Omu mango g’Ivita lya Kabirhi ly’Igulu, ababusi bani barhenga omu cihugo c’e Estonie bahamira omu cihugo c’e Allemagne, emunda naburhiragwa. Enyuma z’okuburhwa kwani, barhondera okucirheganya lyo bahamira e Canada. Enyumpa yirhu ntangiriza, hofi n’e Ottawa, omu Canada, yali nyumpa nsungunu engoko nazo zakag’ilamamwo. Rhwali bakenyi bwenene, cikone rhwakag’ipata amaji g’okulya sezi.

Lusiku luguma, Abahamirizi ba Yehova basomera nyâma olwandiko lw’Amafulûlo 21:3, 4. Ebi ayigaga byamuhuma oku murhima bwenene na ntyo arhondera okulaka. Emburho y’okuli yakula, na larha na nyama bombi bajira amajambere duba-duba banahikira okubatizibwa.

Ababusi bani barhal’imanyire Ecingereza bwinja, cikone barhôla okuli kwa buzibu-zibu. Hofi ngasi lwa Kali-Ndarhu, ciru n’enyuma z’okukola obudufu boshi omu izine y’okuyayusa ebyuma yali omu Sudbury, Ontario, larha akag’impeka nie na Sylvia, mwali wirhu murho, omu mukolo gw’amahubiri. Na ngasi mugobe, rhwakag’iyiga Ilabiro ly’Akalalizi omu mulala. Larha na nyâma banyigiriza okuzigira Nnâmahanga. Oko kwanshumya nahâna akalamo kani emwa Yehova omu mwaka gwa 1956 erhi ngwerhe myaka ikumi. Erhi ntanya lugenda gurhi baba bazigire Yehova bwenene, oko kunampe omurhima ngendekere namukolera.

Erhi nyusa amasomo g’enyanya, ntacisegezagya obwenge bwenene oku mukolo gwa Yehova. Nakarhanya oku nkaba painiya, ntacihashe okuba na nsaranga nyinji lyo mpikiriza ecilorho cani c’okubalama omu aviyo n’okubona igulu. Napata akazi omu stasyo y’eradiyo yali omu eneo yirhu na mw’eyo stasyo nakag’iziha emiziki eri arejistré, nanal’izigire ogo mukolo. Cikone nakag’ikola bijingo; muli ntyo, nakag’igosa entimanano ngasi mango nanakag’icilunga n’abantu barhal’izigire Nnâmahanga. Buzinda, ezamiri yani ekomerezibwe n’Ebibliya yanshumya najira empindulo.

Nahamira omu Oshawa, e Ontario. Eyo munda narhimanana na Ray Norman, Lesli mwali wabo, n’abandi bapainiya. Boshi banyegereza bwinja. Erhi mbona kunganaci bal’igwerhe omwishingo, oko kwanshumya nacib’ilabiriza emihigo yani. Bampa omurhima ntondere obupainiya, nanarhondera ogo mukolo omu Mwezi gwa 9, 1966. Nal’igwerhe omwishingo, n’akalamo kakag’ibonekana nka kali kinja. Cikone, hali ebintu by’okushagalusa byakashanjire akalamo kani byakampikire buzira kulaliza.

Amango naciri oku masomo g’enyanya, nayunjuza efomu y’okuja oku Beteli, e Toronto, omu Canada.  Enyuma z’aho, erhi ndi painiya, nalalikwa okuj’ikolera myaka ini oku Beteli. Cikone, kobinali nali namasima Lesli, nanayoboha oku nkayemera ogo mulali, nta mango nanacimubone. Enyuma z’okusalira bwenene, buzinda nayemera ogo mulali gw’okuja oku Beteli nanaciyumva kubi erhi nsengaruka Lesli.

