1. Nk’oku biyerekinwe omu Malakiya 3:16, NWT, citabu cihi Yehova ali ayandika, na bici bicibamwo?

 OMU bihumbi by’emyaka, Yehova ali ayandika ecitabu cago-cago. Eco citabu cirimwo amazino garhonderire okw’izino lya Abeli, muhamirizi murhangiriza mwishwekerezi. * (Lk. 11:50, 51) Kurhangira ago mango, Yehova ajire ayushula amazino mw’eco citabu, n’ene cikola cirimwo emiliyoni y’amazino. Omu Bibliya, eco citabu cihamagirwe “citabu c’okukengeza,” “citabu c’obuzine,” na “citabu c’okukunjwa c’obuzine.” Mw’eci cigabi, rhwaja rhwacihamagala “citabu c’obuzine.”​—Osome Malakiya 3:16; NWT, Maf. 3:5; 17:8, NWT.

2. Mazino ga bandi gayandisirwe omu citabu c’obuzine, na gurhi rhwakajira ly’izino lirhu liyandikwa mw’eco citabu?

² Eco citabu cago-cago, cirimwo amazino g’abantu boshi baharamya Yehova omu bukenge bunji banazigira izino lyage. Bayish’iba n’obulyo bw’okuhâbwa obuzine bw’ensiku n’amango. Ene, izino lirhu lyanayandikwa mw’eco citabu erhi rhwakacijirira obwîra bwinja na bwa hofi-hofi haguma na Yehova buyimangire oku nterekêro y’engombôlo y’Omugala Yezu Kristu. (Yn. 3:16, 36) Rhweshi rhulonzize amazino girhu gayandikwe mw’eco citabu; rhube rhugwerhe obulangalire bw’okulama empingu erhi hanw’igulu.

3-4. (a) Nkaba izino lirhu liyandisirwe omu citabu c’obuzine, ka k’okuderha oku rhwayish’ihâbwa obuzine bw’ensiku n’amango? Ohugûle. (b) Bici rhwaganirira mw’eci cigabi n’omu cigabi cikulikire?

³ Ka k’okuderha oku ngasi muntu izino lyage liyandisirwe mw’eco citabu ayish’ihâbwa obuzine bw’ensiku n’amango? Enderho Yehova abwiraga Musa ziri omu Olubungo 32:33, zirhurhabire  okushuza kw’er’idoso. Yehova aderha ntya: “Owangomire ye nanazaza omu citabu cani!” Ezo nderho ziyerekine oku amazino gayandisirwe mw’eco citabu ene, ganazazibwa. Yehova ali nk’owarhanzir’iyandika ago mazino n’ekreyo. (Maf. 3:5) Rhushinganine rhujire okwirhu koshi ly’izino lirhu libêra mw’eco citabu kuhika liyandikwe loshi-loshi n’ebike.

⁴ Oko kwanarhuma rhwacidosa madoso malebe. Kwa lwiganyo, bici Ebibliya edesire lugenda abantu amazino gabo gayandisirwe omu citabu c’obuzine n’aba amazino gabo garhayandisirwimwo? Abantu amazino gabo gabêra mw’eco citabu, mangaci bahâbwe obuzine bw’ensiku n’amango? Gurhigi byayish’iba lugenda abantu bafâga buzira kuba n’obulyo bw’okumanya Yehova? Ka byanahashikana amazino gabo gayandikwe mw’eco citabu? Rhwashuza kw’ago madoso mw’eci cigabi n’omu cigabi cikulikire.

MAZINO GA BANDI GAYANDISIRWE OMU CITABU C’OBUZINE?

5-6. (a) Nk’oku olwandiko lw’Abafilipi 4:3 luyerekine, mazino ga bandi gali omu mazino gayandisirwe omu citabu c’obuzine? (b) Mangaci amazino gabo gayish’iyandikwa loshi-loshi omu citabu c’obuzine?

⁵ Mazino ga bandi gayandisirwe mw’eco citabu c’olwiganyo? Lyo rhushuza kw’er’idoso, rhwaganirira bigusho birhanu by’abantu biri lubero. Muli abo bantu, baguma na baguma amazino gabo gayandisirwe omu citabu c’obuzine n’abandi nanga.

