1. Bici rhwakadosibwa ebwa kazi erhi ebwa masomo?

 GURHI ociyumva erhi owinyu munyakazi erhi owinyu mwanafunzi akakudosa lugenda obwemere bwawe? K’onayumve ehy’oboba? Banji muli rhwe banaciyumve ntyo. Cikone idoso lya ntyo linarhurhabale rhuhugûkwe entanya z’owundi muntu erhi obwemere bwage, n’oko kunarhuhe obulyo bw’okumuganirira omwanzi mwinja. Cikoki, hali amango omuntu akarhudosa idoso bulya alonzize okurhujisa kadali. Oko kurhakarhusomeza. Kobinali, hali bantu baguma na baguma babwizirwe emyanzi y’obunywesi lugenda obwemere bwirhu. (Ebj. 28:22) Na kandi, rhuli rhwalama omu “nsiku nzinda,” kasanzi bantu banji “barhakababalira ndi [barhalonza okuyumvikana na ndi, NWT]” na ciru “barhayumva lukogo [bakali, NWT].”—2 Tm. 3:1, 3.

2. Bulya gurhi rhulonzize okuba batûdu?

² Wanacidosa ntya: ‘Gurhi nakabamwo mutûdu na mwirhonzi erhi muntu mulebe akazusa embaka lugenda obwemere bwani buyimangire oku Bibliya?’ Bici byakakurhabala? Kwa bofofi, buli butûdu. Omuntu mutûdu arhakunira duba-duba, cikone anabe wa kucihasha erhi bakamugayisa, n’erhi akaba arhamanyiri oku ashuza. (Mig. 16:32) Cikone, wanabona nk’okuderha ntyo ko kulembu kulusha okukujira. Gurhi wakaciyigirizamwo okuba mutûdu? Gurhi wakajiramwo n’obutûdu erhi muntu mulebe akazusa embaka lugenda obwemere bwawe? N’erhi akaba oli mubusi, gurhi wakarhabalamwo abana bawe lyo baciyigiriza oku bakahaliramwo obuyemere bwabo omu njira y’obutûdu? Lekagi rhubone oku wakajiramwo ntyo.

3. Bulya gurhi rhwakaderha oku obutûdu eba misi ci burhaba buzamba? (2 Timoteyo 2:24, 25)

³ Obutûdu eba misi, ci burhaba buzamba. Biba bihûnyire okuba  n’emisi y’ekandalala ly’omuntu agendekera arhulirira erhi akarhimanana n’akanga kazibu. Obutûdu ciba “cigabi c’ilehe ly’iroho litagatifu.” (Gl. 5:22, 23, NWT) Oluderho lw’Ecigiriki lwahindwirwe “butûdu” hali amango lwakolesibwe omu kuganirira enfarasi y’emuzirhu yakomerezibwe. Obone omu bwenge bwawe enfarasi y’emuzirhu ekola eri ntûdu. Ciru akaba ekola eri ntûdu, ecigwerhe emisi. Rhuli bene bantu, gurhi rhwakabamwo batûdu n’okugendekera rhwaba n’emisi? Rhurhakahash’ijira ntyo oku misi yirhu rhwenene. Rhushinganine rhukahûna Nnâmahanga iroho lyage litagatifu, n’okumuhûna arhurhabale lyo rhukayerekana obo borhere bwinja. Hali bantu banji baciyigirizize okuba batûdu. Bahamirizi banji bayerekine obutûdu erhi bali bahagalikwa n’abashombanyi birhu, n’oko kwarhuma abandi baba n’entanya nyinja okubirhuyerekire. (Osome 2 Timoteyo 2:24, 25.) Gurhi wakajira ly’obutûdu eba misi yawe?

