1. Bici byakarhurhabala lyo rhuhikira aha rhwashagalukira okuyiga obulebi bw’Ebibliya?

 MWENE wirhu muguma ociri musole ohamagalwa Ben adesire ntya: “Nsima okuyiga obulebi bw’Ebibliya.” Ka nawe oyemire ntyo? Erhi k’onarhanye oku obulebi bw’Ebibliya buba buzibu okuhugûkwa? Nkaba ciru wanarhanya oku okuyiga obulebi bw’Ebibliya kwanarhamya. Cikone, erhi wakayiga binji lugenda bulya gurhi Yehova ayandikisize ago malebi omu Kanwa kage, wanashanja entanya zawe.

2. Bici rhwaganirira mw’eci cigabi?

² Mw’eci cigabi, rhwaganirira bulya gurhi rhushinganine rhuyige lugenda amalebi g’Ebibliya na gurhi rhwakajiramwo ntyo. Buzinda rhwaganirira malebi abirhi gali omu citabu ca Daniyeli n’okubona gurhi okugahugûkwa kwakarhurhabalamwo ene.

3. Gurhi rhushinganine rhujire erhi akaba rhulonzize rhuhugûkwe obulebi bw’Ebibliya?

³ Rhushinganine rhuhûne oburhabale lyo rhuhugûkwa obulebi bw’Ebibliya. Rhuganirire olu lwiganyo. Orhanye oli walambagirira ahantu orhamanyiri bwinja cikone mwîra wawe muguma muli mwalambagira mwembi amanyire eyo eneo bwinja. Amanyire bwinja ngahi muli na ngahi ngasi ibarabara lijire. Buzira karhinda wanashagaluka okubona oyo mwîra wawe ayemire mugende mwembi! Ko n’oko, Yehova amanyire ngahi rhwahika omu kasanzi rhuli rhwalamamwo na gurhi byaba omu mango gayisha. Co cirhumire lyo rhuhugûkwa obulebi bw’Ebibliya, rhugwasirwe rhube birhohye n’okuhûna Yehova oburhabale.​—Dan. 2:28; 2 Pt. 1:19, 20.

4. Bici byarhumire Yehova ayandikisa malebi manji omu Kanwa kage? (Yeremiya 29:11) (Olole n’enfoto.)

⁴ Aka ngasi mubusi mwinja, Yehova alonzize abana bage babe  n’omwishingo omu mango gayisha. (Osome Yeremiya 29:11.) Cikone lubero n’ababusi boshi bene bantu, Yehova analeba lugenda amango gayisha buzira kucirheba ciru n’ehitya. Ayandikisize malebi manji omu Kanwa kage lyo rhumanya ebintu by’obulagirire byajirikana embere bibe. (Iz. 46:10) Amalebi g’Ebibliya ziba ngalo z’obuzigire kurhenga emwa Larha wirhu w’omu mpingu. Cikone bici byakakuyemeza n’obwalagale oku ebi Ebibliya elebire kobinali byayish’ijirikana?

5. Bici omusole gwakaciyigiriza kugerera ebyahikiraga Max?

⁵ E masomo, emisole yirhu kanji-kanji enabe ezungulusirwe n’abantu baba bakenzire Ebibliya hisungunu erhi barhayikenga ciru n’ehitya. Enderho zabo n’olugenzi lwabo byanarhuma Omuhamirizi ociri musole aba n’akarhinda lugenda obwemere bwage. Rhuganirire ebyahikiraga mwene wirhu muguma ohamagalwa Max. Adesire ntya: “Erhi ndi omu myaka yani y’omushûko, narhondera okucidosa erhi ababusi bani bakag’inyigiriza idîni ly’okuli n’erhi kobinali Ebibliya yalongozibwe n’iroho lya Nnâmahanga.” Gurhi ababusi bage bajijire? Adesire ntya: “Bagendekera barhulirira, ciru akaba manyire oku bal’iyobohire.” Ababusi ba Max bashuza amadoso gage kugerera Ebibliya. Max naye ajijire kantu kalebe. Adesire ntya: “Naciyigiriza obulebi bw’Ebibliya nie nnene nanakaganirira ebi nakag’iyiga haguma n’eyindi misole y’omu cigamba.” Bunguke buhi okujira ntyo kwamudwirhire? Max adesire ntya: “Enyuma z’okujira ntyo, nayemera n’obwalagale oku Ebibliya yalongozibwe n’iroho lya Nnâmahanga!”

