1-2. Bulya gurhi rhushinganine rhusimisibwe n’omwanzi guganirire Samusoni?

 BICI orhanyako erhi oyumva izino Samusoni? Nkaba onarhanye lugenda omulume wagwerhe emisi yago-yago. Na ntyo kobinali. Cikone Samusoni arhôzire omuhigo mubi gwanamulerhera mazibu manji. Ciru akaba ntyo, Yehova asegize obwenge oku buyemere bwa Samusoni anayemera buyandikwe omu Bibliya oku bunguke bwirhu.

² Yehova akolesize Samusoni ly’ahikiriza ebintu by’okusomeza n’okurhabala olubaga lwage al’icishozire lw’Abaisraheli. Magana g’emyaka enyuma z’okufâ kwa Samusoni, Yehova alongozize entumwa Paolo n’iroho lyage litagatifu ly’eyandika izino lya Samusoni omu mubalè gw’abalume bagwerhe obuyemere bwago-bwago. (Hb. 11:32-34) Olwiganyo lwa Samusoni lwanarhuha omurhima. Akag’icikubagira Yehova, ciru n’omu mango ali omu kanga kazibu. Lekagi rhuganirire gurhi rhwakahâbwamwo omurhima n’agandi masomo g’obulagirire rhwakaciyigiriza kugerera olwiganyo lwage.

3. Mukolo guhi Samusoni ahâbirwe?

³ Erhi Samusoni aburhwa, Abafilistini bakag’irhegeka ishanja ly’Abaisraheli banakag’ililibuza. (Bac. 13:1) Okurhegeka kwabo omu njira y’obuminya kwalerhera Abaisraheli malibuko manji bwenene. Yehova acishoga Samusoni ly’‘arhangira okucungula bene Israheli omu maboko g’Abafilistini.’ (Bac. 13:5) Cikone ogo gwali mukolo muzibu bwenene! Samusoni al’igwasirwe alangalire Yehova ly’ahikiriza ogo mukolo muzibu.

4. Gurhi Yehova arhabiremwo Samusoni ly’acilikuza oku Bafilistini? (Abaciranuzi 15:14-16)

 ⁴ Rhuganirire olwiganyo luyerekine gurhi Samusoni alangaliragamwo Yehova alangalira n’oburhabale bwage. Mango maguma, omurhwe gw’Abafilistini gwayish’igwarha Samusoni e Lehi, byanahashikana oku olo lugo lwali omu eneo y’e Yuda. Abalume b’e Yuda bayoboha, n’oko kwarhuma bahiga okuhira Samusoni omu maboko g’omushombanyi. Abantu b’emwabo Samusoni bamushweka bwinja na migozi ibirhi mihyahya banamuhekera Abafilistini. (Bac. 15:9-13) Cikone, iroho ‘lya Nyamuzinda lyamuha emisi’ anakonola eyo migozi. Buzinda “anacishimana omwanganga mubishi gw’endogomi [punda],” agurhologola, anagukolesa omu kuniga Bafilistini 1 000!—Osome Abaciranuzi 15:14-16.

5. Erhi Samusoni akolesa omwanganga gwa punda, gurhi oko kwayerekinemwo oku al’ilangalire Yehova?

⁵ Bici byarhumaga Samusoni akolesa omwanganga gwa punda? Ako kavuha karhakag’ikolesibwa nka cikolanwa c’okulwa ivita! Buzira karhinda, Samusoni al’imanyire oku Yehova ye wamurhabala ahime, ciru akakolesa cikolanwa cihi c’okulwa ivita. Kobinali, oyo mulume w’obuyemere akolesize ebyanali ho ly’ahikiriza obulonza bwa Yehova. Samusoni ahima abo balume boshi bulya al’ilangalire Yehova.

6. Amango rhuli rhwahikiriza emikolo yirhu y’eciteokrasi, bici olwiganyo lwa Samusoni lwakarhuyigiriza?

⁶ Nirhu Yehova anarhuha emisi y’okuhikiriza ngasi ebi arhuhûnyire rhujire, ciru akaba bibonekine kuli rhwe nka birhakahashikana. Nkaba Nnâmahanga anajira ntyo omu njira yakarhusomeza. Olangalire oku Yehova, wahaga Samusoni emisi, akurhabala ly’ohikiriza obulonza bwage erhi wakacikubagira oburhabale bwage.—Mig. 16:3.