4. Bici rhwakaciyigiriza lugenda obutûdu kugerera olwiganyo lwa Izaki?

⁴ Omu Bibliya muli myanzi minji eyerekine kunganaci obutûdu buba borhere bwa bulagirire bwenene. Rhuganirire olwiganyo lwa Izaki. Erhi alama omu eneo y’Abafilistini y’e Gerari, abalungu bage bagalwa bafuka amaliba abakozi b’ishe bahumbaga. Ahali h’okulwira ago maliba, Izaki ahamikiza omulala gwage ahandi hantu anahumba agandi maliba. (Murh. 26:12-18) Cikone, Abafilistini baderha oku ago mishi nago gali gabo. Ciru akaba ntyo, Izaki ajira omurhûla. (Murh. 26:19-25) Bici byamurhabire ly’agendekera aba mutûdu ciru akaba abandi bal’ibonekine oku bahizire okumuhalalira? Kobinali alolerezize olwiganyo lw’ababusi bage, aciyigiriza binji kugerera oborhere bwa Abrahamu bw’okuba wa murhûla na kugerera ‘omurhima mutûdu na gwa murhûla’ gwa Sara.—1 Pt. 3:4-6, Mashi Bible; Murh. 21:22-34.

5. Lwiganyo luhi luyerekine oku ababusi Bakristu banayigiriza abana babo obulagirire bw’obutûdu?

⁵ Mwe babusi Bakristu, muyemere n’obwalagale oku ninyu mwanayigiriza abana binyu obulagirire bw’obutûdu. Rhuganirire olwiganyo lwa Maxence, ogwerhe myaka 17. Akag’irhimanana n’abantu bakali ebwa masomo n’omu mukolo gw’amahubiri. Ababusi bage bamurhabala omu njira y’obulembedu ly’aba mutûdu. Badesire ntya: “Maxence akola aba ahugûsirwe oku biba bihûnyire misi minji ly’omuntu acihasha erhi akahalalirwa kulusha eyi akakolesa ly’ajira omu njira y’obukali erhi ya buminya.” Eby’okushagalusa kuli kubona oku, obutûdu yo ekola eba misi ya Maxence.

6. Gurhi isala lyakarhurhabalamwo lyo rhujira amajambere omu kuyerekana obutûdu?

⁶ Gurhi rhwakajira erhi rhwakarhimanana n’akanga kazibu, kwa lwiganyo amango muntu mulebe ali azinza izino lya Nnâmahanga wirhu erhi ali agayaguza Ebibliya? Rhushinganine rhuhûne Yehova iroho lyage litagatifu n’obwenge bwage lyo rhujira omu njira y’obutûdu. Gurhigi erhi buzinda rhwakahugûkwa oku rhurhajijire bwinja nk’oku rhwal’ishinganine rhujire? Kandi rhwanashenga Yehova lugenda ako kanga n’okurhanya lugenda gurhi rhwakajira bwinja agandi mango. Erhi rhwakajira ntyo, Yehova anarhuha iroho lyage litagatifu lyo rhucihasha n’okuyerekana obutûdu.

7. Gurhi okubîka omu bukengere bwirhu mandiko malebe g’Ebibliya kwakarhurhabalamwo amango kuli kuzibu kuli rhwe okuderha erhi okujira omu njira y’obutûdu? (Emigani 15:1, 18)

⁷ Hali mandiko manji g’Ebibliya gakarhurhabala amango kuli kuzibu kuli rhwe okuderha omu njira y’obutûdu. Iroho lya Mungu lyanarhukengeza ago mandiko. (Yn. 14:26) Kwa lwiganyo, amakanuni gali omu citabu c’Emigani ganarhurhabala rhube batûdu. (Osome Emigani 15:1, 18.) Kandi eco citabu c’Ebibliya ciyerekine obunguke bw’okucihasha omu kanga kazibu.—Mig. 10:19; 17:27; 21:23; 25:15.

8. Bulya gurhi rhushinganine rhurhanye lugenda ebirhumire omuntu arhujisa mbaka lugenda obwemere bwirhu?

⁸ Kandi oburhimanya bwanarhurhabala. (Mig. 19:11) Omuntu w’oburhimanya anayerekane oborhere bw’okucihasha erhi akajisibwa mbaka lugenda obwemere bwage. Kanji-kanji erhi abantu barhudosa amadoso barharhubwira ecirhumire badosa. Co cirhumire embere rhushuze, kuli kwinja rhukahugûkwa oku nkaba rhurhamanyiri ebyarhumaga omuntu adosa er’idoso.—Mig. 16:23.

