1. Kushimbana n’olwandiko lwa 1 Petro 5:2, mukolo guhi gw’obulagirire abagula bajira?

 ABAGULA Bakristu bahâbirwe omukolo gw’okushibirira ebibuzi bya Yehova by’engulo ndarhi. Abo balume bacihânyire baba bashagalukire okukolera bene wabo na bali babo, bananajire okwabo koshi lyo baba “bangere b’okunali.” (Yer. 23:4, Mashi Bible; osome 1 Petro 5:2.) Rhuvuzire omunkwa bwenene okubona rhugwerhe abalume ba ntyo omu bigamba birhu!

2. Mazibu gahi bagula baguma na baguma bakalwisa?

² Omu kuhikiriza emikolo yabo, abagula banalwise mazibu manji. Kwa lwiganyo, okushibirira ecigamba kuba kuhûnyire mukolo munji. Tony, mugula muguma w’omu Etats-Unis aciyigirizize okuba wa lugero bwenene lugenda obunji bw’emikolo ayemeraga. Adesire ntya: “Oku murhondero gw’obulwala bw’okuyahukira bw’e COVID-19, nakag’ijira mikolo minji bwenene y’okupanga entimanano n’omukolo gw’amahubiri. Cikone ciru akaba nakag’ijira okwani koshi, ensiku zoshi hali binji bya kujira. Buzinda, ntal’icigwerhe kasanzi k’okujira obusomi bwani bw’Ebibliya, ifunzo lyani niene n’isala.” Ilir, mugula muguma w’omu cihugo c’e Kosovo, alwisize amazibu gali lubero. Erhi ali omu eneo y’ivita, abona oku kwali kuzibu kuli ye okukenga obulongozi bw’ikubuliro. Adesire ntya: “Oburhwali bwani bwarhangwirwe erhi ebiro by’etawi bimpa omukolo gw’okurhabala bene wirhu na bali birhu omu eneo ndarhi. Nal’iyobohire, nanakag’ibona nk’obo bulongozi burhapatini n’akanga rhwalimwo.” Tim, misiyonere muguma w’omu Asie, akag’ibona oku kuli kuzibu okujira ebintu byoshi al’igwasirwe ajire ngasi lusiku. Adesire ntya: “Hali amango nakag’iciyumva ntamire bwenene omu kushibirira bene wirhu na bali birhu.” Bici byakarhabala abagula bali balwisa amazibu ga ntyo?

3. Gurhi rhweshi rhwakayunguka omu kuciyigiriza kugerera olwiganyo lw’Omuzuzi Gideoni?

 ³ Abagula banaciyigiriza binji kugerera olwiganyo lw’Omuzuzi Gideoni. (Hb. 6:12; 11:32) Ali mulanzi na lungere w’olubaga lwa Nnâmahanga. (Bac. 2:16; 1 Nga. 17:6) Aka Gideoni, abagula bahizirweho lyo bashibirira olubaga lwa Nnâmahanga omu kasanzi kazibu bwenene. (Ebj. 20:28; 2 Tm. 3:1) Rhwanaciyigiriza binji kugerera oborhere bwa Gideoni bw’olugero, obwirhohye n’okurhumikira. Obulembedu bwage bwarhangwirwe omu mango akag’ihikiriza emikolo yage. Rhube rhuli bagula erhi nanga, rhwanaciyigiriza okuba ba kuvuga omunkwa bwenene lugenda abagula birhu. Rhwanalunga okuboko abo balume bakola bwenene.​—Hb. 13:17.

4. Gurhi Gideoni ayerekinemwo olugero n’obwirhohye?

⁴ Gideoni ali mulume wa lugero na mwirhohye. b Erhi malahika wa Yehova abwira Gideoni oku Yehova acishozire ye ly’acungula Abaisraheli kurhenga omu maboko g’Abamidyani b’emisi bwenene, oyo mulume mwirhohye ashuza ntya: “Enyumpa yirhu yo ngonyo bwenene omu bûko bwa Manasé, na nani nie munyi kulusha w’omu nyumpa ya Larha.” (Bac. 6:15) Aciyumva nk’arhagwerhi obuhashe bw’okuhikiriza ogo mukolo, cikone Yehova al’imumanyire bwinja. Kugerera oburhabale bwa Yehova, Gideoni ahikiriza ogo mukolo bwinja.

