1-2. Aka Loti, mazibu gahi Abakristu bali balwisa ene?

 ERHI rhubona amakanuni g’olugenzi lubi abantu bagwerhe mw’er’igulu ene, rhunaciyumve ak’omulume mushinganyanya Loti. “Akag’ishologorhwa n’olugendo lubi lw’abo banyankola-maligo barhajiraga lugero omu kuhusha,” bulya al’imanyire oku Larha wirhu w’omu mpingu kushomba ashomba olugenzi lubi. (2 Pt. 2:7, 8) Okuyoboha Nnâmahanga n’okumuzigira kwashumya Loti ayaka olugenzi lubi lw’abo bantu bal’imuzungulusire. Nirhu rhuzungulusirwe n’abantu bakenga hisungunu erhi barhakenga ciru n’ehitya amakanuni ga Yehova g’olugenzi. Ciru akaba ntyo, rhwanagendekera rhwaba n’olugenzi lucîre erhi rhwakagendekera rhwazigira Nnâmahanga n’okumuyoboha omu njira eshinganine.​—Mig. 14:2.

² Yehova arhurhabire okujira ntyo kugerera amahano g’okurhuha omurhima gali omu citabu c’Emigani. Abakristu boshi, ko kuderha abalume n’abakazi, emisole n’abashosi, kobinali banayunguka n’amahano g’obwenge gali mw’eco citabu.

3. Kushimbana n’olwandiko lw’Emigani 17:3, cirhumire ciguma cihi cirhushumya rhulange omurhima gwirhu? (Olole n’enfoto.)

³ Ecirhumire c’obulagirire cirhushumya rhulange omurhima gwirhu gw’olwiganyo kuli kubona oku Yehova analolereze omurhima gwirhu. Anabone binji kulusha oku abandi barhubona ananabone oku rhuyosire kobinali ekandalala. (Osome Emigani 17:3.) Arhuzigira erhi rhwakagendekera rhwarhanya oku mahano gage g’obwenge gakarhurhabala rhulame ensiku n’amango. (Yn. 4:14) Erhi rhwakajira ntyo, amakanuni g’olugenzi lubi n’obunywesi bwa Shetani n’igulu lyage birhakaba n’enafasi omu bukengere bwirhu.  (1 Yn. 5:18, 19) Amango rhugendekire rhwayegera Yehova, obuzigire bwirhu n’obukenge bwirhu kuli ye bwanayushuka. Bulya rhurhalonzizi okugayisa Larha wirhu, rhunagaye ciru n’entanya z’okulonza okujira ecaha. Erhi rhwakashumikwa okujira akantu kabi, rhukacidosa ntya: ‘Gurhi nakagayisa n’obulonza Omuntu wanyeresire buzigire bunji bwenene?’​—1 Yn. 4:9, 10.

4. Gurhi okuyoboha Yehova kwalanziremwo mwali wirhu muguma ly’ahagalika enshumi z’okujira ecaha?

⁴ Marta, mwali wirhu muguma w’omu cihugo c’e Croatie washumikagwa okujira eby’enshonyi, ayandisire ntya: “Nabwine oku kwali kuzibu okurhanya bwinja n’okurhenza omu bwenge bwani enshumi z’okushagalukira ecaha omu kasanzi kasungunu. Cikone okuyoboha Yehova ko kwananzire.” b Gurhi okuyoboha Nnâmahanga kwamulanziremwo? Marta adesire oku arhanya bwenene oku malehe mabi okurhôla omuhigo mubi kwakamudwirhire. Nirhu rhwanajira ntyo. Amalehe mabi gakarhuhikira kuli kubona oku rhwanagayisa Yehova rhurhakanaciba n’obulyo bw’okumuharamya ensiku n’amango.​—Murh. 6:5, 6.

5. Bici wakaciyigiriza kugerera ebyahikiraga Leo?

⁵ Amango rhuyobohire Yehova, rhunabe masu lyo rhurhag’ijira obwîra n’abantu bagwerhe olugenzi lubi. Leo, olama omu République Démocratique du Congo, aciyigirizize er’isomo. Myaka ini enyuma z’okubatizibwa kwage, arhondera okujira obwîra n’abîra babi. Akag’irhanya oku bulya yene arhal’igwerhe nkomedu mbi, nta caha akag’ijirira Yehova. Cikone, buzira kulegama, abîra bage babi bamushumika arhondera okulaluka n’okujira eby’enshonyi. Buzinda arhondera okurhanya bwenene kw’ebi ababusi bage Bakristu bamuyigirizagya n’oku mwishingo al’igwerhe embere. Bunguke buhi okujira ntyo kwamudwirhire? Obukengere bwamugalukira. Kugerera oburhabale bw’abagula, agalukira Yehova. Ene, ashagalusire okukola nka mugula na painiya wa pekee.