9. Gurhi Gideoni ayerekinemwo oburhimanya n’obutûdu erhi aganira na Bene Efrayimu?

⁹ Rhuganirire gurhi Gideoni ashuzagya bene Efrayimu. Bamulongoza mpu bulya gurhi arhabalalikaga embere lyo baj’ilwisa haguma abashombanyi b’Abaisraheli. Ka hali ecirhumire cifulike carhumaga bagaya ntyo? Ka bwali bucibone nkaba? Abe ntyo ko byali erhi nanga, Gideoni ayerekana oburhimanya. Acihangana okuhugûkwa oku bakag’iciyumva anabashuza omu njira y’obutûdu. Bunguke buhi oko kwadwirhe? Ebibliya edesire oku erhi aganira nabo omu njira ya ntyo, “oburhe bwatwika.”—Bac. 8:1-3.

10. Bici byakarhurhabala lyo rhumanya gurhi rhwashuza abagwerhe akarhinda lugenda obwemere bwirhu? (1 Petro 3:15)

¹⁰ Nkaba owirhu munyakazi erhi owirhu mwanafunzi anarhudosa bulya gurhi rhurhumikira  makanuni malebe g’olugenzi. Rhwanajira okwirhu koshi lyo rhuhalira obwemere bwirhu omu njira eyerekine oku rhukenzire n’entanya z’omumvirhiza wirhu. (Osome 1 Petro 3:15.) Co cirhumire ahali h’okurhanya oku er’idoso lyage ciri cirhero, rhwanarhanya lugenda gurhi lyakarhurhabalamwo rhumanye ebiri bya bulagirire kuli ye. Habe hali cirhumire cici cashumyagya omuntu adose idoso, kuli kwinja rhumushuze omu njira y’obutûdu na ya lukogo. Erhi rhwakajira ntyo, ishuzo lirhu lyanashumya omuntu ashanje entanya anal’igwerhe. Ciru omuntu akarhubulira obukenge erhi kurhugayaguza omu njira y’obulyalya, omuhigo gwirhu gushinganine gube gwa kumushuza omu njira y’olukogo.—Rm. 12:17.

11-12. (a) Bici rhushinganine rhurhanyeko embere rhushuze idoso lizibu? (Olole n’enfoto.) (b) Ohâne olwiganyo luyerekine gurhi okudosa idoso kwakarhurhabala rhurhondeze enganîro.

¹¹ Kwa lwiganyo, erhi owirhu munyakazi akarhudosa bulya gurhi rhurhajira idinye ly’ensiku z’okuburhwa, rhwanarhanya ntya: K’ali acidosa erhi rhurhaba rhuyemerirwe okugeza akasanzi kinja haguma n’abandi? Erhi k’ali arhanya oku okurhajira kwirhu amadinye g’ensiku z’okuburhwa kwanashereza ehali nyinja y’obwîra eri egarhi k’abirhu banyakazi? Rhwanarhuliriza oyo wirhu munyakazi omu kumuyeresa oku rhushagalusire bwenene okubona aba ashibirire ababo banyakazi n’okumuyemeza n’obwalagale oku nirhu rhuba rhulonzize rhushagalukire ehali nyinja y’obwîra haguma n’abandi ebwa kazi. Oko kwanarhuha obulyo bw’okuganira naye omu njira y’obwîra ebi Ebibliya edesire okubiyerekire ensiku z’okuburhwa.

