ECIGABI C’OKUYIGA 40
Aka Petro, Wanagendekera Wakolera Yehova
‘Ontegeho, Yagirwa, bulya ndi muntu munya-byaha!’—LK. 5:8.
LWIMBO 38 Atakupatia Nguvu
EBI RHWAYIGA a
1. Gurhi Petro ajijire erhi bagwarha ensamaki omu njira y’ecisomerine?
PETRO agezize obudufu boshi ali aduba ensamaki buzira kugwarha ciru n’enguma. Eby’okusomeza, Yezu amubwira erhi: “Musûle amârho emuhengere, murhege orhweshe rhwinyu.” (Lk. 5:4) Petro arhindira omu kurhanya oku arhagwarhe ciru n’ensamaki nguma, cikone ajira nk’oku abwiragwa. Orhweshe bajaga badubamwo rhwarhondera okubereka enyanya z’obuzirho bw’ensamaki bagwarhaga. Erhi bacibonera eco cisomerine, Petro n’aba akag’ikola nabo basomerwa bwenene “erhi obwo budubi bw’enfi [erhi nsamaki] burhuma.” Petro aderha erhi: ‘Ontengeho, Yagirwa, bulya ndi muntu munya-byaha!’ (Lk. 5:6-9) Bibonekine oku Petro aciyumvirhe oku arhashinganini okuba haguma na Yezu.
2. Bulya gurhi okuganirira olwiganyo lwa Petro kwanarhurhabala?
2 Petro adesire okuli, bulya ali “muntu munya-byaha.” Amandiko gayerekine oku mango maguma na maguma akag’iderha n’okujira ebintu byakag’irhuma aciyunjuza buzinda. Ka hali amango nawe ociyumva aka Petro? K’oli walwisa buzamba bulebe erhi borhere bw’okulonza okujira ecaha? Okuyiga olwiganyo lwa Petro kwanakurhuliriza. Omu njira nci? Rhurhanye k’oku: Amagosa Petro akag’ijira nkaba garhakayandisirwe omu Bibliya. Cikone, gahizirwemwo omu kulongozibwa n’iroho litagatifu lyo garhuyigiriza. (2 Tm. 3:16, 17) Okuciyigiriza lugenda oyo mulume wagwerhe obuzamba wanal’igwerhe entanya ziri nk’ezirhu, kwanarhurhabala rhubone oku Yehova arharhulongezako obwimana. Alonzize rhugendekere rhwamukolera, n’okugendekera rhwacihangana okujira ntyo, ciru akaba rhuli bazamba.
3. Bulya gurhi rhushinganine rhugendekere rhwacihangana lyo rhukolera Yehova?
3 Bulya gurhi kuli kwa bulagirire bwenene kuli rhwe okugendekera rhwacihangana lyo rhukolera Yehova? Banaderhe oku, enjuci zirhahandana bûci. Kwa lwiganyo: Omuzihi w’emiziki anayuse myaka minji ali acikomereza ly’amany’iziha. Mw’ako kasanzi koshi, nkaba anajire magosa manji, cikone erhi akagendekera acikomereza, anahikire aha amanya. Ciru akaba akola amanyire okuziha emiziki bwinja, hali amango ajira igosa. Cikone, arharhama. Anagendekere okucikomereza ly’amanya bwenene. Ko n’oko, ciru n’enyuma z’okuciyumva oku rhwahimire buzamba bulebe, nkaba rhwanashub’ibugalukira. Cikone rhunagendekere rhwacihangana lyo rhuhima obo buzamba loshi. Rhweshi rhunaderhe erhi kujira ebintu birhuma rhwaciyunjuza buzinda; ciru akaba ntyo, erhi rhwakacihangana, Yehova anarhurhabala lyo rhugendekera rhwajira ebiri binja kulusha. (1 Pt. 5:10) Lekagi rhuganirire olwiganyo lwa Petro lw’okulembera. Obwonjo Yezu amuyeresagya ciru akaba al’igwerhe obuzamba bwanarhushumya lyo rhugendekera rhwakolera Yehova.