6. Bakazi babirhi bahi b’olwiganyo rhukola rhwaganirira?

 ⁶ Lekagi rhuganirire ecitabu c’Emigani cigabi ca 9, ciganirire bakazi babirhi bashushanyizibwe n’obwenge n’obuhwinja. (Oshushanye n’Abaroma 5:14; Abagalasiya 4:24.) Omu mango rhuli rhwajira ntyo, okengere oku abantu omw’igulu lya Shetani barhambwirwe n’ebijiro by’enshonyi n’epornografi. (Ef. 4:19) Co cirhumire, kuli kwa bulagirire rhugendekere rhwayoboha Nnâmahanga n’okuyaka ebibi. (Mig. 16:6) Muli ntyo, ngasi muguma wirhu, abe ali mulume erhi mukazi, anayunguka n’ebiri mw’eco cigabi. Ngasi muguma muli abo bakazi babirhi aganirirwe nk’oli walalika abarhagwerhi bumanye, ko kuderha ‘abarharhimanya.’ Ngasi muguma ali nk’oli waderha ntya: ‘Yisha omu mwani olye ebiryo.’ (Mig. 9:1, 5, 6, 13, 16, 17) Cikone, ebihikire abayemire ngasi mulali biri lubero bwenene.

7. Kushimbana n’Emigani 9:13-18, bici bihikira abayemera omulali gwa nyamusirhye w’omukazi? (Olole n’enfoto.)

⁷ Lola omulali guhânyirwe na “nyamusirhye w’omukazi.” (Osome Emigani 9:13-18.) Ali ayakuza n’oburhwali abarharhimanya omu kuderha erhi, ‘Mugere eno munda’ rhujire idinye. Bici byabahikira? “Abalâlike ba nyamusirhye w’omukazi, omu rhubanda rhw’ekuzimu bali.” Nkaba wanakengera enderho za ntyo z’olwiganyo ziri omu bigabi by’embere by’ecitabu c’Emigani. Rhurhonzirwe lugenda ‘omukazi w’embuga’ n’‘omukazi mugênzi.’ Ebibliya erhubwizire ntya: “Enyumpa yage ehengemîre ebwa lufû.” (Mig. 2:11-19) Ecitabu c’Emigani 5:3-10 cirimwo obundi burhonde lugenda owundi mukazi “mugênzi” olya ‘amagulu gage garhandalikira ebwa lufû.’

8. Muhigo guhi rhugwasirwe rhurhôle?

⁸ Abayumva omulali gwa “nyamusirhye w’omukazi” bagwasirwe barhôle omuhigo: Ka bayemera ogo mulali erhi bagulahira? Nkaba nirhu hali amango byakahûna rhurhôle omuhigo guli nk’ogo. Gurhi rhwakajira erhi muntu mulebe akarhushumika rhujire ecijiro c’eby’enshonyi kandi erhi rhwakabona buzira kulaliza enfoto y’eby’epornografi?

9-10. Birhumire biguma na biguma bihi birhushumya rhuyake olugenzi lw’eby’enshonyi?

⁹ Hali ebirhumire binja bwenene bishinganine birhushumye rhuyake olugenzi lw’eby’enshonyi. “Nyamusirhye w’omukazi” aganirirwe nk’oli waderha ntya: “Amishi mazimbano go ganuna!” Ago ‘mishi mazimbano’ byo bici? Ebibliya eshushanyize ecijiro c’obuhya egarhi k’omulume na mukage n’amishi g’ehibohololo. (Mig. 5:15-18) Omulume na mukage banashagalukira ebijiro by’obuhya bikwanine omu buhya bwabo buyemerirwe n’amarhegeko g’ecihugo. Cikone, oko  kuli lubero bwenene n’“amishi mazimbano.” Ganashushanya ecijiro cibi c’obuhya cirhayemerirwi n’amarhegeko. Kanji-kanji ecijiro ca ntyo cinajirikane omu bwifulikwe nka kula omushambo alug’izimba omu bwifulikwe. “Amishi mazimbano” ganabonekana nka manunu erhi akaba abali bajira eco cijiro bali barhanya oku ecaha cabo cirhamanyikane. Banabe bali bacirheba bwenene, bulya Yehova anabone byoshi. Okuheza okuyemerwa na Yehova ko kantu kalulu erhi kabi bwenene kakarhuhikira, co cirhumire karhakaba ‘kanunu’ erhi ka kushagalusa. (1 Kr. 6:9, 10) Cikone kwanarhulerhera agandi malehe mabi.

