1. Kasanzi kasungunu embere z’okufâ kw’entumwa Petro, bici iroho litagatifu lyamulongozize okujira?

 ENTUMWA Petro al’imanyire oku al’iyegerire obuzinda bw’akalamo kage. Omu makumi g’emyaka akozire n’obwishwekerezi, alambagire haguma na Yezu, arhondeza amahubiri omu eneo nyinji mpyahya, anakola omu mbaraza eri yalongoza. Cikone hali ogundi mukolo ajijire. Hofi omu mwaka gwa 62-64 Kano Kasanzi Kirhu (K.K.K.), alongozibwa n’iroho litagatifu ly’ayandika maruba abirhi, ko kuderha ecitabu c’Ebibliya ca 1 Petro na 2 Petro. Al’ilangalire oku ago maruba abirhi gakarhabire Abakristu enyuma z’okufâ kwage.—2 Pt. 1:12-15.

2. Bulya gurhi amaruba abirhi Petro ayandikaga gahisire oku kasanzi kakwanine bwenene?

² Petro ayandikaga amaruba gage abirhi galongozibagwa n’iroho omu mango ababo bemezi bali omu “marhangulo ga ngasi lubero.” (1 Pt. 1:6) Abantu babi bakag’ilonza okulerha enyigirizo z’obunywesi n’olungezi lubi omu cigamba c’Ecikristu. (2 Pt. 2:1, 2, 14) Abakristu bal’ilamire omu Yeruzalemu bali hofi bacibonere “obuzinda bw’ebintu byoshi,” ko kuderha okusherezibwa kw’olo lugo n’ehekalu kugerera emirhwe y’Abaroma. (1 Pt. 4:7) Buzira karhinda, amaruba ga Petro garhabire Abakristu lyo babona ebi bal’ishinganine bajire lyo balembera ago mazibu bagwerhe mw’ago mango n’agandi mazibu gakabahikire enyuma z’aho. b

3. Bulya gurhi rhushinganine rhuyige amaruba abirhi galongozibagwa n’iroho Petro ayandikaga?

³ Ciru akaba Abakristu b’omu myaka igana mirhanzi bo Petro  ayandikiraga ago maruba abirhi, Yehova ajijire ago mandishi gaba cigabi c’Akanwa Kage. Co cirhumire, ene rhwanayunguka n’ago maruba. (Rm. 15:4) Bulya rhulamire omw’igulu liri lyagendekeza olugenzi lubi, nirhu rhwanahikirwa n’amazibu gakarhuma kwaba kuzibu kuli rhwe okukolera Yehova. Kandi, hano hofi-hofi rhwacibonera amalibuko madarhi kulusha agahikiraga Abayahudi omu mango g’okusherezibwa kw’olugo lwa Yeruzalemu n’ehekalu yalimwo. Rhwanabona mahano maguma na maguma g’obulagirire omu maruba abirhi ga Petro. Ago mahano garhurhabala rhugendekere rhwalinguza olusiku lwa Yehova, okuhima obwoba bwa bene bantu, n’okuzigirana bwenene rhwene na nnene. Kandi amahano ga ntyo ganarhabala abagula lyo babona gurhi bakashibiriramwo bwinja obuso bwa Nnâmahanga.

4. Nk’oku biyerekinwe omu 2 Petro 3:3, 4, bici byakadundaganya obuyemere bwirhu?

⁴ Rhuzungulusirwe n’abantu barhagwerhi buyemere omu bulebi bw’Ebibliya. Abantu barhuhagalika banarhushekera bulya hakola hali myaka minji rhuli rhwaderha oku obuzinda bw’er’igulu buli hofi. Bantu baguma na baguma banaderha oku obuzinda burhakayisha ciru n’ehitya. (Osome 2 Petro 3:3, 4.) Erhi omumvirhiza wirhu, owirhu munyakazi, erhi omuntu w’omu mulala gwirhu, akaderha enderho za ntyo; obuyemere bwirhu bwanadundagana. Petro ahugwîre ebyakarhurhabala.

