Nicolas na Céline balwisize amazibu gali lubero. Bayemera omukolo gw’okuhamira omu cigamba cihyahya bahâbagwa n’etawi y’e France. Badesire ntya: “Oku murhondero rhwal’ishagalusire bwenene, cikone enyuma z’aho rhwarhondera okudula abîra birhu. Rhurhal’icijira obwîra busezire bwenene haguma na bene wirhu na bali birhu b’omu cigamba cirhu cihyahya.” a Enyanya z’ago mazibu, gurhigi wakajira ly’oba n’omwishingo n’okukola bwinja omu cigamba cihyahya? Gurhi abandi bakarhabalamwo? Na migisho ehi wakapata, n’ehi wakalerherha abandi omu cigamba cihyahya?

MAKANUNI ANI GAKAKURHABALA LY’OKOMERA

1. Oyegemere Yehova. (Enna. 37:5) Kazumi, w’omu cihugo c’e Japon, arhenga omu cigamba ali amajiramwo myaka 20 erhi iba arhumwa ahandi hantu enyanya z’akazi kage. Gurhi ‘alangîsizemwo Nyakasane [Yehova, NWT] enjira zage’? Adesire ntya: “Nayigulira Yehova omurhima gwani goshi lyo mubwira oboba nagwerhe, okuciyumva kahumba n’amababale gani. Ngasi mango erhi nakajijire ntyo, akag’impa emisi nal’ilagirireko.”

Gurhi wakajira ly’oyegemera Yehova loshi-loshi? Nka kula omurhi guba gulagirire oku mishi n’embolera kurhenga omw’idaho lyo gukula, ko n’oko obuyemere bwirhu nabo bugwasirwe bulisibwe lyo bukula. Nicolas, rhwaganiriraga embere, abwine oku okurhanya bwenene oku lwiganyo lwa Abrahamu, Yezu, na Paolo, balume baciyimaga binji lyo bajira obulonza bwa Mungu, kwamuyemezize n’obwalagale oku Yehova amurhabala. Okujira ifunzo lyawe wene ngasi mango kwanakurhabala okulwisa ngasi mazibu omu kalamo kawe, na kandi kwanakurhabala  obe n’engalo z’ekiroho wakashangira haguma n’abandi omu cigamba cawe cihyahya.

2. Oyake okugerera ecigamba cawe cihyahya oku ca mîra. (Muh. 7:10) Jules al’igwasirwe akomere enkomedu eri lubero bwenene erhi arhenga e Bénin n’okuhamira e États-Unis. Akengire ntya: “Nakaciyumva nka ngwasirwe okuganirira ngasi muntu muhyahya nakag’irhimanana naye akalamo kani.” Bulya arhal’ikomire ntyo emwabo, arhondera okuciyegula oku bandi omu cigamba. Cikone erhi ahikira okumanya bwinja bene wirhu na bali birhu omu cigamba, arhondera okushanja entanya zage. Adesire ntya: “Nyemire oku ngasi hoshi rhwakaba rhuli okw’igulu, abantu baba bo na baguma. Banajire kone ebintu n’okuganira omu njira eri lubero. Okuyemera abantu nk’oku banali kuba kwa bulagirire.” Co cirhumire, oyake okugerera abantu b’omu cigamba cawe cihyahya oku bantu b’omu cigamba cawe ca mîra. Nk’oku mwali wirhu muguma painiya ohamagwalwa Anne-Lise adesire: “Ntahamiraga omu cigamba cihyahya mpu lyo mpatamwo ebi nasigaga omu ca mîra. Nahamiremwo lyo mvumbula ebintu bihyahya.”

Abagula nabo bashinganine bayake okugerera ecigamba cabo cihyahya oku ca mîra. Okujira ebintu omu njira ziri lubero arhali ngasi mango kuba kubi. Kuli kukolesa obwenge okurhang’imanya gurhi ebintu bijirwa omu cigamba cihyahya embere ohâne entanya zawe. (Muh. 3:​1, 7b) Kuli kwinja okuyigiriza abandi kugerera olwiganyo lwawe ahali h’okubaseza bakulikire entanya zawe.​—2 Kr. 1:24.

3. Ocihâne bwenene omu mikolo y’ecigamba cawe cihyahya. (Fl. 1:27) Biba bihûnyire akasanzi n’emisi erhi omuntu akahamira omu cigamba cihyahya, cikone kurhondera amango wanahamiragamwo, kuba kwa bulagirire okukaja oku ntimanano za busu oku busu nka bihashikine. Kobinali, erhi akaba abantu b’omu cigamba cawe cihyahya barhasag’ikubona, erhi barhalug’ikubona, gurhi bakakurhabalamwo? Lucinda, wahamiraga omu cigamba cihyahya haguma na bali bage babirhi omu vile nguma nnene y’omu Afrique du Sud, akengire ntya: “Abîra bani bampanûla nsegeze obwenge bwani oku kucihâna bwenene omu mikolo y’ecigamba, okukahubiri haguma n’abandi, n’okukahâna amashuzo oku ntimanano. Kandi rhwabwira bene wirhu oku banakajirira entimano z’amahubiri omu nyumpa yirhu.”

Okujira ‘omurhima gwawe gube muguma’ omu mikolo y’eciteokrasi haguma na bene winyu na bali binyu omu cigamba cawe cihyahya, eri njira nyinja y’okugendekeza “obuyemere bw’Emyanzi y’Akalembe.” Anne-Lise, rhwaganiriraga embere, ahîrwe omurhima n’abagula b’ecigamba acihangane akahubiri na ngasi muntu. Malehe gahi oko kwadwirhe? Adesire ntya: “Nahugûkwa duba-duba oku eryo ly’ihwe ly’okukomera.” Kandi, okucihâna omu mikolo y’okucesa n’okushibirira Enyumpa y’Obwami kunayerekane oku okola oli wabona oku eco co cigamba cawe. Oku wacihâna bwenene mw’eyo mikolo, ko abandi banakukomera duba-duba, ko na nawe waciyumva oku oli cigabi c’omulala gwawe muhyahya gw’ekiroho.

