1. Bulya gurhi oshagalukira abantu baba ba kulembera?

 RHWESHI rhunashagalukire abantu baba ba kulembera. Bulya gurhi rhushagalukira abantu ba ntyo? Rhunakenge abantu balinda kantu kalebe buzira kuvunika omurhima. Rhunashagaluke erhi abandi barhulembera amango rhwamajira amagosa. Kandi rhushagalusire okubona mwalimu wirhu w’Ebibliya arhulembire amango kwali kuzibu kuli rhwe okuyiga nyigirizo ndebe z’Ebibliya, okuziyemera, erhi okuzikolesa omu kalamo kirhu. N’akantu k’obulagirire, rhuvuzire omunkwa bwenene okubona Yehova Nnâmahanga anarhulembere!​—Rm. 2:4.

2. Omu hali zihi kwakaba kuzibu kuli rhwe okuba ba kulembera?

² Ciru akaba rhunashagalukire abantu balembera, rhwanabona oku ensiku zoshi kurhaba kulembu kuli rhwe okulembera. Kwa lwiganyo, kwanaba kuzibu kuli rhwe okugendekera rhwarhulirira erhi akaba emituga elundamine omw’ibarabara, ci bwenene erhi akaba rhwacerirwe. Nkaba rhwanaba burhe bwenene erhi abandi bakarhugayisa. Kandi, hali amango kwakaba kuzibu kuli rhwe okugendekera rhwalinda igulu lihyahya Yehova arhulaganyize. K’olonzize obe wa kulembera bwenene? Mw’eci cigabi, rhwaganirira okulembera ko kuderha gurhi na bulya gurhi kuli kwa bulagirire bwenene. Kandi, rhwaganirira ebyakarhurhabala lyo rhuyerekana bwenene oborhere bw’okulembera.

3. Gurhi omuntu olembera ajira erhi bakamugayisa?

³ Rhuganirire njira ini rhwakayerekanamwo oborhere bw’okulembera. Burhangiriza, omuntu olembera arhakunira duba. Anacihangane okugendekera arhulirira n’okurhacihôla amango bamamugayisa erhi amango ahangayisire omu bukengere. Enderho “orhakunira duba” zibonekine burhangiriza omu Bibliya  erhi Yehova ahugûlira Musa oku aba “Nnâmahanga w’olukogo n’obwonjo, orhakunira duba onaba wa buzigire bunji bwishwekerezi n’okuli.”​—Lub. 34:6, NWT.

4. Gurhi omuntu olembera ajira amango agwasirwe alinde?

⁴ Bwa kabirhi, omuntu olembera analinde erhi anarhulwire. Erhi kantu kalebe kakarhôla kasanzi kanji kulusha oku anal’irhanyize, omuntu wa ntyo anayake okuba wa mihusi arhanaba burhe. (Mt. 18:26, 27) Haba hali nyinji zakarhuhûna rhugendekere rhwalinda rhunarhulwire. Kwa lwiganyo, rhushinganine rhuyumvirhize n’obulembedu amango muntu mulebe ali aderha, buzira kumutwa omu binwa. (Ayu. 36:2) Kandi rhwanaba rhulagirire oku bulembedu amango rhuli rhwarhabala omwanafunzi w’Ebibliya ahugûkwe nyigirizo ndebe z’Ebibliya erhi ahime nkomedu ndebe mbi.

5. Yindi njira ehi rhwakayerekanamwo oborhere bw’okulembera?

⁵ Bwa kasharhu, omuntu olembera arhajira ebintu duba-duba buzira kurhanya. Kobinali, hali akanga kaba kahûnyire okujira ebintu duba-duba. Ciru akaba ntyo, amango omuntu olembera agwerhe mukolo mulebe gw’obulagirire gw’okuhikiriza, arhagurhondera duba-duba erhi kuguyusa duba-duba. Cikone, anacihirireho akasanzi kashinganine ly’apanga ebi ajira. Buzinda anacihirireho akasanzi alagirireko ly’ajira ogo mukolo bwinja.

6. Gurhi omuntu olembera ajira amango ali alwisa amarhangulo erhi amazibu?

⁶ Bwa kani, omuntu olembera anacihangane okulembera amazibu buzira kuciduduma. Kobinali, kurhali kubi okuyigulira omwîra wa hofi-hofi omurhima gwawe n’okumubwira oku oli waciyumva lugenda amazibu ogwerhe. Ciru akaba ntyo, omuntu mulembedu anagendekere alembera erhi anagwerhe entanya nyinja. (Kl. 1:11) Rhuli Bakristu, rhushinganine rhuyerekane obulembedu muli ezo njira zoshi. Bulya gurhi? Lekagi rhuganirire birhumire bisungunu.