Nakag’ikolera omu nyumpa y’okufuliramwo emishangi oku Beteli na buzinda naba mwandishi erhi sekretere. Mw’ago mango, Lesli aba painiya wa pekee omu vile y’e Gatineau, omu Québec. Kanji-kanji nakag’icidosa bici akag’ijira n’erhi narhôzire omuhigo gushinganine. Enyuma z’aho, kantu kaguma k’omu bintu by’okushagalusa bwenene ntal’irhanyizeko omu kalamo kani kampikira. Ray, mushinja wa Lesli, ahamagalwa oku Beteli. Erhi ahika rhwaja omu cumpa ciguma! Oko kwarhuma nacib’ifûla obwîra bwani haguma na Lesli. Rhwajira obuhya omu lusiku luzinda lw’omwaka gwani gw’akani omu mukolo gw’Ebeteli, ko kuderha omu nsiku 27/2/1971.

Nie na Lesli rhwarhumwa omu cigamba c’Ecifaransa omu Québec. Enyuma za myaka misungunu, nashagaluka okuhabwa omukolo gw’okuba mwangalizi w’omuzunguko erhi ngwerhe myaka 28. Naciyumva nka nciri musole bwenene ntanagwerhi buhashe bw’okujira ogo mukolo, cikone enderho ziri omu lwandiko lwa Yeremiya 1:7, 8 zampa omurhima. Ciru akaba ntyo, Lesli ali amajira e aksida y’omutuga kabirhi koshi-koshi anal’igwerhe amazibu g’okubula irô. Co cirhumire, rhwakacidosa erhi rhwahasha okujira omukolo gw’obwangalizi. Ciru akaba ntyo, aderha ntya: “Erhi Yehova akarhuhûna rhujire kantu kalebe, ka rhurhashinganini rhucihangane okukajira?” Rhwayemera ogo mukolo rhwanagujira n’obushagaluke myaka 17.

Omu mukolo gw’obwangalizi, nal’igwerhe bintu binji bya kujira, na ngasi mango ntakag’iba na kasanzi kanji ka kugeza haguma na Lesli. Naligwasirwe nciyigirize erindi isomo. Lwa Kasi luguma sezi, omudende gw’oku muhango gwalaka. Nta muntu wali aha muhango, hali ecigapo cone c’okuhêka oku matembezi, calimwo ilehe, e fromaje, emigati, icupa ly’idivayi, amaveri, n’amaruba garhal’igwerhe izino ly’owagayandikaga galidesire erhi, “Ohêke mukawe oku matembezi.” Olo lwali lusiku lwinja bwenene, lw’ehizûba. Cikone nahugûlira Lesli oku nal’igwêrhe ehotuba z’okurheganya ntakanahashire okugenda. Ahugûkwa cikone agaya hityu. Erhi ntamala aha biro byani lyo nteganya, ezamiri yarhondera okuntumuza. Narhanya oku lwandiko lw’Abefezi 5:25, 28. Nabona oku olo lwandiko lw’Ebibliya eri njira Yehova ankengezizemwo oku nkashibirira oku mukanie ali aciyumva. Enyuma z’okusalira, nabwira Lesli erhi, “Rhugende,” n’oko kwamushagalusa bwenene. Rhwatembeza omutuga kuhika ahantu hinja bwenene hofi n’olwishi, rhwabamba omushangi gwirhu gw’ameza, rhwanageza luguma lw’omu nsiku nyinja bwenene rhwamakageza haguma. N’oko kurharhumaga ntarheganya ehotuba zani.

Emikolo yirhu y’omuzunguko yali ya bushagaluke yanali minji, rhwakag’irhonderera omu Colombie Britannique kuhika omu Terre-Neuve. Irala lyani ly’okubalama lyakag’iba liri lyahikirizibwa. Nakag’irhanya oku  Masomo g’Egileyadi, cikone ntal’ishagalukire okuba misiyonere omu cindi cihugo. Nakag’ibona nka bamisiyonere baba bantu bago-bago, ntanakag’iciyumva nka nshinganine okuba ye. Kandi, nakag’iyoboha oku nkaba rhwanarhumwa omu cihugo c’omu Afrique cibamwo ndwala nyinji n’ivita. Nal’ishagalukire ecihugo nalimwo.