¹⁰ Ecijiro c’eby’enshonyi canarhuma rhwayumva enshonyi, canarhuma rhwaciyumva ba busha, canarhulerhera izimi rhurhal’ilonzize, cananashaba emilala. Bibonekine n’obwalagale oku okuyaka “enyumpa” ya nyamusirhye w’omukazi n’ebiryo byage kuli kukolesa obwenge. Ahanyuma n’olufû lw’ekiroho, bantu banji bajira ebijiro by’enshonyi banalwale endwala zibalerhera duba-duba olufû lw’okunali. (Mig. 7:23, 26) Omulongo gwa 18 gw’ecigabi ca 9 gushwinjire omu kuderha ntya: “Abalâlike ba nyamusirhye w’omukazi, omu rhubanda rhw’ekuzimu bali.” Bulya gurhigi bantu banji bayemera omulali gwage gw’oburhebanyi gubalerhera obuhanya?​—Mig. 9:13-18.

11. Bulya gurhi okulola epornografi kunalerhe mazibu manji?

¹¹ Murhego muguma gulug’igwarha bantu banji eri pornografi. Bantu baguma na baguma banarhanye oku okulola epornografi kurhakabalerhera mazibu goshi-goshi. Lubero n’oko, epornografi enalerhere abantu amazibu, enabanyihize obukenge, n’okubajira baja. Erhi omuntu akalola epornografi, kunabe kuzibu okukûla ezo nfoto omu bwenge. Na kandi, epornografi erharhabala abantu okuyaka enyifinjo mbi; cikone enazijire zibe na misi minji. (Kl. 3:5; Yk. 1:14, 15) Kobinali, bantu banji balola epornografi banahikire aha bajira ebijiro by’enshonyi.

12. Gurhi rhuyerekanamwo oku rhuli masu lugenda enfoto zakazusa irala ly’okujira eby’enshonyi?

¹² Rhuli Bakristu, gurhi rhushinganine rhujire erhi rhwakabona enfoto y’epornografi buzira kulaliza? Ho n’aho rhushinganine rhulole handi-handi. Kwanaba kulembu kuli rhwe okujira ntyo erhi rhwakakengera oku obwîra bwirhu haguma na Yehova ko kantu k’engulo ndarhi bwenene rhujira. Kobinali, ciru nfoto nguma na nguma zirhabonekini nka za pornografi zanazusa irala ly’okujira ecijiro c’eby’enshonyi. Bulya gurhi rhushinganine rhuziyake? Bulya rhurhaba rhulonzize rhujire ciru akantu kasungunu kakarhulongoza rhujire eby’enshonyi omu murhima gwirhu. (Mt. 5:28, 29) Mugula muguma w’omu Thailande ohamagalwa David adesire ntya: “Nancidose ntya: ‘Ciru akaba ezi nfoto zirhabonekini nka za pornografi, ka Yehova ashagaluka erhi nakagendekera nazilolako?’ Okurhanya ntyo kunantabale nkole n’obwenge.”

13. Bici birhurhabala lyo rhukola n’obwenge?

¹³ Okuyoboha okujira akantu kakagayisa Yehova kunarhurhabale rhukole n’obwenge. Okuyoboha Nnâmahanga go ‘murhondêro,’ erhi musingi, “gw’obushinganyanya [gw’obwenge, NWT].” (Mig. 9:10) Oko kuyerekinwe bwinja omu milongo mirhangiriza y’ecitabu c’Emigani cigabi ca 9, ciganirire “oburhimanya [obwenge bw’okunali, NWT]” nka wundi mukazi w’olwiganyo.

14. Mulali guhi guli lubero guyerekinwe omu lwandiko lw’Emigani 9:1-6?

¹⁴ Osome Emigani 9:1-6. Mw’olu lwandiko, rhusomiremwo omulali kurhenga emwa Yehova, Mulemi wirhu na Nshôko y’obwenge boshi. (Mig. 2:6; Rm. 16:27) Olwiganyo lukolesibwe mw’olo lwandiko luyerekine enyumpa nnene egwerhe mitungo nda. Oko kuyerekine oku Yehova aba muhanyi ananayegereze abantu boshi balonza okukolesa obwenge bwage omu kalamo kabo.

