Mw’eco cigabi, rhwayizire oku akantu k’obulagirire bwenene karhuyerekire rhweshi bene bantu na ba malahika kuli kucêsibwa kw’izino likulu bwenene lya Yehova. Okumanya erhi enjira ya Yehova y’okurhegeka yo nyinja bwenene erhi nanga kugwerhe olushangi n’okucêsibwa kw’izino lyage. Ko n’oko, omuntu okubêra mwishwekerezi kuli Nnâmahanga erhi nanga kandi kugwerhe olushangi n’okucêsibwa kw’izino lyage.

Ene, bulya gurhi rhusegize oku akantu k’obulagirire bwenene kayerekire izino lya Yehova n’okucêsibwa kw’er’izino? Rhuganirire birhumire bisharhu.

Burhangiriza, omw’ishwa ly’e Edeni Shetani azinzize izino lya Yehova, erhi irenge lyage. Idoso ly’obulyalya Shetani adosagya Eva lyal’ilonzize okuyerekana oku Yehova arhaba Nnâmahanga muhânyi n’oku al’ihire Adamu na Eva amarhegeko garhal’ishinganine. Enyuma z’aho, Shetani apinga n’obwalagale enderho za Yehova, ayerekana oku Nnâmahanga aba munywesi. Omu kujira ntyo, Shetani acafula izino lya Yehova. Ahikira aha aba “Ibilisi,” k’okuderha “kakoza.” (Yn. 8:44) Enyanya z’okuyemera obunywesi bwa Shetani, Eva arharhumikiraga Nnâmahanga, anagomera oburhegesi bwage bukulu bwenene. (Murh. 3:1-6) Kuhika ene, Shetani agendekire azinza izino lya Yehova omu kulumiza obunywesi lugenda obumuntu bwage. Abayemera obunywesi bwa ntyo kunabe kulembu bwenene kuli bo okurharhumikira Yehova. Co cirhumire, abantu ba Nnâmahanga banabone oku oko kuzinza izino litagatifu lya Yehova buli bubule b’obushinganyanya bubi bwenene. Eco co cirhumire cikulu c’amalibuko manji n’obubi buli omw’igulu.

Bwa kabirhi, ly’alerhera ebiremwa byage byoshi obunguke, Yehova ahizire okuhalira izino lyage, erhi kulirhenzakw’izinga lyoshi. Ako ko kantu k’obulagirire bwenene kuli Yehova. Co cirhumire adesire ntya: “Nakuza [nacêsa, NWT] izino lyani.” (Eze. 36:23) Na Yezu ayerekine n’obwalagale akantu kashinganine kabe ka bulagirire bwenene omu masala g’abakozi boshi bishwekerezi ba Yehova erhi aderha ntya: “Izino lyawe likuzibwe [licêsibwe, NWT].” (Mt. 6:9) Ebibliya eyerekine kanji-kanji obulagirire bw’okukuza izino lya Yehova. Rhuganirire ezi nyiganyo nsungunu: “Herezi Nyakasane [Yehova, NWT] irenge ly’izino lyage.” (1 Nga. 16:29; Enna. 96:8) “Muzihire irenge [izino, NWT] lyage ennanga.” (Enna. 66:2, Mashi Bible) ‘Nnamanyisa izîno lyawe emyaka n’emyaka’ (Enna. 86:12) Mango maguma omu mango Yehova aderhaga yene kurhenga e mpingu mwali omu hekalu e Yeruzalemu, erhi Yezu aderha ntya: “Larha, kuza izino lyawe!” Yehova naye, ashuza erhi: “Nalikuzize nanacilikuza kandi.”​—Yn. 12:28. a

