ECIGABI C’OKUYIGA 38
Mwe Misole, Kalamo Kaci Mulonzize Mube Nako?
“Obugerêreze bwanakâkulanga.”—MIG. 2:11, Mashi Bible.
LWIMBO 135 Yehova Anakuomba “Ukuwe na Hekima”
EBI RHWAYIGA a
1. Kanga kahi kazibu Yowasi, Uziya, na Yosiya balwisize?
ORHANYE obe mwami w’olubaga lwa Nnâmahanga onaciri mwana kone erhi murhabana w’omushûko! Gurhi wakakolesamwo emisi yawe n’obuhashe bwawe? Ebibliya eganirire misole milebe yahikiraga okuba bami b’e Yuda. Kwa lwiganyo, Yowasi agwerhe myaka 7 yone, Uziya agwerhe myaka 16, na Yosiya agwerhe myaka 8. Orhanye gurhi oko kwakabire kuzibu bwenene kuli bo! Cikone ciru akaba birhali bilembu kuli bo, kugerera oburhabale bwa Yehova n’abandi, bahikira okujira bintu binji binja.
2. Bulya gurhi rhushinganine rhuyige omwanzi guganirire Yowasi, Uziya, na Yosiya?
2 Rhurhali bami erhi bamikazi, cikone rhwanaciyigiriza masomo manji g’obulagirire kugerera abo bantu basharhu baganirirwe omu Bibliya. Barhôzire emihigo minja, cikone hali n’amango barhôzire emihigo mibi. Omu kukolesa enyiganyo zabo, rhwabona bulya gurhi rhushinganine rhucishoge abîra binja, rhugendekere rhwabêra birhohye, n’okugendekera rhwalongereza Yehova.
OCISHOGE ABÎRA BINJA
Ene, byanahashikana okukulikira olwiganyo lwa Yowasi omu kuyumvirhiza abîra binja (Olole ecifungo ca 3, 7) c
3. Gurhi Yehoyada arhabiremwo Mwami Yowasi ly’arhôla emihigo minja?
3 Oyige olwiganyo lwa Yowasi omu kurhôla emihigo minja. Amango Mwami Yowasi aciri musole, arhôzire omuhigo mwinja. Bulya arhal’igwerhe ishe, akulikira obulongozi ahâbagwa na Yehoyada, Kuhani Mukulu mwishwekerezi. Oyo kuhani ayigiriza Yowasi nka mwana wage ye nnene. Enyanya z’oko, Yowasi ayerekana obwenge omu kuhiga okulongoza omu nterekêro ecîre n’omu kukolera Yehova. Ciru Yowasi ajira emipango ly’ehekalu ya Yehova elumulwa.—2 Nga. 24:1, 2, 4, 13, 14.
4. Bunguke buhi rhuba nabo omu kuzigira n’okurhumikira amarhegeko ga Yehova? (Emigani 2:1, 10-12)
4 Erhi akaba oli wayigirizibwa okuzigira Yehova n’okulama kushimbana n’amakanuni gage, oli wahâbwa engalo y’engulo ndarhi. (Osome Emigani 2:1, 10-12.) Ababusi bawe banakukomereza omu njira nyinji. Rhuganirire gurhi ishe wa mwali wirhu muguma ohamagalwa Katya amurhabalaga okurhôla emihigo minja. Ngasi lusiku erhi ishe akamulusize ebwa masomo, akag’iganirira olwandiko lw’olusiku haguma naye. Katya adesire ntya: “Ezo nganîro, zakag’intabala okulwisa akanga kazibu nakag’irhimanana nako omu mulegerege.” Cikone, gurhigi wakajira erhi wakabona nk’obulongozi buyimangire oku Bibiliya ababusi bawe bali bakuha buli bwarhuma orhaba n’oluhuma? Bici byakakurhabala ly’orhumikira obulongozi bwabo? Mwali wirhu muguma ohamagalwa Anastasia akengire oku ababusi bage bakag’iciha akasanzi k’okumuhugûlira bulya gurhi bahizireho marhegeko malebe. Adesire ntya: “Oko kwantabire ntakag’ibona ago marhegeko nka bihanzo, cikone nka bulanzi bw’obuzigire.”