7. Lwiganyo luhi luyerekine obulagirire bw’okulonza obulongozi bwa Yehova?

⁷ Bene wirhu na bali birhu banji bali bajira emikolo y’obubasi bw’eciteokrasi bayerekine oku baba balangalire Yehova. Omu mango ga mîra, kanji-kanji bene wirhu bo bakag’icapa n’okuyubaka Enyumpa mpyahya z’Obwami ciru n’eyindi myubako. Cikone bulya bantu banji bali babatizibwa, ikubuliro lyahikira aha  lyajira empindulo. Bene wirhu bali balongoza bahûna Yehova obulongozi banakolesa obulenga buhyahya, nk’okugula enyumpa ziyosire ziyubasirwe n’okuzilumula. Mwene Wirhu Robert, wakolaga oku mikolo minji y’obubasi bw’omw’igulu lyoshi omu myaka egezire, adesire ntya: “Oku murhondero, kurhali kulembu kuli bantu baguma na baguma okulunga okuboko eyo mpindulo.” Agendekire okuderha ntya: “Oko kwali lubero bwenene n’ebi rhwakag’ijira omu kasanzi ka myaka minji. Cikone bene wirhu bali babidu okucipatanisa n’eyo mpindulo, binabonekine n’obwalagale oku Yehova ali agisha eyo mpindulo.” Olo luli lwiganyo luguma lone luyerekine gurhi Yehova ali alongoza abantu bage ly’ahikiriza obulonza bwage. Kasanzi oku kandi, kuli kwinja rhukacidosa ntya: ‘Ka nanonze obulongozi bwa Yehova n’okuba mubidu okujira empindulo lyo mmukolera omu njira nyinja nk’oku binahashikine?’

8. Mango maguma erhi Samusoni ayumva enyorha bwenene, gurhi ajijire?

⁸ Nkaba wasomire lugenda ezindi hali Samusoni ajiragamwo ebintu by’okusomeza. Yene aniga entale, na buzinda aniga balume 30 omu lugo lw’Abafilistini lw’e Ashkeloni. (Bac. 14:5, 6, 19) Samusoni al’imanyire oku arhakahashire ciru n’ehitya okujira ebyo bintu buzira burhabale bwa Yehova. Oko kwabonekine n’obwalagale omu kanga kaguma ayumvagya enyorha bwenene enyuma z’okuniga Bafilistini 1 000. Gurhi ajijire? Ahali h’okucilangalira yene ly’apata amishi g’okunywa, ahûna Yehova oburhabale.—Bac. 15:18.

9. Gurhi Yehova ashuzizemwo isala lya Samusoni ly’okumuhûna oburhabale? (Abaciranuzi 15:19, Mashi Bible)

⁹ Yehova ashuza omusengero gwa Samusoni gw’okumuhûna oburhabale omu kurhondeza enshôko y’amishi omu njira y’ecisomerine. Erhi Samusoni anywa kw’ago mishi, “ashub’izibuha.” (Osome Abaciranuzi 15:19, Mashi Bible.) Bibonekine oku eyo nshôko mpyahya y’amishi yagendekire yabaho myaka minji enyuma z’aho erhi omulebi Samweli alongozibwa n’iroho litagatifu ly’ayandika ecitabu c’Abaciranuzi. Abaisraheli bakag’ibona ago mishi gali gahulula nkaba bakag’ikengera oku erhi bakacikubagira Yehova, anabarhabala omu mango balagirire oku burhabale.

10. Bici rhugwasirwe rhujire lyo rhuhâbwa oburhabale bwa Yehova? (Olole n’enfoto.)

¹⁰ Nirhu rhushinganine rhukahûna Yehova oburhabale ciru rhwakaba rhugwerhe buhashe buhi erhi rhube rhwahikirizize bintu bihi omu mukolo gwage. Rhushinganine rhube ba lugero n’okuyemera oku erhi rhwakacikubagira Yehova lyone rhwakahash’ijira ebi arhuhûnyire rhujire. Nk’oku Samusoni azibuhaga erhi anywa amishi Yehova amuhaga, nirhu rhwanaba n’emisi omu hali y’ekiroho amango rhuli rhwayunguka n’oburhabale Yehova arhuhîre.—Mt. 11:28.

