Amadoso g’Abantu Basoma Ebitabu Birhu
Omu lwandiko lwa Izaya 60:1, ndi obwizirwe ‘azuke, ayunjule bumoleke!’ na gurhi ajiramwo ntyo?
Olwandiko lwa Izaya 60:1 ludesire ntya: “Zuka, oyunjule bumoleke! bulya obulangashane bwawe bw’obwo buyishire, n’irenge lya Nyakasane [Yehova, NWT] lyakumolekire.” Emilongo ekulikire eyerekine oku obwizirwe ali “Sayuni” erhi Yeruzalemu, vile nkulu y’e Yuda y’ago mango. (Iz. 60:14; 62:1, 2) Eyo vile eshushanyize ishanja lyoshi ly’Abaisraheli. Ezo nderho za Izaya zanarhuma rhwacidosa aga madoso abirhi: Burhangiriza, mangaci na gurhi Yeruzalemu ‘azusiremwo’ n’okuyunjula bumoleke bw’ekiroho? Bwa kabirhi, k’ezo nderho za Izaya ziri zahikirira omu njira nnene muli gano mango girhu?
Mangaci na gurhi Yeruzalemu ‘azusiremwo’ n’okuyunjula bumoleke bw’ekiroho? Evile y’e Yeruzalemu n’ehekalu yalimwo byabezire biguka omu myaka 70 Abayahudi bajijire bahamisibwe omu Babiloni. Cikone enyuma z’evile ya Babiloni okugwarhwa n’Abamedi n’Abapersi, Abaisraheli kurhenga omu burhegesi boshi bw’e Babiloni baba n’oluhuma lw’okugaluka omu cihugo cabo n’okugalula enterekêro y’okuli. (Ezr. 1:1-4) Kurhondera omu mwaka gwa 537 Embere za Kano Kasanzi Kirhu (E.K.K.K.), Abaisraheli bishwekerezi bal’icisigire b’omu mûko goshi 12 bajira ntyo. (Iz. 60:4) Barhondera okuha Yehova enterekêro, okujira ensiku nkulu, n’okucib’iyubaka buhyahya ehekalu. (Ezr. 3:1-4, 7-11; 6:16-22) Kandi irenge lya Yehova lyacib’irhondera okumolekera Yeruzalemu, ko kuderha abantu ba Mungu bagalukaga. Nabo, baba bumoleke oku mashanja gali omu mwizimya gw’ekiroho.
Cikone, cigabi cilebe c’ebi Izaya alebaga lugenda okugalulwa cone cahikirire ago mango. Banji omu Baisraheli barhagendekeraga barhumikira Mungu. (Neh. 13:27; Mal. 1:6-8; 2:13, 14; Mt. 15:7-9) Enyuma z’aho, balahira ciru Masiya, Yezu Kristu. (Mt. 27:1, 2) Omu mwaka gwa 70 Kano Kasanzi Kirhu (K.K.K.), Yeruzalemu n’ehekalu yalimwo byasherezibwa obwa kabirhi.
Yehova ali alebire oku oko kwakabire. (Dan. 9:24-27) Bibonekine n’obwalagale oku, arhal’ilonzize Yeruzalemu ya hanw’igulu ehikirize ngasi cigabi c’obulebi buli omu Izaya cigabi ca 60 lugenda okugalulwa.
K’ezo nderho za Izaya ziri zahikirira omu njira nnene muli gano mango girhu? Neci, cikone ziri zahikirira lugenda owundi Yeruzalemu w’olwiganyo, ko kuderha “Yeruzalemu w’enyanya.” Lugenda oyo Yeruzalemu, entumwa Paolo yayandisire ntya: “Ye nyama.” (Gl. 4:26) Yeruzalemu w’enyanya ciri cigabi c’empingu c’ikubuliro lya Mungu, cijijirwe n’ebiremwa bishwekerezi by’ekiroho. Abana bage bahiziremwo Yezu n’Abakristu 144 000 bashizirwe amavurha kugerera iroho litagatifu, bagwerhe obulangalire bw’okuja empingu aka Paolo. Abakristu bashîge amavurha bo bajijire ‘omulala mutagatifu,’ ko kuderha “Israheli wa Nnâmahanga.”—1 Pt. 2:9; Gl. 6:16.