5. Gurhi olugero n’obwirhohye bw’omugula byakarhangulwamwo?

⁵ Abagula banajire okwabo koshi lyo bayerekana olugero n’obwirhohye omu ngasi kantu. (Mik. 6:8; Ebj. 20:18, 19) Barhacikungira obuhashe bwabo erhi ebi bahikirizize; barhanacibona ba busha enyanya z’amagosa gabo erhi buzamba bwabo. Cikone, hali amango kwakaba kuzibu oku mugula okuba mwirhohye na wa lugero. Kwa lwiganyo, nkaba anayemera mikolo minji na buzinda abone oku kuli kuzibu okuyihikiriza yoshi. Erhi anaderhwa kubi lugenda enjira anajiragamwo mukolo mulebe erhi ahabwe irenge lugenda enjira anajiragamwo ogundi mukolo. Bici abagula bakaciyigiriza kugerera olwiganyo lwa Gideoni byakabarhabala omu kanga ka ntyo?

6. Bici abagula bakaciyigiriza lugenda olugero kugerera olwiganyo lwa Gideoni? (Olole n’enfoto.)

⁶ Okahûna oburhabale. Omuntu w’olugero aba amanyire oku hali ebintu arhakahash’ijira.  Gideoni ali wa lugero bulya ali mubidu okuhûna abandi oburhabale. (Bac. 6:27, 35; 7:24) Abagula b’obwenge nabo banajire ntyo. Tony, rhwaganiriraga embere, ahugwîre ntya: “Enyanya z’oku naleragwa, nakag’iyemera mikolo minji kulusha eyi nakahash’ihikiriza. Co cirhumire, nahiga okuganirira olugero omu nterekêro yirhu y’omulala nanahûna mukanie ambwire entanya zage. Kandi oku jw.org nalola evideo edesire: Kama Yesu, Uwazoeze, Uwategemeze, na Uwatie Wengine Nguvu.” Tony arhondera okuhûna abandi bamurhabale kw’eyo mikolo. Bunguke buci oko kwadwirhe? Adesire ntya: “Omukolo omu cigamba guli gwahikirizibwa, nangwerhe kasanzi kanji k’okuseza obwîra bwani haguma na Yehova.”

7. Erhi abagula bakaderhwa kubi, gurhi bakayigamwo olwiganyo lwa Gideoni? (Yakobo 3:13)

⁷ Okashuza n’obutudu erhi bakakuderha kubi. Kandi abagula banarhangulwe erhi bakaderhwa kubi. Mw’eyo njira nayo, olwiganyo lwa Gideoni lwanabarhabala. Bulya al’imanyire oku arhali mwimana, ashuza n’obutudu erhi Abaefraimu bamuderha kubi. (Bac. 8:1-3) Gideoni arhabashuzagya n’obukali. Ayerekana obwirhohye omu kuyumvirhiza ebi bakag’iciduduma lugenda ye, anabaganiza omu njira y’olukogo n’oko kwarhuma barhulirira. Abagula b’obwenge banayige olwiganyo lwa Gideoni omu kuyumvirhiza bwinja n’okushuza n’obutudu erhi bakaderhwa kubi. (Osome Yakobo 3:13.) Omu kujira ntyo, banarhabale okugendekeza omurhûla omu cigamba.