7. Kushimbana na Yakobo 5:7, 8, bulya gurhi oborhere bw’okulembera buli bwa bulagirire bwenene? (Olole n’enfoto.)

⁷ Rhushinganine rhube ba kalembera lyo rhuyish’iyokoka. Aka abakozi bishwekerezi ba Nnâmahanga b’omu mango ga mîra, rhushinganine rhugendekere rhwalingûza oku Nnâmahanga ahikiriza ebiragane byage. (Hb. 6:11, 12) Ebibliya erhushushanyize n’omuhinzi. (Osome Yakobo 5:7, 8.) Omuhinzi anakole n’obushiru ly’arhwera emburho n’okuyidomera, cikone arhaba amanyire mangaci yakula kobinali. Co cirhumire omuhinzi anagendekere alingûza, erhi analangalire oku asarula emburho yage. Ko n’oko, rhunagendekere rhwaba na binji bya kujira omu mikolo y’ekiroho ciru akaba ‘rhurhamanyiri olusiku Nnawirhu ayîsha.’ (Mt. 24:42) Rhuli rhwalingûza, erhi rhunayemire n’obwalagale oku omu kasanzi kage kakwanine, Yehova ahikiriza ebi alaganyize byoshi. Erhi rhwakahikira aha rhwabula obulembedu, rhwanarhama n’okulinda rhwananarhondera okuleka okuli bunyi-bunyi. Kandi rhwanarhondera rhwasegeza obwenge oku bintu byakarhulerhera omwishingo ho n’aho. Cikone erhi akaba rhuli balembedu, rhwanalembera kuhika e buzinda n’okuyokoka.​—Mik. 7:7; Mt. 24:13.

8. Gurhi oborhere bw’okulembera burhurhabala lyo rhuba n’olushangi lwinja haguma n’abandi? (Abakolosi 3:12, 13)

⁸ Oborhere bw’okulembera bunarhurhabale lyo rhuba n’olushangi lwinja haguma n’abandi. Bunarhurhabale okuyumvirhiza bwinja amango abandi bali baganira. (Yk. 1:19) Kandi obulembedu bunagendekeze omurhûla. Bunarhulange lyo rhurhag’ijira ebintu duba-duba erhi kuderha kantu kalebe kabi amango rhuhangayisire omu bukengere. Kandi erhi akaba rhuli ba kulembera, rhurhakakunira duba-duba erhi muntu mulebe akarhugayisa. Ahali h’okucihôla, rhunagendekere ‘rhwalemberana n’okubabalirana.’​—Osome Abakolosi 3:12, 13.

9. Gurhi obulembedu burhurhabalamwo amango rhushinganine rhurhôle emihigo? (Emigani 21:5)

⁹ Kandi oborhere bw’okulembera bwanarhurhabala lyo rhurhôla emihigo minja. Ahali h’okurhôla omuhigo duba-duba erhi buzira kurhanya, rhunacihe akasanzi k’okujira obusagasi n’okurhanya bwenene oku njira zakarhurhabala rhurhôle omuhigo mwinja. (Osome Emigani 21:5.) Kwa lwiganyo, erhi akaba rhuli rhwalonza akazi rhwanashumibwa okuyemera akazi karhangiriza rhuhâbirwe, ciru akaba hali amango ako kazi kakakarhuma rhurhaja oku ntimanano erhi omu mukolo gw’amahubiri. Cikone, erhi akaba rhuli ba kulembera, rhwanaciha akasanzi k’okurhanya bwenene lugenda aha ako kazi kali, nsa inga rhwakayusa ebwa kazi, n’amazibu kakalerhera omulala gwirhu n’obwîra bwirhu haguma na Yehova. Okuba balembedu kwanarhurhabala rhuyake okurhôla omuhigo mubi.