6. Gurhi oshinganine ojire erhi akaba ogwerhe akarhinda, na bulya gurhi oshinganine ojire ntyo?

⁶ Aka Max, erhi wakarhondera wacidosa erhi kobinali Ebibliya ebamwo okuli, orhashinganini ocitumuze. Cikone oshinganine ojire kantu kalebe lugenda oko. Akarhinda ko kaba nka ngutu. Erhi yakalekererwa, yanashereza bunyi-bunyi akantu k’engulo ndarhi. Ly’okûla akarhinda koshi-koshi kakashereza obuyemere bwawe, oshinganine ocidose ntya: ‘Ka mba nyemire ebi Ebibliya edesire lugenda akasanzi kayisha?’ Erhi akaba orhamanyiri bwinja ishuzo kwer’idoso, oshinganine oyige amalebi g’Ebibliya gahikirizibwe. Rhuganirire gurhi wakajiramwo ntyo.

7. Lwiganyo luhi Daniyeli ayerekine lugenda oku rhwakayigamwo obulebi? (Daniyeli 12:10) (Olole n’enfoto.)

⁷ Daniyeli ayerekine olwiganyo lwinja lugenda oku rhwakayigamwo obulebi bw’Ebibliya. Akag’iyiga obulebi bw’Ebibliya anagwerhe ecirhumire cinja cimushumize, al’ilonzize amanye okuli. Kandi Daniyeli ali mwirhohye, al’imanyire oku Yehova anarhabale abantu baba bamumanyire banalama kushimbana n’amakanuni gage bahugûkwe obulebi bw’Ebibliya. (Dan. 2:27, 28; osome Daniyeli 12:10.) Daniyeli ayerekine oku ali mwirhohye bulya akag’ilangalira oburhabale bwa Yehova. (Dan. 2:18) Kandi akag’iyiga bwinja-bwinja. Akag’ijira obusagasi omu mandiko galongozibagwa n’iroho gali ho mw’ago mango. (Yer. 25:11, 12; Dan. 9:2) Gurhi wakayigamwo olwiganyo lwa Daniyeli?

8. Bulya gurhi bantu baguma na baguma bayiga obulebi bw’Ebibliya, cikone bici rhushinganine rhujire?

⁸ Okarhanya lugenda ebikushumya oyige obulebi bw’Ebibliya. K’onayige obulebi bw’Ebibliya bulya olonzize bwenene okumanya okuli? Akaba ntyo ko biri, Yehova akurhabala. (Yn. 4:23, 24;  14:16, 17) Bindi bici bishumya abantu bayige obulebi bw’Ebibliya? Bantu Baguma na baguma banajire ntyo bulya balangalire oku babona ebiyerekine oku Ebibliya erhalongozibagwa n’iroho lya Nnâmahanga. Muli ntyo, banarhanye oku okujira ntyo kwabaha ecirhumire cinja c’okucihiriraho amakanuni gabo bo nnene lugenda ebinja n’ebibi n’okulama kushimbana n’ago makanuni. Cikone, rhushinganine rhube n’ecirhumire cinja cirhushumize okuyiga obulebi bw’Ebibliya. Na kandi, hali oborhere bw’obulagirire rhulagirireko lyo rhuhugûkwa obulebi bw’Ebibliya.

9. Borhere buhi rhulagirireko lyo rhuhugûkwa obulebi bw’Ebibliya? Ohugûle.

⁹ Obe mwirhohye. Yehova alaganyize oku arhabala abantu birhohye. (Yk. 4:6) Co cirhumire rhushinganine rhukamuhûna oburhabale kugerera isala lyo rhuhugûkwa obulebi bw’Ebibliya. Kandi rhugwasirwe rhuyemere oku rhulagirire oku burhabale bwa mushizi mwirhonzi na mwikubagirwa Yehova ali akolesa ly’arhuha ebiryo by’ekiroho omu kasanzi kakwanine. (Lk. 12:42) Yehova arhaba Nnâmahanga wa kavulindi, co cirhumire biyumvikine oku anakolese njira nguma yone ly’arhurhabala rhuhugûkwe enyigirizo ziba omu Kanwa kage.​—1 Kr. 14:33; Ef. 4:4-6.

