1. Kushimbana n’Abahabraniya 12:1, NWT, bici rhushinganine rhujire lyo rhulibirha kuhika oku buzinda bw’akamashigwe kirhu k’obuzine?

 EBIBLIYA eshushanyize akalamo kirhu rhuli Bakristu n’akamashigwe k’okulibirha. Abalibisi bahasha okulibirha kuhika oku buzinda bw’ako kamashigwe bahâbwa oluhembo lw’obuzine bw’ensiku n’amango. (2 Tm. 4:7, 8) Rhushinganine rhujire okwirhu koshi lyo rhugendekera rhwalibirha, bwenene bulya rhuyegerire bwenene obuzinda bw’akamashigwe kirhu k’okulibirha. Entumwa Paolo, wahashaga okulibirha kuhika oku buzinda bw’akamashigwe k’obuzine, ayerekine ebyakarhurhabala lyo rhuhima ako kamashigwe. Arhubwizire oku “rhurhibe ngasi buzirho . . . rhunalibirhe n’obulembedu akamashigwe kahizirwe embere zirhu.”​—Osome Abahabraniya 12:1, NWT.

2. “Okurhiba ngasi buzirho” ko kuderha gurhi?

² Erhi Paolo ayandika oku rhugwasirwe “rhurhibe ngasi buzirho,” k’al’ilonzize okuderha oku nta muzigo Omukristu ashinganine abarhule? Nanga, arhali ntyo ko al’ilonzize okuderha. Lubero n’oko, al’ilonzize okuderha oku rhushinganine rhucirhenzeko ngasi buzirho burhali bwa bulagirire. Obuzirho bwa ntyo bwanarhuma rhurhalibirha duba-duba bwananarhuma rhwarhama. Lyo rhugendekera, rhugwasirwe rhumanye duba-duba n’okucirhenzako ngasi buzirho burhali bwa bulagirire bwakarhuma rhwashuba amagulu. Cikone mw’ako kasanzi ko n’ako, rhurhalonzizi rhurhibe emizigo rhushinganine rhubarhule. Erhi rhwakajira ntyo, rhurhakac’ishinganana okugendekera mw’ako kamashigwe k’okulibirha. (2 Tm. 2:5) Mizigo ehi rhugwasirwe rhubarhule?

3. (a) Kushimbana n’Abagalasiya 6:5, Mashi Bible, bici rhugwasirwe rhubarhule? (b) Bici rhwaganirira mw’eci cigabi, na bulya gurhi?

³ Osome Abagalasiya 6:5, Mashi Bible. Paolo ayerekine kantu kalebe rhugwasirwe rhubarhule. Ayandisire oku “ngasi  muntu agwasirwe okubarhula omuzigo gwage yene.” Mw’olo lwandiko, Paolo akag’iganirira ebi Nnâmahanga ahûnyire ngasi muguma wirhu, nta muntu yeshi-yeshi wakarhujirira byo. Mw’eci cigabi, rhwaganirira ebihizirwe omu muzigo ‘gwirhu rhwene’ na gurhi rhwakagubarhulamwo. Kandi, rhwamanya obuzirho burhali bwa bulagirire rhwakaba rhubarhwire n’okuyiga gurhi rhwakaburhibamwo. Okubarhula omuzigo gwirhu rhwene n’okurhiba obuzirho burhali bwa bulagirire kwarhurhabala lyo rhulibirha bwinja akamashigwe kirhu k’obuzine.

