1-2. Nk’oku olwandiko lw’Ennanga 25:14 luyerekine, bici rhugwasirwe rhujire erhi akaba rhulonzize rhube n’obwîra bwa hofi-hofi haguma na Yehova?

 MORHERE gahi orhanyize gali ga bulagirire kuli we erhi akaba olonzize ogendekere waba n’obwîra bwa hofi-hofi na muntu mulebe? Nkaba wanashuza oku abîra binja bashinganine bazigirane n’okurhabalana. Nkaba orhakarhanya oku oboba buli borhere bwa bulagirire bwakagendekeza obwîra bwinja. Cikone, nk’oku olwandiko lw’omusingi lw’eci cigabi ludesire, abalonzize okuba n’obwîra bwa hofi-hofi haguma na Yehova bagwasirwe ‘bamurhinye’ erhi kumuyoboha.​—Osome Ennanga 25:14.

² Rhube rhugwerhe kasanzi kanji rhuli rhwakolera Yehova erhi nanga, rhweshi rhushinganine rhugendekere rhwamuyoboha omu njira eshinganine. Cikone, okuyoboha Nnâmahanga ko kuderha gurhi? Gurhi rhwakaciyigirizamwo okuyoboha Yehova? Lugenda okuyoboha Nnâmahanga, bici rhwakaciyigiriza kugerera olwiganyo lw’omwimangizi Obadiya, Kuhani Mukulu Yehoyada na Mwami Yowasi?

3. Oganirire ebyakarhuma rhwayoboha na gurhi obo boba bwakarhulangamwo.

³ Rhwanayoboha erhi akaba rhumanyire oku rhwanahikirwa na mazibu malebe. Oboba bwa ntyo bwanaba bwinja, kandi bwanarhushumya rhurhôle emihigo minja. Okuyoboha oku rhwahirima kwanarhushumya rhuyake okulambagira hofi-hofi n’entuli. Okuyoboha oku rhwayagalika kwanarhushumya rhuyake akanga kadarhi. Okuyoboha oku rhwashereza obwîra bwirhu haguma na muntu mulebe rhuzigira kwanarhushumya rhuyake okuderha erhi okujira akantu kabi.

4. Boba bwa gurhi Shetani aba alonzize rhube nabo kuyerekera Yehova?

 ⁴ Shetani aba alonzize abantu bayobohe Yehova omu njira erhashinganini. Anagendekeze entanya Elifazi ayerekanaga, oku Yehova aba Mungu ocihola, mukunizi, n’oku birhakahashikana okumusimisa. (Ayu. 4:18, 19) Kandi aba alonzize rhuyobohe Yehova bwenene kuhika rhuleke okumukolera. Lyo rhuyaka ogo murhego, rhukwanine rhuyobohe Nnâmahanga omu njira eshinganine.

5. Okuyoboha Nnâmahanga ko kuderha gurhi?

⁵ Omuntu oyoboha Nnâmahanga omu njira eshinganine aba amuzigire arhanalonza okujira akantu koshi-koshi kakashereza obwîra bwage haguma naye. Yezu agwerhe ‘obukenge bwage [oboba bwa Nnâmahanga, NWT].’ (Hb. 5:7) Arhal’iyobohire Yehova okurhalusire olugero. (Iz. 11:2, 3) Lubero n’oko, akag’iciyumva azigire Yehova anal’ilonzize okumurhumikira. (Yn. 14:21, 31) Aka Yezu, rhunaciyumve rhukenzire Yehova bwenene rhunarhangazibwe naye, bulya aba wa buzigire, wa bwenge, mushinganyanya na wa buhashe bunji. Kandi rhuba rhumanyire oku Yehova aba arhuzigire bwenene n’oku anashibirire oku rhujira erhi arhuha obulongozi. Erhi rhubula burhumikira Yehova anaciyumve kubi bwenene, cikone erhi rhwakamurhumikira rhunamushagaluse.​—Enna. 78:41; Mig. 27:11.

