1. Bici byarhumaga Abababiloni basimisibwa n’omulebi Daniyeli?

 OMULEBI Daniyeli gwali musole erhi Abababiloni bamugwarha mpira omu mango g’ivita n’okumuhêka kulî bwenene n’ecihugo cage. Cikone ciru akaba Daniyeli aciri musole asimisa bwenene abamugwarhaga mpira. Babona “iranga” lya Daniyeli, ko kuderha oku ‘arhalikwo ishembo, alisolehire’ n’oku al’irhenzire omu mulala gw’obulagirire. (1 Sam. 16:7) Enyanya z’oko, Abababiloni bamukomereza ly’akola omu nyumpa ya mwami.​—Dan. 1:3, 4, 6.

2. Gurhi Yehova akag’ibona Daniyeli? (Ezekiyeli 14:14)

² Yehova al’izigire Daniyeli, arhali enyanya z’iranga lyage linja erhi enyanya z’emikolo y’obulagirire akag’ijira omu nyumpa ya mwami, cikone enyanya z’amorhere al’igwerhe. Kobinali, erhi Yehova aderha oku Daniyeli ali aka Nuhu na Ayubu, nkaba Daniyeli acigwerhe myaka 20 yone. Enyanya z’ago morhere ogo musole gwagwerhe, Yehova akag’imubona oku ali mushinganyanya aka Nuhu na Ayubu, balume bamukoleraga n’obwishwekerezi omu myaka minji. (Murh. 5:32; 6:9, 10; Ayu. 42:16, 17; osome Ezekiyeli 14:14.) Na Yehova agendekire azigira Daniyeli omu nsiku zoshi z’akalamo kage kalî na kago-kago.​—Dan. 10:11, 19.

3. Bici rhwaganirira mw’eci cigabi?

³ Mw’eci cigabi, rhwaganirira morhere abirhi g’omu morhere Daniyeli agwerhe garhumaga Yehova amubona oku ali wa ngulo ndarhi. Burhangiriza, rhwaganirira ngasi buguma bw’ago morhere n’okubona hali zihi abuyerekinemwo. Enyuma z’aho, rhwabona bici byarhabire Daniyeli ly’aba n’ago morhere. Buzinda, rhwaganirira gurhi rhwakayigamwo olwiganyo lwage. Ciru akaba eci cigabi cayandisirwe lyo cirhabala emisole, rhweshi rhwanaciyigiriza kugerera olwiganyo lwa Daniyeli.

4. Gurhi Daniyeli ayerekinemwo oburhwali? Ohâne olwiganyo.

⁴ Abantu b’oburhwali banayoboha, cikone barhaleka obo boba burhume barhajira ebintu binja. Daniyeli gwali musole gwa burhwali bwenene. Rhuganirire hali ibirhi ayerekinemwo oburhwali.  Bibonekine oku arhanzir’iyerekana oburhwali hofi myaka ibirhi enyuma z’Abababiloni okushereza evile y’e Yeruzalemu. Mwami Nebukadnezari w’e Babiloni alorha ecilorho c’okuyobohya lugenda ensalamu nnenene. Ayobohya abalume bage b’obwenge boshi, kuhiramwo na Daniyeli, oku abaniga erhi akaba barhamubwiziri ecilorho cage n’amahugûlo gaco. (Dan. 2:3-5) Daniyeli al’igwasirwe ajire kantu kalebe duba-duba; lubero n’oko, bantu banji bakahezize obuzine. Daniyeli “akanya aja emunda mwami ali amuhûna mpu amuhe akasanzi lyo ahashihugulira mwami ecilôrho cage.” (Dan. 2:16) Oko kwal’ihûnyire oburhwali n’obuyemere. Nta mwanzi gw’Ebibliya guyerekine oku Daniyeli ali amahugûla ebilôrho embere z’aho. Abwira abîra bage Abababiloni bahâga izino lya Shadraki, Meshaki, na Abednego, “bahune obonjo bwa Nyamuzinda w’empingu amanyise elyo ihwe.” (Dan. 2:18) Yehova ashuza ago masala. Kugerera oburhabale bwage, Daniyeli ahugûla ecilorho ca Nebukadnezari. Daniyeli n’abîra bage barhacihezagya obuzine bwabo.

