Ebibliya erhayerekini ebyarhumaga. Cikone eyerekine emyanzi y’obulagirire nkaba yashumyagya ogo muhigo gwabo.

Malahika muguma abwizire Mariya oku akabire izimi anaburhe omwana. Erhi malahika amumanyisa ogo mwanzi, Mariya na Yozefu bal’ilamire e Nazareti, omu vile y’emwabo Yozefu omu Galilaya. (Lk. 1:26-31; 2:4) Buzinda, erhi barhenga e Misri, bagaluka e Nazareti. Yezu akulira eyo munda anaba Munazareti. (Mt. 2:19-23) Co cirhumire rhurhanya lugenda e Nazareti erhi rhuganirira izino lya Yezu, Yozefu na Mariya.

Mariya agwerhe omuntu w’omu mulala gwabo wakag’ihamagalwa Elizabeti wal’ilamire omu Yudeya. Elizabeti ali muka kuhani Zakariya anahikira okuba nina wa Yowane Mubatiza. (Lk. 1:5, 9, 13, 36) Mariya alambagirira Elizabeti anabêra haguma naye myezi isharhu omu Yudeya. Enyuma z’aho Mariya agaluka e Nazareti. (Lk. 1:39, 40, 56) Co cirhumire Mariya al’imanyire e eneo y’e Yudeya.

Buzinda, Yozefu arhumikira irhegeko lyal’ihûnyire “okuyandikwa.” Muli ntyo Yozefu abalama kurhenga e Nazareti kuja e Betelehemu, emunda “mwami Daudi aburhiragwa” yo n’obulebi bwal’iyerekine oku yo Masiya akaburhirwe. (Lk. 2:3, 4, Mashi Bible; 1 Sam. 17:15; 20:6; Mik. 5:2) Enyuma za Mariya okuburhira Yezu eyo munda, Yozefu arhalonzagya Mariya ajire omubalamo muliri gw’okugaluka e Nazareti anagwerhe akabonjo. Babêra e Betelehemu, vile yali oku bilometre hofi mwenda kurhenga e Yeruzalemu. Oko kwakabahashisize okuhêka omwana wabo omu hekalu n’okuhâna entûlo yal’ihûnyirwe n’Irhegeko.​—Lev. 12:2, 6-8; Lk. 2:22-24.

Malahika wa Nnâmahanga ali erhi abwizire Mariya oku omugala akahabirwe “entebe y’obwami bw’ishe Daudi” n’oku ‘akayimire’ nka Mwami. Nkaba Yozefu na Mariya bahugûsirwe oku kuli kwa bulagirire okubona Yezu aburhirwe omu lugo lwa Daudi. (Lk. 1:32, 33; 2:11, 17) Nkaba barhanyize oku guli muhigo gw’obwenge okugendekera babêra eyo munda n’okulinda kuhika bamanye ebindi Nnâmahanga alonzize bajire.

Rhurhamanyiri kasanzi kanganaci bali bamayusa e Betelehemu erhi balya bal’imanyire eby’enyenyezi bahika. Cikone erhi bahika, ogo mulala gwal’ikola guli gwalama omu nyumpa, na mugala wabo al’ikola ‘mwana’ cikone arhaciri kabonjo. (Mt. 2:11) Bibonekine oku ahali h’okugaluka e Nazareti, babêzire e Betelehemu kasanzi karhali kanyi, yanaba nk’emwabo.

Herodi arhegeka oku ‘orhubonjo rhwoshi rhurhac’ibona myaka ibirhi rhw’e Betelehemu’ rhunigwe. (Mt. 2:16) Yozefu ahabwa oburhonde kurhenga emwa Nnâmahanga lugenda er’irhegeko, na muli ntyo, ye na Mariya balibirhira e Misri haguma na Yezu banabêra yo kuhika Herodi afâ. Buzinda, Yozefu ahêka omulala gwage e Nazareti. Bulya gurhi barhagalukaga e Betelehemu? Lyo bayaka Arkelayo, mugala wa Herodi wali mukali bwenene wali omu Yudeya, na kandi lyo barhumikira oburhonde bwa Nnâmahanga. E Nazareti, Yozefu akalerire yo Yezu bwinja ly’akaharamya Nnâmahanga.​—Mt. 2:19-22; 13:55; Lk. 2:39, 52.

Bibonekine oku Yozefu afîre embere Yezu ayigulire abantu enjira y’obuzine bw’omu mpingu. Muli ntyo, Yozefu ayish’ifûka n’okulama hanw’igulu. Banji bayish’irhimanana naye n’okumudosa myanzi minji, nk’omwanzi lugenda bulya gurhi ye na Mariya babêraga e Betelehemu enyuma z’okuburhwa kwa Yezu.