5. Gurhi ebijiro byawe byakarhuma Yehova n’ababusi bawe baciyumva? (Emigani 22:6; 23:15, 24, 25)
5 Erhi wakakakolesa obulongozi buyimangire oku Mandiko oli wahâbwa, wanashagalusa ababusi bawe. N’akantu k’obulagirire bwenene, wanashagalusa Nnâmahanga na kandi wanajira obwîra bwagendekera ensiku zoshi haguma naye. (Osome Emigani 22:6; 23:15, 24, 25.) K’oko kurhakuhîri ecirhumire cinja c’okuyiga olwiganyo lwa Yowasi amango aciri musole?
6. Mahano ga bandi Yowasi arhondire okuyumvirhiza, na bici oko kwamudwirhire? (2 Enganîro 24:17, 18)
6 Ociyigirize kugerera emihigo mibi ya Yowasi. Enyuma z’okufâ kwa Yehoyada, Yowasi acishoga abîra babi. (Osome 2 Enganîro 24:17, 18.) Ahiga okuyumvirhiza abaluzi b’e Yuda barhal’izigire Yehova. Nkaba nawe oyemire oku Yowasi al’ishinganine ayake abo bantu babi. (Mig. 1:10) Ahali h’okujira ntyo, ayumvirhiza abo bal’idesirwe mpu bîra bage. Cikone, erhi Zakariya muzala wa Yowasi alonza okumuhanula, Yowasi amunigisa. (2 Nga. 24:20, 21; Mt. 23:35) Oko ajiraga kwali kubi bwenene bwanali buhwinja bwenene! Yowasi arhondire bwinja omu kalamo kage, cikone eby’okugayisa, ahikira aha aba mugoma na munizi. Buzinda, abakozi bage yene bamuniga. (2 Nga. 24:22-25) Akalamo kage kakabire lubero bwenene acigendekerage ayumvirhiza Yehova n’abantu bazigira Yehova! Isomo lihi wakalonza okuciyigiriza kugerera olo lwiganyo?
7. Bîra bahi oshinganine ocishoge? (Olole n’enfoto.)
7 Isomo liguma rhwakaciyigiriza kugerera omuhigo mubi Yowasi arhôlaga liri ly’eli: Rhushinganine rhucishoge abîra babà lwiganyo lwinja kuli rhwe, ko kuderha abîra bazigira Yehova banalonza okumushagalusa. Rhurhashinganini rhucijirire abîra bagwerhe emyaka yirhu bone. Okengere oku Yowasi ali murho bwenene kulusha omwîra wage Yehoyada. Lugenda abîra ocishoga, okacidosa ntya: ‘Ka banantabale lyo nzibuhya obuyemere bwani muli Yehova? Ka banampe omurhima ndame kushimbana n’amakanuni ga Nnâmahanga? Ka banaganire lugenda Yehova n’enyigirizo zage z’obulagirire? Ka baba bakenzire amakanuni ga Nnâmahanga? Ka banambwire kone ebi ndonzize nyumve, erhi ka bajira oburhwali bw’okumpanula erhi nakahabuka?’ (Mig. 27:5, 6, 17) Kobinali, erhi akaba abîra bawe barhaba bazigire Yehova, orhakaba obalagirireko. Cikone erhi akaba ojira abîra baba bazigire Yehova, ocishwekere kuli bo, ensiku zoshi banakurhabala!—Mig. 13:20.
8. Erhi akaba rhunakolese e site y’e Enternete y’okuganira na bantu banji, bici rhushinganine rhukarhanyako?
8 Esite z’e Enternete z’okuganira na bantu banji zanarhurhabala lyo rhugendekera rhwaganira n’abantu b’omulala gwirhu n’abîra birhu. Cikone, bantu banji banakolese eyo njira lyo barhangaza abandi, omu kuhira oku site enfoto n’amavideo g’ebi baguzire erhi ebi bajijire. Erhi akaba onakolese e site y’e Enternete y’okuganira na bantu banji, ocidose ntya: ‘K’ebinshumya nkolese eyo site kuba kurhangaza abandi? K’omuhigo gwani kuba kushangira kantu kalebe kinja haguma n’abandi, erhi ka kuba kulonza bankunge? Ka nandeke abantu bakolesa eyo site bashumye entanya zani, enderho zani, n’ebijiro byani omu njira mbi?’ Mwene wirhu Nathan Knorr, wakoleraga omu Mbaraza Eri Yalongoza, ahânyire er’ihano: “Orhakag’ilonza okusimisa abantu. Erhi wakalonza okusimisa abantu wanahikira aha orhacisimisizi ciru n’omuguma. Okasimisa Yehova, wasimisa ngasi boshi bamuzigira.”
