1. Bici rhugwasirwe rhujire lyo rhuyokoka olusiku lwa Yehova?

 ERHI Ebibliya eganirira “olusiku lwa Yehova,” enabe eganirire akasanzi Yehova atwiramwo abashombanyi bage olubanja n’okucungula abantu bage. Omu mango ga mîra, hali amango Yehova atwirire abashombanyi bage emanja. (Iz. 13:1, 6; Eze. 13:5; Sof. 1:8) Muli gano mango girhu, “olusiku lwa Yehova” lwarhondera n’okusherezibwa kwa Babiloni Mukulu n’okuhwa okw’ivita lya Harmagedoni. Lyo rhuyokoka olo “lusiku,” rhushinganine rhucirheganye ene. Yezu ayigirizize oku rhurhagwasirwi rhucirheganye kone lugenda “amalibuko [madarhi]” cikone kandi ‘rhuyorhe rhucîrheganyize’ kuli go.​—Mt. 24:21; Lk. 12:40, Mashi Bible.

2. Bulya gurhi rhwanayunguka n’ebiri omu 1 Abatesalonika?

² Omu maruba marhanzi galongozibagwa n’iroho litagatifu entumwa Paolo yayandikiraga Abatesalonika, yakolesize nyiganyo nyinji z’okurhabala Abakristu bayorhe bacirheganyize lugenda olusiku lukulu lwa Yehova lw’okutwa olubanja. Paolo al’imanyire oku olusiku lwa Yehova lurhakayishire ago mango. (2 Ts. 2:1-3) Ciru akaba ntyo, ayinginzire bene wabo bacirheganye lugenda olo lusiku bakabona nka lwayisha irhondo, na nirhu rhwanakolesa er’ihano. Lekagi rhuganirire amahugûlo gage lugenda aga madoso: (1) gurhi olusiku lwa Yehova lwayishamwo, (2) bandi barhayish’iyokoke olo lusiku, na (3) gurhi rhwakacirheganyamwo lyo rhuyokoka?

3. Gurhi olusiku lwa Yehova lwayishamwo nka cishambo omu budufu? (Olole n’enfoto.)

³ “Nka kula ecishambo ciyisha budufu.” (1 Ts. 5:2, Mashi Bible)  Ezi zo nderho ntanzi z’omu nderho isharhu z’olwiganyo zikolesibwe omu kuganirira okuyisha kw’olusiku lwa Yehova. Kanji-kanji ebishambo binazimbe duba-duba n’omu mwizimya amango abantu barhal’irhanyizeko. Olusiku lwa Yehova nalo lwayish’irhibuka amango bantu banji barharhanyizi. Ciru n’Abakristu b’okunali bayish’isomerwa omu kubona gurhi ebintu bihikirire duba-duba. Cikone lubero n’abantu babi, rhwehe rhurhayish’isherezibwe.

4. Omu njira nci olusiku lwa Yehova lushushanyizibwe n’emikero y’okuburha?

⁴ ‘Kula emikero enarhogera omukazi oli izimi.’ (1 Ts. 5:3) Omukazi oli hofi aburhe arhakamanya akasanzi ko na nnene emikero yamurhibukira. Cikone, aba amanyire buzira karhinda oku yamuhikira. Erhi eyo mikero emuhikira, enayishe buzira kulaliza, ya malumwa manji, erhanahusa. Ko n’oko, rhurhamanyiri olusiku n’ensa olusiku lwa Yehova lwarhangira. Cikone, rhumanyire buzira karhinda oku lwayisha n’oku olubanja Nnâmahanga atwira abantu babi lwayish’irhibuka buzira kulaliza lurhakanayakwa.