5. Bici byarhurhabala lyo rhugendekera rhwaba n’entanya nyinja lugenda obuzinda bw’er’igulu? (2 Petro 3:8, 9)

⁵ Bantu baguma na baguma banabone nka Yehova alegamire okulerha obuzinda bw’er’igulu libi. Enderho za Petro zanarhurhabala lyo rhugendekera rhwaba n’entanya nyinja, bulya arhukengezize oku, oku Yehova abona akasanzi kuba lubero bwenene n’oku bene bantu bakabona. (Osome 2 Petro 3:8, 9.) Kuli Yehova emyaka cihumbi kw’eba nka lusiku luguma. Yehova aba mulembedu, arhalonzizi ciru omuntu yeshi-yeshi asherezibwe. Hano olusiku lwage luhika, er’igulu lyahikira obuzinda. Luli lukengwa lunene bwenene okukolesa akasanzi kacisigire lyo rhuhâna obuhamirizi oku bantu b’amashanja goshi.

6. Gurhi rhwakagendekera ‘rhwacifinjamwo’ okuyisha kw’olusiku lwa Yehova? (2 Petro 3:11, 12)

⁶ Petro arhuyinginzire ‘rhukacifinja’ okuyisha kw’olusiku lwa Yehova. (Osome 2 Petro 3:11, 12.) Gurhi rhwakajiramwo ntyo? Kuli kwinja rhukarhanya bwenene ngasi lusiku, nka bihashikine, oku migisho rhwaba nayo omw’igulu lihyahya. Okacibona oli wayisa ehihusi hicire, oli walya ebiryo binja bwenene, oli wayegereza abazigirwa bawe omu mango g’obufûke, onali wayigiriza abantu balamaga myaka minji egezire lugenda okuhikirizibwa kw’amalebi g’Ebibliya. Okurhanya bwenene kw’ebyo bintu kwanakurhabala ly’ogendekera walinda kwananakulanga ly’orhag’iba nk’orhamanyiri akasanzi rhuli rhwalamamwo. Bulya ‘rhukola rhumanyire’ lugenda amango gayisha, ‘rhurhakarhebwa’ n’abalimu b’obunywesi.—2 Pt. 3:17.

7. Gurhi byakarhubêra enyanya z’okuyoboha bene bantu?

⁷ Amango rhuli rhwacifinja erhi kubîka omu bukengere olusiku lwa Yehova, oko kunarhushumye rhukaganirira abandi omwanzi mwinja. Cikone, omu kanga kaguma na kaguma rhwanarhindira okujira ntyo. Bulya gurhi? Bulya rhwanarhogera omu murhego gw’okuyoboha bene bantu omu kasanzi kalebe. Oko kwahikire Petro. Omu budufu Yezu asambisibagwa, Petro ayabirwa okucimanyisa oku ali mwanafunzi wa Yezu anamuhakana kanji-kanji! (Mt. 26:69-75) Cikone eyo ntumwa yo n’eyo, buzinda  yadesire ntya n’oburhwali: “Murhayobohaga abantu ciru n’ehitya, murharhemukaga.” (1 Pt. 3:14, Mashi Bible) Enderho za Petro zirhuyemezize n’obwalagale oku rhwanahima oboba bwa bene bantu.