10. Gurhi Omukristu akajira ly’aba n’oborhere bw’okulembera n’okugendekera abuyerekana?

¹⁰ Okashenga Yehova akurhabale obe wa kulembera bwenene. Obulembedu ciba cigabi c’ilehe ly’iroho litagatifu. (Gl. 5:22, 23) Co cirhumire rhwanashenga Yehova arhuhe iroho lyage litagatifu n’okumuhûna arhurhabale rhukayerekana ilehe ly’alyo. Erhi rhwakahikirwa n’akanga karhangwire obulembedu bwirhu, ‘rhugendekere rhwahûna’ iroho litagatifu lyo lirhurhabala rhulembere. (Lk. 11:9, 13) Kandi rhwanahûna Yehova arhurhabale lyo rhubona ebintu nk’oku ali abibona. Buzinda enyuma z’okusalira, rhushinganine rhujire okwirhu koshi lyo rhuba ba kulembera ngasi lusiku. Oku rhugendekera rhwashenga Yehova oborhere  bw’okulembera n’okujira okwirhu koshi lyo rhuba ba kulembera, ko n’obo borhere bugendekera bwashinga emizi omu murhima gwirhu n’okuba cigabi c’obumuntu bwirhu.

11-12. Gurhi Yehova ayerekinemwo oborherhe bw’okulembera?

¹¹ Okarhanya bwenene oku nyiganyo ziri omu Bibliya. Ebibliya ebamwo nyiganyo nyinji z’abantu bali ba kulembera. Omu kurhanya bwenene kw’ezo nyiganyo, rhwanaciyigiriza enjira rhwakayerekanamwo obulembedu. Embere rhuganirire nyiganyo ndebe muli zo, lekagi rhuganirire olwiganyo lwinja bwenene lw’obulembedu, ko kuderha olwiganyo lwa Yehova.

¹² Omu ishwa ly’e Edeni, Shetani azinzize izino lya Yehova analonza okuyeresa Eva oku Yehova aba Murhegesi orhali mushinganyanya orhanajira buzigire. Ahali h’okushereza oyo kakoza ho n’aho, Yehova ayerekine oborhere bw’okulembera n’okucihasha, bulya al’imanyire oku byakahûnyire akasanzi ly’ayerekana oku oburhegesi bwage bo bwinja bwenene. N’omu mango ali alinda oku ajira ntyo, Yehova alembire izinga lyahebirwe oku izino lyage. Kandi, Yehova agendekire alindirira lyo bantu banji baba n’obulyo bw’okuba n’obuzine bw’ensiku n’amango. (2 Pt. 3:9, 15) N’oko kwarhumire emiliyoni y’abantu bahikira aha bamumanya. Erhi rhwakasegeza obwenge oku bunguke bw’okulembera kwa Yehova, kwanaba kulembu kuli rhwe okulinda akasanzi kage ahizireho ly’alerha obuzinda.

13. Gurhi Yezu ayiziremwo n’obwimana oborhere bw’Ishe bw’okulembera? (Olole n’enfoto.)

¹³ Yezu anayige n’obwimana oborhere bw’Ishe bw’okulembera, anayerekine obo borhere amango ali hanw’igulu. Ensiku zoshi kurhakabire kulembu kuli ye okuyerekana obo borhere, ci bwenene kuyerekera abandishi n’Abafarizeyi bulya zali ndyalya. (Yn. 8:25-27) Ciru akaba ntyo, ak’Ishe, Yezu arhakag’ikunira duba. Erhi  akajacirwe erhi kugayisibwa, arhakag’icihôla. (1 Pt. 2:23) Yezu alembire amazibu buzira kuciduduma. Co cirhumire Ebibliya erhubwizire oku ‘rhukengêre oyo wàlemberaga ago mababale àbabazibagwa n’abanya-byaha goshi’! (Hb. 12:2, 3) Kugera oburhabale bwa Yehova, nirhu rhwanalembera ngasi marhangulo gakarhuhikira.