5. Omu njira nci amalibuko madarhi gali nka muceracera?

⁵ Nka muceracera. Omu lwiganyo lwage lwa kasharhu, kandi Paolo aganirire ebishambo bizimba budufu. Cikone Paolo ashanjire entanya zage anali nk’oshushanyize olusiku lwa Yehova n’omuceracera. (1 Ts. 5:4) Ebishambo biyisha budufu byanaba bigwerhe binji bya kujira kuhika biyibagire oku akasanzi kagezire. Obulangashane bw’olusiku luhyahya bwanabarhibukira bunabayerekane. Amalibuko madarhi nago gayish’iyerekana abantu babêra omu mwizimya omu kugendekera bajira emikolo erhasimisa Nnâmahanga ak’ebishambo. Lubero nabo, rhwanayorha rhucirheganyize omu kuyaka olugenzi lurhashagalusa Yehova n’okushimbulira “ngasi hyinja, ngasi hishinganine na ngasi hiri hy’okuli.” (Ef. 5:8-12) Paolo acibir’ikolesa nyiganyo ibirhi ly’aganirira abarhakayokoka.

6. Omu njira nci bantu banji bali omu iro? (1 Abatesalonika 5:6, 7)

⁶ “Abaja iro.” (Osome 1 Abatesalonika 5:6, 7.) Paolo ashushanyize abantu barhakayokoka olusiku lwa Yehova n’abaja iro. Barhaba bahugûsirwe ebiri byajirikana erhi oku akasanzi kali kagera. Co cirhumire, barhahugûkwa ebintu by’obulagirire biri byajirikana erhi oku bashinganine bajire lugenda ebyo bintu. Ene bantu banji bali iro omu hali y’ekiroho. (Rm. 11:8) Barhayemera ebimanyiso biyerekine oku rhuli rhwalama omu “nsiku nzinda” n’oku amalibuko madarhi gali hofi bwenene. Ebintu bidarhi biri byajirikana omw’igulu byanarhuma baguma na baguma batuluka omw’iro ly’ekiroho n’okubashumya basimisibwe n’omwanzi g’Obwami. Cikone, banji banacib’ija iro ahali h’okugendekera baba masu. Ciru na baguma baguma bagwerhe obuyemere omu lusiku lw’okutwa olubanja banarhanye mpu luciri kuli bwenene. (2 Pt. 3:3, 4) Cikone, amahano garhuhûnyire rhube masu gali gagendekera gaba ga bulagirire bwenene ngasi lusiku.

7. Gurhi abantu bayish’isherezibwa na Nnâmahanga bashushinemwo n’abalalwe?

⁷ “Abalaluka.” Entumwa Paolo yashushanyize abantu bayish’isherezibwa na Nnâmahanga n’abalalwe. Abantu balaluka barhaba babidu okushibirira ebiri byajirikana, barhanarhôla mihigo minja. Ko n’oko, abantu babi barhayemera oburhonde bwa Nnâmahanga. Banacishoge enjira y’akalamo ehesire ebwa buhererekeze. Cikone Abakristu bahûnyirwe balange enkengero zabo, n’okurhanya bwinja. (1 Ts. 5:6) Musomi muguma w’Ebibliya adesire oku omuntu olanga enkengero zage “anagendekere arhulirira, arhanayoboha, anahash’irhanya bwinja ly’ahash’irhôla emihigo eshinganine.” Bulya gurhi rhugwasirwe rhugendekere rhwarhulirira n’okurhanya bwinja? Lyo rhurhag’icihira omu by’epolitike by’ene erhi omu bintu biyerekire olubaga. Oku olusiku lwa Yehova lugendekire lwayegerera ko rhwanagendekera rhwashumikwa rhucihire mw’ebyo. Ciru akaba ntyo, rhurhashinganini rhucihangayise bwenene lugenda oku rhwajira. Iroho lya Nnâmahanga lyanarhurhabala rhugendekere rhwarhulirira n’okulanga enkengero zirhu lyo rhurhôla emihigo minja.​—Lk. 12:11, 12.

8. Morhere gahi olwandiko lwa 1 Abatesalonika 5:8 luyerekine gakarhurhabala rhugendekere rhwaba masu n’okulanga enkengero zirhu? (Olole n’enfoto.)