⁶ Ecigusho cirhanzi, cijijirwe n’abantu Nnâmahanga acishozire lyo bayish’irhambula haguma na Yezu omu mpingu. K’amazino gabo gali mw’eco citabu c’obuzine ene? Neci. Kushimbana n’enderho Paolo ayandikiraga “ababo barhabazi,” erhi bakozi omu Filipi, amazino g’abashîge amavurha bahamagirwe lyo barhambula haguma na Yezu, gali omu citabu c’obuzine ene. (Osome Abafilipi 4:3.)  Cikone, ly’amazino gabo gagendekera gabêra mw’eco citabu c’obuzine, bashinganine bagendekere babêra bishwekerezi kuli Yehova. Muli ntyo, hano bahirwako ecimanyiso cizinda embere z’okufâ kwabo erhi embere amalibuko madârhi garhondere, amazino gabo gayish’iyandikwa loshi-loshi mw’eco citabu.​—Maf. 7:3.

7. Kushimbana n’Amafulûlo 7:16, 17, mangaci amazino g’abantu b’omu hitû hy’ebindi bibuzi gayish’iyandikwa loshi-loshi omu citabu c’obuzine?

⁷ Ecigusho ca kabirhi cijijirwe n’ehitû hy’abantu b’ebindi bibuzi. K’amazino gabo gayandisirwe ene omu citabu c’obuzine? Neci. K’amazino gabo gayish’iba gaciri omu citabu c’obuzine enyuma z’okucunguka kwabo ivita lya Harmagedoni? Neci. (Maf. 7:14) Yezu adesire oku abo bantu bashushanyizibwe n’ebibuzi banaje “omu buzine bw’ensiku n’amango.” (Mt. 25:46) Cikone, abo bantu bayish’icunguka ivita lya Harmagedoni, barhakahâbwa obuzine bw’ensiku n’amango ho n’aho. Rhwanaderha oku amazino gabo gayish’ibêra gayandisirwe n’ekreyo omu citabu c’obuzine. Omu Burhegesi bwa Yezu bw’Emyaka Cihumbi, yene “aba lungere wabo, anabalangûle enjira ehêka ebw’iriba ly’amishi g’obuzine.” Abayish’irhumikira obulongozi bwa Kristu na buzinda babonekane oku bali bishwekerezi kuli Yehova, amazino gabo gayish’iyandikwa loshi-loshi omu citabu c’obuzine.​—Osome Amafulûlo 7:16, 17.

8. Mazino ga bantu bahi garhali mayandike omu citabu c’obuzine, na bici byanabahikire?

⁸ Ecigusho ca kasharhu cijijirwe n’abantu bashushanyizibwe n’empene bayish’isherezibwa okw’ivita lya Harmagedoni. Amazino gabo garhali mayandike omu citabu c’obuzine. Yezu adesire oku “bayish’ihâbwa obuhane [buhererekeze] bw’ensiku n’amango.” (Mt. 25:46, Mashi Bible) Omu kulongozibwa n’iroho litagatifu, Paolo arhubwizire oku “abola bayish’ihâbwa obuhane bw’okukagwa n’okuhererekera ensiku n’amango.” (2 Ts. 1:9; 2 Pt. 2:9) Ntyo ko byanayish’iba lugenda abagomire n’obulonza iroho litagatifu omu kasanzi ka myaka minji. Nabo bayish’ihererekezibwa ensiku n’amango, cikone barhakahâbwa obuzine bw’ensiku n’amango. Bibonekine n’obwalagale oku barhakafûka. (Mt. 12:32; Mk. 3:28, 29; Hb. 6:4-6) Rhuganirirage bigusho bibirhi by’abantu bayish’ifûlwa lyo balama hanw’igulu.

ABANTU BAYISH’IFÛLWA

9. Nk’oku biyerekinwe omu Ebijiro by’Entumwa 24:15, bigusho bihi bibirhi by’abantu bayish’ifûlwa lyo balama hanw’igulu, na lubero luhi luhali egarhi k’ebyo bigusho byombi?