5. Yindi hali ehi Daniyeli ayerekinemwo oburhwali?

⁵ Kasanzi kalebe enyuma za Daniyeli okuhugûla eco cilorho lugenda ensalamu nnenene, oburhwali bwage bwacib’irhangulwa. Nebukadnezari alorha ecindi cilôrho c’okuyobohya. Eco cilôrho cal’iyerekire enduluma y’omurhi. Daniyeli amanyisa mwami n’oburhwali amahugûlo g’eco cilôrho, ciru anamubwira oku akasirahire n’okurhenzibwa oku ntebe y’obwami kasanzi kalebe. (Dan. 4:25) Mwami akabwine nk’ogo mwanzi Daniyeli amubwiraga bwali bugoma akanarhegesire oku Daniyeli anigwe. Ciru akaba ntyo, Daniyeli ayerekana oburhwali anamuhugûlira eco cilôrho.

6. Nkaba bici byarhabire Daniyeli ly’aba n’oburhwali?

⁶ Nkaba bici byarhabire Daniyeli ly’aba n’oburhwali omu kalamo kage koshi? Amango Daniyeli ali musole, kobinali aciyigirizize kugerera olwiganyo lw’ishe na nnina. Buzira karhinda, barhumikire obulongozi Yehova ahaga ababusi Baisraheli, banakayigiriza omwana wabo Irhegeko lya Nnâmahanga. (Lush. 6:6-9) Daniyeli al’imanyire ebi Irhegeko lyal’iyimangireko, nk’Amarhegeko Ikumi, na kandi al’imanyire binji lugenda ebi Omuisraheli akalire n’ebi arhakalire. b (Lev. 11:4-8; Dan. 1:8, 11-13) Kandi Daniyeli al’imanyire omwanzi guganirire abantu ba  Nnâmahanga anal’imanyire ebyabahikiraga erhi babula bulama kushimbana n’amakanuni ga Yehova. (Dan. 9:10, 11) Ebyahikiraga Daniyeli omu kalamo kage byamuyemezize n’obwalagale oku Yehova na bamalahika bage b’emisi bakag’imurhabala.​—Dan. 2:19-24; 10:12, 18, 19.

7. Bindi bici byarhabire Daniyeli ly’aba n’oburhwali? (Olole n’enfoto.)

⁷ Daniyeli ayizire amandishi g’abalebi ba Nnâmahanga, kuhiramwo n’obulebi bwa Yeremiya. Kugerera ebyo Daniyeli ayigaga, ahikira aha ahugûkwa oku akasanzi kalîri k’okuhêkwa mpira kw’Abayahudi e Babiloni kali hofi kahwe. (Dan. 9:2) Okubona okuhikirizibwa kw’obulebi bw’Ebibliya kwasezize obulangalire bwa Daniyeli muli Yehova, n’abantu bagwerhe obulangalire busêzire muli Nnâmahanga banaba n’oburhwali bwago-bwago. (Oshushanye n’Abaroma 8:31, 32, 37-39.) N’akantu k’obulagirire bwenene, Daniyeli akag’iyegera Ishe w’omu mpingu kanji-kanji kugerera isala. (Dan. 6:10) Akag’ihungama ebyaha byage emwa Yehova n’okumubwira oku akag’iciyumva. Kandi Daniyeli akag’ihûna Yehova oburhabale. (Dan. 9:4, 5, 19) Daniyeli ali muntu akirhu, co cirhumire arhaburhanagwa oburhwali. Lubero n’oko, okuyiga, okusalira, n’okulangalira Yehova ko kwamurhabire abe n’obo borhere.

8. Gurhi rhwakajira lyo rhuba n’oburhwali?

⁸ Lyo rhuba n’oburhwali, bici rhushinganine rhujire? Ababusi birhu banarhuha omurhima rhube n’oburhwali, cikone rhurhakayima obo borhere kurhenga oku babusi birhu. Okuba n’oburhwali kuba nka kuciyigiriza obulenga buhyahya. Njira nguma wakamanyamwo obo bulenga bwinja-bwinja, kuli kulolereza ebi omwigiriza wawe ali ajira na buzinda oyige olwiganyo lwage. Ko n’oko, rhunaciyigirize okuba n’oburhwali omu kulolereza bwinja gurhi abandi bali bayerekanamwo obo borhere n’okuyiga olwiganyo lwabo. Bicigi rhuciyigirizize kugerera olwiganyo lwa Daniyeli? Akage, rhushinganine rhumanye Akanwa ka Nnâmahanga bwinja. Rhugwasirwe rhujire obwîra bwa hofi-hofi haguma na Yehova omu kukamuganiza kanji-kanji n’okumubwira oku rhuli rhwaciyumva koshi. Kandi rhushinganine rhulangalire Yehova n’okuyemera n’obwalagale oku arhurhabala ensiku zoshi. Erhi rhwakajira ntyo, rhwanaba n’oburhwali erhi obuyemere bwirhu bwakarhangulwa.