¹² Rhwanakolesa enjira ya ntyo y’okuganira erhi owundi muntu akarhudosa agandi madoso mazibu. Nkaba owirhu mwanafunzi anaderha oku Abahamirizi bashinganine bashanje entanya zabo lugenda ecijiro c’obuhya egarhi k’omulume n’owabo mulume erhi omukazi n’owabo mukazi. K’oko kuyerekine oku agwerhe entanya z’obunywesi lugenda Abahamirizi ba Yehova? Erhi ka kuyerekine oku ajira omwîra erhi muntu w’omulala ojira ecijiro c’obuhya n’owabo mulume erhi n’owabo mukazi? K’ali arhanya oku rhurhaba rhuzigire abantu bajira ecijiro ca ntyo? Byanahûna rhumuyemeze n’obwalagale oku rhunashibirire abantu boshi n’oku rhunakenge oluhuma ngasi muntu agwerhe lw’okucirhôlera emihigo. b (1 Pt. 2:17) Buzinda, rhwanahasha okumuhugûlira obunguke rhuba nabo omu kukenga amakanuni g’Ebibliya g’olugenzi lwinja.

13. Gurhi wakarhabalamwo omuntu obona nka buli buhwinja okuba n’obuyemere muli Nnâmahanga?

¹³ Erhi omuntu akahalira bwenene entanya zage, rhurhashinganini rhuderhe duba-duba oku rhumanyire ebi aba ayemire. (Tt. 3:2) Kwa lwiganyo, gurhi wakajira erhi owinyu mwanafunzi akaderha oku okuba n’obuyemere muli Nnâmahanga buba buhwinja? K’oshinganine oderhe oku ayemire bwenene enyigirizo z’amageuzi n’oku amanyire binji lugenda ezo nyigirizo? Kobinali, nkaba anaba ali aderha kone ebi ayumvirhe. Ahali h’okurhondeza akadali lugenda eby’esiyanse, wanalonza obulyo bw’okumuha kantu kalebe akarhanyako buzinda. Nkaba wanamuyeresa mwanzi mulebe guganirire obulemi guli oku jw.org. Nkaba buzinda anaba mubidu okuganirira mwanzi mulebe erhi video ndebe eri kw’eyo site. Kobinali, erhi wakaganira naye omu njira y’obukenge, nkaba oko kwanamurhabala alonze okuyiga binji lugenda ebi Ebibliya edesire.

14. Gurhi Niall akolesizemwo bwinja esite yirhu y’e Enternete ly’arhabala owabo mwanafunzi ashanje entanya zirhali z’okuli agwerhe lugenda Abahamirizi ba Yehova?

¹⁴ Mwana-rhabana muguma w’omushûko ohamagalwa Niall akolesize esite yirhu y’e  Enternete ly’ayerekana oku ebi bantu baguma na baguma baderha lugenda Abahamirizi ba Yehova birhaba by’okuli. Adesire ntya: “Kanji-kanji owirhu mwanafunzi akag’imbwira oku ntaba nyemire eby’esiyanse bulya mba nyemire ecitabu ‘c’endibi’ kone.” Erhi owabo mwanafunzi abula bumuyemerera amuhugûlire obwemere bwage, Niall alongoza oyo mwanafunzi oku jw.org oku cigabi cidesire, “Esiyanse n’Ebibliya.” Buzinda, Niall ahugûkwa oku oyo mwanafunzi asomire emyanzi eri mw’eco cigabi anali mubidu okuganirira gurhi obuzine bwarhangiraga. Nawe wanaba n’amalehe gali nk’ago.

15. Gurhi ababusi bakarhabalamwo abana babo bashuze omu njira y’obutûdu erhi ababo banafunzi bakahagalika obwemere bwabo?

¹⁵ Ababusi banahash’iyigiriza abana babo gurhi bakashuzamwo omu njira y’obutûdu erhi obwemere bwabo bwakahagalikwa. (Yk. 3:13) Babusi baguma na baguma baba bapanzire ebigabi by’okucikomereza omu nterekêro yabo y’omulala. Banaganirire amadoso abana babo bakadosibwa ebwa masomo, n’okujira eonyesho lugenda gurhi gakashuzibwamwo, bananayigirize abana babo gurhi bakaderha omu njira nyinja na ya butûdu.—Olole ecisanduku cidesire “ Ebigabi by’Okucikomereza Byanarhabala Omulala Gwawe.”