4. Bulya gurhi eciragane cirhu c’okucihâna emwa Yehova gurhaba muzigo muzirho? (Olole n’enfoto.)

⁴ Eciragane rhwajijire c’okukolera Yehova. Erhi rhucihâna emwa Yehova, rhwajijire eciragane c’okumuharamya n’okujira obulonza bwage. Rhugwasirwe rhuhikirize eco ciragane. Okulama kushimbana n’eciragane cirhu c’okukolera Yehova karhali kantu kalembu, cikone gurhaba muzigo muzirho. Rhudesire ntyo bulya Yehova arhulemire lyo rhujira obulonza bwage. (Maf. 4:11) Arhuhiziremwo  obulagirire bw’ekiroho anarhulemire oku nshusho yage. Co cirhumire, rhunahashe okumuyegera rhunanashagalukire okujira obulonza bwage. (Enna. 40:8) Na kandi, erhi rhujira obulonza bwa Nnâmahanga n’okukulikira Omugala, ‘rhunabone irhamuko’ ly’obuzine bwirhu.​—Mt. 11:28-30.

5. Bici byakakurhabala ly’ohikiriza eciragane wahîre Nnâmahanga c’okumukolera? (1 Yowane 5:3)

⁵ Gurhi wakabarhulamwo ogo muzigo? Hali bintu bibirhi byakakurhabala. Burhangiriza, ogendekere wazibuhya obuzigire bwawe kuli Yehova. Wanajira ntyo omu kurhanya bwenene oku bintu binja byoshi okujirire n’oku migisho akuha omu mango gayisha. Oku obuzigire bwawe kuli Nnâmahanga bwagendekera bwayushuka, ko kwanagendekera kwaba kulembu kuli we okumurhumikira. (Osome 1 Yowane 5:3.) Bwa kabirhi, oyige olwiganyo lwa Yezu. Ahashire okujira obulonza bwa Yehova Nnâmahanga bulya akag’imuhûna oburhabale anagendekera asegeza obwenge oku luhembo akahabirwe. (Hb. 5:7; 12:2) Aka Yezu, okahûna Yehova emisi onagendekere wabîka obulangalire bw’obuzine bw’ensiku n’amango omu bwenge bwawe. Erhi wakagendekera wayushula obuzigire bwawe kuli Nnâmahanga n’okuyiga olwiganyo lw’Omugala, wanahasha okuhikiriza eciragane wamuhîre c’okumukolera.

6. Bulya gurhi rhugwasirwe rhuhikirize emikolo rhugwerhe omu mulala? (Olole n’enfoto.)

⁶ Ebi ngasi muntu ahûnyirwe okujira omu mulala. Omu kamashigwe kirhu k’obuzine, rhugwasirwe rhuzigire Yehova na Yezu kulusha oku rhuzigira abantu b’omulala gwirhu. (Mt. 10:37) Cikone, oko kurhali kuderha oku rhwanalekerera emikolo yirhu rhugwerhe omu mulala, omu kubona nka yanarhuma rhurhashagalusa Nnâmahanga na Yezu. Lubero n’oko, lyo rhuyemerwa na Nnâmahanga na Yezu, rhushinganine rhuhikirize omukolo gwirhu omu mulala. (1 Tm. 5:4, 8) Erhi rhwakajira ntyo, rhwanaba na mwishingo munji. Kobinali, Yehova aba amanyire oku emilala yanaba n’omwishingo amango omulume na mukage bali bajirirana omu njira y’obuzigire n’obukenge, amango ababusi bazigire abana babo banali babakomereza, n’amango abana bali barhumikira ababusi babo.​—Ef. 5:33; 6:1, 4.

7. Gurhi wakahikirizamwo omukolo gwawe omu mulala?

⁷ Gurhi wakabarhulamwo ogo muzigo? Obe oli mulume, mukazi erhi mwana, okalangalira amahano g’obwenge gali omu Bibliya ahali h’okuyegemera entanya zawe, oborhere bw’ah’olama, erhi ebi abaderhwa basomi badesire. (Mig. 24:3, 4) Okakolesa bwinja ebicapo birhu biyimangire oku Bibliya. Bibamwo amahano minja gakakurhabala ly’omany’ikolesa amakanuni g’Ebibliya. Kwa lwiganyo, ecigabi cidesire “Oburhabale oku Mulala” cibamwo emyanzi eganirire amazibu gahikira abarhôline, ababusi, n’emisole muli gano mango. b Ohige okukakolesa ebi Ebibliya edesire ciru akaba abandi bantu b’omu mulala barhajijiri ntyo. Erhi wakajira ntyo, omulala gwawe gwanayunguka, kandi wanashagalukira emigisho ya Yehova.​—1 Pt. 3:1, 2.