6. Njira nguma ehi rhwakaciyigirizamwo okuyoboha Nnâmahanga? (Ennanga 34:11)

⁶ Rhurhaburhanwa oboba bwa Yehova; rhugwasirwe rhuciyigirize okuba nabo. (Osome Ennanga 34:11.) Njira nguma rhwakajiramwo ntyo kuli kulolereza obulemi. Oku rhugendekera rhwabona obwenge bwa Yehova, obuhashe bwage, n’obuzigire bunji ajira kuli rhwe rhubona kugerera ‘ebiremwa alemire,’ ko rhunagendekera rhwamukenga bwenene n’okumuzigira. (Rm. 1:20) Mwali wirhu muguma ohamagalwa Adrienne adesire ntya: “Obwenge bwa Yehova rhubona kugerera obulemi bunansomeze bunanantabale mpugûkwe oku aba amanyire ebiri binja bwenene kuli nie.” Bulya akag’irhanya kanji-kanji lugenda oko, aderha ntya: “Ntalonza okujira akantu koshi-koshi kakashereza obwîra bwani haguma na Yehova, Nshôko y’obuzine bwani.” Ka wanaciha kasanzi kalebe mw’ogu mugobe ly’orhanya bwenene lugenda kantu kalebe Yehova alemire? Okujira ntyo kwanarhuma wakenga Yehova bwenene n’okumuzigira.​—Enna. 111:2, 3.

7. Gurhi isala lirhurhabalamwo lyo rhuyoboha Yehova omu njira eshinganine?

⁷ Eyindi njira rhwakaciyigirizamwo okuyoboha Nnâmahanga kuli kukasalira ngasi mango. Oku rhugendekera rhwasalira, ko rhunagendekera rhwabona oku Yehova ali muntu w’okunali. Ngasi mango erhi rhumuhûna emisi y’okulembera amazibu, oko kunarhukengeze oku ajira misi minji bwenene. Ngasi mango erhi rhumuvuga omunkwa oku ngalo arhuhîre y’Omugala, rhunakengere oku aba arhuzigire bwenene. N’erhi rhusemberera Yehova oburhabale amango rhugwerhe mazibu malebe, rhunakengere oku aba wa bwenge bunji bwenene. Amasala ga ntyo ganarhume rhwakenga Yehova bwenene. Kandi ganazibuhye omuhigo gwirhu gw’okuyaka okujira akantu koshi-koshi kakashereza obwîra bwirhu haguma naye.

8. Gurhi rhwakajira lyo rhugendekera rhwayoboha Nnâmahanga?

⁸ Rhwanagendekera rhwayoboha Nnâmahanga omu kuyiga Ebibliya erhi rhunagwerhe n’omuhigo gw’okuciyigiriza kugerera enyiganyo nyinja n’enyiganyo mbi zibamwo. Lekagi rhuganirire bakozi babirhi bishwekerezi ba Yehova, Obadiya mwimangizi w’enyumpa ya Mwami Ahabu na Kuhani Mukulu Yehoyada. Buzinda rhwabona bici rhwakaciyigiriza kugerera olwiganyo lwa Mwami Yowasi w’e Yuda, warhonderaga bwinja cikone buzinda aleka Yehova.