10. Bici ebyahikiraga Esther bikuyigirizize?

¹⁰ Okayiga bwinja-bwinja. Okacishoga bulebi buguma bukusimisize onabujirire obusagasi. Ntyo ko mwali wirhu muguma ohamagalwa Esther ajijire. Al’ilonzize amanye binji lugenda amalebi galebagwa okubiyerekire okuyisha kwa Masiya. Adesire ntya: “Erhi ngwerhe myaka 15, narhondera okujira obusagasi lyo mbona ebiyerekine n’obwalagale oku obo bulebi kobinali bwayandisirwe embere z’amango ga Yezu.” Ebi ayigaga lugenda Enyanja y’Omunyu [Mer Morte] byamuyemeza n’obwalagale. Acibir’iderha ntya: “Bitabu biguma na biguma muli byo byayandikagwa embere z’amango ga Yezu, co cirhumire amalebi gabamwo gagwasirwe gabe garhenganga emwa Nnâmahanga.” Ayushwire ntya: “Nal’igwasirwe nkasoma kanji-kanji obo bulebi lyo mbuhugûkwa.” Cikone ashagalusire okubona acihanganyire okujira ntyo. Enyuma z’okuyiga kanji-kanji amalebi g’Ebibliya, adesire ntya: “Nakacibonera n’obwalagale oku ebi Ebibliya edesire biba by’okuli!”

11. Bunguke buhi rhuba nabo omu kuciyemeza rhwe nnene oku Ebibliya eba y’okuli?

¹¹ Erhi rhubona gurhi bulebi buguma na buguma buli omu Kanwa ka Nnâmahanga bwahikirire, rhunalangalire Yehova bwenene n’okulangalira obulongozi arhuha. Kandi, amalebi g’Ebibliya ganarhurhabale lyo rhuba n’obulangalire bwinja lugenda amango gayisha, ciru akaba ene rhuli rhwalwisa mazibu gahi. Lekagi rhuganirire kwa bofofi malebi abirhi gayandikagwa na Daniyeli gali gahikirira ene. Okugahugûkwa kwanarhurhabala lyo rhurhôla emihigo minja.

12. Bici enshando z’“ecuma cigushe haguma n’ibumba” zishushanyize? (Daniyeli 2:41-43)

¹² Osome Daniyeli 2:41-43. Omu cilorho Daniyeli ahugûliraga mwami Nebukadnezari, enshando z’ensalamu Mwami abonaga zal’ijijirwe n’“ecuma cigushe haguma n’ibumba.” Omu kushushanya obo bulebi n’agandi malebi gali omu citabu ca Daniyeli n’ec’Amafulûlo, rhwanaderha oku ezo nshando zishushanyize omulungano  gwa Angleterre na Amérique, burhegesi bukulu bw’igulu lyoshi ene. Lugenda obo burhegesi bw’igulu lyoshi, Daniyeli adesire oku ‘obwola bwami bwayishiba lunda luguma buzibu n’olundi lunda bube bulembagusire.’ Bulya gurhi lunda luguma bwaba bulembagusire? Bulya abantu barhalengeriri, bashushanyizibwe n’ibumba, banazambanye obuhashe bw’obo burhegesi bw’okukola n’emisi eri nka cuma. b

