ECIGABI C’OKUYIGA CA 28
LWIMBO 123 Rhukenge Omupango gw’Eciteokrasi
K’Oyishi Olubero Egarhi k’Okuli n’Obunywesi?
“Muyimangire kuli gombi! Okuli gube gwo mukaba gwinyu.”—EF. 6:14.
EBI ECI CIBABI CISEGIZE
Carhukomereza lyo rhukahugûkwa olubero luli egarhi k’okuli rhwayigirizibwe na Yehova n’obunywesi bugendekezibwa na Shetani n’abarhuhagalika.
1. Gurhi ociyumva lugenda okuli?
ABANTU ba Yehova baba bazigire okuli kuba omu Kanwa kage. Obuyemere bwirhu buba buyimangire oku Kanwa kage. (Rm. 10:17) Rhwahikire aha rhwayemera oku Yehova ahizireho ecigamba c’Ecikristu nka go “mutungo co na ciriba c’okuli.” (1 Tm. 3:15) Kandi rhunashagalukire okurhumikira “abali balongoza” egarhi kirhu, barhuhugûlira okuli kurhenga omu Bibliya n’okurhuha obulongozi bupatine n’obulonza bwa Mungu.—Hb. 13:17, NWT.
2. Kushimbana na Yakobo 5:19, bici byakarhuhikira enyuma z’okumanya okuli?
2 Cikone, enyuma z’okuyemera okuli n’okuyemera oku rhushinganine rhukulikire obulongozi bw’ikubuliro lya Mungu, rhwanacirhebwa. (Osome Yakobo 5:19.) Nta kandi kantu Shetani akacifinja kulusha okurhujira rhuleke okulangalira Ebibliya erhi obulongozi rhuhâbwa n’ikubuliro lya Mungu.—Ef. 4:14.
3. Bulya gurhi rhushinganine rhusêre oku okuli? (Abefezi 6:13, 14)
3 Osome Abefezi 6:13, 14. Hano hofi-hofi, Ibilisi akolesa emyanzi midarhi y’obunywesi ly’arheba amashanja goshi gahagalike Yehova. (Maf. 16:13, 14) Kandi rhumanyire oku Shetani ayushula obushiru bwage ly’alonza okurheba abantu ba Yehova. (Maf. 12:9) Co cirhumire, kuli kwa bulagirire rhucikomereze okumanya olubero egarhi k’okuli n’enyigirizo z’obunywesi n’okurhumikira okuli. (Rm. 6:17; 1 Pt. 1:22) Okujira ntyo kwayish’irhuma rhwayokoka amango g’amalibuko madarhi!
4. Bici rhwaganirira mw’eci cigabi?
4 Mw’eci cigaci, rhwabona morhere abirhi rhulagirireko lyo rhukamanya okuli kurhenga omu Bibliya n’okuyemera obulongozi rhuhâbwa n’ikubuliro lya Mungu. Buzinda, rhwaganirira bintu bisharhu rhwakajira lyo rhugendekera rhwasêra omu okuli.
AMORHERE RHULAGIRIREKO LYO RHUKAMANYA OLUBERO EGARHI K’OKULI N’OBUNYWESI
5. Gurhi okuyoboha Yehova kurhurhabala lyo rhumanya olubero egarhi k’okuli n’obunywesi?
5 Okuyoboha Yehova. Erhi rhwakayoboha Yehova omu njira eshinganine, rhwanamuzigira bwenene na ntyo nta mango rhwakajira akantu koshi-koshi kakamugayisa. Rhunabe babidu okumanya olubero egarhi k’ebinja n’ebibi, egarhi k’okuli n’obunywesi, lyo rhuyemerwa na Yehova. (Mig. 2:3-6; Hb. 5:14) Rhurhagwasirwi ciru n’ehitya rhuyobohe bene bantu bwenene kulusha oku rhuzigira Yehova, bulya ebisimisa bene bantu kanji-kanji binagayise Yehova.