8. Gurhi abagula bashinganine bashuze erhi bakahabwa obukuze? Ohâne olwiganyo.

⁸ Okaha Yehova obukuze boshi. Erhi Gideoni akuzibwa enyanya z’okuhima Abamidyani, asegeza obwenge kuli Yehova. (Bac. 8:22, 23) Gurhi abalume bahizirweho bakayigamwo olwiganyo lwa Gideoni? Bashinganine bakaha Yehova obukuze kw’ebi bali bahikiriza. (1 Kr. 4:6, 7) Kwa lwiganyo, erhi omugula akakuzibwa enyanya z’obuhashe bwage bw’okuyigiriza, anaderha oku enyigirizo zirhenzire omu Kanwa ka Nnâmahanga n’oku rhweshi rhunayigirizibwe n’ikubuliro lyage. Mango oku gandi, abagula bashinganine bakarhanya lyo bamanya erhi bali bacisegezako obwenge okurhalusire olugero. Rhuganirire ebyahikiraga mugula muguma ohamagalwa Timothy. Erhi Timothy aba mugula, al’isimire okugeza ehotuba z’abantu boshi. Adesire ntya: “Nakag’ikolesa enshula-myanzi n’enyiganyo ndiri na nzibu okuyumva. Kanji-kanji oko kwakag’irhuma abantu bankunga bwenene. Eby’okugayisa, bakansegezako obwenge ahali h’okubusegeza oku Bibliya erhi kuli Yehova.” Erhi hagera kasanzi, Timothy abona oku al’ishinganine ashanje enjira yage y’okuyigiriza ly’abantu barhakag’imusegezako obwenge okurhalusire olugero. (Mig. 27:21) Bunguke buhi oko kwadwirhe? Ahugwîre ntya: “Bene wirhu na bali birhu bali lubero bakola bambwira oku ehotuba yani yabarhabire okulwisa amazibu, okulembera amarhangulo erhi okuyegera Yehova bwenene. Nanyumve omwishingo munji erhi nyumva ezo nderho zabo kulusha oku nakag’iciyumva erhi bakampa obukuze omu myaka yageraga.”

9. Gurhi okurhumikira kwa Gideoni n’oburhwali bwage byarhangwirwemwo? (Olole enfoto eri oku cijala c’eyi gazeti.)

⁹ Enyuma za Gideoni okuhirwaho nka muzuzi, okurhumikira kwage n’oburhwali bwage byarhangulwa. Ahabwa omukolo mudarhi gw’okushereza amazabahu ga Bali ishe akag’ikolesa. (Bac. 6:25, 26) Enyuma z’aho, erhi Gideoni ayus’igusanya omurhwe gw’abasoda, ahabwa obulongozi kabirhi koshi oku abanyihyeko. (Bac. 7:2-7) Buzinda, abwirwa oku arhere akambi k’abashombanyi omu kagarhi k’obudufu.​—Bac. 7:9-11.

10. Gurhi okurhumikira kw’omugula kwakarhangulwamwo?

¹⁰ Abagula bashinganine babe ‘babidu okurhumikira.’  (Yk. 3:17, NWT) Omugula orhumikira aba mubidu okukulikira ebi Amandiko gadesire n’okushimba obulongozi bw’ikubuliro lya Nnâmahanga. Omu kujira ntyo, anayerese abandi olwiganyo lwinja. Ciru akaba ntyo, okurhumikira kwage kwanarhangulwa. Kwa lwiganyo, nkaba anabona oku kuli kuzibu okukulikira obulongozi ahabirwe. Omu kanga kaguma na kaguma, nkaba anacidosa erhi bulongozi bulebe bupatine n’ehali erhi kandi buli bwa bwenge. Erhi kandi anahûnwa oku ajire mukolo mulebe gwakarhuma ashwekwa. Gurhi abagula bakayigamwo olwiganyo lwa Gideoni lw’okurhumikira omu kanga ka ntyo?

11. Bici byakarhabala abagula lyo baba ba kurhumikira?

¹¹ Okayumvirhiza bwinja obulongozi n’okubukolesa. Yehova abwizire Gideoni gurhi ashabamwo amazabahu g’ishe, ngahi ayubaka amazabahu mahyahya ga Yehova na nsimba ehi ahâna nterekêro. Gideoni arharhindiraga okurhumikira obo bulongozi, ajira nk’oku Yehova anamubwiraga. Ene, ikubuliro lya Yehova linahe abagula obulongozi kugerera amaruba, amatangazo n’obundi bulongozi burhurhabala rhube n’amagala minja g’omubiri n’ag’ekiroho. Rhunazigire abagula birhu bulya banakulikire obulongozi bw’ikubuliro n’obwishwekerezi. Ecigamba coshi cinayunguke.​—Enna. 119:112.