AMAZIBU PETRO ALWISIZE N’EMIGISHO ABÎRE NAYO
Gurhi wakajira erhi wakahikirwa n’ebintu biri nk’ebyahikiraga Petro? (Olole ecifungo ca 4)
4. Nk’oku olwandiko lwa Luka 5:5-10 luyerekine, gurhi Petro adesire okubimuyerekire, cikone gurhi Yezu amuhîremwo omurhima?
4 Amandiko garhadesiri bulya gurhi Petro aderhaga oku ali “muntu munya-byaha” erhi byaha bihi akag’irhanyako. (Osome Luka 5:5-10.) Cikone nkaba ajijire magosa malebe madarhi. Yezu ahugûkwa oboba Petro al’igwerhe bwakarhumire aciyumva nk’arhashinganini. Kandi Yezu al’imanyire oku Petro akabêzire mwishwekerezi. Oko kwarhuma Yezu abwira Petro ntya omu njira y’olukogo: “Orhayobohaga.” Yezu al’imulangalire n’oko kwarhuma akalamo ka Petro kashanja. Buzinda Petro na mulumuna wage Andreya baleka omukolo gw’okuduba ensamaki bahikira aha baba banafunzi ba Masiya b’akasanzi koshi, ogo muhigo gwabalerhera migisho minji bwenene.—Mk. 1:16-18.
5. Migisho ehi Petro ahâbirwe omu kuhima oboba bwage n’omu kuyemera omulali gwa Yezu?
5 Petro acibwinire bintu binji by’okusomeza bulya ali mwanafunzi wa Kristu. Abwine oku Yezu ajaga afumya abalwala, afukuza abazimu, ciru n’okufûla abafîre. b (Mt. 8:14-17; Mk. 5:37, 41, 42) Kandi Petro acibwinire ecibonekerezi c’obukuze bw’Obwami bwa Yezu bw’omu mango gayisha, ako kali kantu arhayibagiraga ciru n’ehitya. (Mk. 9:1-8; 2 Pt. 1:16-18) Petro abwine ebintu arhakabwine nk’arhabaga mwanafunzi wa Yezu. Oko kwarhumire ashagaluka bwenene bulya ahimire ezo ntanya mbi anacibonera eyo migisho yoshi!
6. Ka Petro ahimire obuzamba bwage duba-duba? Ohugûle.
6 Ciru akaba Petro acibwinire n’okuyumva ebyo byoshi, agendekire alwisa obuzamba bwage. Rhuganirire nyiganyo nsungunu. Erhi Yezu ahugûla gurhi akalibuzibwemwo n’okufâ ly’ahikiriza obulebi bw’Ebibliya, Petro amukalihira. (Mk. 8:31-33) Kabirhi koshi-koshi, Petro n’ezindi ntumwa bakag’ija kadali lugenda owali mukulu egarhi kabo. (Mk. 9:33, 34) Omu budufu buzinda embere z’okufâ kwa Yezu, ho n’aho buzira kurhanya Petro atwa mulume muguma okurhwiri. (Yn. 18:10) Obo budufu bo n’obo, Petro arhondera okuyoboha anahakana kasharhu koshi-koshi omwîra wage Yezu. (Mk. 14:66-72) Oko kwarhuma Petro alaka bwenene.—Mt. 26:75.
7. Bulyo buhi Petro ahâbirwe enyuma z’okufûka kwa Yezu?
7 Yezu arhalekaga entumwa yage yal’ivunisire omurhima. Enyuma z’okufûka kwage, aha Petro obulyo bw’okucib’imuyereka oku amuzigire. Yezu abwira Petro akole n’obwirhohye nka lungere w’ebibuzi byage. (Yn. 21:15-17) Petro ayemera okujira ogo mukolo. Ali e Yeruzalemu olusiku lwa Pentekoste anali egarhi k’Abakristu barhanzi bashigagwa amavurha kugerera iroho litagatifu.
