1-2. (a) Burhonde buhi Yezu ahîre entumwa zage? (b) Bici byarhumaga entumwa za Yezu zamuleka? (Olole n’enfoto.)

 “OMURHIMA guba mwangu, ci omubiri guba muzamba.” a (Mt. 26:41b) Kugerera ezo nderho, Yezu ayerekine oku aba ahugûsirwe ehali yirhu y’okurhaba bimana. Cikone, ezo nderho zage zirimwo n’obu burhonde: Oyake okucilangalira bwenene. Embere, mw’obo budufu bo n’obo, abanafunzi bage bali bamaderha n’obwalagale oku barhakaleka Nnawabo. (Mt. 26:35) Bal’igwerhe obulonza bwinja. Cikone barhahugûkagwa kunganaci bakazambanyize duba-duba omu kanga kazibu. Co carhumire Yezu abarhonda ntya: “Mube masu munashenge, mulek’ishumikwa.”​—Mt. 26:41a.

² Eby’okugayisa, abanafunzi bayabirwa okuba masu. Erhi Yezu agwarhwa, ka babêzire haguma naye erhi bayobohire n’okulibirha? Bulya abanafunzi ba Yezu barhabaga masu, bajira ebi balahiraga oku barhakajira ciru n’ehitya: Baleka Yezu.​—Mt. 26:56.

3. (a) Lyo rhubêra bishwekerezi kuli Yehova, bulya gurhi rhugwasirwe rhuyake okucilangalira okurhalusire olugero? (b) Bici rhwaganirira mw’eci cigabi?

³ Rhurhagwasirwi rhucilangalire okurhalusire olugero. Kobinali, rhuba rhuhizire okurhajira akantu koshi-koshi kakagayisa Yehova, ciru akaba ntyo, rhurhaba bimana rhwananashumikwa okujira ebintu bibi. (Rm. 5:12; 7:21-23) Buzira kulaliza, rhwanacirhimana omu kanga kakarhuma rhwashagalukira olugenzi lubi. Lyo rhugendekera rhwabêra bishwekerezi kuli Yehova n’Omugala, rhushinganine rhukulikire ihano lya Yezu ly’okugendekera rhwaba masu lyo rhuhagalika amashumi  g’okujira ecaha. Eci cigabi canarhurhabala okujira ntyo. Burhangiriza, rhwaganirira kanga kahi rhugwasirwe rhubemwo masu bwenene. Enyuma z’aho, rhwaganirira oku rhwakacilangamwo oku mashumi. Buzinda, rhwaganirira oku rhwakagendekera rhwabêramwo masu.

AKANGA RHUGWASIRWE RHUBEMWO MASU

4-5. Bulya gurhi rhushinganine rhube masu ciru lugenda n’ebyaha bisungunu?

⁴ Ciru n’ebyaha bibonekine nka biri bisungunu, byanazambanya obwîra bwirhu haguma na Yehova. Kandi, byanarhulongoza okujira ebindi byaha bizibu bwenene.

⁵ Rhweshi rhunashumikwe okujira ecaha. Cikone ngasi muguma wirhu ajira buzamba bulebe bwakarhuma kwaba kulembu kuli ye okurhangulwa ajire ecaha cizibu, acihire omu lugenzi lulebe lurhacîri, erhi kuyahukirwa n’entanya z’er’igulu. Kwa lwiganyo, muntu mulebe anaba ali alwisa amashumi g’okujira eby’enshonyi. Owundi anaba agogomirwe n’irala ly’okujira enkomedu zirhacîri, nk’okucigologorha erhi okulola epornografi. Cikone owundi anaba ali alwisa oboba bwa bene bantu, iroho ly’okulonza okucilongoza, okukunira duba, erhi bundi buzamba. Nk’oku Yakobo ayandikaga, ‘omuntu ashumikwa n’enyifinjo zage mbi erhi zimukulula zinamugwase.’​—Yk. 1:14, Mashi Bible.

6. Bici rhurhashinganini rhucirhebeko?

⁶ K’omanyire omu njira zihi kuba kulembu bwenene kuli we okushumikwa okujira ecaha? Okucirheba rhwene omu kulahira obuzamba bwirhu erhi okuderha oku rhuli ntwali rhurhakajira akantu kabi kurhakarhulerhera bunguke boshi-boshi. (1 Yn. 1:8) Paolo adesire oku ciru n’abagwerhe ‘amorhere g’ekiroho gakwanine’ banahimwa n’amashumi erhi akaba barhabiri masu. (Gl. 6:1, NWT) Rhurhagwasirwi rhucirhebe na kandi rhugwasirwe rhuhugûkwe enjira rhubamwo bazamba.​—2 Kr. 13:5.