12. Gurhi abagula bakakolesamwo olwandiko lw’Abahabraniya 13:17 erhi akaba hali empindulo omu bulongozi bw’ikubuliro?

¹² Okaba mubidu okujira empindulo. Okengere oku Yehova abwizire Gideoni oku anyihye oku basoda bage banji bagaluke emwababwe. (Bac. 7:8) Nkaba akarhanyize ntya: ‘K’eyi mpindulo kobinali eri ya bulagirire? Ka yantabala?’ Ciru akaba ntyo, Gideoni arhumikire. Ene, abagula banayige olwiganyo lwa Gideoni omu kurhumikira erhi ikubuliro lyakabahûna bajire mpindulo ndebe. (Osome Abahabraniya 13:17.) Kwa lwiganyo, omu mwaka gwa 2014, Embaraza Eri Yalongoza yajijire empindulo lugenda oku ensaranga z’okuyubaka Enyumpa z’Entimanano, n’Enyumpa z’Entimanano Nkulu zakag’ipatikanamwo. (2 Kr. 8:12-14) Ebigamba birhakacihûnyirwe okuhoza ensaranga n’okuzigalula buzinda. Lubero n’oko, ikubuliro likola likolesa emicango erhenga omu bigamba by’omw’igulu lyoshi omu kuyubaka Enyumpa z’Entimanano n’Enyumpa z’Entimanano Nkulu aha zilagirirweko, ciru akaba ecigamba cirhagwerhi obuhashe bw’okuzigalula. Erhi José ayumva oku haba eyo mpindulo, aba n’akarhinda arhanayemeraga oku yanakola, arhanya ntya: ‘Nta Nyumpa y’Entimanano ciru n’enguma yanaciyubakwe. Arhali kw’ebintu bijirwa ntyo eno mwirhu.’ Bici byarhabire José ly’alunga obo bulongozi okuboko? Adesire ntya: “Enderho ziri omu lwandiko lw’Emigani 3:5, 6 zankengezize okulangalira Yehova. N’amalehe gabire minja bwenene! Arhali Nyumpa nyinji z’Entimanano zone rhuli rhwayubaka cikone rhwaciyigirizize okuhâna emicango omu njira ziri lubero lyo rhweshi rhuyumanyanya.”

13. (a) Bici Gideoni al’iyemire n’obwalagale? (b) Gurhi abagula bakayigamwo olwiganyo lwa Gideoni? (Olole n’enfoto.)

 ¹³ Ojire obulonza bwa Yehova n’oburhwali. Gideoni arhumikire Yehova ciru n’amango al’iyobohire n’amango omukolo gwage gwakamudwirhire amazibu. (Bac. 9:17) Enyuma za Yehova okumuzibuhya, Gideoni ayemera n’obwalagale oku Yehova akamurhabire ly’alanga abakozi bage. Abagula balamire omu maeneo omukolo gwirhu guhanzibwemwo banayige olwiganyo lwa Gideoni. Banalongôze n’oburhwali entimanano n’omukolo gw’amahubiri ciru bakabayobohya oku babashweka, ciru bakabadosa amadoso, ciru bakaheza omukolo gwabo erhi kukolerwa n’obuminya. c Omu mango g’amalibuko madarhi, abagula bayish’iba balagirire oku burhwali lyo barhumikira obulongozi bayish’ihabwa ciru akaba okukulikira obo bulongozi kwabalerhera amazibu. Obo bulongozi bwanaba buyerekire okuyalagaliza abantu omwanzi gw’olubanja n’oku rhwakajira lyo rhuyokoka ecirhero ca Gogi w’e Magogi.​—Eze. 38:18; Maf. 16:21.

