Naburhagwa omu mwaka gwa 1934, ababusi bani barhengaga e Suisse n’okuhamira omu Timmins, vile bakolamwo eby’amabuye g’engulo ndarhi eba omu Ontario, e Canada. Hofi omu mwaka gwa 1939, nyâma arhondera okusoma egazeti Ilabiro ly’Akalalizi n’okuja oku ntimanano z’Abahamirizi ba Yehova. Akag’irhuhêka oku ntimanano rhweshi bana bage nda. Kasanzi kasungunu enyuma z’aho, aba Muhamirizi wa Yehova.

Larha arhashagalukiraga omuhigo gwage, cikone nyâma al’izigire okuli anal’ihizire okucishwekera oku okuli. Ajijire ntyo ciru n’oku murhondero gw’emyaka ya 1940 amango omukolo gw’Abahamirizi ba Yehova gwal’ilahizibwe omu Canada. N’ensiku zoshi, akag’ijirira larha omu njira y’olukogo na ya bukenge, ciru akaba larha akag’imubwira enderho z’obukali. Olwiganyo lwage lwinja bwenene lwarhurhabala rhuli bana bage nirhu rhuyemere okuli. Eby’okushagalusa kuli kubona oku, enyuma za kasanzi kalebe, engeso za larha zashanja anarhondera okurhujirira bwinja.

Omu Mwezi gwa 8, 1950, naja oku ntimanano nkulu yajiragwa omu vile y’e New York, yal’igwerhe ecirhwe cidesire Ongezeko la Kiteokrasi. Nashumibwa bwenene okujira binji omu mukolo gwa Yehova enyuma z’okurhimanana na bene wirhu na bali birhu kurhenga omw’igulu lyoshi n’okuyumvirhiza enganîro z’okushagalusa z’abayusagya Amasomo g’Egileadi! Kulusha agandi mango goshi, nahiga bwenene okuja omu mukolo gw’akasanzi koshi. Erhi ngaluka e kâ ntya, nayunjuza efomu y’okuba painiya w’akasanzi koshi. Ebiro by’etawi y’e Canada byanyandikira amaruba gampaga omurhima oku ntang’ibatizibwa. Nabatizibwa omu lusiku 1/10/1950. Mwezi muguma enyuma z’aho, naba painiya w’akasanzi koshi nanahâbwa omukolo murhangiriza gw’okuj’ikolera omu Kapuskasing. Eyo vile yali oku bilometre binji bwenene kurhenga aha rhwakag’ilama ago mango.

 Omu mango g’enkuba nzindikiriza omu mwaka gwa 1951, ebiro by’etawi byahûna Abahamirizi bal’imanyire okuderha olulimi lw’Ecifaransa barhanye erhi banahamira omu provense y’e Québec baderhamwo Ecifaransa. Hali obulagirire bunji bw’abahubiri eyo munda. Erhi ndi nakula nakag’iderha Ecifaransa n’Ecingereza, na muli ntyo nayemera ogo mulali nanarhumwa e Rouyn. Nta muntu nal’imanyire eyo munda. Nk’oku naganiriraga oku murhondero gw’eci cigabi, adresi yone nal’igwerhe. Cikone ebintu byagendeka bwinja. Nie na Marcel rhwaba bîra bwenene, nanashagalukira okukolera e Québec omu myaka ini yakulikiraga, n’oku buzinda bw’eyo myaka nakolamwo nka painiya wa pekee.

Erhi ndi e Québec, nashagaluka okuyankirira omulali gw’okuja okw’isomo lya 26 ly’Amasomo g’Egileadi omu South Lansing, e New York. Rhwahâbwa ediplome omu nsiku 12/2/1956, nanarhumwa okuj’ikolera omu cihugo cikola cihamagalwa Ghana, b c’omu Afrique de l’Ouest. Cikone embere nje eyo munda, byal’ihûnyire ngaluke e Canada n’okuyusa yo “migobe milebe” kuhika mpate edokima zani z’okubalama.

Ahali ha migobe milebe, najira myezi nda e Toronto ndi nalinda ezo dokima. Mw’ako kasanzi, omulala gwa Cripps gwanyemerera ndame aha mwabo, nanahikira okumanyana na Sheila, mwali wabo. Nasimana na Sheila. Erhi nkola ndi hofi mudose erhi alonzize rhurhôlane, napata eviza yani. Nie na Sheila rhwasalira lugenda oko rhwanahiga oku nshinganine ngende emunda ntumirwe. Cikone byal’ihûnyire rhugendekere rhwayandikirana amaruba lyo rhulola erhi byakahashikine rhujire obuhya na mangaci rhwakajijire ntyo. Ogo gurhali muhigo mulembu, cikone ebyabire enyuma z’aho byarhuyeresire oku gwali muhigo gushinganine.