8. Igosa lizibu lihi Petro ajijire erhi ali e Antiyokiya?
8 Ciru n’enyuma z’okuba Mukristu mushige amavurha, Petro al’ishinganine okulwisa obuzamba bwage. Omu mwaka gwa 36 Kano Kasanzi Kirhu (K.K.K.), ho Petro ali erhi omuntu orhakembwirwi orhali Muyahudi ohamagalwa Korneliyo ashigwa amavurha kugerera iroho litagatifu, oko kwayerekana n’obwalagale oku “Nnâmahanga arhajira kabôlo” n’oku abarhali Bayahudi nabo bakajire omu cigamba c’Ecikristu. (Ebj. 10:34, 44, 45, Mashi Bible) Enyuma z’aho, Petro arhondera okulya haguma n’abarhali Bayahudi, ako kali kantu arhakajijire embere z’aho. (Gl. 2:12) Ciru akaba ntyo, Abakristu Bayahudi baguma na baguma bakag’iciyumva nk’Abayahudi n’abarhali Bayahudi barhashinganini balire haguma. Erhi bantu baguma na baguma bagwerhe entanya za ntyo bahika e Antiyokiya, Petro aleka okulira haguma na bene wabo barhali Bayahudi, nkaba bulya akag’iyoboha okugayisa Abakristu Bayahudi. Entumwa Paolo abona obo bulyalya anakalihira Petro embere z’abantu banji. (Gl. 2:13, 14) Ciru akaba ajijire ago magosa, Petro agendekera akolera Yehova. Bici byamurhabire?
BICI BYARHABIRE PETRO LY’AGENDEKERA AKOLERA YEHOVA?
9. Gurhi olwandiko lwa Yowane 6:68, 69 luyerekinemwo obwishwekerezi bwa Petro?
9 Petro ali mwishwekerezi; arhalekaga akantu koshi-koshi karhume arhashimba Yezu. Ayerekine obwishwekerezi bwage mango maguma erhi Yezu aderha kantu kalebe abanafunzi bage barhahugûkagwa. (Osome Yowane 6:68, 69.) Buzira kulinda erhi buzira kulonza amahugûlo, banafunzi banji ba Yezu baleka okumushimba. Cikone Petro arhajiraga ntyo. Al’imanyire oku Yezu yene wagwerhe “ebinwa by’obuzine bw’ensiku n’amango.”
Bulya gurhi ohâbirwe omurhima n’oku Yezu ayerekanagamwo oku al’ilangalire Petro? (Olole ecifungo ca 10)
10. Gurhi Yezu ayerekinemwo oku al’ilangalire Petro? (Olole n’enfoto.)
10 Yezu arhalekaga Petro. Omu budufu buzinda bw’akalamo kage ka hanw’igulu, Yezu al’imanyire oku Petro n’ezindi ntumwa bakamulesire. Ciru akaba ntyo, Yezu al’iyemire n’obwalagale oku Petro akagalusire n’okubêra mwishwekerezi. (Lk. 22:31, 32) Yezu al’imanyire oku “omurhima guba mwangu, ci omubiri guba muzamba.” (Mk. 14:38) Co cirhumire, ciru n’enyuma za Petro okumuhakana, Yezu arhalekaga eyo ntumwa yage. Erhi Yezu afûka abonekera Petro, bibonekine oku ago mango Petro ali yene. (Mk. 16:7; Lk. 24:34; 1 Kr. 15:5) Oko kugwasirwe kube kwahîre eyo ntumwa yal’ivunisire omurhima oburhwali!
11. Gurhi Yezu ayemezizemwo Petro oku Yehova ashibirira amalagirire gage g’omubiri?
11 Yezu ayemezize Petro n’obwalagale oku Yehova amurhabala. Erhi Yezu afûka acibir’irhabala Petro n’ezindi ntumwa bagwarha ensamaki omu yindi njira y’ecisomerine. (Yn. 21:4-6) Kobinali eco cisomerine cayemezize Petro n’obwalagale oku kwakabire kulembu kuli Yehova okushibirira amalagirire gage g’omubiri. Nkaba buzinda eyo ntumwa yakengire enderho za Yezu ziyerekine oku Yehova akashibirire amalagirire ga balya ‘barhang’ilonza Obwami.’ (Mt. 6:33, Mashi Bible) Muli ntyo, ahali h’okuhira omukolo gw’okuduba ensamaki oku nafasi ntazi, Petro ahira omukolo gw’amahubiri oku nafasi ntanzi omu kalamo kage. Ahânyire obuhamirizi n’oburhwali oku lusiku lwa Pentekoste y’omwaka gwa 33 Kano Kasanzi Kirhu (K.K.K.), anarhabala ebihumbi by’abantu bayemera omwanzi mwinja. (Ebj. 2:14, 37-41) Enyuma z’aho, arhabala Abasamariya n’abantu b’agandi mashanja lyo bayemera Kristu. (Ebj. 8:14-17; 10:44-48) Kobinali Yehova akolesize Petro omu njira y’obuhashe ly’alerha abantu ba ngasi lubero omu cigamba.