8. Gurhi emihigo yirhu yakarhuma rhwaciyumva?

⁸ Rhushinganine rhuyemere amazibu gakarhuhikira enyanya z’emihigo yirhu. Yehova arhuhîre oluhuma lw’okucishoga, anaba alonzize rhushagalukire obunguke rhwakaba nabo omu kurhôla emihigo minja. Cikone kandi arharhucîka n’amazibu gakarhuhikira erhi rhwakarhôla emihigo mibi. (Gl. 6:7, 8) Co  cirhumire, rhunayemere amazibu garhuhikira enyanya z’emihigo mibi rhurhôzire, okuderha buzira kurhanya, erhi okujira ebintu buzira kurhanya. Ezamiri yirhu yanarhutumuza kushimbana n’ebi rhwajijire. Cikone, okumanya oku rhushinganine rhuyemere amazibu gakarhuhikira enyanya z’emihigo rhurhôzire, kwanarhushumya rhuhungame ebyaha birhu, rhukubûle amagosa girhu, n’okuyaka okushub’ijira ago magosa. Okujira ntyo kwanarhurhabala lyo rhugendekera omu kamashigwe k’obuzine.

9. Gurhi wakajira erhi akaba warhôzire omuhigo mubi? (Olole n’enfoto.)

⁹ Gurhi wakabarhulamwo ogo muzigo? Erhi akaba warhôzire omuhigo mubi, gurhi wakajira? Oyemere oku orhakahash’ishanja ebyagezire. Orhahezagya akasanzi kawe n’emisi yawe omu kucihalira erhi kucitumuza erhi kutumuza abandi enyanya z’emihigo yawe mibi. Lubero n’oko, oyemere amagosa gawe onajire okwawe koshi ly’okolesa bwinja akanga olimwo buno. Erhi wakayumva oli wacitumuza enyanya z’igosa wajijire, omu njira y’obwirhohye oyegere Yehova kugerera isala, oyemere igosa lyawe, onamuhûne akubabalire. (Enna. 25:11; 51:3, 4) Ohûne aba wagokize obwonjo, n’erhi akaba kuli kwa bulagirire, ohûne abagula oburhabale. (Yk. 5:14, 15) Ociyigirize kugerera amagosa gawe, onajire okwawe koshi ly’oyaka okugashubirira. Erhi wakajira ntyo, wanayemera n’obwalagale oku Yehova akuyeresa olukogo lwage n’oku akuha oburhabale olagirireko.​—Enna. 103:8-13.

10. Bulya gurhi okulangalira ebi rhurhakahash’ijira guba muzigo muzirho? (Abagalasiya 6:4)

¹⁰ Okulangalira ebi orhakahash’ijira. Rhwanacibarhuza omuzigo muzirho omu kulangalira ebi rhurhakahash’ijira amango rhuli rhwacigerera oku bandi. (Osome Abagalasiya 6:4.) Erhi ngasi mango rhwakakacigerera oku bandi, rhwanakayagalwa nabo n’okuba n’iroho ly’akamashigwe. (Gl. 5:26) Lyo rhucihangana okuhikiriza ebi abandi bahikirizize, rhwanacihangana okujira ebirhalusire obuhashe bwirhu n’ebi ehali zirhu zirharhuyemeriri okujira. N’erhi akaba “okulangalira ehi omuntu arhahikakwo, [kuba] kulîsibwa n’amagala,” rhwanavunika omurhima bwenene erhi rhwakalangalira ebi rhurhakahash’ihikiriza ciru n’ehitya! (Mig. 13:12) Okujira ntyo kwananyihya emisi yirhu n’okurhuma rhwashuba amagulu omu kamashigwe kirhu k’obuzine.​—Mig. 24:10.

