yuda Iskariote arhakafûlwa. (Mk. 14:21; olole na Yowane 17:12 n’amahugûlo g’ifunzo omu Bibliya y’Ifunzo y’Ecifaransa.) Yuda al’imanyire oku ebi ajiraga byal’ipingine n’obulonza bwa Yehova n’Omugala, cikone abijira. (Olole Marko 3:29 n’amahugûlo g’ifunzo omu Bibliya y’Ifunzo y’Ecifaransa.) Ko n’oko, Yezu adesire oku birongozi biguma na biguma by’amadîni byakag’imuhagalika byakafîre buzira bulangalire bw’obufûke. (Mt. 23:33; olole Yowane 19:11 n’amahugûlo g’ifunzo omu Bibliya y’Ifunzo y’Ecifaransa “l’homme.”) N’entumwa Paolo yarhonzire oku abagoma barhaciyunjuzizi barhakafûlwa.—Hb. 6:4-8; 10:29.
12. Bici rhumanyire lugenda olukogo lwa Yehova? Ohâne enyiganyo.
12 Cikone, bici rhumanyire lugenda olukogo lwa Yehova? Gurhi ayerekinemwo oku “arhalonza hajire owahera”? Gurhi ayeresiremwo bantu baguma na baguma bajiraga ebyaha bizibu olukogo lwage? Mwami Daudi ajijire ebyaha bizibu bihiziremwo obugonyi n’obunizi. Cikone Daudi aciyunjuza, na Yehova amubabalira enyanya z’olukogo lwage. (2 Sam. 12:1-13) Mwami Manasé ajijire mabi manji omu cigabi cinene c’akalamo kage. Ciru na muli ako kanga k’obubi bwenene, Yehova ayerekana olukogo lwage anababalira Manasé bulya al’iciyunjuzize. (2 Nga. 33:9-16) Ezo nyiganyo zirhukengezize oku Yehova anayerekane olukogo lwage ngasi mango erhi akabona oku hali ecirhumire c’okujira ntyo. Ayish’ifûla abo bantu ba ntyo bulya bahugûsirwe oku bajijire ebyaha bizibu bwenene banaciyunjuza.
13. (a) Bici byarhumire Yehova ayeresa abantu b’e Ninawi olukogo? (b) Bici Yezu adesire enyuma z’aho lugenda abantu b’e Ninawi?
13 Kandi rhumanyire oku Yehova ayeresire Abaninawi olukogo lwage. Mungu abwira Yona ntya: “Obubi bwabo bwahisire emunda ndi.” Cikone, erhi baciyunjuza ebyaha byabo, Yehova ababalira abo bantu enyanya z’olukogo lwage. Ayerekana lukogo lunji bwenene kulusha Yona. Mungu al’igwasirwe akengeze oyo mulebi wage wal’igayire oku abo Baninawi bali bantu “barhishi okulyo kwabo, barhishi okulembe kwabo.” (Yon. 1:1, 2; 3:10; 4:9-11) Enyuma z’aho, Yezu akolesize olo lwiganyo ly’ayigiriza lugenda obushinganyanya bwa Yehova n’olukogo lwage. Yezu adesire oku abantu b’e Ninawi bal’iciyunjuzize “omu lusiku lw’Okutwa olubanja . . . bayimanga.”—Mt. 12:41, Mashi Bible.
