Amango rhuli rhwasoma Ebibliya, rhwanakolesa ebikolanwa biri lubero by’okujira obusagasi lyo rhuhugûkwa bwinja ebi rhuli rhwasoma. Cikone, rhurhalonza okuyiga mpu lyo rhuyushula kone obumanye bwirhu bw’Ebibliya. Rhuba rhulonzize rhupate obuhirhi bw’ekiroho lugenda amorhere ga Yehova bwakayushula obuzigire bwirhu kuli ye. Lyo rhuhasha okujira ntyo, rhwanacidosa ntya: ‘Bici olu lwandiko lw’Ebibliya lunyigirizize lugenda Yehova?’

Rhwanalonza ebiyerekine n’obwalagale amorhere minja bwenene ga Yehova, nk’obuzigire, obwenge, obushinganyanya, n’obuhashe bwage. Cikone arhali ago morhere gone Yehova ajira. Obumuntu bwage buhiziremwo agandi morhere minja. Ngahi wakabona myanzi minji bwenene lugenda ago morhere?

Olole eliste y’agandi morhere gage 50 na kulusha omu Index des publications des Témoins de Jéhovah, idako ly’ecirhwe cidesire “Jéhovah” na buzinda wanalonza ecirhwe cisungunu cidesire “Qualités par nom.” Ojire obusagasi lugenda amorhere ga Yehova gapatine n’omwanzi gw’Ebibliya oli wasoma. (Erhi akaba ecitabu Musaada wa Kutafuta Habari kwa Ajili ya Mashahidi wa Yehova cone ogwerhe, olole idako ly’ecirhwe cidesire “Yehova Mungu” na buzinda olonze ecirhwe cisungunu cidesire “Sifa za Yehova.”)