Omu mwaka gwa 1992, erhi omukolo gwirhu gurhondera gwayigulwa omu bihugo byali by’omu Mulungano gw’e Sovieti, barhudosa erhi rhwanalonza okuhamira e Estonie n’okuba bamisiyonere. Rhwasomerwa bwenene, cikone rhwasalira lugenda oko. Kandi rhwacib’irhanya ntya: ‘Erhi Yehova akarhuhûna oku rhujire kantu kalebe, ka rhurhashinganini rhucihangane okukajira?’ Rhwayemera, nanarhanya ntya: ‘Kuli kwinja, bulya rhurhaje omu Afrique.’

Ho n’aho rhwarhondera okuyiga olulimi lw’Eciestoniya. Erhi rhuyusa myezi milebe mw’eco cihugo, barhuhûna oku rhujire omukolo gw’omuzunguko. Rhwakag’ilambagirira bigamba 46 ntya na bikundi bilebe by’omu Estonie, omu Latvie, omu Lithuanie, ciru n’omu Kaliningrad, e Russie. Kuli kuderha oku rhwacihanganyire okuyiga Ecilatviya, Ecilithuaniya, n’Ecirusi. Oko kurhali kulembu. Cikone bene wirhu na bali birhu bakag’ishagalukira obushiru bwirhu banarhurhabala. Omu mwaka gwa 1999, ebiro by’etawi byarhondezibwa omu cihugo c’e Estonie, nanahabwa omukolo gw’okukola omu komite y’etawi haguma na Mwene Wirhu Toomas Edur, Lembit Reile, na Tommi Kauko.

Rhwahikire aha rhwamanya Bahamirizi banji bal’ihesirwe omu Sibérie embere z’aho. Ciru akaba bajirirwe n’obukali omu prizo banal’ihesirwe kuli n’emilala yabo, barhabaga bakali barhanabîkaga akarhinda. Bagendekire baba n’omwishingo n’obushiru omu mukolo gw’amahubiri. Olwiganyo lwabo lwarhuyigiriza oku rhwanahash’ilembera n’okuba n’omwishingo ciru akaba rhuli omu kanga kazibu.

Rhwakola bwenene myaka minji buzira kuba n’akasanzi kanji k’okurhamûka, n’oko kwarhuma Lesli arhondera okuyumva omurhamo munji bwenene. Rhurhahugûkagwa duba-duba oku oko kwal’idwirhwe n’endwala elerha omurhamo ehamagalwa fibromyalgie. Rhwakarhanya bwenene lugenda okugaluka e Canada. Erhi rhulalikwa e Patterson, omu New York, États-Unis oku masomo ga bene wirhu bakola omu komite y’etawi, ntarhanyagya oku rhwahasha okuja kw’ago masomo. Cikone, rhwayemera enyuma z’okusalira bwenene. Yehova agishire ogo muhigo. Erhi rhuba rhuli kw’ago masomo lyo Lesli abusirwe endwala yage, n’oko kwarhuma rhwahash’igalukira emikolo yirhu nk’oku byali embere.

Bijingo biguma omu mwaka gwa 2008 erhi rhuba rhwagalusire e Estonie, bene wirhu b’oku biro bikulu bampamagala n’okundosa erhi rhwanayemera okuj’ikolera omu République Démocratique du Congo. Nahwerwa, bwenene bulya nalishinganine mpane ishuzo olusiku lwakulikiraga. Ntabwiraga Lesli ho n’aho bulya nal’imanyire oku arhakahunzire obo budufu. Lubero n’oko, nie ntahungaga obo budufu, bulya nakag’isalira Yehova lugenda oboba nagwerhe bw’okuja e Afrique.