RHUSHINGANINE RHUGENDEKERE RHWABA BIRHOHYE
9. Bici Yehova arhabire Uziya okujira? (2 Enganîro 26:1-5)
9 Oyige olwiganyo lwa Uziya omu kurhôla emihigo minja. Amango Mwami Uziya ali musole, ali mwirhohye. Aciyigirizize ‘okurhinya Nyamuzinda.’ Na Yehova amugishire myaka minji omu myaka 68 alamire. (Osome 2 Enganîro 26:1-5.) Uziya ahimire mashanja manji omu mashanja g’abashombanyi anajira okwage koshi ly’evile ya Yeruzalemu elangwa bwinja. (2 Nga. 26:6-15) Kobinali Uziya ashagalukire ebintu byoshi Nnâmahanga amurhabire ajire.—Muh. 3:12, 13.
10. Bici byahikire Uziya?
10 Ociyigirize kugerera emihigo mibi ya Uziya. Mwami Uziya al’ikomire okuha abandi obulongozi. K’oko ko kwarhumire arhanya oku akajijire ngasi kantu alonzize? Lusiku luguma Uziya aja omu hekalu ya Yehova n’enyanya z’okuhanjalika ayôca obukû oku mazabahu, n’obo abami barhal’iyemerirwe okujira ntyo. (2 Nga. 26:16-18) Kuhani Mukulu Azariya alonza okumuhanula, cikone Uziya agaya bwenene. Eby’okugayisa kuli kubona oku, Uziya ashereza obwishwekerezi bwage kuli Yehova anahâbwa obuhane omu kuba mushomyo. (2 Nga. 26:19-21) Akalamo kage kakabire lubero bwenene acigendekerage abêra mwirhohye!
Ahali h’okucikungira ebi rhwahikirizize, rhushinganine rhuhe Yehova irenge kw’ebi rhugwerhe obuhashe bw’okujira (Olole ecifungo ca 11) d
11. Bijiro bihi byakayerekana erhi rhuli birhohye erhi nanga? (Olole n’enfoto.)
11 Erhi Uziya aba n’emisi, ayibagira oku Yehova wamuhâga eyo misi ye wanarhumaga ayololoka. Isomo lihi rhuciyigirizize? Kuli kwinja rhukakengera oku emigisho rhugwerhe n’emikolo rhujira omu cigamba emwa Yehova birhenga. Ahali h’okucikungira ebi rhwahikirizize, rhushinganine rhukaha Yehova irenge enyanya z’ebi rhugwerhe obuhashe bw’okujira. b (1 Kr. 4:7) Rhugwasirwe rhube birhohye n’okuhugûkwa oku rhurhaba bimana n’oku rhuba rhulagirire oku buhane. Mwene wirhu muguma oli omu myaka 60, ayandisire ntya: “Naciyigirizize okurhakacibona nka ntakajira igosa ciru n’ehitya. Erhi nakahâbwa obuhane enyanya z’amagosa g’obuhwinja njira mango maguma na maguma, nancihangane okujira empindulo n’okugendekera embere.” Kobinali amango rhuli rhwayoboha Yehova n’okugendekera rhwaba birhohye, rhunabe n’omwishingo omu kalamo.—Mig. 22:4.
OGENDEKERE WALONGEREZA YEHOVA
12. Gurhi Yosiya alongerezizemwo Yehova amango ali mwana-rhabana w’omushûko? (2 Enganîro 34:1-3)
12 Oyige olwiganyo lwa Yosiya omu kurhôla emihigo minja. Yosiya ali murhabana w’omushûko erhi arhondera okulongereza Yehova. Al’ilonzize okuyiga lugenda Yehova n’okujira obulonza bwage. Akalamo karhali kalembu kuli oyo mwami murho. Al’igwasirwe ahalire enterekêro ecîre amango enterekêro y’obunywesi yal’iyunjwire omu cihugo. Na kobinali ajijire ntyo! Embere Yosiya ayeneze myaka 20, arhondera okukûla enterekêro y’obunywesi omu cihugo.—Osome 2 Enganîro 34:1-3.