⁸ “Rhuyorhe rhufumbasire empenzi . . . rhuyambale n’ensirha.” Paolo arhushushanyize n’abasoda bali masu banayambirhe emyambalo y’ivita. (Osome 1 Abatesalonika 5:8.) Omusoda aba ashinganine akaba acirheganyize ngasi mango okulwa ivita erhi lyakarhibuka. Nirhu ko n’oko. Rhunagendekere rhwaba rhucirheganyize lugenda olusiku lwa Yehova omu kuyambala empenzi y’obuyemere n’obuzigire n’ensirha y’obulangalire. Ago morhere ganarhurhabala bwenene.

9. Gurhi obuyemere bwirhu burhulangamwo?

⁹ Empenzi yakag’ilanga omurhima gw’omusoda. Obuyemere n’obuzigire binalange omurhima gwirhu gw’olwiganyo. Ago morhere ganarhurhabala rhugendekere rhwakolera Nnâmahanga n’okushimba Yezu. Obuyemere bunarhuyemeze n’obwalagale oku Yehova ayish’irhuhemba bulya rhunamulongereze n’omurhima gwirhu goshi. (Hb. 11:6) Bwarhushumya rhugendekere rhwabêra bishwekerezi kuli Cirongozi wirhu Yezu, ciru akaba rhugwasirwe rhulembere amazibu. Rhwanaseza obuyemere bwirhu lyo rhuhash’ilembera amazibu g’akalamo omu kuciyigiriza kugerera enyiganyo za muli zino nsiku z’abantu bagendekire okubêra bishwekerezi, ciru akaba balibuzibwe erhi ciru akaba balwisize amazibu g’obukenyi. Kandi, rhwanayaka omurhego gw’okuzigira eby’en’igulu omu kuyiga enyiganyo z’abantu bacishozire okulama akalamo karhahûnyiri  binji lyo bahira obunguke bw’Obwami oku nafasi ntanzi. b

10. Gurhi obuzigire kuli Nnâmahanga n’oku balungu birhu burhurhabala lyo rhulembera?

¹⁰ Obuzigire nabo buli bwa bulagirire lyo rhugendekera rhwaba masu n’okulanga enkengero zirhu. (Mt. 22:37-39) Obuzigire kuli Nnâmahanga bunarhurhabale lyo rhulembera omu mukolo gw’amahubiri ciru gwakarhulerhera mazibu malebe. (2 Tm. 1:7, 8) Bulya rhuba rhuzigire ciru n’abantu barhakolera Yehova, rhunagendekere rhwahubiri rhunanacihangane okuyusa e eneo yirhu, ciru rhunahubiri kugerera etelefone na kugerera amaruba. Rhurhaheza obulangalire oku lusiku luguma abalungu birhu bashanja banarhondere bajira ebishinganine.​—Eze. 18:27, 28.