9. Bunguke buhi rhwakaba nabo omu kuba n’oburhwali?

⁹ Okuba n’oburhwali kunarhulerhere obunguke omu njira nyinji. Rhuganirire ebi Ben acibwinire. Asomeraga oku masomo maguma omu cihugo c’e Allemagne, na kw’ago masomo abantu boshi bal’iyemire oku ebintu kuhinduka byajire byahinduka-hinduka, banakag’ibona oku omwanzi gw’Ebibliya guganirire obulemi luba lulibi kone. Lusiku luguma, Ben ahâbwa oluhya lw’okuyimanga embere z’ababo banafunzi n’okuhugûla bulya gurhi ayemire oku obuzine bwalemirwe. Abaganirira obwemere bwage n’oburhwali. Bunguke buhi oko kwadwirhe? Ben adesire ntya: “Mwalimu wani ayumvirhiza bwinja-bwinja anajira ekopi z’omwanzi nakolesagya lyo mpugûla obwemere bwani, anaha ngasi mwanafunzi ekopi y’ogo mwanzi.” Gurhi ababo banafunzi bajijire? Ben adesire ntya: “Banji mulibo bayumvirhiza ebi naderhaga, banaderha oku banshagalukire.” Nk’oku ebyo Ben acibwinire biyerekine, kanji-kanji abantu b’oburhwali banakengwe n’abandi. Kandi banarhabala abantu b’omurhima mwinja bamanye Yehova. Kobinali, rhugwerhe ebirhumire binja by’okuba n’oburhwali.

10. Obwishwekerezi byo bici?

¹⁰ Omu Bibliya, oluderho lw’Ecihabraniya lwahindwirwe “bwishwekerezi,” erhi “buzigire bwishwekerezi,” luhânyire entanya z’okucishwekera kuli muntu mulebe omu njira y’obuzigire na kanji-kanji lunakolesibwe omu kuganirira obuzigire Nnâmahanga ayeresa abakozi bage. Kandi olo luderho lo n’olo lukolesibwe omu kuganirira obuzigire abakozi ba Nnâmahanga bayeresanya bone na nnene. (2 Sam. 9:6, 7) Obwishwekerezi  bwanagendekera bwazibuha oku akasanzi kali kagera. Rhuganirire gurhi obwishwekerezi bwa Daniyeli bwagendekire bwazibuha.

11. Irhangulo lihi ly’obwishwekerezi Daniyeli arhimanine nalyo omu myaka yage y’obushosi? (Olole enfoto eri oku cijalada c’eyi gazeti.)

¹¹ Obwishwekerezi bwa Daniyeli kuli Yehova bwarhangwirwe omu kalamo kage koshi. Cikone irhangulo liguma ly’omu marhangulo gage madarhi bwenene lyamuhikire erhi agwerhe myaka 90 na kulusha. Mw’ago mango, evile y’e Babiloni yali yamagwarhwa n’Abamedi n’Abapersi yanakag’irhegekwa na Mwami Dariyusi. Abakozi b’omu nyumpa y’obwami bal’ishombire Daniyeli barhanakag’ikenga Nnâmahanga akag’iharamya. Enyanya z’oko, bajirira Daniyeli ekomplo ly’anigwa. Bashumya mwami asinye irhegeko lyakarhumire Daniyeli ayerekana erhi abêra mwishwekerezi kuli Nnâmahanga wage erhi kuli mwami. Ebi Daniyeli al’igwasirwe ajire kwali kuyerekana obwishwekerezi bwage kuli mwami n’okujira ak’abandi bantu boshi omu kuleka okushenga Yehova nsiku 30. Daniyeli arhayemeraga okuleka obwishwekerezi bwage kuli Yehova. N’enyanya z’oko akwebwa omu bulumba bw’entale. Cikone Yehova ahemba obwishwekerezi bwa Daniyeli omu kumuciza kw’ezo ntale. (Dan. 6:12-15, 20-22) Bici byakarhurhabala lyo rhuba n’obwishwekerezi busêzire kuli Yehova nk’obu Daniyeli ayerekanaga?

12. Bici byarhabire Daniyeli ly’agendekera abêra mwishwekerezi kuli Yehova?

¹² Nk’oku rhwaganiriraga embere, lyo rhuba bishwekerezi kuli Yehova rhugwasirwe rhube n’obuzigire busêzire kuli ye. Daniyeli agendekire aba mwishwekerezi kuli Yehova Ishe w’omu mpingu bulya al’imuzigire bwenene. Buzira karhinda Daniyeli abire n’obuzigire bwa ntyo omu kurhanya oku morhere ga Yehova n’oku njira akag’igayerekanamwo. (Dan. 9:4) Kandi Daniyeli akag’irhanya bwenene oku bintu binja byoshi Yehova amujirire ye n’olubaga lwage, anali wa kuvuga omunkwa.​—Dan. 2:20-23; 9:15, 16.