11. Gurhi rhwakajira lyo rhuyunguka bwenene n’oburhabale bwa Yehova? Ohâne olwiganyo.

¹¹ Rhuganirire olwiganyo lwa Aleksey, mwene wirhu muguma w’omu cihugo c’e Russie oli walembera okulibuzibwa bwenene. Bici byamurhabire ly’agendekera aba n’emisi mw’ako kanga kadarhi? Ye na mukage bacihirireho eprograme nyinja y’ebintu by’ekiroho. Adesire ntya: “Nancihangane okukenga eprograme yani y’ebintu by’ekiroho omu kujira ifunzo lyani niene n’okusoma Ebibliya ngasi lusiku. Ngasi sezi, nie na mukanie rhunaganirire olwandiko lw’olusiku n’okusalira Yehova haguma.” Bici oko kurhuyigirizize? Ahali h’okucilangalira rhwene, rhushinganine rhukacikubagira  Yehova. Gurhi rhwakajiramwo ntyo? Omu kuyubaka obuyemere bwirhu kugerera eprograme nyinja y’ifunzo lirhu rhwene ly’Ebibliya n’eyindi mikolo y’Eciteokrasi. Erhi rhwakajira ntyo, Yehova anagisha bwenene obushiru rhuli rhwajira lyo rhumukolera. Ahîre Samusoni emisi, kobinali nirhu anarhuha yo.

12. Gurhi obwîra bwa Samusoni haguma na Dalila bwalimwo lubero n’obwîra ajiraga n’abakazi Bafilistini?

¹² Akirhu, Samusoni naye arhali mwimana, co cirhumire hali amango arhôzire emihigo mibi. Muhigo muguma omu mihigo arhôlaga gwamudwirhire amazibu madarhi bwenene. Enyuma za Samusoni okukola nka muzuzi omu kasanzi kalebe, “anaciyinjibana omukazi omu kabanda ka Soreki, izino ly’oyo mukazi ye Dalila.” (Bac. 16:4) Embere z’aho, Samusoni al’isimine n’omukazi Mufilistini, cikone oko “kwarhengaga emwa Nyakasane [Yehova, NWT],” bulya “akazagilonza engwarhiro y’akigenzo emunda Abafilistini bâli.” Enyuma z’aho, Samusoni abêra omu nyumpa y’omukazi Mufilistini w’embaraga omu vile y’e Gaza. Mw’ako kanga, Nnâmahanga aha Samusoni emisi ly’ahêka enyumvi z’omuhango gw’eyo vile n’oko kwarhuma yasigala buzira bulanzi. (Bac. 14:1-4; 16:1-3) Cikone byanahashikana Dalila ali Muisraheli, co cirhumire obwîra bwa Samusoni haguma naye burhakabire bulyo bw’okulwisa Abafilistini.

13. Gurhi Dalila ahiziremwo Samusoni omu kanga kabi?

¹³ Dalila ayemera ensaranga nyinji bwenene Abafilistini bamuhaga ly’alenganya Samusoni. Nkaba bulya Samusoni al’izigire Dalila bwenene, arhahashaga okuhugûkwa ebi Dalila al’ilonzize okujira. Abe ntyo ko byali erhi nanga, Dalila agendekire okuseza  Samusoni amubwire aha emisi yage yakag’irhenga na buzinda ahikira aha amubwira. Eby’okugayisa kuli kubona oku er’igosa lya Samusoni lyarhumire aheza emisi yage arhanacigendekeraga ayemerwa na Yehova omu kasanzi kalebe.—Bac. 16:16-20.

14. Mazibu gahi gahikire Samusoni enyanya z’okulangalira Dalila?

¹⁴ Samusoni ahikirwa n’amazibu madarhi enyanya z’okulangalira Dalila ahali h’okulangalira Yehova. Abafilistini bamugwarha banamurhomola amasu. Bamushwekera omu vile y’e Gaza abonesagyamwo abantu enshonyi embere z’aho, n’abo bantu bamujira muja w’okushwa emogomogo. Enyuma z’aho Abafilistini bamubonesa nshonyi erhi barhimanana okw’idinye lilebe. Bajirira mungu wabo w’obunywesi ohamagalwa Dagoni enterekêro nnene, bulya bal’iyemire oku ye wahizire Samusoni omu maboko gabo. Lyo bashekera Samusoni, bamurhenza omu prizo n’okumulerha kw’er’idinye mpu ‘abasimise.’—Bac. 16:21-25.

15. Gurhi Samusoni ayerekinemwo oku ashubir’icikubagira Yehova? (Abaciranuzi 16:28-30) (Olole enfoto eri oku cijalada c’eyi gazeti.)