11. Bici byakakurhabala ly’oyaka okulangalira ebi orhakahash’ijira?

¹¹ Gurhi wakarhibamwo obo buzirho? Orhacilongezagyako binji bwenene kulusha ebi Yehova akuhûnyire. Nta mango akakuhûna omuhe ebi orhagwerhi. (2 Kr. 8:12) Oyemere n’obwalagale oku Yehova arhakagerera ebi oli wajira kw’ebi abandi bali bajira. (Mt. 25:20-23) Anashagalukire ebi oli wamujirira n’obugumaguma bwawe boshi, obwishwekerezi bwawe, n’obulembedu bwawe. Okuba n’olugero kwanakurhabala oyemere oku emyaka yawe, amagala gawe n’akanga olimwo byanarhuma orhajira binji ene nk’oku wakalonzize. Aka Barzilayi, okaba mubidu okulahira mikolo milebe erhi akaba amagala gawe, erhi emyaka yawe birhakakuyemerera okuhikiriza eyo mikolo. (2 Sam. 19:35, 36) Aka Musa, okayemera oburhabale n’okuha abandi mikolo milebe amango bihûnyire okujira ntyo. (Lub. 18:21, 22) Olugero lwa ntyo lwanakurhabala orhakag’ilangalira ebi orhakahash’ijira byakarhuma warhama omu kamashigwe kawe k’obuzine.

12. Ka rhushinganine rhucitumuze enyanya z’emihigo mibi y’abandi? Ohugûle.

¹² Okucitumuza enyanya z’emihigo mibi y’abandi. Rhurhakarhôlera abandi emihigo; na ngasi mango rhurhakabacîka oku mazibu galerwa n’emihigo mibi barhôzire. Kwa lwiganyo,  omwana-rhabana erhi omwana-nyere anahikira aha acishoga okuleka okukolera Yehova. Ogo muhigo gwanababaza ababusi bwenene. Cikone, ababusi bacitumuza enyanya z’omuhigo mubi gw’omwana wabo banabe bali bacibarhuza omuzigo muzirho. Obo burhali buzirho Yehova alonzize bacibarhuze.​—Rm. 14:12.

13. Gurhi omubusi ashinganine ajire erhi akaba omwana wage arhôzire omuhigo mubi?

¹³ Gurhi wakarhibamwo obo buzirho? Ohugûkwe oku Yehova arhuhîre rhweshi oluhuma lw’okucishoga. Analeke ngasi muntu acirhôlere omuhigo gwage yene. Ogo muhigo guhiziremwo okucishoga erhi amukolera erhi nanga. Yehova amanyire oku orhaba mubusi mwimana; co cirhumire alonzize kone ojire ebi wakanahasha. Omwana wawe ye wakatumuzibwa lugenda omuhigo arhôzire, ci arhali we. (Mig. 20:11) Ciru akaba ntyo, nkaba wanagendekera warhanya oku magosa wajijire nka mubusi. Akaba ntyo kobiri, okabwira Yehova oku oli waciyumva n’okumuhûna obwonjo. Amanyire oku orhakahash’igalula akasanzi enyuma n’okushanja ebyagezire. Na kandi, arhakakuhûna ocîke omwana wawe ly’arhasarulaga ebi ahinzire. Okengere oku erhi omwana wawe akajira okwage koshi ly’agalukira Yehova, Yehova anaba mubidu okumuyankirira.​—Lk. 15:18-20.