6. Gurhi okuyoboha bene bantu kwarhumire balume ikumi Baisraheli bali bakulu b’emilala barhaderha okuli?
6 Erhi rhwakayoboha bene bantu kulusha oku rhuyoboha Mungu, rhwanaciyegula n’okuli bunyi-bunyi. Rhuganirire olwiganyo lwa bakulu 12 b’emilala bajag’iyenja ecihugo Yehova al’ilaganyize okuha Abaisraheli. Bantu ikumi egarhi k’abo bakulu bajag’ilolereza eco cihugo, bayoboha Abakanani bwenene kulusha oku bal’izigire Yehova. Babwira ababo Baisraheli ntya: “Rhurhankahasha okusôka mpu rhujilwisa olwola lubaga, luli ludarhi kurhulusha.” (Mib. 13:27-31) Omu masu ga bene bantu, Abakanani bali badarhi erhi ba misi kulusha Abaisraheli, na ntyo ko byali. Cikone okuderha oku Abaisraheli barhakahashire okuhima abashombanyi babo, kwali kuyibagira Yehova. Ezo ndolerezi ikumi zal’ishinganine zisegeze obwenge kw’ebi Yehova al’ilonzize Abaisraheli bajire. Kandi, zal’ishinganine zirhanye bwenene kw’ebi Yehova ajiriraga Abaisraheli kasanzi kasungunu embere z’aho. Muli ntyo zakahugûsirwe oku emisi y’Abakanani yali ntayo omu kuyigerera oku misi ya Yehova Ogala-byoshi. Lubero n’ezo ndolerezi zirhagwerhe buyemere, Yozwe na Kalebu bal’ilonzize okuyemerwa na Yehova. Babwira olubaga ntya: “Nka Nyamuzinda arhurhonyize, yene anarhuhêka muli ecola cihugo, anarhuhe co.”—Mib. 14:6-9.
7. Gurhi rhwakajira lyo rhuyoboha Yehova bwenene? (Olole n’enfoto.)
7 Lyo rhuyoboha Yehova bwenene, rhushinganine rhukalonza okumusimisa omu ngasi muhigo rhurhôzire. (Enna. 16:8) Amango oli wasoma emyanzi y’Ebibliya, okacidosa ntya: ‘Ncibage mw’aka kanga, muhigo guhi nakarhôzire?’ Kwa lwiganyo, ocibone omu bwenge oli wayumvirhiza abo bakulu ikumi Baisraheli amango bali bahâna eraporo y’obunywesi. Ka wakayemire eyo raporo n’okuyoboha bene bantu, erhi k’obuzigire bwawe kuli Yehova n’irala ly’okumusimisa byakarhumire wahima oboba bwa bene bantu? Er’iburha lyoshi ly’Abaisraheli lyayabirwa okumanya oku Yozwe na Kalebu bal’idesire okuli. Enyanya z’oko, baheza obulyo bw’okuja omu Cihugo c’Amalaganyo.—Mib. 14:10, 22, 23.
Raporo ya ndi wakayemire? (Olole ecifungo ca 7)
8. Borhere buhi rhugwasirwe rhucihangane bwenene okuba nabo, na bulya gurhi?
8 Obwirhohye. Abantu birhohye bo Yehova afulûlira okuli. (Mt. 11:25) Rhwayemire n’obwirhohye oburhabale rhwahâbagwa lyo rhumanya okuli. (Ebj. 8:30, 31) Ciru akaba ntyo, rhugwasirwe rhube masu lyo rhurhabaga ba bucibone. Okuba ba bucibone kwanarhuma rhwakabona entanya zirhu nka ko zinali nk’amakanuni g’Amandiko n’obulongozi rhuhâbwa n’ikubuliro lya Yehova.
9. Gurhi rhwakajira lyo rhugendekera rhwaba birhohye?
9 Lyo rhugendekera rhwaba birhohye, rhushinganine rhukakengera oku rhuli basungunu bwenene omu kugererwako Yehova. (Enna. 8:3, 4) Kandi, rhwanashenga Yehova arhurhabale rhube birhohye na babidu okuyigirizibwa. Yehova arhurhabala lyo rhukashokoza entanya zage arhuha kugerera Akanwa kage n’ikubuliro lyage, ahali h’okushokoza entanya zirhu rhwe nnene. Omu busomi bwawe bw’Ebibliya, okalonza ebiyerekine oku Yehova aba azigire obwirhohye anaba ashombire obucibone n’okucikunga. Kandi, oshinganine obe masu bwenene ly’ogendekera waba mwirhohye erhi wakahâbwa mukolo mulebe omw’ikubuliro gurhumire wamanyikana omu njira ndebe.