15. Bici Nnâmahanga arhulalisire rhujire?

 ¹⁵ Kugerera olwiganyo lw’omukazi oshushanyizibwe n’“obwenge bw’okunali” omu citabu c’Emigani cigabi ca 9, rhuciyigirizize oku Yehova aba muhanyi ananarhuhe bintu binji bwenene. Ogo mwanzi guyerekine oku oyo mukazi w’olwiganyo al’irheganyize bwinja enyama yage, idivayi lyage likande bwinja, n’ameza gage gali mapange bwinja omu nyumpa yage. (Mig. 9:2) Kandi, kushimbana n’omulongo gwa 4 n’ogwa 5, Mashi Bible: ‘Abwizire [bwenge buganirirwe nka muntu] ngasi barhagweri okurhimanya erhi: Yishi mulye oku biryo byani.’ Bulya gurhi rhushinganine rhuje omu nyumpa y’obwenge bw’okunali n’okulya ebiryo oyo mukazi arhuhire? Yehova alonzize abana bage babe n’obwenge banaciyumve bali omu bulanzi, arhalonzizi rhujire amagosa gakarhuma rhwaciyumva kubi. Co cirhumire, “abashinganyanya bo abîkîre obucire bwage [obwenge bwage bukola, NWT].” (Mig. 2:7) Amango rhuyobohire Yehova omu njira eshinganine, rhwanakalonza okumushagalusa. Rhunayumve amahano gage g’obwenge, rhunanashagalukire okugakolesa.​—Yk. 1:25.

16. Gurhi okuyoboha Nnâmahanga kwarhabiremwo Alain ly’arhôla omuhigo gw’obwenge, na bunguke buci oko kwadwirhe?

¹⁶ Rhuganirire gurhi okuyoboha Nnâmahanga kwarhabire Alain ly’arhôla omuhigo gw’obwenge. Oyo mugula Mukristu na mwalimu oku masomo malebe adesire ntya: “Banji b’omu birhu balimu bakag’ilola e filme z’epornografi banakag’izibona nka njira y’okuciyigiriza lugenda ecijiro c’obuhya.” Cikone Alain arharhebagwa. Adesire ntya: “Enyanya z’okuyoboha Nnâmahanga, nalahira loshi-loshi okulola ezo filme. Kandi nahugûlira abirhu balimu bulya gurhi nalahiraga okuzilola.” Akag’ikolesa ihano lihânyirwe n’“obwenge bw’okunali” lirhubwizire oku ‘rhukulikire enjira y’obwenge.’ (Mig. 9:6, Mashi Bible) Ababo balimu baguma na baguma bashagalukira olwimango lwa Alain, na buno bali bayiga Ebibliya n’okuja oku ntimanano z’Ecikristu.

17-18. Migisho ehi abali bayemera omulali gw’”obwenge bw’okunali” bali bashagalukira, na bici bali balindirira? (Olole n’enfoto.)

¹⁷ Yehova akolesize olwiganyo lw’abo bakazi babirhi ly’arhuyeresa gurhi rhwakabamwo n’obushagaluke omu mango gayisha. Abayemera omulali gwa “nyamusirhye w’omukazi” banasegeze obwenge bwabo oku masima “manunu” g’omu bwifulikwe. Kobinali, banasegeze obwenge oku kalamo k’ene, barhanarhanya lugenda amango gayisha. Ebijiro byabo byayish’ibalerhera olufû.​—Mig. 9:13, 17, 18.

¹⁸ Ebyo biri lubero bwenene n’ebyahikira abayemera omulali gw’“obwenge bw’okunali”! Buno, ebigolo byage biri byashagalukira ebiryo birheganye bwinja na bya kuyubaka omubiri, ko kuderha idinye ly’ebiryo binja by’ekiroho. (Iz. 65:13) Kugerera omulebi Izaya, Yehova adesire  ntya: “Munyumvirhize lyo mukaz’irya ebinunu, munacishinge omu kulya ebishushagire.” (Iz. 55:1, 2) Rhunaciyigirize okuzigira ebi Yehova azigira n’okushomba ebi ashomba. (Enna. 97:10) Kandi rhunashagalukire okulalika abandi bayunguke n’“obwenge bw’okunali.” Rhuli nka bakozi barhumirwe “baje bayakûza, bayimange omu cishagala [erhi lugo] oku irango, baje baderha erhi: ‘Mâshi ngasi cinganyi cije hano.’” Obunguke kuli rhwe n’oku bantu bali bayemera omulali gwirhu burhali bwa muli gano mango gone. Obo bunguke buli bw’ensiku zoshi, bwarhuhashisa ‘rhulame’ ensiku n’amango hano rhuba rhuli ‘rhwakulikira enjira y’obwenge.’​—Mig. 9:3, 4, 6, Mashi Bible.

19. Kushimbana n’olwandiko lw’Omuhanûzi 12:13, 14, bici rhushinganine rhuhige okujira? (Olole n’ecisanduku cidesire “ Okuyoboha Nnâmahanga Kunarhulerhere Obunguke.”)

¹⁹ Osome Omuhanûzi 12:13, 14. Lekagi okuyoboha Nnâmahanga kugendekere kwalanga omurhima gwirhu n’okurhurhabala rhugendekere rhwaba rhucîre omu lugenzi lwirhu n’omu hali y’ekiroho muli zino nsiku nzinda mbi. Obo boba bushinganine bwarhushumya rhugendekere rhwalalika bantu banji nk’oku binahashikine balonze “obwenge bw’okunali” n’okuyunguka nabo.