Rhulole gurhi Ebibliya eshuzize kw’ago madoso.

Olwandiko lw’Ebijiro by’Entumwa 24:15, NWT, lurhubwizire oku hanabe “obufûke bw’abashinganyanya n’abarhali bashinganyanya.” Abashinganyanya bali bantu barhumikire Nnâmahanga embere bafê, co cirhumire amazino gabo gali mayandike omu citabu c’obuzine. (Mal. 3:16) Abarhali bashinganyanya bahiziremwo abantu bafîre buzira kuba n’obulyo bw’okuyiga okubiyerekire Yehova, co cirhumire amazino gabo garhali mayandike omu citabu c’obuzine.

Olwandiko lwa Yowane 5:28, 29 luganirire ebyo bigusho bibirhi byo n’ebyo biganirirwe omu lwandiko lw’Ebijiro by’Entumwa 24:15. Yezu adesire oku “abakozire aminja bafûkire obuzine, n’abajizire amabi bafûkire olubanja.” Abashinganyanya bajijire aminja embere z’okufâ kwabo. Banafûkire obuzine bulya amazino gabo gaba gaciri mayandike omu citabu c’obuzine. Cikone, abarhali bashinganyanya bajijire amabi embere bafê. Banafûkire olubanja. Amazino gabo garhali mayandike omu citabu c’obuzine, na ntyo bayish’iba n’akasanzi k’okutwirwa olubanja, erhi kulabirizibwa n’okurhangulwa. Muli ako kasanzi, bayish’iba n’obulyo bw’okuyiga okubiyerekire Yehova ly’amazino gabo gayandikwa omu citabu c’obuzine.

Olwandiko lw’Amafulûlo 20:12, 13, Mashi Bible, luhugwîre oku abayish’ifûka boshi bashinganine barhumikire ‘ebiyandisirwe muli ebyo bitabu [by’okukunjwa],’ k’okuderha amarhegeko mahyahya gayish’ikola omw’igulu lihyahya. Yehova ayish’ihererekeza abalahira okurhumikira.​—Iz. 65:20.

Olwandiko lwa Daniyeli 12:2, Mashi Bible, lulimwo obulebi budesire oku baguma na baguma omu bantu bafîre bayish’ifûka “banabone obuzine bw’ensiku n’amango, n’abandi enshonyi zibagwarhe n’okugayaguzibwa kw’emyaka n’emyaka.” Olo lwandiko luganirire olubanja luzinda abanafûke bayish’itwirwa: hali abayish’ihâbwa “obuzine bw’ensiku n’amango” n’abandi “okugayaguzibwa kw’emyaka n’emyaka.” Co cirhumire, oku buzinda bw’emyaka 1 000, baguma bayish’ihâbwa obuzine bw’ensiku n’amango n’abandi bayish’ihererekezibwa emyaka n’emyaka.​—Maf. 20:15; 21:3, 4.

Rhurhole olwiganyo. Akanga k’abantu ba muli ebyo bigusho bibirhi byayish’ifûlwa kanashushanyizibwa n’abantu ba cihugo cilebe balonzize okuj’ilama omu cindi cihugo. Abashinganyanya bali nk’abantu bahâbwa e viza y’omukolo erhi viza y’okuba cikala erhuma bamanyikana n’okuba n’oluhuma omu njira ndebe. Cikone, abarhali bashinganyanya bali nka bantu barhali b’omu cihugo cilebe bakahâbwa e viza ya kasanzi kalebe erhi viza y’okuba cigolo. Abo bantu barhali ba cikala muli eco cihugo bashinganine bajire okwabo koshi lyo bayemererwa okugendekera balama mw’eco cihugo cihyahya. Ko n’oko, abarhali bashinganyanya bayish’ifûlwa bashinganine barhumikire amarhegeko ga Yehova n’okuyerekana oku bali bashinganyanya lyo bagendekera balama omu Paradizo. Na ciru abantu bakahâbwa viza ehi, erhi bayus’ihika ntya omu cihugo cilebe ca bene, enyuma za kasanzi kalebe baguma banayemererwa okuba bacikala b’eco cihugo n’abandi banagalulwa omu cihugo cabo. Amorhere gabo n’olugenzi lwabo byo birhuma bayemererwa buzinda okulama mw’eco cihugo cihyahya erhi nanga. Ko n’oko, olubanja luzinda abantu bayish’ifûlwa boshi batwirwa lwayish’iyimangira oku bwishwekerezi bwabo n’olugenzi lwabo omw’igulu lihyahya.

Yehova aba Nnâmahanga w’obwonjo cikone kandi aba Nnâmahanga w’obushinganyanya. (Lush. 32:4; Enna. 33:5) Ayish’iyerekana obuzigire bwage omu kufûla abantu bashinganyanya n’abarhali bashinganyanya. Cikone ayish’ibahûna boshi barhumikire amakanuni gage g’olugenzi lwinja. Abayish’ihikira aha bamukenga n’okurhumikira amakanuni gage bone bayish’iyemererwa bagendekere balama omw’igulu lihyahya.