OKU RHWAKAJIRA LYO RHUGENDEKERA RHWASÊRA OMU OKULI
10. Bandi Yehova akolesize ly’ayigiriza abantu bage n’okubaha obulongozi?
10 Ogendekere walangalira obulongozi rhuhâbwa n’ikubuliro lya Yehova. Omu Israheli ya mîra, Yehova akolesize Musa na buzinda akolesa Yozwe ly’aha abantu bage obulongozi. (Yoz. 1:16, 17) Abaisraheli bakag’igishwa erhi bakabwine abo balume nka bantu bahizirweho na Yehova lyo babalongoza. Magana malebe g’emyaka enyuma z’aho erhi ecigamba c’Ecikristu cirhondezibwa, entumwa 12 zo zakag’ihâna obulongozi. (Ebj. 8:14, 15) Buzinda, eco cigusho cabamwo abandi bagula bali omu Yeruzalemu. Omu kukulikira obulongozi bakag’ihâbwa n’abo balume b’obuyemere, “emirhwe y’Abakristu yakomera omu bwemere, na ngasi lusiku yakâyushuka kwo.” (Ebj. 16:4, 5, Mashi Bible) Muli gano mango, nirhu rhunagishwe erhi rhukulikira obulongozi bw’eciteokrasi rhuhâbwa n’ikubuliro lya Yehova. Cikone, gurhigi Yehova akaciyumva erhi rhwakalahira okurhumikira aba ahizireho lyo barhulongoza? Rhwanashuza er’idoso omu kuganirira ebyahikiraga Abaisraheli erhi bali omu njira y’okuja omu Cihugo c’Amalaganyo.
11. Bici byahikire abantu b’omw’ishanja lya mîra ly’Abaisraheli bahagalikaga Musa Yehova al’icishozire ly’abalongoza? (Olole n’enfoto.)
11 Mango maguma erhi Abaisraheli bali omu mubalamo gw’okuja omu Cihugo c’Amalaganyo, balume balebe bal’imanyikine bahagalika Musa n’omukolo Yehova al’imuhîre. Baderha ntya: “Olubaga lwoshi [arhali Musa yene], abantu boshi bali bimâna [erhi batagatifu], na Nyamubâho ali ekarhî kabo.” (Mib. 16:1-3) Ciru akaba kobinali omu masu ga Mungu, “olubaga lwoshi” lwali lutagatifu, Yehova al’icishozire Musa ly’alongoza abantu bage. (Mib. 16:28) Omu kuderha Musa kubi, kobinali abo bagoma Yehova ye bakag’iderha kubi. Barhasegezagya obwenge bwabo kw’ebi Yehova al’ilonzize, cikone babusegeza kw’ebi bal’ilonzize, ko kuderha kuba n’obukulu n’okumanyikana. Mungu aniga abalerhaga obo bugoma n’ebihumbi by’abantu bacilungaga haguma nabo. (Mib. 16:30-35, 41, 49) Ene, rhwanayemera n’obwalagale oku Yehova aba ashombire abalahira okukenga obulongozi bw’ikubuliro lyage.
Ndi wakalunzire okuboko? (Olole ecifungo ca 11)
12. Bulya gurhi rhwanagendekera rhwalangalira ikubuliro lya Yehova?
12 Rhwanagendekera rhwalangalira ikubuliro lya Yehova. Erhi bibonekana n’obwalagale oku hashinganine habe empindulo lugenda oku rhuba rhuhugûsirwe nyigirizo ndebe z’Ebibliya erhi lugenda oku omukolo gw’Obwami gupanzirwe, abali balongoza barharhindira okujira empindulo zihûnyirwe. (Mig. 4:18) Banajire ntyo bulya, kulusha akandi kantu koshi-koshi, baba balonzize okushagalusa Yehova. Kandi banajire okwabo koshi ly’emihigo yabo eyimangira oku Kanwa ka Mungu, lwiganyo lw’ebinwa nkana abakozi ba Yehova boshi bagwasirwe bakulikire.
13. “Olwiganyo lw’ebinwa nkana” byo bici, na gurhi rhugwasirwe rhujire nabyo?
13 “Oshimbe olwiganyo lw’ebinwa nkana.” (2 Tm. 1:13) “Olwiganyo lw’ebinwa nkana” ziri nyigirizo z’Ecikristu ziba omu Bibliya. (Yn. 17:17) Ezo nyigirizo go musingi gwa ngasi kantu rhuba rhuyemire. Ikubuliro lya Yehova lyarhuyigirizize okucishwekera kw’olo lwiganyo lw’ebinwa nkana. Omu kugendekera rhwajira ntyo, rhwagishwa.