13. Nyigirizo zihi z’obulagirire rhuciyigirizize omu kuhugûkwa obo bulebi?

¹³ Amahugûlo ga Daniyeli lugenda ensalamu y’omu cilorho, ci bwenene enshando zayo, garhuyigirizize nyigirizo nyinji z’obulagirire. Burhangiriza, Oburhegesi Bukulu bw’Igulu Lyoshi bwa Angleterre na Amérique bwayerekine emisi yabo omu njira ndebe. Kwa lwiganyo, bwajijire cigabi cinene omu kuhima Ivita lya Burhanzi ly’Igulu n’Ivita lya Kabirhi ly’Igulu. Cikone, obo burhegesi bukulu bw’igulu lyoshi bwazambanyibwe bwanagendekera bwazambanyibwa n’akavulindi egarhi ka bacikala babo. Bwa kabirhi, ogo mulungano gwa Angleterre na Amérique bo burhegesi bukulu bw’igulu lyoshi buzinda bwarhegeka embere Obwami bwa Nnâmahanga bushereze amarhegesi goshi ga bene bantu. Ciru agandi mashanja gakahagalika obo Burhegesi Bukulu bw’Igulu Lyoshi bwa Angleterre na Amérique, garhakarhôla enafasi yabo. Rhumanyire ntyo bulya “ibuye” lishushanyize Obwami bwa Nnâmahanga lyavunyungula ezo nshando, ko kuderha ecigabi c’eyo nsalamu cishushanyize omulungano gwa Angleterre na Amérique.​—Dan. 2:34, 35, 44, 45.

14. Gurhi okuhugûkwa obo bulebi lugenda enshando z’ecuma n’ibumba kwakarhurhabalamwo lyo rhurhôla emihigo y’obwenge?

¹⁴ K’oyemire n’obwalagale oku obulebi bwa Daniyeli lugenda enshando z’ecuma n’ibumba buli b’okuli? Erhi akaba oyemire ntyo, oko kwanabonekana kugerera akalamo kawe. Orhakasegeza obwenge oku kulonza ensaranga nyinji erhi kuba na birugu binji bwenene by’omubiri bulya omanyire oku hano hofi-hofi er’igulu libi lyasherezibwa. (Lk. 12:16-21; 1 Yn. 2:15-17) Okuhugûkwa obo bulebi kandi kwanakurhabala obone obulagirire bw’omukolo gw’okuhubiri n’okuyigiriza. (Mt. 6:33; 28:18-20) Obu rhwamayusa rhwayiga kwa bofofi obo bulebi, wanacidosa er’idoso, ‘K’emihigo ntôla eyerekine oku nyemire n’obwalagale oku hano hofi-hofi Obwami bwa Nnâmahanga bwashereza amarhegesi goshi ga bene bantu?’

15. Ene, “omwami w’e mwené” ye ndi n’“omwami w’e mukondwe” ye ndi? (Daniyeli 11:40)

¹⁵ Osome Daniyeli 11:40. Ecitabu ca Daniyeli cigabi 11 ciganirire bami babirhi, erhi marhegesi abirhi g’epolitike, bali balwira okurhegeka igulu. Omu kushushanya obo bulebi n’agandi malebi gali omu Bibliya, rhwanahugûkwa oku “omwami w’e mwené” ye Russie n’ebindi bihugo bimulunzire okuboko “n’omwami w’e mukondwe” bo Burhegesi Bukulu bw’Igulu Lyoshi bwa Angleterre na Amérique. c

16. Mazibu gahi abakozi ba Nnâmahanga balamire omu burhegesi bw’“omwami w’e mwené” bali balwisa?

¹⁶ Abakozi ba Nnâmahanga balamire omu burhegesi bw’“omwami w’e mwené” bali balibuzibwa n’oyo mwami omu njira y’obwalagale. Bahamirizi baguma baguma bashurhagwirwe banakwebwa omu prizo erhi buyemere bwabo burhuma. Ebijiro by’“omwami w’e mwené” birhali byayobohya bene wirhu cikone biri byarhuma baseza obuyemere bwabo. Bulya gurhi? Bulya bene wirhu bamanyire oku okulibuzibwa kw’abakozi ba Nnâmahanga kuli kwahikiriza obulebi  buli omu citabu ca Daniyeli. d (Dan. 11:41) Okumanya ntyo kwanarhurhabala rhugendekere rhwazibuhya obulangalire bwirhu n’okubêra bishwekerezi kuli Yehova.

