1. Bici rhwayizire oku ntimanano ya ngasi mwaka y’omu mwaka gwa 2023?

 OKU ntimanano ya ngasi mwaka y’omu mwaka gwa 2023, a rhwahâbirwe amahugûlo mahyahya g’okushagalusa lugenda obwemere bwirhu rhwanayumvirhe matangazo malebe g’okushagalusa lugenda omukolo gwirhu gw’amahubiri. Kwa lwiganyo, rhwayizire oku bantu baguma na baguma banayish’iba n’obulyo bw’okucilunga haguma n’abantu ba Yehova ciru n’enyuma z’okusherezibwa kwa Babiloni mukulu. Kandi rhwayizire oku kurhondera omu Mwezi gwa 11, 2023, abahubiri b’Obwami barhakacihûnwa okuhâna eraporo y’omukolo gwabo goshi gw’amahubiri. K’ezo mpidulo ziyerekine oku omukolo gwirhu gw’amahubiri gurhaciri gwa bulagirire bwenene, erhi gurhaciri gwa kujirwa duba-duba? Nanga ciru n’ehitya!

2. Bulya gurhi ngasi lusiku luja oku nkuba omukolo gwirhu gw’amahubiri gunabe gwa bulagirire bwenene? (Marko 13:10)

² Ngasi lusiku luja oku nkuba, omukolo gwirhu gw’amahubiri gunabe gwa bulagirire bwenene. Bulya gurhi? Bulya harhacisigiri kasanzi kanji embere obuzinda buyishe. Rhuganirire ebi Yezu alebire lugenda omukolo gw’amahubiri omu nsiku nzinda. (Osome Marko 13:10.) Kushimbana n’omwanzi guli omu Mateyo, Yezu adesire oku omwanzi mwinja gushinganine guyalagazibwe omu igulu lyoshi embere “obuzinda” buyishe. (Mt. 24:​14, NWT) Olo luderho luhugwîre obuzinda boshi bw’er’igulu libi  lya Shetani. Yehova ahizireho ‘olusiku . . . n’akasanzi’ obo buzinda bwahika. (Mt. 24:36; 25:13; Ebj. 1:7) Ngasi lusiku luja oku nkuba, rhunayegere bwenene ako kasanzi. (Rm. 13:11) Amango rhuli rhwalinda, rhugwasirwe rhugendekere rhwahubiri kuhika obo buzinda buhike.

3. Bici birhushumya okuhubiri?

³ Amango rhuli rhwarhanya oku mukolo gwirhu gw’amahubiri, kuli kwinja okucidosa er’idoso ly’obulagirire bwenene: Bulya gurhi rhuyalagaza omwanzi mwinja? Kwa bofofi, obuzigire bo burhushumya rhuhubiri. Ebi rhujira omu mukolo gw’amahubiri binayerekane obuzigire bwirhu oku mwanzi mwinja, obuzigire bwirhu oku bantu, na kulusha byoshi, obuzigire bwirhu kuli Yehova n’izino lyage. Lekagi rhuganirire ebyo bintu higuma-higuma.

RHUNAHUBIRI BULYA RHUBA RHUZIGIRE OMWANZI MWINJA

4. Gurhi rhuciyumva erhi barhubwira omwanzi mwinja?

⁴ Ka wanakengera gurhi waciyumvirhe erhi bakubwira omwanzi mwinja, nkaba lugenda okuburhwa kw’omwana omu mulala gwinyu erhi ciru okuhâbwa akazi wal’ilagirireko bwenene? Kobinali wali mubidu bwenene okuganirira abantu b’omu mulala gwawe n’abîra bawe ogo mwanzi. Ka ko wanaciyumvirhe ntyo erhi oyumva omwanzi mwinja bwenene kulusha yoshi, ko kuderha omwanzi mwinja gw’Obwami bwa Mungu?

5. Gurhi waciyumvirhe erhi oyiga okuli oburhangiriza kurhenga omu Kanwa ka Mungu? (Olole n’enfoto.)

⁵ Okengere gurhi waciyumvirhe erhi oyiga okuli oburhangiriza kurhenga omu Kanwa ka Mungu. Wamanya oku Sho wawe w’omu mpingu aba akuzigire, oku aba alonzize obe cigabi c’omulala gw’abakozi bage, oku alaganyize okuyusa amalumwa n’amalibuko, oku wanalangalira okubona abazigirwa bawe bafîre hano bafûka omu igulu lihyahya, n’ebindi n’ebindi. (Mk. 10:​29, 30; Yn. 5:​28, 29; Rm. 8:​38, 39; Maf. 21:​3, 4) Ezo nyigirizo ziri za kushagalusa bwenene. (Lk. 24:32) Wazigira bwenene ezo nyigirizo wayigaga, wanalonza okuzibwira ngasi muntu!—Oshushanye na Yeremiya 20:9.