8. Bici byakarhurhabala lyo rhuhima oboba bwa bene bantu? (1 Petro 3:15)

⁸ Bici byakarhurhabala lyo rhuhima oboba bwa bene bantu? Petro arhubwizire ntya: “Muhe Kristu olukengwa omu mirhima yinyu.” (Osome 1 Petro 3:15, Mashi Bible.) Oko kuhiziremwo okurhanya bwenene oku cikono n’obuhashe bwa Nnawirhu na Mwami wirhu, Kristu Yezu. Erhi wakaciyumva oyobohire erhi kudirhimana amango ogwerhe obulyo bw’okuganirira abandi omwanzi mwinja, okengere Omwami wirhu. Okamubona omu bwenge bwawe ali arhegeka omu mpingu anazungulusirwe na bamalahika barhakaganjwa. Okengere oku agwerhe “obuhashe bwoshi bw’omu mpingu n’obw’igulu” n’oku aba ‘haguma nirhu ensiku zoshi kuhika aha kuyurha kw’igulu.’ (Mt. 28:18-20) Petro arhuyinginzire oku rhukayorha ‘rhucirheganyize ensiku zoshi’ lyo rhuhalira obuyemere bwirhu. K’olonzize okuhâna obuhamirizi ebwa kazi, ebwa masomo, erhi ahandi hantu? Orhanye embere z’akasanzi lugenda amango wakaba n’obuhashe bw’okujira ntyo, buzinda orheganye ebi wayish’iderha. Ohûne Yehova oburhwali, onalangalire oku akurhabala ly’ohima oboba bwa bene bantu.—Ebj. 4:29.

9. Mango maguma, gurhi Petro ayabirwemwo okuyerekana obuzigire? (Olole n’enfoto.)

⁹ Petro aciyigirizize gurhi akahash’iyerekanamwo obuzigire. Ali ho erhi Yezu aderha ntya: “Mmuhîre irhegeko lihyahya: muzigirane; nk’oku nammuzigire, kwo ninyu mukag’izigirana.” (Yn. 13:34) Ciru akaba ntyo, buzinda Petro arhogera omu murhego gw’okuyoboha bene bantu analahira okulya haguma na bene wabo na bali babo barhali Bayahudi. Entumwa Paolo yahamagire ebi Petro ajiraga oku bwali “bulyalya.” (Gl. 2:11-14) Petro ayemire er’ihano lya Paolo anaciyigiriza kugerera lyo. Omu maruba gage gombi, asegize oku rhurhashinganini rhuciyumve kone rhuzigire bene wirhu na bali birhu, cikone kandi rhugwasirwe rhubayerese obo buzigire.

10. Bici byakarhurhabala lyo ‘rhusima buzira bulyalya’ bene wirhu na bali birhu? Ohugûle. (1 Petro 1:22, Mashi Bible)

¹⁰ Petro adesire oku rhushinganine ‘rhusîme buzira bulyalya’ bene wirhu na bali birhu. (Osome 1 Petro 1:22, Mashi Bible.) “Okuyumva n’okujira ebi okuli kudesire” ko kurhuma rhwaba n’obuzigire bwa ntyo. Oko kuli kuhiziremwo enyigirizo ziyerekine oku “Nnâmahanga arhajira kabôlo.” (Ebj. 10:34, 35, Mashi Bible) Rhurhakarhumikira irhegeko lya Kristu lugenda obuzigire erhi rhwakakabuyeresa bantu balebe bone omu cigamba n’okubula bubuyeresa abandi. Kobinali, rhwanaciyumva rhuyegerire bwenene bantu balebe kulusha abandi, aka Yezu. (Yn. 13:23; 20:2) Cikone Petro arhukengezize oku rhushinganine rhucihangane rhuzigire ‘bene wirhu,’ ko kuderha oku rhube n’obuzigire buli nk’obw’abantu b’omu mulala kuli bene wirhu na bali birhu boshi.—1 Pt. 2:17.

11. Okusimana ‘bwenene n’emirhima yirhu yoshi’ ko kuderha gurhi?

¹¹ Petro arhuyinginzire oku ‘rhusimane bwenene n’emirhima yirhu yoshi.’ Mw’olu lwandiko, okusima erhi kuzigira “bwenene” kuhugwîre okuzigira muntu mulebe ciru akaba kuli kuzibu okumuyeresa obuzigire. Kwa lwiganyo, gurhi rhwakajira erhi mwene wirhu akarhugayisa erhi kurhusarhaza omu njira ndebe? Oku murhondero rhwanalonza okucihola ahali h’okumuyeresa obuzigire. Cikone, Petro aciyigirizize kugerera Yezu oku okucihola kurhashagalusa Nnâmahanga. (Yn. 18:10, 11) Petro ayandisire ntya: “Murhakag’igalula obubi oku bundi. Erhi ebijaci oku bijaci; ci mukahâna obwanga [omugisho] erhikwo.” (1 Pt. 3:9) Okaleka obuzigire bunji bukushumye obe wa lukogo ciru n’okushibirira abantu bakaba bakusarhazize.