7. Bici rhushinganine rhubeko masu bwenene? Ohâne olwiganyo.

⁷ Enyuma z’okuhugûkwa enjira kubamwo kulembu kuli rhwe okurhangulwa, bici rhushinganine rhujire? Ojire okwawe koshi ly’oba n’obuhashe bw’okuhagalika ago mashumi! Kwa lwiganyo, omu mango ga mîra ecigabi cali cizamba bwenene oku lukuta lw’evile yali mihango yayo. Co cirhumire, emihango yakag’ilangwa bwenene. Ko n’oko, rhushinganine rhube masu bwenene lugenda enjira rhumanyire oku rhubamwo bazamba.​—1 Kr. 9:27.

 OKU RHWAKABAMWO MASU

8-9. Gurhi omusole guganirirwe omu citabu c’Emigani cigabi ca 7 gwakayasiremwo okujira ecaha cizibu? (Emigani 7:8, 9, 13, 14, 21)

⁸ Gurhi rhwakacilangamwo? Rhuganirire ebi rhwakaciyigiriza kugerera omusole guganirirwe omu citabu c’Emigani cigabi ca 7. Ajira ecijiro c’eby’enshonyi n’omukazi w’embaraga. Omulongo gwa 22, Mashi Bible, gurhubwizire oku ogo musole gwamushimba “ho n’aho.” Cikone emilongo eshokwire eyerekine oku ajijire bintu bilele embere z’aho byamulongozagya bunyi-bunyi ahikire okujira ecaha.

⁹ Bici ajijire byamulongozagya okujira ecaha? Burhangiriza, bijingo, “agera omu njira nnene eri hofi n’aha mw’omukazi w’omugonyi.” Enyuma z’aho, alambagira kuyerekera ebwa nyumpa y’oyo mukazi. (Osome Emigani 7:8, 9, Mashi Bible.) Buzinda, erhi abona nyamukazi, arhagalukaga. Ahali h’okujira ntyo, ayemera ehinunugurho hya nyamukazi anamuyumvirhiza erhi amubwîra lugenda enterekêro z’omurhûla ali amahâna, nkabaga ajiraga ntyo ly’ogo musole gurhanya oku arhali muntu mubi. (Osome Emigani 7:13, 14, 21.) Ogo musole guciyakage emirhego yagulongozagya okujira ecaha, gwakacilanzire oku mashumi gurhakanajijire ecaha.

10. Ene, gurhi omuntu akajiramwo ecaha ciri nk’eci ogo musole gwajiraga?

¹⁰ Ogo mwanzi guyerekine ebyakahikira ngasi mukozi wa Yehova. Anarhogera omu caha cizibu na buzinda aciyumve nka ngasi kantu kajirikine “ho n’aho.” Erhi kandi anaderha erhi, “byampikire kone.” Cikone, erhi akarhanya kobinali oku bintu byamuhikire, nkaba anahikira okuhugûkwa oku hali bintu bilebe birhali bya bwenge anajijire byamulongozagya ahikire okujira ecaha. Ebyo bintu bibi byanahiramwo okukomera abîra babi, okucishagalusa n’ebintu birhashinganini, erhi okukomera hantu halebe habi, kugerera e Enternete erhi busu oku busu. Nkaba kandi anaba erhi ali amaleka okusalira, okusoma Ebibliya, okuja oku ntimanano z’ecigamba erhi omu mahubiri. Ak’ogo musole guganirirwe omu citabu c’Emigani, nkaba anaba arhajiraga ecaha “ho n’aho.”

11. Bici rhushinganine rhuyake lyo rhucilanga oku caha?

¹¹ Isomo lihi rhukuzire aho? Arhali caha cone rhushinganine rhuyake, ci n’ebyakarhulongoza rhujire ecaha. Solomoni ayerekine ntyo bwinja enyuma z’okuganirira omwanzi lugenda ogo musole n’omukazi w’embaraga. Okubiyerekire oyo mukazi mugenzi, Solomoni adesire ntya: ‘Orhahabukiraga omu njira zage.’ (Mig. 7:25) Kandi acibir’iderha ntya: “Enjira yawe erhageraga hofi naye, orhanahîraga okalirâna [okayegera] olumvi lw’enyumpa yage.” (Mig. 5:3, 8) Kobinali, rhunacilange oku caha omu kuyaka ebintu n’ehali zakarhulongoza oku caha. b Nkaba oko kwanahiramwo okuyaka hali ndebe erhi bintu bilebe birhahanzibwi oku Bakristu cikone bimanyikine oku byanarhuma rhwaja omu mashumi.​—Mt. 5:29, 30.