⁹ Ebibliya eganirire bigusho bibirhi by’abantu bayish’ifûlwa banagwerhe obulangalire bw’okulama emyaka n’emyaka hanw’igulu, “abashinganyanya” n’“abarhali bashinganyanya.” (Osome Ebijiro by’Entumwa 24:15, NWT.) “Abashinganyanya” bali bantu bakolire Yehova n’obwishwekerezi akalamo kabo koshi. Lubero n’oko, “abarhali bashinganyanya” bali bantu barhakoleraga Yehova. Kobinali, olugenzi lwa banji muli bo lurhali lwa bushinganyanya. Bulya abantu b’ebyo bigusho bibirhi bayish’ifûlwa, ka rhwanaderha oku amazino gabo gali mayandike omu citabu c’obuzine? Lyo rhushuza kw’er’idoso, rhuganirirage ngasi cigusho ca muli byo.

10. Bulya gurhi “abashinganyanya” bayish’ifûlwa, na lukengwa luhi baguma na baguma ba muli bo bayish’ihâbwa? (Olole n’“Amadoso g’Abantu Basoma Ebitabu Birhu” gali mw’eyi gazeti lugenda obufûke hanw’igulu.)

¹⁰ Ecigusho ca kani cijijirwe n’“abashinganyanya.” Embere bafê, amazino gabo gali mayandike omu citabu c’obuzine. K’amazino gabo gazazibwe mw’eco citabu erhi bafâ? Nanga, bulya ‘bacizine’ omu nkengero  za Yehova. Yehova “aba Nnâmahanga wa bantu bazine, cikwone arhaba w’abafîre, bulya kw’abona nk’abantu boshi bazine.” (Lk. 20:38, Mashi Bible) Oko kuli kuderha oku hano abashinganyanya bafûlwa hanw’igulu, amazino gabo gayish’iba gaciri mayandike omu citabu c’obuzine, ciru akaba burhangiriza gaba gaciri mayandike “n’ekreyo.” (Lk. 14:14) Buzira karhinda, baguma na baguma muli abo bayish’ifûlwa bayish’ihâbwa olukengwa lw’okuba “barhambo omu cihugo coshi [omw’igulu lyoshi].”​—Enna. 45:16, Mashi Bible.

11. Bici “abarhali bashinganyanya” bashinganine bayigirizibwe embere amazino gabo gayandikwe omu citabu c’obuzine?

¹¹ Buzinda, rhuganirirage ecigusho ca karhanu, k’okuderha, “abarhali bashinganyanya.” Nkaba barhalamaga akalamo k’obushinganyanya embere bafê bulya barhal’imanyire amarhegeko ga Yehova. Co cirhumire, amazino gabo garhayandikagwa omu citabu c’obuzine. Cikone, Nnâmahanga ayish’ibafûla lyo baba n’obulyo bw’okujira amazino gabo gayandikwe omu citabu c’obuzine. Abo “barhali bashinganyanya” bayish’iba balagirire oku burhabale bunji. Embere bafê, baguma ba mulibo bajijire ebijiro bigalu-galu bwenene. Co cirhumire, bayish’iba balagirire oku kuyigirizibwa lyo bamanya gurhi bakalamamwo kushimbana n’amakanuni mashinganyanya ga Yehova. Lyo bayigirizibwa gurhi bakajiramwo ntyo, Obwami bwa Nnâmahanga bwayish’ilongoza omukolo munene bwenene gw’okuyigiriza gurhasag’ijirwa bundi.

12. (a) Bandi bayish’iyigiriza abarhali bashinganyanya? (b) Bici byayish’ihikira abayish’ilahira okukolesa ebi bayish’iyigirizibwa?

¹² Bandi bayish’iyigiriza abarhali bashinganyanya? Abantu b’ehitû hinene n’abashinganyanya bayish’ifûlwa. Ly’amazino g’abarhali bashinganyanya gayandikwa omu citabu c’obuzine, byayish’ihûna bajire obwîra haguma na Yehova n’okucihâna emwage. Yezu Kristu n’abashige amavurha bayish’ikalabiriza erhi banali empingu amajambere abo barhali bashinganyanya bayish’iba bali bajira.  (Maf. 20:4) Ngasi yeshi wayish’ilahira obo burhabale ahâbwa ayish’ihererekezibwa, ciru akaba anaba acigwerhe myaka 100. (Iz. 65:20) Bulya Yehova na Yezu banasome emirhima, barhayish’iyemerere omuntu yeshi-yeshi ajire amaligo omw’igulu lihyahya.​—Iz. 11:9; 60:18; 65:25; Yn. 2:25.