17. Mazibu gahi abakozi ba Nnâmahanga barhimanine n’ago idako ly’oburhegesi bw’“omwami w’e mukondwe”?

¹⁷ Omu mango ga mîra, “omwami w’e mukondwe” naye alibuzize abakozi ba Yehova omu njira y’obwalagale. Kwa lwiganyo, oko kwabire omu mango g’Ivita lya Burhanzi ly’Igulu n’omu mango g’Ivita lya Kabirhi ly’Igulu erhi bene wirhu banji bahebwa omu prizo enyanya z’olwimango lwabo lw’okurhaja omu by’ivita na Bahamirizi baguma na baguma baciri bana bahîvwa oku masomo enyanya z’okulahira okulamusa idarapo. Cikone, omu makumi g’emyaka gazind’igigera, obwishwekerezi bw’abakozi ba Yehova balamire omu burhegesi bw’oyo mwami w’e mukondwe bwarhangwirwe omu zindi njira zirhali z’obwalagale. Kwa lwiganyo, omu makampanye g’obulondôzi, Omukristu anashumibwa okulunga okuboko cama cilebe c’epolitike erhi ngereke [candidat] mulebe. Nkaba arhakahikira aha acagula, cikone analunga okuboko luhande lulebe  omu bwenge bwage n’omu murhima gwage. Kuli kwa bulagirire bwenene rhugendekere rhwalahira okulunga okuboko oluhande loshi-loshi omu by’epolitike arhali kugerera ebijiro birhu byone cikone kandi kugerera entanya zirhu n’oku rhuli rhwaciyumva!​—Yn. 15:18, 19; 18:36.

18. Gurhi entambala egarhi k’“omwami w’e mwené” n’“omwami w’e mukondwe” erhuma rhwaciyumva? (Olole n’enfoto.)

¹⁸ Abarhagwerhi buyemere omu bulebi bw’Ebibliya banahangayika okulushire olugero omu kubona “omwami w’e mukondwe” ‘ali alwisa’ oyo ‘mwami w’e mwené.’ (Dan. 11:40) Abo bami bombi bagwerhe ebikolanwa bidarhi by’okulwa ivita byakashereza ngasi buzine okw’igulu. Cikone rhumanyire oku Yehova arhakaleka bibe ntyo. (Iz. 45:18) Ahali h’okurhuyobohya, enshombo ekarhi k’“omwami w’e mwené” n’“omwami w’e mukondwe” ezibuhize obuyemere bwirhu. Eyerekine n’obwalagale oku obuzinda bw’er’igulu libi buli hofi.

19. Bici rhushinganine rhumanye lugenda obulebi bw’Ebibliya?

¹⁹ Rhurhamanyiri gurhi bulebi buguma na buguma bw’Ebibliya bwayish’ihikirizibwamwo. Ciru n’omulebi Daniyeli arhamanyaga amahugûlo ga ngasi kantu ayandikaga. (Dan. 12:8, 9) Cikone arhali mpu bulya rhurhahugûsirwi bulebi bulebe kone ko kuderha oku obo bulebi burhahikirire. Buzira karhinda, rhwanalangalira oku Yehova arhufulûlira ebi rhulagirire oku kumanya omu kasanzi kakwanine, nk’oku anajiraga omu mango ga mîra.​—Am. 3:7.

20. Malebi gahi g’Ebibliya g’okushagalusa gahikirira hano hofi-hofi, na bici rhushinganine rhugendekere rhwajira?

²⁰ ‘Omurhûla n’akalembe’ byayish’iyalagazibwa. (1 Ts. 5:3) Enyuma z’aho, amarhegesi g’epolitike g’er’igulu gayish’ihindukira idîni ly’obunywesi n’okulishereza. (Maf. 17:16, 17) Buzinda bay’ishirhera abakozi ba Nnâmahanga. (Eze. 38:18, 19) Ebyo byayish’ilongoza okw’ivita lya Harmagedoni. (Maf. 16:14, 16) Rhwanayemera n’obwalagale oku ebyo byajirikana hano hofi-hofi. Embere bijirikane, lekagi rhuyerese Larha wirhu w’omu mpingu w’obuzigire oku rhumuvuzire omunkwa omu kusegeza obwenge oku bulebi bw’Ebibliya n’omu kurhabala abandi nabo bajire ntyo.