13. (a) Marhangulo gahi g’obwishwekerezi emisole yirhu elwisa? Ohâne olwiganyo. (Olole n’enfoto.) (b) Nk’oku biyerekinwe omu video, gurhi wakashuza erhi bakakudosa erhi Abahamirizi ba Yehova banalunge okuboko abalume bajira ecijiro c’obuhya n’ababo balume erhi abakazi n’ababo bakazi?

¹³ Aka Daniyeli, emisole yirhu eba ezungulusirwe n’abantu barhakenga Yehova n’amakanuni gage. Abantu ba ntyo banashomba ngasi muntu ogwerhe obwemere buli lubero n’obwabo. Ciru baguma na baguma banalonze okuseza emisole yirhu eleke obwishwekerezi bwabo  kuli Yehova. Kwa lwiganyo, rhulole ebyahikiraga musole muguma ohamagalwa Graeme, olama omu cihugo c’e Australie. Alwisize akanga kazibu erhi ali oku masomo g’enyanya. Mwalimu adosa abanafunzi boshi omw’isomo gurhi bakajira erhi mwîra mulebe akababwira oku anajire ecijiro c’obuhya n’ababo balume erhi n’ababo bakazi. Mwalimu aderha oku abanafunzi boshi omw’isomo bakalonza okulunga okuboko oyo mwîra omu kulama akalamo ka ntyo bayimange lunda luguma omw’isomo; n’abarhakalonza, bayimange olundi lunda. Graeme adesire ntya: “Abanafunzi boshi omw’isomo bayimanga olunda lw’abalunzire okuboko ako kalamo ka ntyo. Nie n’owundi Muhamirizi rhwene rhwayimanzire olwirhu lunda.” Ebyabire enyuma z’aho byarhangula kobinali obwishwekerezi bwa Graeme kuli Yehova. Adesire ntya: “Omu yindi nsa nguma er’isomo lyajiraga, abirhu banafunzi, cirhu na mwalimu, barhushekera n’okurhujacira. Najira okwani koshi lyo mpalira obwemere bwani omu njira y’obutûdu na ya lugero, cikone barhayumvirhizagya ciru n’akanwa kaguma mw’ebi nababwiraga.” Gurhi Graeme aciyumvire enyuma z’okuhima er’irhangulo ly’obwishwekerezi? Adesire ntya: “Ntasimaga erhi abirhu banafunzi banjacira, cikone naciyumva nshagalusire bwenene bulya nabezire mwishwekerezi kuli Yehova nanahalira obwemere bwani.” c

14. Njira nguma ehi yakarhurhabala rhuhige okugendekera rhwabêra bishwekerezi kuli Yehova?

¹⁴ Rhwanahiga okugendekera rhwabêra bishwekerezi kuli Yehova erhi rhwakamuzigira bwenene, aka Daniyeli. Rhunabe n’obuzigire bwa ntyo omu kuciyigiriza lugenda amorhere ga Yehova. Kwa lwiganyo, rhwanayiga lugenda ebintu alemire. (Rm. 1:20) Okalonza okusêza bwenene obuzigire bwawe kuli Yehova n’okumukenga bwenene, wanasoma ebigabi byofofi biri omu mwanzi gudesire; “K’aka Kantu Kone Kacijiraga?” erhi olole amavideo galimwo. Kandi wanasoma emyanzi eri omu broshire edesire Uhai​—Ulitokana na Muumba? n’edesire Vitu Vyenye Uzima Vilianza Namna Gani?​—Maulizo 5 ya Kujiuliza. Olole ebi mwali wirhu muguma ociri musole w’omu cihugo c’e Danemark ohamagalwa Esther adesire lugenda ebyo bicapo: “Enjira y’okurhanya ekolesibwe mw’ebyo bicapo eba nyinja bwenene. Ezo broshire zirhakubwiziri ebi wayemera; ziyerekine kone emyanzi y’okuli n’okukuleka wene orhôle omuhigo.” Ben, rhwaganiriraga embere, adesire ntya: “Emyanzi erimwo yazibuhize obuyemere bwani. Yanyemezize n’obwalagale oku Nnâmahanga ye walemaga obuzine.” Enyuma z’okuyiga eyo myanzi, nkaba wanayemera ezi nderho z’Ebibliya: “Nnawirhu Nyamuzinda, oshinganine ohâbwe irenge, n’obukuze, n’obuhashe, bulya we walemaga ebintu byoshi, n’oku bulonza bwawe byarhondêraga okubâho byanalemwa.”​—Maf. 4:11. d