Gurhi Yeruzalemu ‘azusiremwo, n’okuyunjula bumoleke’? Ajijire ntyo kugerera abana bage bashîge amavurha ba hanw’igulu. Rhulole gurhi ebyabahikiraga bishushine n’ebyal’ilebirwe omu Izaya cigabi ca 60.
Abakristu bashîge amavurha bal’igwasirwe ‘bazuke’ bulya bali bamaja omu hali y’omwizimya gw’ekiroho erhi obugoma bw’ekiroho bwalebagwa bubamira omu kagana ka kabirhi Kano Kasanzi Kirhu (K.K.K.). (Mt. 13:37-43) Muli ntyo, baja omu buja bwa Babiloni Mukulu, ko kuderha amadîni goshi g’obunywesi. Abashîge amavurha babêzire mw’obo buja kuhika “aha kuhwa kw’igulu,” kasanzi karhonderaga omu mwaka gwa 1914. (Mt. 13:39, 40) Kasanzi kasungunu enyuma z’aho, omu mwaka gwa 1919, barhenga mw’obo buja na ho n’aho barhondera balangaza obumoleke bw’ekiroho omu kucihâna loshi-loshi omu mukolo gw’amahubiri. a Omu kasanzi ka myaka minji, abantu kurhenga omu mashanja goshi bajire mw’obo bumoleke, kuhiramwo n’abantu bacisigire b’omu Israheli wa Nnâmahanga, kuli kuderha “abami” bayerekinwe omu Izaya 60:3.—Maf. 5:9, 10.
Omu mango gayisha, Abakristu bashîge amavurha bayerekana obo bumoleke kurhenga emwa Mungu omu njira ciru nnene bwenene kulusha. Gurhi bayish’ijiramwo ntyo? Hano bayusa olugendo lwabo lwa hanw’igulu, bayish’iba cigabi ca “Yeruzalemu muhyahya,” erhi muhya wa Kristu wayish’iba ajijirwe n’ababo bami n’abakuhani 144 000.—Maf. 14:1; 21:1, 2, 24; 22:3-5.
Yeruzalemu Muhyahya ayish’iba n’ecigabi c’obulagirire omu kuhikiriza olwandiko lwa Izaya 60:1. (Oshushanye Izaya 60:1, 3, 5, 11, 19, 20 n’Amafulûlo 21:2, 9-11, 22-26.) Nk’oku Yeruzalemu wa hanw’igulu ho hali hantu hakulu h’oburhegesi omu Israheli ya mîra, ko n’oko Yeruzalemu Muhyahya na Kristu bo bwayish’iba burhegesi bw’igulu lihyahya. Gurhi Yeruzalemu Muhyahya ‘amanukamwo emalunga, emwa Nyamuzinda’? Omu kujira emikolo eyerekire igulu. Abantu barhinya Nnâmahanga kurhenga omu mashanja goshi ‘bayish’ilambagira omu bulangashane’ bwa Yeruzalemu. Ciru bayish’icizibwa kurhenga omu caha n’omu lufû. (Maf. 21:3, 4, 24) Amalehe g’oko kwayish’iba ‘kuyumanyanya [erhi kugalulwa kw’] ebintu byoshi,’ nk’oku Izaya n’abandi balebi balebaga. (Ebj. 3:21) Oko kugalulwa kunene kwarhonderaga erhi Yezu aba Mwami kwanayish’ihwa oku buzinda bw’Oburhegesi bwage bw’Emyaka Cihumbi.
a Okugalulwa kw’enterekêro y’okuli kwabaga omu mwaka gwa 1919 kandi kuganirirwe omu Ezekiyeli 37:1-14 n’omu Amafulûlo 11:7-12. Ezekiyeli alebire okugalulwa kw’ekiroho kw’Abakristu boshi bashîge amavurha enyuma z’okuba omu buja bw’akasanzi kalî bwenene. Obulebi buli omu citabu c’Amafulûlo buyerekire okucib’iburhwa omu njira y’ekiroho kw’ecigusho cisungunu ca bene wirhu bashîge amavurha balongozagya enyuma za kasanzi kasungunu k’okusezibwa okurhajira omukolo goshi-goshi enyanya z’okushwekwa omu njira erhali ya bushinganyanya. Omu mwaka gwa 1919, bahirwaho nka “mushizi mwirhonzi na mwikubagirwa.”—Mt. 24:45, NWT; olole ecitabu Ibada Safi ya Yehova—Inarudishwa Tena!, buk. 118.