12. Muhigo guhi Ayubu arhôzire, na gurhi gwakamurhabiremwo ly’acilanga oku mashumi? (Ayubu 31:1)

¹² Lyo rhuyaka akanga kakarhulongoza oku caha, rhushinganine rhurhôle omuhigo muzibu-zibu. Ntyo ko Ayubu ajijire. ‘Ali acîgashire bwenene, oku arhakakonolera omunyere amasu’ nti acîfinje ye. (Osome Ayubu 31:1, Mashi Bible.) Okukulikira ogo muhigo gwage kwakamurhabire ayake okujira obuhushi. Na nirhu rhwanahiga okuyaka ngasi kantu  kakabonekana oku kanarhuhira omw’irhangulo.

13. Bulya gurhi rhugwasirwe rhulange entanya zirhu? (Olole n’enfoto.)

¹³ Kandi rhushinganine rhulange entanya zirhu. (Lub. 20:17) Bantu baguma na baguma baba bayemire oku kurhali kubi okuba n’enyifinjo mbi erhi akaba omuntu arhazihikirizizi. Cikone okurhanya ntyo kuli kucirheba. Omuntu ogendekera arhanya oku kantu kabi anabe ali ayushula irala ly’okukajira. Omu njira ndebe, anabe ali acihira omw’irhangulo byamuhûna okulwisa. Okuderha okuli, hali amango entanya mbi zakayisha omu bukengere bwirhu. Lyo rhuzihima, rhushinganine rhukaziyaka ho n’aho n’okurhanya oku bintu binja. Erhi rhujira ntyo, rhunabe rhuli rhwacilanga lyo rhurhajiraga ecaha cizibu bulya rhurhalesire entanya mbi zihikire okuba nyifinjo mbi bwenene.​—Fl. 4:8; Kl. 3:2; Yk. 1:13-15.

14. Bindi bici byakarhurhabala lyo rhucilanga oku mashumi?

¹⁴ Bindi bici rhwakajira lyo rhucilanga oku mashumi? Rhushinganine rhuyemere n’obwalagale oku ensiku zoshi rhwaba n’obunguke omu kurhumikira amarhegeko ga Yehova. Hali amango kuba kuzibu kuli rhwe okupatanisa entanya zirhu, n’enyifinjo zirhu n’ebi Nnâmahanga ayemire, cikone omurhûla rhuba nago omu bukengere go munji kulusha obushiru rhukolesa lyo rhujira ntyo.

15. Gurhi okugendekera rhwaba n’enyifinjo nyinja kwakarhurhabalamwo lyo rhucilanga oku mashumi?

¹⁵ Rhushinganine rhuciyigirize okuba n’enyifinjo nyinja. Erhi rhwakaciyigiriza ‘okushomba amabi, n’okusîma aminja,’ rhwanazibuhya omuhigo gwirhu gw’okujira ebishinganine n’okuyaka akanga kakarhulongoza okujira ecaha. (Am. 5:15) Kandi omu kuba n’enyifinjo zishinganine, rhwanaba n’obuhashe bw’okuhagalika amarhangulo erhi rhwakacirhimana omu kanga rhurhal’irhanyizeko erhi aka rhurhakahashire okuyaka.

16. Gurhi emikolo y’ekiroho erhurhabalamwo lyo rhugendekera rwaba masu? (Olole n’enfoto.)

¹⁶ Gurhi rhwakajira lyo rhuba n’enyifinjo  nyinja? Rhushinganine rhube na binji bya kujira omu mikolo y’ekiroho nk’oku byakanahashikana. Amango rhuli oku ntimanano z’Ecikristu erhi omu mukolo gw’amahubiri, kurhaba kulembu rhushumikwe okujira ebibi. Lubero n’oko, rhunazibuhye irala lirhu ly’okusimisa Yehova. (Mt. 28:19, 20; Hb. 10:24, 25) Omu kusoma n’okuyiga Akanwa ka Mungu n’okukarhanyako bwenene, rhunazibuhye obuzigire bwirhu oku bintu binja n’okushomba ebintu bibi. (Yoz. 1:8; Enna. 1:2, 3; 119:97, 101) Okengere oku Yezu abwizire abanafunzi bage ntya: ‘Mushenge mulek’ishumikwa.’ (Mt. 26:41) Omu kugendekera rhwageza akasanzi haguma na Larha wirhu w’omu mpingu kugerera isala, rhunayunguke n’oburhabale bwage n’okuzibuhya omuhigo gwirhu gw’okulonza okumushagalusa.​—Yk. 4:8.