16-17. Gurhi ebigabi by’okucikomereza byakarhabalamwo emisole?

¹⁶ Ebigabi by’okucikomereza byanarhabala Abakristu baciyemeze n’obwalagale bulya gurhi baba bayemire bintu bilebe n’okumanya gurhi bakahugûliramwo abandi obwemere bwabo. Ecigabi cidesire “Amadoso Emisole Ecidosa” ciri oku jw.org cirimwo amakaratasi emisole yakayandikirako. Ago makaratasi garheganyizibwe lyo garhabala emisole ezibuhye obwemere bwabo n’okurheganya amashuzo omu nderho zabo bonene. Okuyiga ebyo bigabi omu mulala,  kwanarhurhabala rhweshi rhumanye gurhi rhwakahaliramwo obuyemere bwirhu omu njira nyinja, na ya butûdu.

¹⁷ Mwana-rhabana muguma w’omushuko ohamagalwa Matthew ahugwîre gurhi ebigabi by’okucikomereza byamurhabiremwo. Omu cigabi ciguma c’enterekêro yabo y’omulala, Matthew n’ababusi bage kanji-kanji bakag’ijira obusagasi lugenda emyanzi yakaganirirwa ebwa masomo. Adesire ntya: “Rhunarhanye oku madoso gakadosibwa, rhunanacikomereze okugashuza omu kukolesa ebi rhwapasire omu busagasi bwirhu. Erhi nakaba mpugûsirwe n’obwalagale ebirhuma mba nyemire bintu bilebe, nanciyumve ntulirire kunanabe kulembu kuli nie okuba mutûdu amango ndi naganira n’abandi.”

18. Bunguke bwa bici buyerikinwe omu lwandiko lw’Abakolosi 4:6?

¹⁸ Ciru rhwakahugûla ebintu omu njira y’obwalagale na ya kuyemeza, arhali ngasi muntu wayemera ebi rhudesire. Cikone okuganira omu njira erhakarhuma rhwasarhaza abandi na ya butûdu kwanarhabala. (Osome Abakolosi 4:6.) Okuganirira obwemere bwirhu kwanashushanyizibwa n’okukweba akabumbu. Rhwanakweba akabumbu bunyi-bunyi erhi rhukabande n’emisi yoshi. Erhi rhwakakweba akabumbu bunyi-bunyi, owundi rhuli rhwasharha naye anahasha okukasama n’okugendekera asharha. Ko n’oko, erhi rhwakaganira omu njira erhasarhazizi abandi na ya butûdu, abantu banaba babidu okurhuyumvirhiza n’okugendekeza enshambalo. Kobinali, erhi muntu mulebe akalonza okuyaza akadali erhi kugayaguza obwemere bwirhu, rhurhasezibwi oku rhugendekere rhwamushuza. (Mig. 26:4) Cikone kanji-kanji rhurharhimanana n’omuntu wa ntyo; baguma na baguma, nkaba ciru banji, banayumvirhize.

19. Bici bishinganine birhushumye rhube batûdu amango rhuli rhwahalira obwemere bwirhu?

¹⁹ Kobinali, hali bunguke bunji omu kucihangana okuba batûdu. Okashenga Yehova emisi olagirireko ly’ogendekera waba mutûdu erhi muntu mulebe akadosa amadoso g’okukujisa kadali erhi kandi ga kukugayaguza. Okengere oku obutûdu bwawe bwanarhabala ly’entanya ziri lubero n’ez’omumvirhiza wawe zirhahikiraga aha zalerha akadali. N’ishuzo lyawe ly’obutûdu n’obukenge lyanashumya abumvirhiza baguma na baguma bashanje entanya bal’igwerhe okubirhuyerekire n’okubiyerekire okuli kw’Ebibliya. Okayorha ‘ocirheganyize ensiku zoshi okuhalira’ obwemere bwawe omu “kujira ntyo n’obutûdu n’obukenge bunji.” (1 Pt. 3:15, NWT) Neci, oleke obutûdu ebe misi yawe!