Olusiku lwakulikiraga erhi mbwira Lesli, rhwarhanya ntya: “Yehova ali arhuhûna oku rhuje omu Afrique. Erhi akaba rhurhapimiri okuja yo, gurhi rhumanyiremwo oku rhurhakahasha okulama yo n’okuyishagalukira?”  Muli ntyo, enyuma z’okuyusa myaka 16 omu Estonie, rhwarhôla e aviyo y’okuja e Kinshasa, omu Congo. Ebiro by’etawi byagwerhe e jardin nyinja bwenene hanali hantu ha murhûla. Kantu kaguma k’omu bintu birhanzi Lesli ahiraga omu cumpa cirhu kali karte abîkaga kurhenga amango rhwahamaga e Canada. Ako karte kali kayandike kw’ezi nderho: “Obe n’omwishingo ah’oli.” Enyuma z’okurhimanana na bene wirhu na bali birhu, okulongoza amafunzo g’Ebibliya, n’okushagalukira omukolo gw’obumisiyonere, omwishingo gwirhu gwayushuka. Enyuma za kasanzi kalebe, rhwahabwa olukengwa lw’okulambagirira zindi tawi 13 ntya z’ebindi bihugo by’omu Afrique. Oko kwarhuhashisa okubonana na bantu banji bwenene bali lubero na binja. Oboba nagwerhe embere bwahwa, rhwanavuga Yehova omunkwa okubona arhurhumire rhuj’ikolera omu Afrique.

Omu Congo, barhuhire biryo binji biri lubero rhwakag’irhanya oku rhurhakahash’irya, kwa lwiganyo ebiruru. Cikone erhi rhubona gurhi bene wirhu bali babishagalukira, rhwapima okubirya rhwanashagaluka okubona rhwajijire ntyo.

Rhwabire n’obulyo bw’okuhêka ebiryo by’ekiroho n’oburhabale bw’omubiri omu eneo y’ebushoshokero bw’izuba (Est) y’ecihugo c’e Congo, emunda emirhwe y’abagoma erhera engo n’okujirira kubi abakazi n’abana. Bene wirhu banji barhagwerhe bintu binji by’omubiri. Ciru akaba ntyo, obulangalire bwabo busezire omu bufûke, obuzigire bwabo kuli Yehova, n’obwishwekerezi bwabo okw’ikubuliro lyage byarhuhuma oku murhima. Olwiganyo lwabo lwarhushumya rhurhanye lugenda ecirhuma rhukolera Yehova rhwanazibuhya obuyemere bwirhu muli ye. Bene wirhu baguma bahezize enyumpa zabo n’emburho zabo. Oko kwankengezize gurhi ebintu by’omubiri bihera duba-duba na kunganaci obuhirhi bw’ekiroho buba bwa ngulo ndarhi bwenene. Ciru akaba bene wirhu bahikirwe n’amazibu madarhi, barhakag’iciduduma kanji-kanji. Oko bakag’ibona ebintu kwarhushumya rhukalembera amazibu girhu n’oburhwali, ciru n’amazibu g’obulwala.

Buzinda rhwahikirwa n’akandi kantu k’okushagalusa rhurhal’irhanyizeko. Barhuhûna oku rhuhamire oku biro by’etawi by’e Hong Kong. Nta mango rhwarhanyize lugenda okulama omu Asie! Cikone enyuma z’okucibonera gurhi Yehova arhurhabire omu njira y’obuzigire omu mikolo yoshi rhwahabirwe, rhwayemera ogo mulali. Omu mwaka gwa 2013, rhwalaka erhi rhuleka abîra  birhu bazigirwa n’ebintu binja by’okusomeza by’omu Afrique, buzira kumanya bici rhwarhimanana nabyo emunda rhwaja.