Bwa kasharhu, omuhigo gwa Yehova ensiku zoshi guba gupatine n’izino lyage, erhi irenge lyage. Orhanye k’oku: Enyuma z’irhangulo lya buzinda lyay’ishihwa oku buzinda bw’Emyaka Cihumbi y’Oburhegesi bwa Kristu, bici byayish’ikulikira? Gurhi bamalahika boshi n’abantu boshi bayish’iciyumva lugenda izino lya Yehova muli ago mango? Lyo rhushuza kw’er’idoso, rhukengere ebintu bibirhi bigwerhe olushangi: obwishwekerezi bwa bene bantu n’oburhegesi bukulu  bwenene bw’igulu lyoshi. K’abantu bayerekine oku bali ba buyemere bayish’iba n’amazibu g’okugendekera babêra bishwekerezi? Nanga. Bayish’iba bakola bimana banayish’iba barhangwirwe loshi-loshi. Bayish’iba bahâbirwe obuzine bw’ensiku n’amango. K’idoso lugenda oshinganine okuba murhegesi mukulu w’ebintu byoshi lyanacigendekere lyalerha akadali, ciru n’okugabikanamwo, egarhi ka bamalahika n’abantu? Nanga. Enjira ya Yehova y’okurhambula yayish’iba yabonekine n’obwalagale oku yo eshinganine yo na nyinja bwenene. Gurhigi lugenda izino lya Yehova?

Ago mango, izino lya Yehova lyayish’icêsibwa loshi-loshi, na ngasi muntu ayish’iba amanyire okuli lugenda Yehova. Ciru akaba ntyo, izino lya Yehova lyanagendekere lyaba lya bulagirire bwenene oku bishwekerezi boshi e mpingu na hanw’igulu. Bulya gurhi? Bulya banabone ebintu by’okurhangaza Yehova acigendekera ajira. Orhanye k’oku: Bulya Yezu omu bwirhohye ayish’igalulira Yehova Nnâmahanga oburhegesi boshi, Nnâmahanga “arhegeka byoshi lwoshi.” (1 Kr. 15:28, Mashi Bible) Enyuma z’aho, abantu hanw’igulu banashagalukire “oluhuma lw’irenge lw’abana ba Nnâmahanga.” (Rm. 8:21, NWT) Kandi Yehova ayish’ihikiriza omuhigo ajira ensiku zoshi g’okuhira haguma ebiremwa byoshi by’obwenge by’e mpingu na hanw’igulu, gube mulala muguma munene gugwerhe ecinyabuguma.​—Ef. 1:10.

Enyuma z’okujirikana kw’ebyo bintu byoshi, gurhi ab’omu mulala gwa Yehova bali e mpingu n’okw’igulu bayish’iciyumva? Kobinali rhwayish’iba rhugwerhe irala linene ly’okukuza izino lya Yehova. Omu kulongozibwa n’iroho litagatifu, omuzihi w’ennanga Daudi ayandisire ntya: “Agishwe [akuzibwe] Nyakasane Nyamuzinda . . . Ligishwe [likuzibwe] n’izîno lyage ly’irenge ensiku zoshi.” (Enna. 72:18, 19) Emyaka n’emyaka, rhwanagendekere rhwaba n’ebirhumire bihyahya na binja by’okujira ntyo.

Izino lya Yehova liyerekine ngasi kantu lugenda ye. Ci bwenene, izino lyage lirhukengezize obuzigire bwage. (1 Yn. 4:8) Rhwayish’igendekera rhwakengera oku Yehova arhulemire erhi buzigire bwage burhuma, oku ahânyire enterekêro y’engombôlo erhi buzigire bwage burhuma, n’oku enyanya z’obuzigire bwage ayerekine n’obwalagale oku enjira yage y’okurhegeka eba nshinganyanya. Cikone rhwanagendekere rhwabona gurhi Yehova ali ayereka ebiremwa byage obuzigire. Emyaka n’emyaka, rhwayish’ishumibwa okugendekera rhwamuyegera nka Larha wirhu n’okuyimbira izino lyage linja bwenene irenge.​—Enna. 73:28.