13. Gurhi okucihâna emwa Yehova kwakakurhabala omu kalamo kawe ka ngasi lusiku?
13 Ciru akaba ociri musole bwenene, wanahiga okuyiga olwiganyo lwa Yosiya omu kulongereza Yehova n’okuciyigiriza okushagalukira amorhere gage. Okujira ntyo kwanakushumya ocihâne emwage. Gurhi oko kucihâna emwage kwakakurhabala omu kalamo kawe ka ngasi lusiku? Luke, wabatizibagwa erhi agwerhe myaka 14, adesire ntya: “Kurhangira ene, nahira okukolera Yehova oku nafasi ntanzi omu kalamo kani na kandi nakacihangana okumushagalusa.” (Mk. 12:30) Gwanaba mugisho bwenene kuli we erhi akaba nawe olonzize okujira ntyo!
14. Ohâne enyiganyo ziyerekine gurhi abana b’omushûko bali bayigamwo olwiganyo lwa Mwami Yosiya.
14 Erhi akaba oli mukozi wa Yehova ociri musole, mazibu gahi wakalwisa? Johan, wabatizibagwa erhi agwerhe myaka 12, aganirire gurhi ababo banafunzi bamuseza ly’anywa irhabi ly’ecielektronike. Ly’aba n’emisi y’okuhagalika ago mashumi, Johan anacikengeze oku okunywa er’irhabi kwanashereza amagala gage n’obwîra bwage haguma na Yehova. Rachel, wabatizibagwa erhi agwerhe myaka 14, ahugwîre bici bimurhabala ly’alwisa amazibu arhimanana nago ebwa masomo. Adesire ntya: “Nancihangane okusegeza obwenge oku kantu kalebe k’ekiroho. Kwa lwiganyo, isomo lilebe ly’ehistware lyanankengeza mwanzi mulebe gw’Ebibliya erhi bulebi bulebe. Erhi enshambalo haguma na muntu mulebe zanankengeza olwandiko lw’obulagirire nakamuganirira.” Amazibu oli walwisa ganaba gali lubero n’aga Mwami Yosiya alwisagya, cikone wanaba n’obwenge na mwishwekerezi akage. Okulwisa amazibu onaciri musole kwanakurheganya ly’olwisa agandi mazibu warhimanana nago omu myaka eri embere.
15. Bici byarhabire Yosiya ly’akolera Yehova n’obwishwekerezi? (2 Enganîro 34:14, 18-21)
15 Erhi Mwami Yosiya agwerhe myaka 26, arhondera okulumula ehekalu. Erhi ali ajira ogo mukolo, abandâna “ecitabu c’amarhegeko, aga Nyamuzinda ahâga Musa.” Erhi ciri casomwa, oko kwashumya mwami arhôle omuhigo gw’okurhumikira ebi cali cidesire. (Osome 2 Enganîro 34:14, 18-21, Mashi Bible.) K’olonzize okasoma Ebibliya ngasi mango? Akaba warhangire okuyisoma, k’onashagalukire okujira ntyo? K’onabîke amandiko gakakurhabala? Luke, rhwaganiriraga embere, anayandike omu citabu entanya abwine zimusimisize. Okujira akantu kashushine n’ako kwanakurhabala ly’okakengera amandiko g’Ebibliya erhi entanya zikusimisize? Oku wagendekera wamanya Ebibliya n’okuyizigira, ko wanagendekera walonza okukolera Yehova. N’aka Mwami Yosiya, Akanwa ka Nnâmahanga kanakushumya ojire ebishinganine.