6. Bici rhuciyigirizize kugerera olwiganyo lwa Ernest na mukage Rose?

 ⁶ Rhuganirire olwiganyo. Mwene wirhu muguma ohamagalwa Ernest b al’igwerhe hofi myaka ikumi erhi ishe afâ. Ernest akengire ntya: “Nacidosa, ‘K’anajire empingu? Erhi k’arhakacihaba loshi-loshi?’ Nakayagalwa n’abandi bana bacigwerhe b’ishe.” Ernest akaja ebwa kaburi ngasi mango, akafukama oku nshinda y’ishe, n’okusalira ntya: “Mungu wekasinga, nonzize manye aha larha ali.” Hofi myaka 17 enyuma z’okufâ kw’ishe, Ernest adosibwa erhi anayiga Ebibliya, anayemera buzira kurhindira. Ashagaluka bwenene okumanya oku abafîre barhayishi cici, baba nk’abali omw’iro ly’akadodo, n’oku Ebibliya elaganyize obufûke omu mango gayisha. (Muh. 9:5, 10; Ebj. 24:15) Buzinda, apata amashuzo g’amadoso gakag’imurhindibuza omu myaka minji! Ernest ashagalukira bwenene enyigirizo z’Ebibliya akag’iyiga. Mukage Rose, acilunga haguma naye omu kuyiga Ebibliya anashagalukira naye omwanzi gw’Obwami. Omu mwaka gwa 1978, babatizibwa. Barharhindiraga okuganirira abantu b’omu mulala gwabo, abîra babo, na ngasi muntu wakayumvirhizize obuyemere bwabo bw’engulo ndarhi. Oko kwaba n’amalehe minja: Ernest na mukage Rose barhabire bantu balushire 70 bajire amajambere n’okuhikira okubatizibwa.

7. Gurhi biba erhi rhuzigira bwenene okuli kw’Ebibliya omu murhima gwirhu? (Luka 6:45)

⁷ Kobinali, erhi rhuzigira bwenene okuli kw’Ebibliya omu murhima gwirhu, rhurhakaleka okukuganirira abandi. (Osome Luka 6:45.) Rhunaciyumve ak’abanafunzi ba Yezu b’omu myaka igana mirhanzi baderhaga ntya: “Rhurhankahasha okurhaderha ebi rhwâbwine n’ebi rhwâyumvirhe.” (Ebj. 4:20) Bulya rhuba rhuzigire okuli bwenene, rhunalonze okukuganirira bantu banji bwenene nk’oku byakanahashikana.

RHUNAHUBIRI BULYA RHUBA RHUZIGIRE ABANTU

8. Bulya gurhi rhuba rhulonzize okuganirira abandi omwanzi mwinja? (Olole ecisanduku cidesire “ Ozigire Abantu—ly’Ojira Abanafunzi.”) (Olole n’enfoto.)

⁸ Aka Yehova na Yezu, rhuba rhuzigire abantu. (Mig. 8:31; Yn. 3:16) Rhunayumvize obwonjo bwenene ba “mbula-Nyamuzinda” na ba “mbulabulangalire.” (Ef. 2:12) Bali ak’abali omu mwina rhunagwerhe omugozi rhwakabakululamwo, ko kuderha omwanzi mwinja gw’Obwami bwa Mungu. Obuzigire bwirhu n’obwonjo rhugwerhe oku bantu ba ntyo, binarhushumye rhujire ebi rhwakanahasha byoshi lyo rhubaganirira omwanzi mwinja. Ogo mwanzi gw’engulo ndarhi gwanayunjuza obulangalire  omu mirhima yabo, gwanabarhabala babe n’akalamo kinja nk’oku byakanahashikana ene, gwananabaha obulangalire bw’“akalamo k’okunali,” ko kuderha obuzine bw’ensiku n’amango omu igulu lihyahya lya Nnâmahanga.—1 Tm. 6:19.