¹⁵ Samusoni ali amajira igosa lizibu, cikone arharhamaga. Alonza obulyo bw’okuhikiriza omukolo Nnâmahanga al’imuhîre gw’okulwisa Abafilistini. (Osome Abaciranuzi 16:28-30.) Samusoni asemberera Yehova oku amurhabale ‘abone kurhi ankahasha okucihôla oku Bafilistini.’ Mungu w’okuli ashuza omusengero gwa Samusoni anamugalulira emisi yago-yago al’igwerhe. Enyanya z’oko, Samusoni ahima Abafilistini bwenene kulusha agandi mango goshi.

16. Bici rhwakaciyigiriza kugerera igosa lya Samusoni?

¹⁶ Ciru akaba Samusoni ahikirwe n’amazibu madarhi enyanya z’igosa lyage, arhalekaga okucihangana ly’ajira obulonza bwa Yehova. Ciru rhwakajira igosa rhunakalihirwe erhi kuheza mukolo mulebe omw’ikubuliro, rhurhagwasirwi rhurhame. Okengere oku Yehova arhakarhuleka. (Enna. 103:8-10) Ciru rhwakajira amagosa, Yehova anacirhukolesa, nk’oku akolesagya Samusoni.

17-18. Bici bikuhîre omurhima lugenda olwiganyo lwa Michael? (Olole n’enfoto.)

¹⁷ Rhuganirire olwiganyo lwa mwene wirhu muguma ociri musole ohamagalwa Michael. Akag’ijira binji omu mukolo gwa Yehova: ali murhabazi w’abagula na painiya w’akasanzi  koshi. Ciru akaba ntyo, eby’okugayisa, ajira igosa anaheza emikolo agwerhe omu cigamba. Adesire ntya: “Kuhikira aho, nakag’igendekera bwinja omu mukolo gwa Yehova. Cikone buzira kulaliza, nahwerwa na byoshi. Nta mango narhanyize oku Yehova andeka, cikone nakacidosa erhi obwîra bwani haguma naye bwanacibe bwinja nk’oku bwali embere kandi erhi hali amango nanacihashe okumukolera omu cigamba bwenene nk’oku nakag’ijira embere.”

¹⁸ Eby’okushagalusa kuli kubona oku Michael arharhamaga. Ayushwire ntya: “Nasegeza obwenge oku kukubûla obwîra bwani haguma na Yehova omu kukamuyigulira omurhima gwani ngasi mango kugerera isala, omu kuyiga, n’okurhanya bwenene.” Enyuma za kasanzi kalebe, Michael acib’ihabwa emikolo agwerhe omu cigamba. Ene, ali mugula anali painiya w’akasanzi koshi. Adesire ntya: “Okuhâbwa omurhima n’oburhabale nahâbirwe, bwenene n’abagula, kwantabire nahugûkwa oku Yehova acinzigire. Ndi nacib’ikolera omu cigamba nangwerhe ezamiri ecîre. Ebyo byampikiraga byanyigirizize oku Yehova anababalire ngasi muntu ociyunjuzize okunali.” Erhi rhwakajira okwirhu koshi lyo rhukubûla enjira zirhu n’okugendekera rhwacikubagira Yehova, nirhu rhwanayemera n’obwalagale oku arhukolesa n’okurhugisha ciru akaba rhwajijire amagosa.—Enna. 86:5; Mig. 28:13.

19. Gurhi olwiganyo lwa Samusoni lukuhiremwo emisi?

¹⁹ Mw’eci cigabi, rhwaganirire bintu bisungunu by’okushagalusa byajirikine omu kalamo ka Samusoni. Arhali mwimana; cikone arharhamaga okucihangana ly’akolera Yehova, ciru n’enyuma z’okujira igosa ly’okubwira Dalila ihwe ly’emisi yage. Na Yehova arhamulekaga. Nnâmahanga acibir’ikolesa Samusoni omu njira y’obuhashe. Yehova acigendekire amubona nka mulume wa buyemere bwago-bwago, anamuhira omu liste y’abalume bishwekerezi baganirirwe omu citabu c’Abahabraniya cigabi ca 11. Rhuhîrwe omurhima bwenene omu kumanya oku rhunakolere Larha w’obuzigire w’omu mpingu wa ntyo olonzize okurhuha emisi, bwenene amango rhuli bazamba! Co cirhumire, aka Samusoni, lekagi rhusemberere Yehova ntya: “Onyibuke [onkengere] nani mashi, oshubimpa emisi.”—Bac. 16:28.