 4. Ocijirire abîra bahyahya. (2 Kr. 6:11-13) Okusimisibwa n’abandi yo njira nyinja y’okujira abîra, co cirhumire okaciha akasanzi embere n’enyuma z’entimanano ly’obayegera n’okulonza okubamanya. Ocihangane okumanya amazino gabo. Okukengera amazino g’abantu, okubashagalukira, n’okuba wa kuyegerwa kwanarhuma abandi bakuyegera kwananarhuma wacijirira abîra bahyahya.

Ahali h’okucijira oku orhaba mpu lyo bene wirhu na bali birhu bahyahya bakukomera, obaleke bakumanye nk’oku onayorha. Ojire nk’oku Lucinda ajiraga, adesire ntya: “Rhukola rhugwerhe abîra ba hofi-hofi bulya rhwe rhwakag’iba barhanzi okubayegereza aha mwirhu.”

“MUKAYANKIRIRANA MWÊNE NA NNENE”

Okuja omu Nyumpa y’Obwami eyunjwiremwo abantu orhamanyiri kwanayobohya baguma na baguma. Co cirhumire, gurhigi wakajira lyo kuba kulembu oku bantu bahyahya bahamiraga omu cigamba cinyu? Entumwa Paolo yahânyire omurhima ntya: “Mukayankirirana mwêne na nnene nka kulya Kristu ammuyankiriraga.” (Rm. 15:7) Omu kuyiga olwiganyo lwa Kristu, abagula banarhabala abahyahya lyo baciyumva bwinja. (Olole ecisanduku cidesire, “ Ebyakarhabala Abahamaga lyo Bakomera.”) Cikone, abantu boshi omu cigamba, ciru n’abana, banajira kantu kalebe lyo barhabala abahyahya baciyumve bwinja.

Okuyankirira abandi kuhiziremwo okubayegereza aha mwa birhwe, cikone kandi kuhiziremwo okubaha oburhabale balagirireko. Kwa lwiganyo, mwali wirhu muguma aciha akasanzi k’okulambagiza owundi mwali wirhu muhyahya omu vile n’okumuhugûlira lugenda eby’etransporo. Oko kwahuma oyo mwali wirhu muhyahya oku murhima bwenene kwanamurhabala okukomera.

OBULYO BW’OKUKULA OMU HALI Y’EKIROHO

Amango ihanzi liri lyakula, linaciyubule kanji-kanji embere ebyubi byalyo bibe n’obuhashe bw’okubalala. Ko n’oko, erhi wakahamira omu cigamba cihyahya, oshinganine okûle oboba boshi-boshi bwakarhuma orhabalala omu njira y’olwiganyo  omu mukolo gwa Yehova. Nicolas na Céline bayemire ntyo omu kuderha ntya: “Okuhama eba njira nyinja bwenene y’okucikomereza. Lyo rhukomera abantu bahyahya, rhwal’igwasirwe rhukuze amorhere mahyahya.” Jean-Charles, rhwaganiriraga oku murhondero gw’eci cigabi, aganirire gurhi omulala gwage gwayungusiremwo. Adesire ntya: “Okuhamira omu cigamba cihyahya kwahashisize abana birhu bakule omu hali y’ekiroho n’okuyegera Yehova bwenene. Enyuma za myezi misungunu yone, mwali wirhu arhondera okugeza ebigabi oku ntimanano y’omu kagarhi k’omugobe na mugala wirhu aba muhubiri orhali mubatize.”

Gurhigi erhi akaba akanga kawe karhakuhashisizi okuhama, kwa lwiganyo okuja ahali obulagirire bunji? Wanajira ecigamba cawe ca mîra cibonekane nka cihyahya kuli we omu kukolesa maguma na maguma g’omu mahano gaganirirwe mw’eci cigabi. Amango ogendekire walangalira Yehova, ocihâne bwenene omu mikolo y’ecigamba cawe omu kujira emipango y’okuhubiri haguma n’abandi n’okucijirira abîra bahyahya erhi kuseza obwîra haguma n’aba ogwerhe ene. Ka wanacihangana okuha abahyahya oburhabale erhi abali omu malagirire omu kubaha ebi balagirireko? Bulya obuzigire bo buyerekana Abakristu b’okunali, okujira ntyo buzira karhinda kwanakurhabala okule omu hali y’ekiroho. (Yn. 13:35) Wanayemera n’obwalagale oku “entûlo za bene ezo zo Nyamuzinda asîma.”​—Hb. 13:16.

Ciru akaba haba amazibu, Bakristu banji bahamaga bahashire okuba n’omwishingo n’okujira binji omu cigamba cabo cihyahya, nawe wanajira ntyo! Anne-Lise adesire ntya: “Okushanja ebigamba kwantabire nyigule omurhima gwani goshi-goshi.” Kazumi akola ayemire oku omu kuhama “wanacibonera oburhabale bwa Yehova omu njira orhalisag’icibonera bo.” Na gurhigi lugenda Jules? Adesire ntya: “Abîra nacijirire banantabale nciyumve nkomire. Nkola nciyumva nkomire ecigamba cani cihyahya na nka kwanaba kuzibu kuli nie okucirhengamwo.”