9. Burhonde buhi rhuhâna lugenda amango gayisha, na bulya gurhi? (Ezekiyeli 33:​7, 8)

⁹ Obuzigire bwirhu oku bantu kandi bunarhushumye rhubarhonde lugenda obuzinda buyegerire bwenene bw’er’igulu libi. (Osome Ezekiyeli 33:​7, 8.) Rhunayumvize abalungu birhu obwonjo n’abantu b’omu milala yirhu barhali Bahamirizi ba Yehova. Omu kalamo kabo ka ngasi lusiku, banji bali balama buzira kumanya ebyayisha, ko kuderha “malibuko garhazig’iboneka kurhenga okulemwa kw’igulu kuhika buno, garhakanacibonekana bundi.” (Mt. 24:21) Rhulonzize bamanye ebyayish’iba muli ago mango g’okutwa olubanja: okurhenzibwaho kw’amadîni g’obunywesi n’okusherezibwa kw’igulu libi lyoshi lya Shetani kwakulikira okw’ivita lya Harmagedoni. (Maf. 16:​14, 16; 17:​16, 17; 19:​11, 19, 20) Rhuli rhwashenga oku bantu banji nk’oku byakanahashikana bayumvirhize obo burhonde banacilunge ene haguma na nirhu omu nterekêro ecîre. Cikone, gurhigi lugenda balya barhayumvirhizizi obo burhonde ene, kuhiramwo n’abantu b’omu milala yirhu?

10. Bulya gurhi kuli kwa bulagirire rhugendekere rhwahâna oburhonde?

¹⁰ Nk’oku rhwabonaga omu mwanzi guli embere, bwanaba bulonza bwa Yehova okuyish’iyokola abantu baba n’obuyemere muli ye enyuma z’okubona obushereze bwa Babiloni mukulu. Akaba ntyo ko biri, kuli kwa bulagirire ciru bwenene rhugendekere rhwabaha obo burhonde ene. Orhanye kuli oku: Ebi rhuli rhwababwira ene byo bakengera ago mango. (Oshushanye na Ezekiyeli 33:33.) Nkaba bayish’ikengera oburhonde rhwabahaga banacilunge haguma na nirhu omu nterekêro ecîre embere kube kucêrwa bwenene. Ak’omulanzi w’eprizo w’omu Filipi, washanjaga entanya zage kuhika olusiku abonaga “omusisi munene gwagera,” nkaba baguma na baguma barhali bayumvirhiza ene bayish’ishanja entanya zabo enyuma z’okubona obushereze bwa Babiloni mukulu bwayish’idundaganya igulu.—Ebj. 16:​25-34, Mashi Bible.

RHUNAHUBIRI BULYA RHUBA RHUZIGIRE YEHOVA N’IZINO LYAGE

11. Gurhi rhuhamwo Yehova irenge, obukuze, n’obuhashe? (Amafulûlo 4:11) (Olole n’enfoto.)

¹¹ Ecirhumire c’obulagirire cirhushumya okuhubiri kuli kuba rhuba rhuzigire Yehova Nnâmahanga n’izino lyage litagatifu. Rhunabone omukolo gwirhu gw’amahubiri nka njira y’okukuza Nnâmahanga rhuzigira. (Osome  Amafulûlo 4:11.) Rhuyemire n’omurhima goshi oku Yehova Nnâmahanga ashinganine obukuze, irenge, n’obuhashe kurhenga oku bakozi bage bishwekerezi. Rhunamuhe irenge n’obukuze erhi rhuganirira abandi ebirhuyemezize n’obwalagale oku ye “walemaga ebintu byoshi” n’oku rhuzine bulya arhuhîre obuzine. Rhunamuhe obuhashe, ko kuderha obuhashe bwirhu erhi rhukolesa akasanzi kirhu, emisi yirhu, n’ebirugu birhu lyo rhushangira omu mukolo gw’amahubiri nk’oku rhwakanahasha, kushimbana n’akanga kirhu. (Mt. 6:33; Lk. 13:24; Kl. 3:23) Kwa bofofi, rhunashagalukire okuganira lugenda Nnâmahanga wirhu rhuba rhuzigire. Kandi rhunaciyumve rhushagalukire okuganirira abandi lugenda izino lyage n’amorhere gage. Bulya gurhi?