9. Gurhi okuyoboha Yehova kwarhabiremwo Obadiya? (1 Abami 18:3, 12)

⁹ Oburhangiriza Ebibliya eganirire Obadiya b edesire ntya: “Obadiya akengaga [ayobohaga, NWT] Nyamuzinda bwenene.” (Osome 1 Abami 18:3, 12, Mashi Bible.) Gurhi obo boba bwinja bwarhabiremwo Obadiya? Omu njira nguma, bwarhumire erhaba ndyalya anaba wa kulangalirwa; n’oko kwarhuma Mwami amujira mwimangizi w’enyumpa y’obwami. (Oshushanye na Nehemiya 7:2.) Okuyoboha Nnâmahanga kwa Obadiya kwamuhîre oburhwali bwago-bwago, anal’ilagirire kw’obo borhere bwenene. Alamaga amango g’oburhegesi bw’Omwami mubi Ahabu, ‘wagayisagya Nyakasane kulusha balya [bami] boshi bamushokoleraga.’ (1 Bam. 16:30) Kandi, Yezebeli muka Ahabu wakag’iharamya Bali, al’ishombire Yehova bwenene analonza okurhenzaho enterekêro y’okuli omu bwami bw’e mwenè [Nord]. Ciru anayirha balebi banji ba Nnâmahanga. (1 Bam. 18:4) Buzira karhinda, Obadiya akag’iharamya Yehova omu kasanzi kazibu bwenene.

10. Gurhi Obadiya ayerekinemwo oburhwali bwago-bwago?

¹⁰ Gurhi Obadiya ayerekinemwo oburhwali bwago-bwago? Erhi Yezebeli arhondera okulongereza abalebi ba Nnâmahanga ly’abaniga, Obadiya arhôla 100 mulibo ‘anafulika caligumiza balêbi makumi arhanu [arhanu] omu lwala, anakaz’ibashegulamwo omugati n’amishi.’ (1 Bam. 18:13, 14) Bacivumbulaga ebi oyo mulume w’oburhwali Obadiya akag’ijira, kobinali akanizirwe. Kobinali, Obadiya ali mwene muntu, arhanal’ilonzize okufâ. Cikone Obadiya al’izigire Yehova bwenene n’abakozi bage kulusha oku al’izigire obuzine bwage yenene.

11. Gurhi abakozi ba Yehova ba muli gano mango bayigamwo olwiganyo lwa Obadiya? (Olole n’enfoto.)

¹¹ Ene, bakozi banji ba Yehova balamire omu bihugo omukolo gwirhu guhanzibwemwo. Banayerese abarhegesi bene bantu obukenge bubakwanine, cikone aka Obadiya, abo bene wirhu na bali birhu bazigirwa banahe Yehova ebi ashinganine, kuli kuderha oku banagendekere babêra bishwekerezi kuli ye yene.  (Mt. 22:21) Banayerekane oku baba bayobohire Nnâmahanga omu kumurhumikira ahali h’okurhumikira bene bantu. (Ebj. 5:29) Banajire ntyo omu kugendekera bayaliza omwanzi mwinja n’omu kujira entimanano omu bwifulikwe. (Mt. 10:16, 28) Banajire okwabo koshi lyo bene wabo na bali babo baba n’ebiryo binji by’ekiroho balagirireko. Rhuganirire olwiganyo lwa Mwene Wirhu Henri, olama omu cihugo ciguma c’omu Afrique omukolo gwirhu gwal’ihanzibwemwo kasanzi kalebe. Mw’ako kasanzi, Henri acihâna ly’aj’ahisako ababo Bahamirizi ebiryo by’ekiroho. Ayandisire ntya: “Mba wa nshonyi. Co cirhumire nyemire n’obwalagale oku obukenge bunji nyumva ngwerhe kuli Yehova bo bwampire oburhwali nal’ilagirireko.” Ka nawe wanaba n’oburhwali buli nk’obwa Henri? Wanaba nabo erhi wakakayoboha Nnâmahanga omu njira eshinganine.