14. Gurhi abantu b’e Ninawi ‘bafûkiremwo olubanja’?
14 Okuderha oku “omu lusiku lw’Okutwa olubanja” abantu b’e Ninawi “bayimanga” ko kuderha gurhi? Yezu ayigirizize lugenda ‘abafûkire olubanja’ omu mango gayisha. (Yn. 5:29) Yezu akag’iganirira Oburhegesi bwage bw’Emyaka Cihumbi, amango “abashinganyanya n’abarhali bashinganyanya” bayish’ifûlwa. (Ebj. 24:15) Oku barhali bashinganyanya, oko kwayish’iba ‘kufûkira olubanja.’ Kuli kuderha oku, enyuma z’okufûlwa kw’abo bantu, Yehova na Yezu bayish’ilabiriza olugenzi lwabo n’okulola erhi bali barhumikira ebi bayigirizibwa n’okubikolesa. Erhi omuntu w’e Ninawi wayish’ifûlwa akalahira okucilunga omu nterekêro ecîre, Yehova arhayish’imuleke agendekere alama. (Iz. 65:20) Cikone balya boshi bayish’icishoga okuharamya Yehova n’obwishwekerezi, olubanja lwabo lwayish’iba lwinja. Bayish’iba n’obulangalire bw’okulama ensiku n’amango!—Dan. 12:2.
15. (a) Bulya gurhi rhurhashinganini rhuderhe oku ntaye wanafûke omu bantu basherezibagwa omu Sodoma na Gomora? (b) Gurhi rhwakahugûkwa enderho ziri omu Yuda 7? (Olole ecisanduku cidesire “ Bici Yuda Alonzagya Okuderha?”)
15 Erhi Yezu ali aganira lugenda abantu b’e Sodoma n’e Gomora, adesire oku kwaba kulembu kuli bo “olusiku lw’olubanja” kulusha abandi bantu bamulahiraga n’enyigirizo zage. (Mt. 10:14, 15; 11:23, 24; Lk. 10:12) Gurhi alonzagya okuderha? Nkaba rhwanarhanya oku mw’ako kanga Yezu akag’ikolesa enderho z’olwiganyo zihamagalwa hyperbole. Cikone bibonekine oku ezo zirhali nderho za lwiganyo, arhanakolesagya enderho z’olwiganyo erhi aganirira abantu b’e Ninawi. c Lubero n’oko, bibonekine oku ebi Yezu aderhaga byali by’okunali. “Olusiku lw’olubanja” aganiriraga mw’ako kanga kombi lwali lo n’olo. Ak’abantu b’e Ninawi, abantu b’e Sodoma n’e Gomora nabo bajijire ebintu bibi. Cikone abantu b’e Ninawi bohe babire n’obulyo bw’okuciyunjuza. Kandi, okengere ebi Yezu aderhaga lugenda ‘abafûkire olubanja.’ Abo bantu bahiziremwo “abajizire amabi.” (Yn. 5:29) Co cirhumire bibonekine oku hanaba hali bulangalire bulebe lugenda abantu b’e Sodoma n’e Gomora. Byanahashikana oku bantu belebe muli abo bantu bayish’ifûka, nkaba rhwananabe n’obulyo bw’okubayigiriza lugenda Yehova na Yezu Kristu.
16. Bici rhumanyire lugenda oku Yehova ayish’icishogamwo ndi wafûka? (Yeremiya 17:10)
16 Osome Yeremiya 17:10. Olo lwandiko lurhurhabire okuhugûkwa kwa bofofi ebi rhumanyire lugenda enjira ya Yehova y’okutwa emanja: ensiku zoshi Yehova aba ye n’olya, ‘anasingirize omurhima n’okuyenja ensiko.’ Lugenda obufûke bw’amango gayisha, ‘ayish’igabira ngasi muguma nk’oku ebijiro byage binakwanine,’ ntyo ko anayorha ajira. Omu kuhiga erhi afûla muntu mulebe erhi nanga, Yehova ayish’ikulikira bwinja-bwinja amakanuni gage g’obushinganyanya cikone kandi ayish’iba mubidu okuyerekana olukogo amango hali ecirhumire c’okujira ntyo. Co cirhumire, rhurhakaderha oku muntu mulebe arhayish’ifûke amango rhurhamanyiri n’obwalagale oku Ebibliya okudesire!