14. Bici rhwakaciyigiriza kugerera obulembedu bwa Abrahamu? (Abahabraniya 6:15) (Olole n’enfoto.)

¹⁴ Gurhigi erhi akaba ebi rhwal’ilangalire lugenda obuzinda birhacihikirira? Nkaba rhwal’ilangalire oku obuzinda burhakahisire buno burhayisha. Nkaba rhwanayoboha oku obuzinda bwayisha erhi mîra rhwafâga. Bici byakarhurhabala lyo rhugendekera rhwabulingûza? Rhuganirire olwiganyo lwa Abrahamu. Amango Abrahamu agwerhe myaka 75 buzira mwana, Yehova amulaganya ntya: “Nakujira ishanja linene.” (Murh. 12:1-4) Ka Abrahamu abwine okuhikirizibwa kw’eco ciragane? Arhabonaga oku cahikirizibwa coshi-coshi. Enyuma z’okuyikira Olwishi Efrati n’okulinda myaka 25, Abrahamu abona okuburhwa kw’omugala Izaki omu njira y’ecisomerine, n’enyuma za yindi myaka 60, abinjikulu Esau na Yakobo baburhwa. (Osome Abahabraniya 6:15.) Cikone Abrahamu arhabonaga ciru n’ehitya oku iburha lyage lyahikira okuba ishanja linene n’okuyima Ecihugo c’Amalaganyo. Ciru akaba ntyo, oyo mulume w’obuyemere ashagalukire obwîra bwa hofi-hofi haguma n’Omulemi wage. (Yk. 2:23) Na hano Abrahamu afûlwa, ayish’ishagaluka bwenene okumanya oku obuyemere bwage n’okulembera kwage byadwirhire amashanja goshi emigisho! (Murh. 22:18) Isomo lihi rhuciyigirizize? Nkaba rhurhabone okuhikirizibwa kw’ebiragane byoshi bya Yehova gano mango. Cikone, erhi rhwakaba ba kulembera aka Abrahamu, rhwanayemera n’obwalagale  oku Yehova arhuhemba ene n’oku ajira ntyo ciru bwenene omw’igulu lihyahya arhulaganyize.​—Mk. 10:29, 30.

15. Bici rhwakayiga omu ifunzo lirhu rhwene?

¹⁵ Ebibliya erimwo ezindi nyiganyo nyinji z’abantu bali ba kulembera. (Yk. 5:10) Wanacihiriraho eprograme y’okuyiga lugenda ezo nyiganyo omw’ifunzo lyawe wene. b Kwa lwiganyo, ciru akaba Daudi ashizirwe amavurha ly’ayish’iba Mwami w’ishanja ly’Abaisraheli, al’igwasirwe alinde myaka minji embere ahâbwe obwami. Simeoni na Ana bakag’iharamya Yehova n’obwishwekerezi omu mango bakag’ilinda Masiya walaganyizibagwa. (Lk. 2:25, 36-38) Amango oli wayiga lugenda emyanzi ya ntyo, okalonza amashuzo kw’aga madoso: Nkaba bici byarhabire oyu muntu ly’ayerekana oborhere bw’okulembera? Gurhi ayungusiremwo omu kuba wa kulembera? Gurhi nakayigamwo olwiganyo lwage? Kandi nkaba wanayunguka omu kuyiga lugenda abantu barhayerekanaga oborhere bw’okulembera. (1 Sam. 13:8-14) Wanacidosa ntya: ‘Nkaba bici byarhumire barhayerekana oborhere bw’okulembera? Bici byabahikire enyanya z’okurhalembera kwabo?’

16. Bunguke buhi buguma na buguma rhuba nabo omu kuba ba kulembera?

¹⁶ Okarhanya oku bunguke bw’okuba wa kulembera. Amango rhuli ba kulembera, rhunabe na mwishingo munji rhunanarhulirire bwenene. Muli ntyo, oborhere bw’okulembera bwanayinjihya amagala girhu g’omubiri nag’obukengere. Amango rhuli rhwalembera abandi, rhunashagalukire okuba n’olushangi lwinja haguma nabo. Oko kwanarhuma ecigamba cirhu caba n’ecinyabuguma bwenene. Erhi muntu mulebe akarhugayisa, okurhakunira duba kwirhu kwanarhuma ako kanga karhaba kabi bwenene. (Enna. 37:8; Mig. 14:29) N’akantu kinja kulusha byoshi, amango rhuli ba kulembera rhunayige olwiganyo lwa Larha wirhu w’omu mpingu rhunanamuyegere ciru bwenene.

17. Bici rhushinganine rhuhige okujira?

¹⁷ Kobinali, obulembedu buba borhere bwinja bwenene burhulerhera rhweshi obunguke! Ciru akaba ensiku zoshi kurhakaba kulembu kuli rhwe okulembera, kugerera oburhabale bwa Yehova rhwanagendekera rhwaba n’obo borhere. Amango rhuli rhwalingûza igulu lihyahya, rhwanayemera n’obwalagale oku “isu lya Yehova linalange abamuyoboha, balya balinda obuzigire bwage bwishwekerezi.” (Enna. 33:18, NWT) Lekagi rhweshi rhuhige okugendekera rhwacihundikira okulembera.