12. (a) Bindi bici okusimana bwenene kwakarhushumya rhujire? (b) Bici olonzize ocihangane okujira, nk’oku biyerekinwe omu video edesire Tulinde Umoja Wetu—Ni Zawadi ya Muzuri Sana?

¹² Omu maruba gage marhanzi, Petro akolesize enderho ‘kuzigirana bwenene.’ Obuzigire bwa ntyo, bunazaze arhali byaha bisungunu byone, cikone “byaha binji.” (1 Pt. 4:8, Mashi Bible) Nkaba Petro akengire isomo Yezu amuyigirizagya myaka minji embere z’aho lugenda okubabalira. Ago mango, bibonekine oku Petro al’iyemire oku anaba ali muntu mwinja erhi aderha oku anababalira mwene wabo kuhika “kali nda.” Cikone Yezu amuyigiriza, anarhuyigirizize nirhu, oku rhukababalira “kali 77,” ko kuderha buzira lugero. (Mt. 18:21, 22, NWT) Erhi wakabona nka kuli kuzibu okukolesa er’ihano, orhavunikaga omurhima! Bulya abakozi ba Yehova boshi barhaba bimana, hali amango babona oku kuli kuzibu okubabalira. Akantu k’obulagirire bwenene wakajira ene kuli kujira okwawe koshi ly’obabalira mwene winyu n’okujira omurhûla haguma naye. c

13. Bici byakarhuma kwaba kuzibu oku bagula okuyabula ebibuzi bya Nnâmahanga?

¹³ Kobinali, Petro arhayibagiraga ciru n’ehitya ezi nderho Yezu amubwiraga enyuma z’okufûka kwage: “Yabula ebibuzi byani.” (Yn. 21:16) Akaba oli mugula, omanyire oku er’irhegeko likuyerekire nawe. Cikone, kwanaba kuzibu oku mugula okuba n’akasanzi k’okuhikiriza ogo mukolo gw’obulagirire. Abagula bagwasirwe barhang’ishibirira amalagirire g’emilala yabo bonene omu hali y’omubiri, y’ekandalala n’ey’ekiroho. Kandi banayerekane olwiganyo lwinja lugenda omukolo gw’amahubiri, okurheganya n’okugeza ebigabi by’entimanano z’ecigamba, entimanano z’omuzunguko n’entimanano z’e eneo. Kandi, baguma na baguma muli bo banakole omu Komite Zijira Olushangi n’Ehopitali erhi omu mukolo gw’obubasi bw’omu eneo yabo (LDC). Kobinali abagula bajira mikolo minji!

14. Bici byakashumya abagula lyo bayabula obuso bwa Nnâmahanga? (1 Petro 5:1-4)

¹⁴ Petro ayinginzire ababo bagula ntya: “Muyabule obuso bwa Nyamuzinda.” (Osome 1 Petro 5:1-4.) Akaba oli mugula, rhumanyire oku oba ozigire bene winyu na bali binyu onaba olonzize okubayabula. Ciru akaba ntyo, hali amango wakaciyumva nk’ogwerhe binji bya kujira erhi orhamire bwenene orhakanahasha okuhikiriza ogo mukolo. Gurhi wakajira? Obwire Yehova oku oli waciyumva. Petro ayandisire ntya: “Owahirwe omukolo gw’oburhumisi, agukole n’emisi ya Nnâmahanga.” (1 Pt. 4:11) Bene winyu na bali binyu banaba bali balwisa amazibu garhakahwa mw’er’igulu. Cikone okengere oku Yezu Kristu, “lungere w’abangere,” anabarhabala kulusha oku wakajiramwo ntyo. Anajira ntyo ene n’omw’igulu lihyahya. Ebi Nnâmahanga ahûnyire abagula kone kuli kuzigira bene wabo na bali babo, okubayabula, n’‘okuba lwiganyo lw’obuso.’