11. Gurhi obuzigire kuli bene wirhu na bali birhu burhurhabalamwo? (1 Abatesalonika 5:11)

¹¹ Obuzigire bwirhu oku balungu buhiziremwo okuzigira abirhu Bakristu. Rhunayerekane obuzigire bwa ntyo omu ‘kushibirizanya n’okuzibuhanya.’ (Osome 1 Abatesalonika 5:11, Mashi Bible.) Ak’abasoda bakola ngasi muguma aha burhambi bw’owabo amango bali omu ntambala, rhunashibirizanye erhi kuhânana omurhima. Kobinali, omusoda anayagaza owabo amango bali omu ntambala ndarhi, cikone nta lusiku akajira ntyo n’obulonza. Ko n’oko, nta lusiku rhwakayagaza bene wirhu na bali birhu n’obulonza erhi kubagalulira obubi oku bundi. (1 Ts. 5:13, 15) Kandi rhunayerekane obuzigire bwirhu omu kukenga abali balongoza omu cigamba. (1 Ts. 5:12) Erhi Paolo ayandika ago maruba gage, ecigamba c’e Tesalonika cirhal’icijira ciru mwaka muguma. Abalume bal’ihizirweho mw’eco cigamba nkaba barhal’icihugûkwa binji banakag’ijira amagosa. Ciru akaba ntyo, bal’ishinganine okukengwa. Oku amalibuko madarhi gagendekera gayegera, ko rhwanaba rhulagirire bwenene oku bagula b’omu cigamba cirhu lyo barhuha obulongozi kulusha oku biri ene. Nkaba byanahashikana rhurhabe n’obuhashe bw’okuhabwa obulongozi na bene wirhu b’oku biro bikulu erhi bene wirhu b’oku biro by’etawi; co cirhumire, kuli kwa bulagirire rhuciyigirize okuzigira n’okukenga abagula birhu ene. Ciru bici byakahika, lekagi rhugendekere  rhwalanga enkengero zirhu, rhurhasegezagya obwenge oku buzamba bwabo, cikone rhugendekere rhwakengera oku Yehova ali alongoza abo balume bishwekerezi kugerera Kristu.

12. Gurhi obulangalire bwirhu bulangamwo enkengero zirhu?

¹² Nk’oku ensirha yakag’ilanga irhwe ly’omusoda, obulangalire bwirhu bw’obucunguke bunalange enkengero zirhu. Kugerera obulangalire busezire, rhunabone ebintu er’igulu lihâna oku biri bya busha. (Fl. 3:8) Obulangalire bwirhu bunarhurhabale rhugendekere rhwarhulirira n’okuba n’entanya nyinja. Wallace na Laurinda bakolera omu Afrique, nabo bacibwinire ntyo. Omu migobe isharhu, ngasi muguma mulibo afîrwa n’omubusi wage. Enyanya z’obulwala bw’okuyahukira bw’e COVID-19, barhakahashire okugaluka emwababwe lyo baba haguma n’emilala yabo. Wallace ayandisire ntya: “Obulangalire bw’obufûke bunantabale ntakag’irhanya lugenda oku bal’iyosire omu nsiku nzinda z’akalamo kabo mw’er’igulu, cikone nkarhanya lugenda oku bayish’iyorha omu nsiku ntangiriza z’akalamo kabo omw’igulu lihyahya. Obo bulangalire bunantulirize amango mbabire bwenene erhi amango ndi nabakengera.”

13. Gurhi rhwakajira lyo rhuhabwa iroho litagatifu?

¹³ “Murhazimyagya omuliro gw’iroho.” (1 Ts. 5:19, NWT) Paolo ashushanyize iroho litagatifu n’omuliro gurhuli omu kandalala. Amango rhugwerhe iroho lya Nnâmahanga, rhunabe na bushiru bunji na bushagaluke bunji bw’okujira ebintu binja rhunanabe n’emisi y’okukolera Yehova. (Rm. 12:11) Gurhi rhwakajira lyo rhuhabwa iroho litagatifu? Rhushinganine rhukalihûna Nnâmahanga, rhukayiga Akanwa kage kalongozibagwa n’iroho n’okucilunga n’ikubuliro lyage lilongozibwa n’iroho. Okujira ntyo kwanarhurhabala lyo rhuyerekana “ilehe ly’iroho.”​—Gl. 5:22, 23, NWT.