ABAFÛKIRE OBUZINE N’ABAFÛKIRE OLUBANJA

13-14. (a) Embere, gurhi rhwal’ihugûsirwe enderho za Yezu ziri omu Yowane 5:29? (b) Bici rhushinganine rhumanye lugenda ezo nderho?

¹³ Kandi Yezu aganirire abantu banafûlwe lyo balama hanw’igulu. Kwa lwiganyo, aderha ntya: “Amango gayiruka, abali omu nshinda boshi barhengemwo bamayumva izu lyage; abakozire aminja bafûkire obuzine, n’abajizire amabi bafûkire olubanja.” (Yn. 5:28, 29) Bici Yezu alonzagya okuderha?

¹⁴ Embere, rhwal’ihugûsirwe oku enderho za Yezu ziganirire ebijiro abayish’ifûlwa bayish’ijira enyuma z’okufûka; kwali kuderha oku, baguma na baguma bayish’ifûlwa n’okujira ebintu binja n’abandi bayish’ifûlwa n’okujira ebintu bibi. Cikoki, obwine oku Yezu arhadesiri oku abantu bayish’ifûlwa omu kaburi bayish’ijira ebintu binja ho n’aho erhi oku bayish’ijira ebintu bibi. Akolesize oluderho luyerekine ebijiro by’amango gagezire. Aganirire “abakozire aminja” n’“abajizire amabi.” Oko kuyerekine oku ebyo bijiro byajirikanaga embere bafê. Ebyo biyumvikine, bulya nta muntu yeshi-yeshi wayish’iyemererwa ajire ebintu bibi omw’igulu lihyahya. Abarhali bashinganyanya bakwanine babe bajijire ebyo bintu bibi embere bafê. Gurhigi rhushinganine rhuhugûkwe enderho za Yezu lugenda ‘abafûkire obuzine’ n’‘abafûkire olubanja’?

15. Bandi ‘bayish’ifûkira obuzine,’ na bulya gurhi?

¹⁵ Abashinganyanya, k’okuderha abantu bajijire aminja embere bafê ‘banafûkire obuzine’ bulya amazino gabo gayish’iba gali mayandike omu citabu c’obuzine. Oko kuli kuderha oku obufûke bw“abakozire aminja” buganirirwe omu Yowane 5:29 bo n’obo bufûke bw’“abashinganyanya” buganirirwe omu lwandiko lw’Ebijiro by’Entumwa 24:15. Aga mahugûlo mahyahya gapatine n’ebidesirwe omu lwandiko lw’Abaroma 6:7, ludesire ntya: “Owafîre erhi afumire ecaha.” Yehova azazize ebyaha by’abo bantu bashinganyanya erhi bafâ, cikoki agendekire akengera ebijiro byabo by’obuyemere. (Hb. 6:10) Kobinali, abo bashinganyanya bayish’ifûlwa bakwanine bagendekere babêra bishwekerezi kuli Yehova ly’amazino gabo gagendekera okubêra omu citabu c’obuzine.

16. Gurhi abarhali bashinganyanya ‘bafûkiremwo olubanja’?

¹⁶ Gurhigi lugenda abantu bajijire amabi embere z’okufâ kwabo? Ciru akaba ebyaha byabo byazazibwe, barhakoleraga Yehova amango bacir’izine. Amazino gabo garhali mayandike omu citabu c’obuzine. Co cirhumire, obufûke bw’“abajizire amabi” bo n’obo bufûke bw’“abarhali bashinganyanya” buganirirwe omu lwandiko lw’Ebijiro by’Entumwa 24:15. Bohe, ‘bayish’ifûkira olubanja.’ * Okuderha oku abarhali bashinganyanya bayish’itwirwa olubanja kuli kuderha oku ebijiro byabo byayish’ilabirizibwa. (Lk. 22:30) Byayish’ihûna akasanzi kanji ly’amazino gabo gashinganana okuyandikwa omu citabu c’obuzine. Erhi abo barhali bashinganyanya bakaleka olugenzi lwabo lubi lwa mira n’okucihâna emwa Yehova, lyone amazino gabo gakashinganana okuyandikwa omu citabu c’obuzine.