15. Gurhi mugula muguma ayabulamwo obuso bwa Nnâmahanga? (Olole n’enfoto.)

¹⁵ William, okola ogwerhe myaka minji ali mugula, aba ahugûsirwe obulagirire bw’okuyabula obuso. Erhi obulwala bw’okuyahukira bw’e COVID-19 burhangira, ye n’ababo bagula bahira oku nafasi ntanzi omukolo gw’okuhamagala ngasi muntu omu cikundi cabo ngasi mugobe. Ahugwîre ecarhumaga bajira ntyo: “Banji muli bene wirhu na bali birhu bakag’ilama bone omu nyumpa yabo, kwakanabire kulembu  kuli bo okuba n’entanya mbi.” Amango mwene wirhu erhi mwali wirhu agwerhe mazibu malebe, William anayumvirhize bwinja-bwinja ly’amanya amalagirire gage n’ebiri byamuhangayisa. Buzinda anabone ebi akarhabalamwo oyo mwene wirhu erhi mwali wirhu, kanji-kanji enabe video y’oku site yirhu. Adesire ntya: “Omukolo gw’okuyabula obuso guli gwa bulagirire ene kulusha agandi mango goshi. Rhunacihangane bwenene lyo rhurhabala abantu bayige lugenda Yehova; ntyo ko rhunashinganine rhucihangane lyo rhuyabula obuso bwage, omu kurhabala ebibuzi bya Yehova bigendekere byabêra omu okuli.”

16. Omu njira nci rhwakakolesamwo amasomo rhwaciyigirizize kurhenga omu maruba abirhi ga Petro?

¹⁶ Rhwaganirire masomo masungunu gone kurhenga omu maruba abirhi ga Petro galongozibagwa n’iroho litagatifu. Nkaba wabwine kantu kalebe wakalonza okujirira amajambere. Kwa lwiganyo, k’olonzize okarhanya bwenene oku migisho rhwaba nayo omw’igulu lihyahya? Ka wacihirireho omuhigo gw’okuhâna obuhamirizi ebwa kazi, ebwa masomo, erhi handi hantu? K’obwine njira nguma na nguma wakayeresamwo bene winyu na bali binyu buzigire bunji bwenene? Mwe bagula, ka muhizire okuyabula ebibuzi bya Yehova n’obushiru na buzira kusezibwa? Erhi wakacilabiriza bwinjinja nkaba wanabona oku ogwerhe buzamba bulebe, cikone orhavunikaga omurhima. “Nyakasane aba mwinja,” anakurhabala ly’ojira amajambere. (1 Pt. 2:3) Petro arhuyemezize n’obwalagale ntya: “Nyamuzinda . . . ammukomeza, ammuzibuhya, anammujire ntadundagana.”—1 Pt. 5:10.

17. Erhi rhwakagendekera rhwakolera Yehova n’obwishwekerezi n’okumuleka arhukomereze, bici oko kwakarhulerhera?

¹⁷ Mango maguma Petro aciyumvirhe oku arhashinganini okuba haguma na Mugala wa Nnâmahanga. (Lk. 5:8) Cikone, kugerera oburhabale bw’obuzigire bwa Yehova na Yezu, Petro agendekire aba mwanafunzi wa Kristu. Muli ntyo, Petro ayemererwa “okuyish’ija omu Bwami bw’ensiku n’amango bwa Nnawirhu n’Omucunguzi wirhu Yezu Kristu.” (2 Pt. 1:11) Olo luli luhembo lwinja bwenene! Erhi wakagendekera wakolera Yehova n’obwishwekerezi nk’oku Petro ajiraga n’okuyemera Yehova akukomereze, nawe wanahâbwa oluhembo lw’obuzine bw’ensiku n’amango. ‘Obuyemere bwawe bwanakuhisa oku bucire bwawe.’—1 Pt. 1:9.