14. Gurhi okulembera kwa Gideoni kwarhangwirwemwo?

¹⁴ Omukolo gwa Gideoni gw’obuzuzi gwal’ihûnyire okukola na misi minji bwenene. Erhi Abamidyani balibirha omu ntambala abalwisagya budufu, Gideoni abalibirhako kurhenga omu Kabanda k’e Yezreli n’enjira yoshi kuhika oku Lwishi Yordani, byanahashikana eyo njira yal’izungulusirwe n’amashaka. (Bac. 7:22) Ka Gideoni ayimanzire erhi ahika oku Lwishi Yordani? Nanga! Ciru akaba ali amarhama, ye n’abalume 300 bali haguma naye bayikira banagendekera babakulikira. Buzinda, bagwarha Abamidyani banabahima.​—Bac. 8:4-12.

15. Mangaci okulembera kw’omugula kwakarhangulwa?

¹⁵ Hali amango omugula akaciyumva arhamire omubiri, omu bukengere, n’ekandalala enyanya z’okushibirira ecigamba n’omulala gwage. Omu kanga ka ntyo gurhi abagula bakayigamwo olwiganyo lwa Gideoni?

16-17. Bici byarhabire Gideoni ly’alembera, na bici abagula bakayemera n’obwalagale? (Izaya 40:28-31) (Olole n’enfoto.)

 ¹⁶ Olangalire oku Yehova akuha emisi. Gideoni al’ilangalire oku Yehova amuha emisi, na Yehova amuhire yo. (Bac. 6:14, 34) Mango maguma, Gideoni n’abalume bali haguma naye balibirhako bami babirhi Bamidyani oku magulu n’obo nkaba abo bami bohe bali bashonyire oku ngamiya. (Bac. 8:12, 21) Cikone, kugerera oburhabale bwa Nnâmahanga, Abaisraheli babagwarha banahima entambala. Ko n’oko, abagula banalangalira Yehova, bulya “arhakarhama ciru n’olusiku luguma nisi erhi acîlîkirire.” Abaha emisi amango bayilagirireko.​—Osome Izaya 40:28-31, Mashi Bible.

¹⁷ Rhuganirire ebi Matthew, mwene wirhu muguma w’omu Komite Ejira Olushangi n’Ehopitali, acibwinire. Bici bimurhabala ly’alembera? Matthew adesire ntya: “Nacibwinire oku enderho ziri omu Abafilipi 4:13 ziba z’okuli. Kanji-kanji amango ntamire nannogonosire nieshi, nanshenge Nnâmahanga bwenene n’okumuhûna emisi y’omubiri n’ey’obukengere ndagirireko lyo ntabala bene wirhu. Omu mango ga ntyo, nanyumve oku iroho lya Yehova liri lyampa emisi, n’okuntabala nembere.” Aka Gideoni, abagula birhu bacihânyire bwenene banarhimanana n’amazibu amango bali bayabula obuso bwa Nnâmahanga buzira kucikaliza. Kobinali, bashinganine babe ba lugero n’okuhugûkwa oku arhali ensiku zoshi bakahasha okujira ngasi kantu bal’ilonzize. Cikone banalangalira oku Yehova ayumvirhiza amasala gabo g’okumuhûna oburhabale n’okubaha emisi lyo balembera.​—Enna. 116:1; Fl. 2:13.

18. Omu kucikengeza, gurhi abagula bakayigamwo olwiganyo lwa Gideoni?

¹⁸ Abagula banaciyigiriza binji kugerera olwiganyo lwa Gideoni. Abagula bagwasirwe bayerekane oborhere bw’olugero n’obwirhohye omu bunji bw’emikolo bayemera n’oku bajira erhi bakaderhwa kubi nisi erhi bakakuzibwa. Bagwasirwe bayerekane oborhere bw’okurhumikira n’oburhwali, ci bwenene bulya obuzinda bw’er’igulu libi buli hofi. Kandi bashinganine balangalire oku ciru bakarhimanana na mazibu gahi, Nnâmahanga anabaha emisi. Kobinali, rhunashagalukire abo balungere bakola bwenene ‘rhunanakenge’ abalume ba ntyo.​—Fl. 2:29.