BICI RHUCIYIGIRIZIZE?
12. Omu kubîka olwiganyo lwa Petro omu bwenge, bici rhushinganine rhukengere erhi akaba rhukola rhugwerhe nsiku nyinji rhuli rhwalwisa buzamba bulebe?
12 Yehova anarhurhabala lyo rhugendekera rhwamukolera. Nkaba kwanaba kuzibu kuli rhwe okugendekera, bwenene erhi akaba rhukola rhugwerhe nsiku nyinji rhuli rhwalwisa buzamba bulebe. Hali amango obuzamba bwirhu bwakabonekana nka buli budarhi bwenene kulusha obu Petro alwisize. Cikone Yehova anarhuha emisi lyo rhurhag’irhama. (Enna. 94:17-19) Kwa lwiganyo, mwene wirhu muguma al’igwerhe olugenzi lw’okujira ecijiro c’eby’enshonyi n’ababo balume myaka minji embere ayige okuli. Arhôla omuhigo gw’okuleka loshi-loshi olo lugenzi lwa ntyo. Cikone, hali amango akag’ilwisa irala libi. Bici byamurhabire ly’arhag’irhama? Ahugwire ntya: “Yehova anarhuhe emisi.” Ayushwire ntya: “Kugerera iroho lya Yehova . . . , naciyigirizize oku byanahashikana [ngendekere] omu njira y’okuli . . . Yehova ahashire okunkolesa, na ciru akaba ngwerhe obuzamba anagendekere ampa emisi.”
Horst Henschel arhonderaga omukolo gw’akasanzi koshi omu lusiku 1/1/1950. K’orhanyize oku aciyunjuzize bulya okolesize akalamo kage omu kukolera Yehova? (Olole ecifungo ca 13, 15) d
13. Gurhi rhwakayigamwo olwiganyo lwa Petro, luganirirwe omu Ebijiro by’Entumwa 4:13, 29, 31? (Olole n’enfoto.)
13 Nk’oku rhwabwine, arhali liguma lyone Petro arhogire omu murhego gw’okuyoboha abantu. Cikone omu kuhûna Yehova emisi, Petro ahashire okukola n’oburhwali. (Osome Ebijiro by’Entumwa 4:13, 29, 31.) Nirhu rhwanahima oboba bwirhu. Rhuganirire ebyahikiraga mwene wirhu muguma ociri musole ohamagalwa Horst, wal’ilamire omu Allemagne y’Abanazi. Arhali liguma lyone ayobohire ebwa masomo erhi bakamuseza oku aderhe “Heil Hitler!” Ahali h’okukalihira Horst, ababusi bage bakasalira haguma naye, n’okuhûna Yehova amuhe oburhwali. Kugerera oburhabale bw’ababusi bage n’okulangalira Yehova, Horst ahikira aha asêra buzibukwe. Buzinda aderha ntya: “Yehova arhandikiriraga ciru n’eliguma.” c
14. Gurhi abagula barhushibirira bakarhulirizamwo balya bali baciyumva bavunisire omurhima?
14 Yehova na Yezu barhakarhuleka. Enyuma z’okuhakana Yezu, Petro al’ishinganine arhôle omuhigo gw’obulagirire. K’akalesire okuba mwanafunzi wa Kristu, erhi akagendekire? Yezu ali amasemberera Yehova ly’obuyemere bwa Petro burhazambanyagya. Yezu abwizire Petro lugenda er’isala anayerekana oku al’iyemire n’obwalagale oku buzinda Petro akahashire okuzibuhya bene wabo. (Lk. 22:31, 32) Petro agwasirwe abe ahâbirwe omurhima omu kukengera ezo nderho za Yezu! Amango rhugwasirwe rhurhôle omuhigo gw’obulagirire, Yehova anakolesa balungere barhushibirira lyo barhuha oburhulirize rhulagirireko lyo rhugendekera rhwabêra bishwekerezi. (Ef. 4:8, 11) Mwene wirhu muguma okola ogwerhe myaka minji ali mugula ohamagalwa Paul anacihangane okuha abandi oburhulirize. Anahûne abali baciyumva nka bakola barhama barhanye lugenda gurhi Yehova abakululaga lyo baja omu okuli. Buzinda anabayemeze n’obwalagale oku Yehova arhakabaleka ciru n’ehitya enyanya z’obuzigire bwage bwishwekerezi. Ashwinjire ntya: “Nabwine gurhi bene wirhu na bali birhu banji bavunisire omurhima bagendekire kugerera oburhabale bwa Yehova.”