14. Gurhi Bakristu baguma na baguma baciyegulagamwo oku “lwiganyo lw’ebinwa nkana”?
14 Bici byakarhuhikira erhi rhwakaleka okushimba “olwiganyo lw’ebinwa nkana”? Rhuganirire olwiganyo. Omu myaka igana mirhanzi, bibonekine oku Bakristu baguma na baguma bakag’ilumiza omwanzi gw’obunywesi gwal’idesire oku olusiku lwa Yehova lwali lwamahika. Nkaba hali maruba malebe barhanyagya oku gayandikagwa n’entumwa Paolo garhumaga barhanya ntyo. Buzira kuciha akasanzi k’okulongereza ebintu by’okuli lugenda ogo mwanzi, Bakristu baguma na baguma b’omu Tesalonika baguyemera ciru banaja bagulumiza. Abo Bakristu barhakarhebirwe bacikengerage ebintu Paolo abayigirizagya amango aciri haguma nabo. (2 Ts. 2:1-5) Paolo ahanûla abo bene wabo barhakag’iyemereza ngasi kantu bayumvirhe. Ly’abarhabala lugenda agandi mango, Paolo ashwinja amaruba gage ga kabirhi ayandikiraga Abatesalonika kugerera ezi nderho: “Ogu musingo guli gwa kuboko kwani niene Paolo. Eco co cimanyiso ca ngasi maruba gani.”—2 Ts. 3:17.
15. Gurhi rhucilangamwo n’emyanzi y’obunywesi ebonekana nk’eri y’okuli? Ohâne olwiganyo. (Olole n’enfoto.)
15 Bici rhwakaciyigiriza kugerera enderho Paolo ayandikiraga Abatesalonika? Erhi rhwakayumva kantu kalebe karhapatini n’ebi rhwayizire omu Bibliya, kandi erhi rhuyumve mwanzi mulebe gw’obunywesi gw’okusomeza, rhushinganine rhukolese oburhimanya. Omu Mulungano gwa mîra gw’e Sovieti, mango maguma abashombanyi birhu balumiza amaruba gal’ibonekine nka garhenzire oku biro birhu bikulu. Ago maruba gal’ihîre bene wirhu baguma na baguma omurhima baciberule n’okucijirira elyabo ikubuliro. Gal’ibonekine nka gali g’okuli. Cikone bene wirhu bishwekerezi barharhebagwa. Bahugûkwa oku ebyal’idesirwe mw’ago maruba birhal’ipatine n’ebi bayigirizibwe. Ene, hali amango abashomba okuli bakolesa e Enternete n’ebyombo by’okuhâna emyanzi lyo barhuvuruga obukengere n’okurhuma rhwagabikanamwo. Ahali h’‘okufuduka omurhima,’ rhwanacilanga omu kulabiriza erhi ebi rhuyumvirhe erhi kusoma bipatine n’enyigirizo z’okuli rhwayigirizibwe.—2 Ts. 2:2; 1 Yn. 4:1.
Orharhebagwa n’emyanzi y’obunywesi ebonekana nk’eri y’okuli (Olole ecifungo ca 15) a
16. Kushimbana n’Abaroma 16:17, 18, bici rhushinganine rhujire erhi baguma na baguma bakaciyegula oku okuli?
16 Obêre omu cinyabuguma haguma n’abantu bishwekerezi kuli Yehova. Mungu alonzize rhumuharamye omu cinyabuguma haguma na bene wirhu na bali birhu. Ensiku zoshi, rhwagendekera rhwaba n’ecinyabuguma erhi rhwakasêra omu okuli. Abantu boshi baciyegula oku okuli banalerhe okugabikanamwo omu cigamba, co cirhumire Mungu arhurhonzire ‘rhubayake.’ Erhi rhwakaba rhurhajijiri ntyo, nirhu rhwene rhwanarhondera rhwaciyegula n’okuli.—Osome Abaroma 16:17, 18.
17. Migisho ehi rhuba nayo omu kumanya okuli n’okukusêrako?
17 Erhi rhumanya olubero egarhi k’okuli n’obunywesi n’okusêra oku okuli, rhunagendekere rhwayegera Yehova n’okuba n’obuyemere busezire. (Ef. 4:15, 16) Rhwalangwa n’enyigirizo z’obunywesi za Shetani n’emyanzi y’obunywesi alumiza, na kandi rhwabêra omu bulanzi bwa Yehova omu mango g’amalibuko madarhi. Rhugendekere rhwacishwekera oku biri by’okuli, ‘na Nnâmahanga orhuha omurhûla abêra haguma na nirhu.’—Fl. 4:8, 9, Mashi Bible.
LWIMBO 122 Obe n’Emisi Orhanadundaganaga!
a AMAHUGÛLO G’ENFOTO: Enfoto eyerekine ebyageraga hakola hali amakumi g’emyaka, bene wirhu b’omu Mulungano gwa mîra gw’e Sovieti bayankirira amaruba gabonekanaga nka garhenzire oku biro birhu bikulu, cikone kobinali, gal’irhenzire oku bashombanyi birhu. Muli gano mango, abashombanyi birhu banakolesa e Enternete lyo balumiza mwanzi mulebe gw’obunywesi lugenda ikubuliro lya Yehova.