17-18. Bici abayish’ifûlwa lyo balama hanw’igulu boshi bashinganine bajire, n’“ebijiro” biganirirwe omu lwandiko lw’Amafulûlo 20:12, 13, Mashi Bible, biri bijiro bihi?

 ¹⁷ Abayish’ifûlwa boshi, babe bali bashinganyanya erhi barhali bashinganyanya, bashinganine barhumikire amarhegeko gali omu bitabu bihyahya by’okukunjwa byayish’iyigulwa omu myaka 1 000. Entumwa Yowane ehugwîre ntya ebi yabonaga omu cibonekerezi: “Nabona abafîre, abakulu n’abarho, nabona bayimanzire emalanga g’entebe. Ebitabu [by’okukunjwa] byabungûlwa. Ecindi citabu [c’okukunjwa] kandi naco cabungûlwa, co citabu c’obuzine. Abafîre bakag’itwirwa emanja nk’okw’ebijiro byabo byanali biyosire, omu kushimbulira ebyali biyandisirwe muli ebyo bitabu [by’okukunjwa].”​—Maf. 20:12, 13, Mashi Bible.

¹⁸ ‘Bijiro’ bihi abayish’ifûlwa batwirwako olubanja? Ka byayish’iba bijiro bajiraga embere z’okufâ kwabo? Nanga! Okengere oku ebyaha bajiraga embere byazazibwe erhi bafâ. Co cirhumire, “ebijiro byabo” birhakaba bijiro bajiraga omu kalamo kabo ka mira. Cikone, ebyo bishinganine bibe bijiro bajira enyuma z’okuyigirizibwa omw’igulu lihyahya. Ciru n’abantu bishwekerezi nka Nuhu, Samweli, Daudi, na Danieli bashinganine bayigirizibwe okubiyerekire Yezu Kristu n’okuyerekana obuyemere omu nterekêro yage. Erhi akaba abo bantu nabo bayish’iyigirizibwa, k’okuderha oku abarhali bashinganyanya bashinganine bayigirizibwe binji bwenene!

19. Bici byayish’ihikira abalahira obulyo bwinja bwenene bw’okuyigirizibwa bayish’ihâbwa?

¹⁹ Bici byayish’ihikira abayish’ilahira obo bulyo bwinja bwenene bw’okuyigirizibwa bayish’ihâbwa? Olwandiko lw’Amafulûlo 20:15, Mashi Bible, ludesire ntya: “Ngasi yeshi orhali muyandike omu citabu c’obuzine, bamukweba mw’eyo nyenga [nyanja] y’omuliro.” Kobinali, bayish’ihererekezibwa ensiku n’amango. Co cirhumire, kuli kwa bulagirire bwenene rhujire okwirhu koshi ly’izino lirhu liyandikwa omu citabu c’obuzine linagendekere lyabêramwo!

20. Mukolo guhi gw’okushagalusa gwayish’ijirwa omu Burhegesi bw’Emyaka Cihumbi? (Olole enfoto eri oku cijalada c’eyi gazeti.)

²⁰ Oburhegesi bw’Emyaka Cihumbi kayish’iba kasanzi kinja bwenene! Muli ago mango, hayish’iba omukolo munene bwenene gw’okuyigiriza gurhasag’ijirwa bundi hanw’igulu. Cikone kandi, kayish’iba kasanzi olugenzi lw’abashinganyanya n’abarhali bashinganyanya lwayish’ilabirizibwa. (Iz. 26:9; Ebj. 17:31) Gurhi ogo mukolo gw’okuyigiriza gwayish’ihikirizibwamwo? Ecigabi cikulikire carhurhabala rhuhugûkwe ogo mupango mwinja bwenene n’okugushagalukira.