RHUGENDEKERE RHWABA MASU

17. Buzamba buhi Petro arhogiremwo kanji-kanji?

¹⁷ Rhwanahasha okuhima loshi-loshi buzamba bwirhu buguma na buguma. Cikone nkaba rhwanacigendekera okulwisa obundi buzamba kasanzi kanji. Rhuganirire olwiganyo lw’entumwa Petro. Enyanya z’oboba bwa bene bantu, ahakana Yezu kasharhu. (Mt. 26:69-75) Buzinda byabonekine nka Petro ahimire obo boba bulya ahânyire n’oburhwali obuhamirizi lugenda Yezu oku kagombe kakulu k’Abayahudi. (Ebj. 5:27-29) Cikone, myaka milebe enyuma z’aho, enyanya z’‘okuyoboha abakembûle,’ aleka okulya haguma n’Abakristu barhali Bayahudi omu kasanzi kalebe. (Gl. 2:11, 12) Oboba bwa Petro bwamugalukire. Nkaba arhahashaga okubuhima loshi-loshi.

18. Lugenda buzamba buguma na buguma, bici byakarhuhikira?

¹⁸ Nkaba nirhu rhwanacishanga omu hali ya ntyo. Omu njira nci? Obuzamba rhurhanyize oku rhwahimire nkaba bwanacirhugalukira. Kwa lwiganyo, mwene wirhu muguma adesire ntya: “Hagezire myaka ikumi ndesire obuzamba bwani bw’okulola epornografi nanayemera n’obwalagale oku nabuhimire loshi-loshi. Cikone obo buzamba bwal’igwishire bwanakag’ilinga akanga kabukwanine lyo bucib’izuka.” Eby’okushagalusa, oyo mwene wirhu arhalekaga okulwisa obo buzamba. Ahugûkwa oku al’ishinganine agendekere  okukolesa bushiru bunji ly’alwisa obo buzamba, nkaba ciru omu kalamo kage koshi mw’er’igulu libi. Kugerera oburhabale bwa mukage n’abagula b’ecigamba, arhôla emihigo minja ly’alwisa enkomedu y’okulola epornografi.

19. Gurhi rhwakajira erhi akaba hali buzamba bulebe rhwayabirwe okuhima?

¹⁹ Gurhi rhwakajira ly’obuzamba bwarhuyabire okuhima burharhumaga rhwahikira okujira akantu kabi? Rhushinganine rhukulikire er’ihano lya Yezu lugenda amashumi lidesire ntya: “Mube masu.” Ciru n’amango oli waciyumva nk’ogwerhe emisi kiroho, ogendekere wayaka akanga kakarhuma waja omu mashumi. (1 Kr. 10:12) Ogendekere wajira ebintu omanyire oku byakurhabire okulwisa obo buzamba. Olwandiko lw’Emigani 28:14, NWT, ludesire ntya: “Ow’obushagaluke ali olya muntu obêra ali masu ensiku zoshi.”​—2 Pt. 3:14.

OKU RHUYUNGUKAMWO ERHI RHUGENDEKERA RHWABA MASU

20-21. (a) Migisho ehi rhwaba nayo erhi rhwakakaba masu lugenda amashumi? (b) Erhi rhwakajira ecirhu cigabi, bici Yehova naye akarhujirira? (2 Abakorinti 4:7)

²⁰ Rhwanayemera n’obwalagale oku okuba masu lugenda amashumi kunarhulerhere obunguke ensiku zoshi. Ciru “amasîma g’ecaha ga nsiku nsungunu” gakarhulerhera bunguke buhi, okulama kushimbana n’amakanuni ga Yehova kwanarhuma rhwaba n’omwishingo munji bwenene. (Hb. 11:25; Enna. 19:8) Binabe ntyo bulya rhwalemirwe lyo rhulama kushimbana n’enjira za Yehova. (Murh. 1:27) Oko kwanarhuma rhwaba n’ezamiri ecîre n’okugendekera rhwabêra omu njira ehêsire ebwa buzine bw’ensiku n’amango.​—1 Tm. 6:12; 2 Tm. 1:3; Yd. 20, 21.

²¹ Kobinali, “omubiri guba muzamba.” Cikone oko kurhali kuderha oku rhurhagwerhi carhabala. Yehova aba mubidu okurhuha emisi rhulagirireko. (Osome 2 Abakorinti 4:7.) Kandi, omanye oku Nnâmahanga anahâne obuhashe bulushire obwirhu. Cikone rhushinganine rhurhang’ikolesa obuhashe bwirhu. Erhi rhwakajira ecirhu cigabi, rhwanayemera n’obwalagale oku Yehova ashuza amasala girhu g’okumuhûna arhuyushulire emisi rhulagirireko. (1 Kr. 10:13) Kobinali, kugerera oburhabale bwa Yehova, rhwanagendekera rhwaba masu lyo rhuhima amashumi.