Yali mpindulo nnene okulama omu Hong Kong, bulya eba vile erimwo bantu banji bwenene barhenzire ngasi hoshi omw’igulu. Okuyiga olulimi lw’Ecishinwa kurhali kulembu. Ciru akaba ntyo, bene wirhu barhuyegerezize n’omwishingo, rhwanashagalukira bwenene ebiryo by’eyo munda. Omukolo gwirhu gwakag’ijira amajambere duba-duba, cikoki obukenyi nabo bwakag’iyushuka bwenene. Oko kwarhuma Embaraza Eri Yalongoza yarhôla omuhigo gw’obwenge gw’okuguza nyumpa nyinji na parsele nyinji z’etawi. Kasanzi kasungunu enyuma z’aho, omu mwaka gwa 2015, rhwarhumwa e Corée du Sud, yo rhunacigendekire rhwakolera kuhika buno. Eno munda rhuli rhwayiga olundi lulimi luzibu, cikone rhuhabirwe omurhima bulya, ciru akaba rhurhacihash’iluderha bwinja, bene wirhu na bali birhu bali babona oku rhuli rhwajira amajambere omu kuderha olo lulimi lw’Ecikoreya.

Ensiku zoshi, kurhaba kulembu okucijirira abîra bahyahya, cikone rhwabwine oku, omu kuba barhanzi okuyegereza abandi, rhwanahikira aha rhwabamanya duba-duba. Rhwacibwinire oku bene wirhu baba bashushine omu bintu binji bwenene kulusha ebi babamwo lubero n’oku Yehova arhulemire omu njira nyinja bwenene erhuhashisa rhuyigulire bîra banji bwenene omurhima n’okubayeresa obuzigire.​—2 Kr. 6:11.

Rhwacibwinire oku kuba kwa bulagirire rhukayemera abantu nk’oku Yehova naye abayemera, n’okulonza ebiyerekine obuzigire bwa Yehova n’obulongozi bwage omu kalamo kirhu. Ngasi mango erhi rhwakaciyumvirhe rhuvunisire omurhima erhi kucidosa erhi abandi baba barhuzigire, rhwakag’icib’isoma amakarte n’amaruba g’okuhâna omurhima rhwarhumiragwa n’abîra birhu. Kobinali rhwacibwinire gurhi Yehova ashuzize oku masala girhu, gurhi arhuyemezize n’obwalagale oku aba arhuzigire, n’oku arhuhire emisi y’okugendekera.

Omu myaka minji, nie na Lesli rhwaciyigirizize obulagirire bw’okucihiriraho akasanzi k’okugeza haguma, ciru rhwakaba rhugwerhe bintu binji bwenene bya kujira. Kandi rhwahugûsirwe oku kuli kwa bulagirire rhukacishekera, bwenene amango rhuli rhwayiga olulimi luhyahya. Na ngasi budufu, rhunacihangane okulonza kantu kalebe k’okushagalusa rhwakavugako Yehova omunkwa.

Okuderha okuli, nakag’iciyumva nka ntakaba misiyonere erhi kulama omu bindi bihugo. Cikone nacibwinire omwishingo gw’okuyemera oku ebintu byoshi binahashikane kugerera oburhabale bwa Yehova. Oko kunkengezize ezi nderho z’omulebi Yeremiya: “Mâshi Nyamuzinda ci wantebire!” (Yer. 20:7, Mashi Bible) Kobinali, arhuhîre bintu binji bwenene bya kushagalusa na migisho minji rhurhal’irhanyizeko, ciru ahikirizize n’irala lyani ly’okubalama omu aviyo. Rhwabalamire omu aviyo n’okuja hantu hanji bwenene ntakarhanyizeko amango naciri mwana-rhabana, rhwalambagirire etawi omu kontina irhanu. Omu mikolo yirhu yoshi, nashagalukire bwenene iroho lya Lesli ly’okuba mubidu okununga okuboko.

Rhunagendekere rhwacikengeza ndi rhuli rhwajirira ngasi kantu na bulya gurhi rhuli rhwamujirirako. Emigisho rhuli rhwashagalukira ene eri yarhuhonjesa akalamo k’ensiku n’amango rhwayish’iba nako hano Yehova ‘alambûla okuboko [kwage], ayiguse n’obugale bwage ngasi coshi cibâmwo omûka.’​—Enna. 145:16.