15. Yindi njira ehi rhwakajiramwo obwîra bwa hofi-hofi haguma na Yehova?

¹⁵ Eyindi njira yakarhurhabala rhube n’obuzigire busêzire kuli Yehova, kuli kuyiga akalamo k’Omugala, Yezu. Mwali wirhu muguma ociri musole ohamagalwa Samira, olama omu cihugo c’e Allemagne, ajijire ntyo. Adesire ntya: “Nahikire aha namanya Yehova bwinja kugerera Yezu.” Amango Samira aciri mwana, al’igwerhe amazibu g’okuhugûkwa gurhi Yehova akabamwo mwîra wage na gurhi akamuzigiramwo. Cikone ahasha okuhugûkwa gurhi Yezu akag’iciyumva. Ayushwire ntya: “Nazigira Yezu bulya akag’iyegera abantu anal’izigire abana.” Oku agendekire ayiga binji lugenda Yezu, ko anagendekire ajira obwîra busêzire haguma na Yehova. Bulya gurhi? Adesire ntya: “Nahugûkwa bunyi-bunyi oku Yezu anayige kwa bwimana olwiganyo lw’Ishe. Baba bashushine bwenene.  Nahugûkwa oku eci ciri cirhumire ciguma c’omu bintu byarhumaga Yehova arhuma Yezu hanw’igulu, ly’ahashisa bene bantu bamanye Yehova bwinja.” (Yn. 14:9) Erhi akaba olonzize okuseza obwîra bwawe haguma na Yehova, wanacihiriraho akasanzi k’okuyiga ebi wakanahasha byoshi lugenda Yezu. Erhi wakajira ntyo, obuzigire bwawe kuli Yehova n’obwishwekerezi bwawe kuli ye bwanayushuka.

16. Bunguke buhi rhuba nabo omu kuba bishwekerezi? (Ennanga 18:25; Mikeyo 6:8)

¹⁶ Abantu baba bishwekerezi kanji-kanji banajire obwîra busêzire haguma n’abandi bunagendekera nsiku nyinji. (Rut. 1:14-17) Kandi, abantu baba bishwekerezi kuli Yehova baba bagwerhe omurhûla gw’ekandalala. Bulya gurhi? Bulya Yehova alaganyize oku aba mwishwekerezi oku bantu bali bishwekerezi kuli ye. (Osome Ennanga 18:25; Mikeyo 6:8.) Orhanye k’oku, Omulemi ogala byoshi aba alonzize okujira obwîra bwa hofi-hofi haguma na nirhu! N’erhi rhwakaba rhugwerhe obwîra bwa hofi-hofi haguma na Yehova, nta marhangulo gakarhunanula kuli ye, nta muntu orhuhagalika wakarhunanula kuli ye, ciru n’olufû lonene lurhakarhunanula kuli ye. (Dan. 12:13; Lk. 20:37, 38; Rm. 8:38, 39) Kuli kwa bulagirire bwenene rhuyige olwiganyo lwa Daniyeli n’okubêra bishwekerezi kuli Yehova!

17-18. Bindi bici rhwakaciyigiriza kugerera olwiganyo lwa Daniyeli?

¹⁷ Mw’eci cigabi, rhwaganirire morhere abirhi gone ga Daniyeli. Cikone hali bindi binji bwenene rhwakaciyigiriza kugerera olwiganyo lwage. Kwa lwiganyo, Yehova ayeresire Daniyeli bibonekerezi binji n’ebilôrho, anamuha obuhashe bw’okuhugûla emyanzi y’obulebi. Malebi manji muli ago malebi gahikirizibwe. Agandi malebi gayerekine binji lugenda ebyajirikana amango gayisha byayish’ihuma oku ngasi muntu hanw’igulu.

¹⁸ Omu cigabi cikulire, rhwaganirira malebi abirhi gayandikagwa na Daniyeli. Okuhugûkwa ago malebi kwanarhurhabala rhweshi, rhube misole erhi bashosi, lyo rhurhôla emihigo y’obwenge ene. Kandi ago malebi ganazibuhya oburhwali bwirhu n’obwishwekerezi bwirhu lyo rhuba rhucirheganyize okulwisa amarhangulo gali embere.