12. Gurhi rhucêsamwo izino lya Yehova omu mukolo gwirhu gw’amahubiri?

¹² Obuzigire bwirhu kuli Yehova bunarhushumye rhucêse izino lyage. (Mt. 6:9) Rhuba rhulonzize okujira ecirhu cigabi: kucêsa izino lyage omu kulikulako izinga Shetani alihizireko kugerera obunywesi bwage bw’obulyalya. (Murh. 3:​1-5; Ayu. 2:4; Yn. 8:44) Omu mukolo gwirhu gw’amahubiri, rhuba babidu okuhalira Mungu wirhu, omu kubwira abantu boshi balonzize okurhuyumvirhiza okuli okubimuyerekire. Rhuba rhulonzize ngasi muntu amanye oku oborhere bwage bukulu buba buzigire, oku enjira yage y’okurhegeka eba ya bushinganyanya, n’oku Obwami bwage bwayusa amalibuko goshi hano hofi-hofi n’okulerhera abantu omurhûla n’omwishingo. (Enna. 37:​10, 11, 29; 1 Yn. 4:8) Erhi rhuhalira irenge lya Yehova omu mahubiri, rhunacêse izino lyage. Kandi rhunashagaluke bulya rhuli rhwajira ebi rhuhûnyirwe okujira nka Bahamirizi ba Yehova. Bulya gurhi rhudesire ntyo?

13. Bulya gurhi rhucidinira okuhamagalwa Bahamirizi ba Yehova? (Izaya 43:​10-12)

¹³ Rhwe Yehova acishozire lyo rhuba “bahamirizi”  bage. (Osome Izaya 43:​10-12.) Myaka milebe egezire, maruba maguma kurhenga oku Mbaraza Eri Yalongoza gadesire ntya: “Olukengwa lunene bwenene ngasi muguma wirhu akashagalukira kuli kahamagalwa Muhamirizi wa Yehova.” c Bulya gurhi? Orhanye kw’olu lwiganyo. Erhi akaba olagirire oku muntu mulebe waba muhamirizi wawe omu lubanja lulebe, wanacishoga omuntu omanyirire bwinja onalangalire, muntu ogwerhe irenge linja lyakarhuma ebi adesire byayemerwa. Obu rhwe Yehova acishozire rhube Bahamirizi bage, ayerekine oku arhumanyire bwinja n’oku alangalire oku rhwahamiriza oku yene ye Mungu w’okuli. Rhunaciyumve oku luli lukengwa lunene bwenene okuba Bahamirizi bage, na muli ntyo rhunakolese ngasi bulyo rhwakaba nabo lyo rhumanyisa izino lyage n’okuyerekana oku ebintu bigalugalu byoshi bamuderhire biba bya bunywesi. Omu kujira ntyo, rhunalame kushimbana n’izino lirhu rhucidinira bwenene, ly’Abahamirizi ba Yehova!—Enna. 83:18; Rm. 10:​13-15.

RHWAGENDEKERA RHWAHUBIRI KUHIKA OBUZINDA BUYISHE

14. Bulangalire buhi bw’okushagalusa buli embere zirhu?

¹⁴ Rhushagalusire enyanya z’obulangalire bwinja bwenene buli embere zirhu! Kugerera oburhabale bwa Yehova, rhulangalire oku bantu banji bayemera okuli embere amalibuko madarhi garhondere. Kandi, rhushagalusire bwenene bulya ciru n’omu mango g’amalibuko madarhi, kasanzi kazibu bwenene kurhenga bene bantu balemirwe, nkaba bantu banji bayish’irhenga omu igulu lya Shetani n’okucilunga haguma na nirhu omu kukuza Yehova!—Ebj. 13:48.

15-16. Bici rhwagendekera rhwajira, na kuhika mangaci?

¹⁵ Embere ako kasanzi kahike, rhugwerhe omukolo gw’okujira, ko kuderha omukolo gurhakacigalukirwa bundi g’okuyalagaza omwanzi mwinja gw’Obwami omu igulu lyoshi. Na kandi, rhugwasirwe rhugendekere rhwarhonda abantu lugenda ebyajirikana hano hofi-hofi. Abantu bashinganine bamanye oku obuzinda bw’er’igulu libi buyegerire bwenene. Muli ntyo, hano ago mango g’okutwa olubanja gahika, abantu bayish’imanya oku omwanzi rhwakag’ihubiri emwa Yehova Nnâmahanga gwakag’irhenga.—Eze. 38:23.

¹⁶ Bicigi rhuhizire okujira? Omu kushumibwa n’obuzigire, ko kuderha obuzige oku mwanzi mwinja, obuzigire oku bantu, na kulusha byoshi obuzigire kuli Yehova Mungu n’izino lyage, rhwagendekera rhwaba n’irala ly’okuhubiri n’obushiru na buzira kuheza akasanzi kuhika Yehova aderhe, “Mulekerage aho!”