12. Gurhi Kuhani Mukulu Yehoyada na mukage bayerekinemwo obwishwekerezi bunji kuli Yehova?

¹² Kuhani Mukulu Yehoyada al’iyobohire Yehova, n’obo boba bwamushumya okuba mwishwekerezi n’okugendekeza enterekêro y’okuli. Ayerekine ntyo n’obwalagale erhi mwali wa Yezebeli wakag’ihamagalwa Ataliya, aciha entebe y’obwami omu Yuda. Abantu bagwerhe ecirhumire cinja c’okuyoboha Ataliya. Arhagwerhe bwonjo anal’ilalikire bwenene obukulu n’oko kwarhuma ajira okwage koshi ly’ayirha iburha ly’obwami lyoshi, ko kuderha abinjikulu bage yenene! (2 Nga. 22:10, 11) Muka Yehoyada wakag’ihamagalwa Yehosheba aciza Yowasi, muguma muli abo bana. Oyo mukazi n’iba bafulika oyo mwana banakamushibirira. Omu kujira ntyo, Yehoyada na Yehosheba barhabala okulanga iburha ly’obwami lya Daudi. Yehoyada ali mwishwekerezi kuli Yehova arhanadirhimanaga enyanya za Ataliya.​—Mig. 29:25.

13. Kundi gurhi Yehoyada ayerekinemwo obwishwekerezi kuli Yehova amango Yowasi agwerhe myaka nda?

¹³ Kandi Yehoyada ayerekine obwishwekerezi bwage kuli Yehova, amango Yowasi al’igwerhe myaka nda. Ajira mupango mulebe. Okugwarha kw’ogo mupango kwakarhumire Yowasi aba mwami oshinganine w’omw’iburha lya Daudi. Cikoki okurhagwarha kwago kwakarhumire Yehoyada aheza obuzine bwage. Kugerera oburhabale bwa Yehova, ogo mupango gwagwarha. Bulya Yehoyada al’ilunzirwe okuboko n’abarhambo na Bene-Levi, Yowasi ajirwa mwami na Ataliya anigwa. (2 Nga. 23:1-5, 11, 12, 15; 24:1) Enyuma z’aho, Yehoyada “ajira ekarhi ka Nyamubâho, mwami w’olubaga, endagano y’okubaseza mpu babe lubaga lwa Nyamuzinda.” (2 Bam. 11:17) Yehoyada “ahira abalanzi oku mihango y’akâ-Nyamubâho [nyumpa ya Yehova, NWT], lyo harhagijira owajamwo anagwerhe bugalugalu bulebe.”​—2 Nga. 23:19.

14. Omu njira zihi Yehoyada akengesibwemwo bulya akang’ikenga Yehova?

¹⁴ Yehova ali erhi adesire ntya: ‘Nie nkengêsa abankenga boshi.’ Kobinali, ahembire Yehoyada. (1 Sam. 2:30) Kwa lwiganyo, ayandikisize ebijiro binja by’oyo Kuhani Mukulu lyo birhuyigiriza. (Rm. 15:4) N’erhi Yehoyada afâ, ahabwa olukengwa lwago-lwago lw’okubishwa “omu lugo lwa Daudi haguma n’abami, kulya kuba ajizire ebinja omu Israheli n’embere za Nyamubâho n’omu nyumpa yage.”​—2 Nga. 24:15, 16.

15. Bici rhwakaciyigiriza kugerera omwanzi guganirire Yehoyada? (Olole n’enfoto.)

¹⁵ Omwanzi guganirire Yehoyada gwanarhurhabala rhweshi lyo rhuba n’oboba kuli Nnâmahanga. Abagula Bakristu banayiga olwiganyo lwa Yehoyada omu kugendekera baba masu n’omu kulanga obuso bwa Nnâmahanga n’obwishwekerezi. (Ebj. 20:28) Kugerera olwiganyo lwa Yehoyada, abakola bashosi banaciyigiriza oku erhi bakayoboha Yehova n’okugendekera  babêra bishwekerezi, anabakolesa ly’ahikiriza omuhigo gwage. Nta mango akabakabulira. Abaciri misole banalola gurhi Yehova ajirire Yehoyada na kandi banayiga olwiganyo lwa Yehova omu kujirira abantu bishwekerezi bakola bashosi n’obukenge, ci bwenene balya bakola bagwerhe myaka minji bali bakolera Yehova n’obwishwekerezi. (Mig. 16:31) Buzinda, rhweshi rhwanaciyigiriza isomo lilebe kugerera abarhambo na Bene-Levi balungaga Yehoyada okuboko. Lekagi rhweshi rhukalunga okuboko “abali balongoza” omu kubakenga.​—Hb. 13:17, NWT.