“OMUZUZI W’ER’IGULU LYOSHI BUSHINGANYANYA AKOLÊSA”
17. Gurhi byayish’iba lugenda abantu bafîre?
17 Kurhenga amango Adamu na Eva bacilungaga na Shetani n’okugomera Yehova Mungu, emiliyoni y’abantu yamakafâ. “Omushombanyi . . . Lufû,” asarwire bwenene! (1 Kr. 15:26) Gurhi byayish’iba lugenda abo bantu boshi? Omubalè musungunu gw’abanafunzi bishwekerezi ba Kristu, ko kuderha bantu 144 000 bayish’ifûlwa lyo bahâbwa obuzine burhakafâ empingu. (Maf. 14:1) Omubalè munene bwenene gw’abalume n’abakazi bishwekerezi bal’izigire Yehova bayish’ifûka amango gw’“obufûke bw’ . . . abashinganyanya,” banayish’ilama ensiku n’amango okw’igulu erhi bakagendekera babêra bashinganyanya omu mango g’Oburhegesi bwa Kristu bw’Emyaka Cihumbi n’amango g’irhangulo lizinda. (Dan. 12:13; Hb. 12:1) Kandi, omu Burhegesi bwa Kristu bw’Emyaka Cihumbi, “abarhali bashinganyanya,” bahiziremwo abantu barhakoleraga Yehova ciru n’ehitya erhi ciru n’“abajizire amabi,” bayish’ihâbwa obulyo bw’okushanja olugenzi lwabo n’okuba bakozi ba Yehova bishwekerezi. (Lk. 23:42, 43) Cikone, bantu baguma na baguma bali babi bwenene, bal’ihirize okuhagalika Yehova n’emihigo yage, na muli ntyo ahizire oku nta bufûke kuli bo.—Lk. 12:4, 5.
18-19. (a) Bici rhwakayemera n’obwalagale lugenda oku Yehova anatwiremwo abantu bafîre olubanja? (Izaya 55:8, 9) (b) Bici rhwaganirira omu cigabi cikulikire?
18 Ka rhwanayemera n’obwalagale oku erhi Yehova atwira abantu olubanja, ensiku zoshi anarhôle omuhigo mwinja? Neci! Nk’oku Abrahamu al’ihugûsirwe bwinja, Yehova ye ‘muzuzi w’er’igulu lyoshi’ mwimana, wa bwenge bwenene na wa lukogo bwenene. Akomerezize Omugala anamuha omukolo gw’okutwira abantu boshi olubanja. (Yn. 5:22) Ye n’Omugala banasoma ebiri omu murhima gwa ngasi muntu. (Mt. 9:4) Omu kanga ka ngasi muntu, bakolesa “obushinganyanya”!
19 Lekagi rhuhige okulangalira Yehova n’emihigo yage yoshi. Rhuba rhumanyire oku rhurhagwerhi obuhashe bw’okutwa olubanja, cikone yehe abugwerhe! (Osome Izaya 55:8, 9.) Co cirhumire rhunaleke omukolo gw’okutwa emanja zoshi omu maboko gage ye n’Omugala, Mwami oyerekana kwa bwimana obushinganyanya n’olukogo lw’Ishe. (Iz. 11:3, 4) Bicigi rhwakaderha lugenda oku Yehova na Yezu batwira abantu olubanja omu mango g’amalibuko madarhi? Bici rhumanyire lugenda oko? Na bici rhurhamanyiri? Ecigabi cirhu cikulikire cashuza ago madoso.
LWIMBO 57 Tuhubirie Watu Wote
b Okubiyerekire Adamu, Eva, na Kaini, olole Ilabiro ly’Akalalizi ly’omu lusiku 1/1/2013, buk. 12, amahugûlo g’idako (omu Cishwahiri c’e Congo).
c Erhi omuntu akolesa enderho z’olwiganyo zihamagalwa hyperbole anarhaluse olugero omu nderho zage ly’asegeza ntanya ndebe, cikone arhaba alonzize abantu bahugûkwe enderho zage luderho oku lundi. Cikoki ebi Yezu aderhaga lugenda abantu b’omu Sodoma n’e Gomora byanahugûkwa luderho oku lundi, co cirhumire erhali hyperbole.