14. Bulya gurhi okucitumuza okurhalusire olugero buba buzirho rhushinganine rhurhibe?

¹⁴ Okucitumuza okurhalusire olugero. Erhi rhwakajira ecaha, biyumvikine oku rhwanacitumuza. Cikone, okucitumuza okurhalusire olugero bo buzirho Yehova arhalonzizi rhubarhule ciru n’ehitya. Obo buli buzirho rhugwasirwe rhurhibe. Gurhi rhwakamanyamwo erhi rhuli rhwacitumuza okurhalusire olugero? Erhi akaba rhwahungamire ecaha cirhu, rhwaciyunjuzize, rhunali rhwarhôla emihigo lyo rhuyaka okushubirira eco caha, rhwanalangalira oku Yehova arhubabalire. (Ebj. 3:19) Enyuma z’okujira ebyo bintu byoshi, Yehova arhalonza rhugendekere rhwacitumuza. Aba amanyire oku okugendekera rhwacitumuza kwanarhulerhera amazibu. (Enna. 31:10) Erhi rhwakababala  okurhalusire olugero, rhwanarhama omu kamashigwe kirhu k’obuzine.​—2 Kr. 2:7.

15. Bici byakakurhabala ly’oleka okucitumuza okurhalusire olugero? (1 Yowane 3:19, 20) (Olole n’enfoto.)

¹⁵ Gurhi wakarhibamwo obo buzirho? Erhi wakagendekera wacitumuza okurhalusire olugero, osegeze obwenge “obwonjo bw’ebyaha” burhenga emwa Nnâmahanga. (Enna. 130:4) Erhi ababalira abaciyunjuzize okunali, alaganyize ntya: ‘Ntakacikengera ebyaha byabo.’ (Yer. 31:34) Oko kuli kuderha oku enyuma z’okukubabalira, Yehova arhakacikutumuza ciru n’ehitya ebyaha wajiraga omu mango gageraga. Co cirhumire, orharhanyagya oku amalehe gadwirhwe n’ebyaha byawe gayerekine oku Yehova arhakubabaliraga. Orhanacibêraga burhe bulya amagosa wajiraga amango gagerage ganarhuma orhajira binji ene omu mukolo gwage. Yehova arhagendekera arhanya oku byaha byawe, nawe orhashinganini ojire ntyo.​—Osome 1 Yowane 3:19, 20.

16. Rhwe nka balibisi, bici rhugwasirwe rhuhugûkwe?

¹⁶ Amango rhuli rhwalibirha akamashigwe kirhu k’obuzine, rhugwasirwe ‘rhulibirhe lyo rhuhâbwa oluhembo.’ (1 Kr. 9:24) Rhwanajira ntyo erhi akaba rhuhugûsirwe olubero egarhi k’emizigo rhugwasirwe rhubarhule n’obuzirho rhugwasirwe rhurhibe. Mw’eci cigabi, rhwaganirire nyiganyo nsungunu zone z’ebi rhugwasirwe rhubarhule n’ebi rhugwasirwe rhurhibe. Cikone hali ezindi nyiganyo. Yezu adesire oku ‘emirhima yirhu yanazidoherwa oku madinye [okulya okurhalusire olugero] n’endalwe n’omu ntanya z’obu bulamu.’ (Lk. 21:34, Mashi Bible) Olo lwandiko n’agandi, ganakurhabala omanye empindulo wakajira amango oli walibirha akamashigwe k’obuzine.

17. Bulya gurhi rhwakayemera n’obwalagale oku rhwahima akamashigwe k’obuzine?

¹⁷ Rhwanayemera n’obwalagale oku rhwahima akamashigwe kirhu k’obuzine bulya Yehova arhuha emisi rhulagirireko. (Iz. 40:29-31) Co cirhumire, orhashubaga amagulu! Oyige olwiganyo lw’entumwa Paulo, wajiraga okwage koshi ly’ahâbwa oluhembo lwal’ihizirwe embere zage. (Fl. 3:13, 14) Nta muntu wakalibirha ako kamashigwe ahali hawe, cikone kugerera oburhabale bwa Yehova wanahash’ilibirha kuhika e buzinda. Yehova anakurhabala ly’obarhula emizigo yawe n’okurhiba obuzirho burhali bwa bulagirire. (Enna. 68:19) Bulya Yehova ali olunda lwawe, wanahash’ilibirha ako kamashigwe n’obulembedu n’okuhima!