16. Bici byarhumaga Yosiya ajira igosa lizibu, n’isomo lihi oko kurhuyigirizize?
16 Ociyigirize kugerera omuhigo mubi gwa Yosiya. Erhi Yosiya agwerhe myaka hofi 39, ajira igosa lyarhumaga aheza obuzine bwage. Acilangalira yene ahali h’okuhûna Yehova obulongozi. (2 Nga. 35:20-25) Hali isomo oko kurhuyigirizize. Rhube rhukola rhukuzire bwenene erhi nanga erhi rhube rhukola rhugwerhe myaka minji rhuli rhwayiga Ebibliya erhi nanga, rhugwasirwe rhugendekere rhwalonza obulongozi bwa Yehova. Oko kuhiziremwo okuhûna Yehova obulongozi ngasi mango kugerera isala, okuyiga Akanwa kage, n’okuyumvirhiza amahano g’Abakristu bakuzire kiroho. Oko kwanarhurhabala rhuyake okujira amagosa madarhi kwananarhurhabala rhube n’omwishingo.—Yk. 1:25.
MWE MISOLE, MWANABA N’AKALAMO K’OMWISHINGO
17. Masomo gahi g’obulagirire rhwaciyigirizize kugerera emyanzi eganirire bami basharhu b’e Yuda?
17 Hali bintu binji binja wakajira amango ociri musole. Omwanzi guganirire Yowasi, Uziya, na Yosiya guyerekine oku emisole yanarhôla emihigo minja n’okulama akalamo kashagalusize Yehova. Nk’oku rhwabwine, omuntu anarhondera bwinja agali nayusa kubi. Ciru akaba ntyo, rhwanayiga ebintu binja abo bami bajijire n’okuyâka amagosa bajiraga. Erhi wakajira ntyo, wanaba n’akalamo k’omwishingo.
Omu busole bwage, Daudi ayegerire Yehova. Ayemerwa naye, n’akalamo kage kaba ka mwishingo (Olole ecifungo ca 18)
18. Nyiganyo zihi ziganirirwe omu Mandiko ziyerekine oku wanaba n’akalamo k’omwishingo? (Olole n’enfoto.)
18 Amandiko gaganirire eyindi misole yayegerire Yehova, yayemerwa naye, yanalama akalamo k’omwishingo. Daudi ali muguma wa muliyo. Erhi aciri musole, acishoga okuba mwîra wa Yehova na buzinda aba mwami mwishwekerezi. Kobinali, hali amango ajijire amagosa, cikone al’iyemirwe na Nnâmahanga. (1 Bam. 3:6; 9:4, 5; 14:8) Okuyiga lugenda akalamo ka Daudi na gurhi akoleraga Nnâmahanga n’obwishwekerezi kwanakuha omurhima n’okukushumya. Erhi kandi omw’ifunzo lyawe wanahiga okuyiga lugenda olwiganyo lwa Marko erhi olwa Timoteyo. Barhonderaga okukolera Yehova erhi banaciri misole bwenene, banagendekera bamukolera n’obwishwekerezi. Omuhigo gwabo gw’okukolera Yehova gwamushagalusize gwanabalerhera omwishingo.
19. Kalamo kaci olonzize obe nako?
19 Oku oli wakolesa akalamo kawe ene ko kwakarhuma kaba kinja erhi kabi omu mango gayisha. Erhi wakalangalira Yehova ahali h’okulangalira obumanye bwawe we nnene, oko kwanarhuma alongoza enjira zawe. (Mig. 20:24) Wanaba n’akalamo kinja na ka mwishingo. Okengere oku Yehova anashagalukire bwenene ebi omujirira. Okukolera Larha wirhu w’obuzigire w’omu mpingu yo njira nyinja bwenene wakakolesamwo akalamo kawe.
LWIMBO 144 Kaza Macho ku Zawadi!
a Mwe misole, Yehova amanyire oku munarhimanane n’amazibu gakarhangula obwîra bwinyu haguma naye. Gurhi mwakarhôlamwo emihigo minja yakashagalusa Sho w’omu mpingu? Rhwaganirira nyiganyo za barhabana basharhu bahikiraga okuba bami b’e Yuda. Olole bici wakaciyigiriza kugerera emihigo yabo.
b Olole ecisanduku cidesire “Uepuke ‘Unyenyekevu wa Kinafiki’” ciri omu mwanzi guli oku jw.org gudesire “Ni Jambo ya Maana Kujulikana Sana ku Site za Enternete za Kupashana Habari?”
