Omu 1 Abakorinti 15:8, Mashi Bible, Paolo adesire ntya: “Enyuma ly’abo boshi, nani ambonekera, n’obwo niono kwo ndi nka muntu waburhagwa arhahisizi n’emyezi.” Embere, rhwakag’ihugûla oku nkaba Paolo akag’iganirira ebyamuhikiraga erhi abona Yezu omu bukuze bwage bw’empingu omu cibonekerezi. Byabonekana nk’ahâbirwe olukengwa lw’okucib’iburhwa, erhi kufûlwa, ly’ahâbwa obuzine bw’ekiroho embere z’akasanzi, myaka minji embere obufûke bwa ntyo bube. Cikone, enyuma z’okucib’iyiga bwenene ogo mulongo, bibonekine oku kuli kwa bulagirire rhukubûle oku rhwal’iguhugûsirwe.

Mw’olo lwandiko, kobinali Paolo akag’iganirira ebyamuhikiraga erhi ahinduka n’okuba Mukristu. Cikone, bici alonzagya okuderha erhi aderha oku ali “muntu waburhagwa arhahisizi n’emyezi”? Nkaba hali birhumire binji byarhumaga aderha ntyo.

Okuhinduka kwage kwahisire buzira kulaliza n’omu njira y’okuyobohya. Okuburha omwana orhayenezizi emyezi, kanji-kanji kunahike buzira kulaliza. Erhi Saulu (wayish’irimanyikana buzinda okw’izino lya Paolo) ali omu mubalamo gw’okuja e Damasi ly’aj’ilibuza Abakristu eyo, arhal’icirheganyize okubona ecibonekerezi ca Yezu wafûkaga. Okuhinduka kwa Paolo kwabire buzira kulaliza, arhali kuli ye yene cikone n’oku Bakristu akag’ipanga okuj’ilibuza mw’eyo vile y’e Damasi. Kandi, oko kuhinduka kwage kwajijirwe omu njira y’okuyobohya bwenene ciru kwarhuma ayusa kasanzi kalebe ahusire amasu.​—Ebj. 9:1-9, 17-19.

Ahindusire omu “kasanzi karhashinganini.” Oluderho lwa mîra lw’Ecigiriki luhindwirwe “muntu waburhagwa arhahisizi n’emyezi” kandi lwanahindulwa “muntu waburhagwa omu kasanzi karhashinganini.” Ebibliya ehamagalwa The Jerusalem Bible edesire ntya: “Nali nka nabusirwe omu mango nta muntu wakag’irhanya ntyo.” Amango Paolo ahindukaga n’okuba Mukristu, Yezu ali erhi agalusire empingu. Lubero n’abantu Paolo aganirire omu milongo eri embere, yehe arhabonaga Yezu wafûkaga embere agaluke empingu. (1 Kr. 15:4-8) Okubonekera Yezu abonekeraga Paolo kwaha Paolo obulyo bw’okubona Yezu enyuma z’okufûka kwage, ciru akaba kabonekine nka kali “kasanzi karhashinganini.”

Paolo akag’iciganirira yene omu njira y’olugero. Nk’oku basomi baguma na baguma baderha, oluderho Paolo akolesize mw’olo lwandiko lwanayumvikana nk’akag’iciderha yene kubi. Nkaba zo ntanya Paolo agwerhe ezo, k’okuderha oku, al’imanyire oku arhal’ishinganine olo lukengwa ahâbagwa. Agendekire okuderha ntya: “Nie munyinyi omu ntumwa ​— omu kuderha okunali ntashinganini nderhwe ntumwa, bulya narhindibuzize Emirhwe [cigamba] y’Abakristu ya Nnâmahanga. Cikwone oku lukogo lwa Nnâmahanga, niono nkola ndi okûla nanyosire.”​—1 Kr. 15:9, 10, Mashi Bible.

Co cirhumire, bibonekine oku Paolo akag’iganirira enjira y’okusomeza Yezu amubonekeragamwo, akasanzi ahindukagamwo n’okuba Mukristu buzira kucirheganya, erhi okubona oku arhal’ishinganine okuhâbwa eco cibonekerezi c’okusomeza. Abe ebyo byo Paolo akag’iganirira erhi nanga, buzira karhinda al’ishagalukire eco cibonekerezi. Camuyemezize n’obwalagale oku Yezu afûzirwe kurhenga omu bafû. Kobinali, kanji-kanji akag’iganirira ebyo byamuhikiraga buzira kulaliza amango akag’ihubiri abandi lugenda obufûke bwa Yezu.​—Ebj. 22:6-11; 26:13-18.