16. Bici biyerekine oku Mwami Yowasi ali mugalugalu?

¹⁶ Mwami Yowasi ayungusire kugerera olwiganyo lwinja lwa Yehoyada. (2 Bam. 12:2) Co cirhumire oyo mwami musole al’ilonzize okusimisa Yehova. Cikone enyuma z’okufâ kwa Yehoyada, Yowasi ayumvirhiza abaluzi bagoma. Bici oko kwadwirhe? Ye na bacikala bage barhondera ‘okugashaniza emitungo . . . n’ezindi nsalamu.’ (2 Nga. 24:4, 17, 18, Mashi Bible) Ciru akaba Yehova agayire bwenene enyanya z’oko, “akazibarhumira abalêbi bakazagihamiriza ekarhi kabo, ci barhayumvagya.” Ciru barhayumvirhizagya na Zakariya, mugala wa Yehoyada, orhali kone mulêbi wa Yehova na kuhani cikone kandi ali muzala wa Yowasi. Mwami Yowasi ciru anigisa Zakariya, ciru akaba omulala gwa Zakariya gwamurhabire bwenene.​—2 Nga. 22:11; 24:19-22.

17. Buzinda gurhi ebintu byaberire Yowasi?

¹⁷ Yowasi arhagendekeraga ayoboha Yehova  omu njira eshinganine, n’ebintu byamubêra bibi. Yehova ali erhi adesire ntya: “Abampeba kw’akagayo nabo bagayaguzibwa.” (1 Sam. 2:30, Mashi Bible) Buzinda, omurhwe musungunu gw’Abasiriya gwahima omurhwe gwali “gwa bantu banji bwenene” gwa Yowasi banamusiga “ayunjwire bibande.” Enyuma z’okugaluka kw’Abasiriya, abakozi ba Yowasi bamuniga bulya naye anizire Zakariya. Oyo mwami mugalugalu ciru arhabonekanaga nk’ashinganine okubishwa “omu nshinda z’abami.”​—2 Nga. 24:23-25.

18. Kushimbana na Yeremiya 17:7, 8, gurhi rhwakayakamwo okuba aka Yowasi?

¹⁸ Bici rhwakaciyigiriza kugerera olwiganyo lwa Yowasi? Ali nka murhi gugwerhe emizi erhajiri omw’idaho bwenene guyimangire oku mutungo. Erhi omutungo, ko kuderha Yehoyada aba arhacihali n’obugoma buzuka, Yowasi akulumba. Olo lwiganyo luyerekine oku rhurhashinganini rhuyobohe Nnâmahanga mpu bulya kone abantu b’omu mulala gwirhu n’abandi b’omu cigamba bali barhuyeresa olwiganyo rhwakakulikira. Lyo rhugendekera rhwaba n’emisi y’ekiroho, rhugwasirwe rhugendekere rhwacihâna emwa Nnâmahanga n’okugendekera rhwamuyoboha, omu kuyiga ngasi mango, okurhanya bwenene, n’okusalira.​—Osome Yeremiya 17:7, 8; Kl. 2:6, 7.

19. Bici Yehova arhuhûnyire rhujire?

¹⁹ Kobinali Yehova arharhuhûna binji bwenene. Ebi arhuhûnyire biyerekinwe kwa bofofi omu lwandiko lw’Omuhanûzi 12:13, ludesire ntya: “Orhinye [oyobohe] Nyamuzinda onashimbe amarhegeko gage, bulya gwo mukolo gwa ngasi muntu.” Erhi rhwakayoboha Nnâmahanga, rhwanaba n’obuhashe bw’okulwisa amarhangulo garhuhikira omu mango gayisha n’okuba n’oburhwali aka Obadiya na Yehoyada. Nta kantu koshi-koshi kayish’ihasha okushereza obwîra bwirhu haguma na Yehova.