14. Bici rhushinganine rhuyake lyo rhugendekera rhwahabwa iroho lya Nnâmahanga? (Olole n’enfoto.)

¹⁴ Enyuma za Nnâmahanga okurhuha iroho lyage litagatifu, rhugwasirwe rhube masu lyo ‘rhurhag’izimya omuliro gw’iroho.’ Abagendekera baba n’entanya zicîre n’olugenzi lucîre bone Nnâmahanga aha iroho lyage litagatifu. Arhakagendekera arhuha iroho lyage litagatifu  erhi rhwakagendekera rhwarhanya oku bintu bicafu. (1 Ts. 4:7, 8) Lyo rhugendekera rhwahabwa iroho litagatifu, kandi rhurhashinganini ‘rhugayaguze obulebi.’ (1 Ts. 5:20) Oluderho “bulebi” mw’olu lwandiko luyerekine emyanzi Nnâmahanga arhuhire kugerera iroho lyage litagatifu ehiziremwo emyanzi eyerekire olusiku lwa Yehova n’obulagirire bw’okujira duba-duba muli gano mango girhu. Rhurharhenza olo lusiku omu bwenge bwirhu omu kurhanya oku ivita lya Harmagedoni lirhayishe muli gano mango girhu. Lubero n’oko, rhunagendekere rhwabîka olo lusiku hofi-hofi omu bwenge bwirhu n’okukabona oku luli hofi bwenene omu kugendekera rhwaba n’olugenzi lwinja ngasi lusiku ‘n’ebijiro biyerekine oku omuntu acishwekîre kuli Nnâmahanga.’​—2 Pt. 3:11, 12, Mashi Bible.

15. Gurhi rhwakayakamwo okurhebwa n’emyanzi erhali y’okuli erhi myanzi elongozibwe n’abazimu? (1 Abatesalonika 5:21)

¹⁵ Omu mango gayisha gali hofi-hofi, abashombanyi ba Nnâmahanga bayish’iderha omu njira ndebe ntya: ‘Omurhûla n’akalembe!’ (1 Ts. 5:3) Emyanzi y’obunywesi yayish’ilongozibwa n’abazimu yayish’iyunjula omw’igulu n’okurheba banji. (Maf. 16:13, 14) Ka nirhu rhwayish’irhebwa? Rhurhayish’irhebwe erhi ‘rhwakalola bwinja ngasi kantu.’ (Osome 1 Abatesalonika 5:21.) Oluderho lw’Ecigiriki lwahindwirwe “kulola bwinja” lwakolesibwe omu kuganirira enjira abantu bakag’ipimamwo amabuye g’engulo ndarhi lyo bamanya erhi gali g’okunali. Co cirhumire rhushinganine rhukapima erhi kulabiriza ebi rhuyumva erhi ebi rhusoma lyo rhumanya erhi biri by’okunali. Oko kwali kwa bulagirire oku Batesalonika, kandi kwaba kwa bulagirire ciru bwenene kuli rhwe amango rhugendekire rhwayegerera amalibuko madarhi. Ahali h’okuyemereza duba-duba ebi abandi badesire, rhunakolese obuhashe bwirhu bw’okurhanya lyo rhushushanya ebi rhusomire erhi ebi rhuyumvirhe n’ebi Ebibliya n’ikubuliro lya Yehova bidesire. Omu kujira ntyo, rhurhayish’irhebwe n’emyanzi y’obunywesi elongozibwe n’abazimu.​—Mig. 14:15; 1 Tm. 4:1.

16. Bulangalire buhi bw’okunali rhugwerhe, na bici rhuhizire okujira?

¹⁶ Nka cigusho, abakozi ba Nnâmahanga bayish’iyokoka amalibuko madarhi. Cikone nka muntu muguma muguma, rhurhamanyiri gurhi byaba irhondo. (Yk. 4:14) Ciru akaba ntyo, rhube rhwayish’icunguka amalibuko madarhi erhi rhwafâ embere gayishe, rhwayish’ihabwa oluhembo lw’obuzine bw’ensiku n’amango erhi rhwakagendekera rhwabêra bishwekerezi. Abakristu bashige amavurha bayish’iba haguma na Kristu omu mpingu. Abantu b’ebindi bibuzi bayish’ilama omu paradizo hanw’igulu. Rhweshi rhugendekerage rhwasegeza obwenge oku bulangalire bwirhu bwinja n’okuyorha rhucirheganyize lugenda olusiku lwa Yehova!