K’Omanyire??
Gurhi amaburiki n’enjira z’okuforomola amaburiki zavumbulagwa omu bigûka by’evile ya mîra y’e Babiloni bilunzire okuboko omwanzi gw’Ebibliya?
ABANTU bavumbula ebintu bya mîra bavumbwire omu vile ya mîra y’e Babiloni maburiki manji bwenene mayoce gakolesibagwa omu kuyubaka eyo vile. Kushimbana na Robert Koldewey, muvumbuzi w’ebintu bya mîra, ago maburiki gakag’ijirirwa omu mafuru gali “embuga z’eyo vile, emunda ibumba lyali linja n’amashaka bakakuziremw’enshali . . . gali manji.”
Amandishi ga mîra gayerekine oku, kandi abarhegesi Bababiloni bakag’ikolesa amafuru gabo lyo bajira akandi kantu kabi bwenene. Paul-Alain Beaulieu, profesere w’oku Université y’e Toronto omanyire bwenene e histware n’olulimi lw’omu Asiriya ya mîra adesire ntya: “Mandishi manji g’Abababiloni . . . gayerekine oku mwami akag’ihâna irhegeko oku abantu bayocibwe enyanya z’obugoma erhi okurhakenga ebintu bitagatifu.” Mandishi maguma ga kurhenga omu nsiku za Mwami Nebukadnezari gaganirire obu buhane bukulikire: “Obashereze, obababule, obayoce, . . . omu resho y’okudekera . . . ojire omugi gwabo gusokere e malunga, obanige omu kubakweba omu ngulumira y’omuliro.”
Ebyo bikengezize abantu basoma Ebibliya ebintu byajirikanaga biganirirwe omu Daniyeli cigabi ca 3. Ogo mwanzi gudesire oku, Mwami Nebukadnezari atula ensalamu nnenêne y’amasholo erhi noro omu kabanda k’e Dura, embuga z’evile y’e Babiloni. Erhi Bahabraniya basharhu baciri misole bahamagirwe Meshaki, Shadraki na Abednego balahira okuharamya eyo nsalamu, Nebukadnezari agaya bwenene, arhegeka oku er’ifuru erhi ndugurhira “edukuzibwe kali nda kulusha oku eyorha etwanwamwo omuliro,” n’oku abo balume basharhu ‘bakwebwe omwola ndugurhira y’omuliro.’ Malahika w’obuhashe abaciza barhafâga.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Iburiki liyoce izino lya Nebukadnezari liyandisirweko
Amaburiki g’Abababiloni nago gone galunzire okuboko ogo mwanzi gw’Ebibliya. Manji muli ago maburiki gabako amandishi g’okukuza mwami. Mandishi maguma gali kw’ezi nderho: “Nebukadnezari, Mwami w’e Babiloni . . . Enyumpa y’obwami, nie Mwami Mukulu nayubakaga . . . Iburha lyani lirhegeke muli yo ensiku n’amango.” Ago mandishi galinzir’ishushana n’enderho ziri omu Daniyeli 4:30, Mwami Nebukadnezari acikungagamwo omu kuderha ntya: “K’eci cihugo arhali ye Babeli munene, niene naciyubakaga nti cibe hantu h’oburhwali. Co ciyerekana obuhashe bw’emisi yani, n’olukengwa lw’irenge lyani?”