15. Gurhi olwiganyo lwa Petro n’olwa Horst luyerekinemwo oku enderho ziri omu Mateyo 6:33 ziri z’okuli?
15 Nk’oku Yehova ashibiriraga amalagirire g’omubiri ga Petro n’ezindi ntumwa, nirhu ashibirira amalagirire girhu g’omubiri erhi rhwakahira omukolo gw’amahubiri oku nafasi ntanzi omu kalamo kirhu. (Mt. 6:33) Oku buzinda bw’Ivita lya Kabirhi ly’Igulu, Horst, rhwaganiriraga embere, alonza okuba painiya. Cikone, ali mukenyi bwenene, anakag’iyoboha oku arhahashe okucihikirigiza amalagirire gage g’omubiri n’okubêra omu mukolo gw’akasanzi koshi. Gurhi akajijire? Ahiga okuhira Yehova omu irhangulo, na muli ntyo ageza omugobe goshi omu mukolo gw’amahubiri amango ecigamba cabo cal’ilambagirirwe na mwangalizi w’omuzunguko. Oku buzinda bw’ogo mugobe, asomerwa bwenene erhi mwangalizi w’omuzunguko amuha emvolopi erhali yandisirwe kw’izino ly’owayirhumaga. Yalimwo enfaranga zirhali nyi zakamurhabire omu mukolo gwage gw’obupainiya miezi minji. Horst abona eyo ngalo nka cemezo c’obwalagale ciyerekine oku Yehova akamushibirire. Kurhangira aho, ahira obunguke bw’Obwami oku nafasi ntanzi omu kalamo kage.—Mal. 3:10.
16. Bulya gurhi kuli kwinja rhuyige binji lugenda olwiganyo lwa Petro n’ebi ayandikaga omu maruba gage?
16 Petro agwasirwe abe ashagalusire bwenene okubona Yezu arhamulekaga ciru n’ehitya, nk’oku anahûnaga embere z’aho! Kristu agendekire akomereza Petro ly’eba ntumwa y’obwishwekerezi na lwiganyo lwinja bwenene oku Bakristu. Omwanzi guganirire gurhi amukomerezagyamwo gulimwo masomo manji g’obulagirire gakarhulerhera obunguke rhweshi. Petro aganirire masomo maguma na maguma muligo n’agandi manji omu maruba abirhi galongozibagwa n’iroho litagatifu arhumiraga ebigamba by’omu myaka igana mirhanzi. Omu cigabi cikulikire, rhwaganirira masomo malebe gali mw’ago maruba na gurhi rhwakagakolesamwo ene.
LWIMBO 126 Ukuwe Macho, Usimame Imara, Ukuwe na Nguvu
a Eci cigabi carheganyizibwe lyo ciyemeza n’obwalagale balya bali balwisa buzamba bulebe oku banabuhima n’okugendekera bakolera Yehova n’obwishwekerezi.
b Enderho z’amandiko manji ziri mw’eci cigabi zirhenzire omu Injili ya Marko. Bibonekine oku ayandisire ebi ayumvizagyako Petro waliho erhi ebyo bintu bijirikana.
c Olole ecigabi c’enganîro z’akalamo ka Horst Henschel cidesire, “Nilichochewa na Uaminifu-Mshikamanifu wa Familia Yangu kwa Mungu,” ciri omu Amuka! y’omu nsiku 22/02/1998 (omu Ciswahiri).
d AMAHUGÛLO G’ENFOTO: Nk’oku rhubwine kw’eyi nfoto eyerekine ebyageraga, Ababusi ba Horst Henschel bakag’isalira haguma naye banazibuhya omuhigo gwage gw’okusêra buzibukwe.