Enyuma z’okuyusa omwezi ndi nabalama omu train, omu bato y’emizigo, n’omu aviyo, nahika e Accra, omu Ghana. Eyo munda nahâbwa omukolo gw’okuba mwangalizi w’e wilaya. Ogo mukolo gwal’ihiziremwo okubalama omu cihugo c’e Ghana coshi, omu Ivory Coast (ene Côte d’Ivoire) n’omu Togoland (ene Togo). Kanji-kanji, nakag’ibalama niene omu mutuga nahâbagwa n’etawi.  Nakag’ishagalukira bwenene ogo mubalamo gw’okulambagirira bene wirhu!

Oku buzinda bw’omugobe, nakag’igeza ebigabi oku ntimanano z’omuzunguko. Rhurhal’igwerhe Nyumpa z’Entimanano Nkulu. Co cirhumire, bene wirhu bakag’igwika emilonge n’okuhira amashami g’emirhi y’amabo enyanya lyo bayubaka emyubako ya kasanzi kasungunu y’okurhulanga okw’izuba likali. Bulya harhali frigo z’okubikiramwo ebiryo abantu balya omu nsa z’okurhamuka, ensimba zizine zakag’ishwekerwa aho lyo ziyish’ibagwa n’okulisa abantu bali oku ntimanano nkulu.

Hali ebintu by’okushesa byakag’ijirikana kw’ezo ntimanano nkulu. Mango maguma owirhu misiyonere Herb Jennings, c akag’igeza ehotuba erhi enkafu etwa olukoba. Yalibirha oku nafasi y’egarhi k’ejukwa n’abumvirhiza. Herb aleka okuderha n’eyo nkafu yabonekana nk’erhacimanyiri aha eyerekire. Cikone bene wirhu bani b’emisi bagwarha eyo nkafu banayigalula emunda yal’ishwekirwe, n’abumvirhiza bakoma akagasha.

Omu mugobe, nakag’iyerekana efilme egwerhe ecirhwe cidesire, Société ya Ulimwengu Mupya Iko Nafanya Kazi omu maeneo ga hofi n’evile. Lyo njira ntyo, nakag’iyiyerekana oku citambara cigali ceru cakag’imanikwa oku mitungo ibirhi erhi mirhi ibirhi. Abantu ba mw’ago maeneo bayisima bwenene! Kuli banji muli bo, yo yali filme ntangiriza babonaga. Erhi bakabwine aha abantu bali babatizibwa mw’eyo video, bakag’ikoma akagasha bwenene. Kobinali, eyo filme yarhabire abantu bayilabaga bahugûkwe oku rhuli ikubuliro ly’omw’igulu lyoshi ligwerhe ecinyabuguma.

Enyuma z’okuyusa myaka ibirhi ntya omu Afrique, nashagaluka okuja oku ntimanano nkulu y’omw’igulu lyoshi yajiragwa omu mwaka gwa 1958 omu vile y’e New York. Gwali mwishingo munji okubona Sheila, warhengaga e Québec, emunda ali painiya wa pekee. Rhwakag’iganira kugerera amaruba gone, lero rhwacib’irhimanana, nanamudosa erhi rhwanarhôlana, anayemera. Nayandikira Mwene Wirhu Knorr d nanamudosa erhi Sheila akajire oku Masomo g’Egileadi n’enyuma z’aho antimane omu Afrique. Mwene Wirhu Knorr ayemera. Buzinda Sheila ahika omu Ghana. Rhwajiraga obuhya omu nsiku 3/10/1959 e Accra. Rhwaciyumva oku kobinali Yehova arhugishire bulya rhwamuhizire oku nafasi ntanzi omu kalamo kirhu.

Omu mwaka gwa 1961, rhwarhumwa okuj’ikolera omu cihugo c’e Cameroun. Bene wirhu barhuhûna  rhurhondeze yo ebiro bihyahya bw’etawi, muli ntyo nal’igwerhe binji bya kujira. Bulya nali mwimangizi muhyahya w’ebiro by’etawi, nal’igwerhe binji bya kuyiga. Enyuma z’aho omu mwaka gwa 1965, rhwamanya oku Sheila ali izimi. Okuyemera oku rhukola rhwaba babusi, kurhali kulembu kuli rhwe. Cikone erhi rhuba rhukola rhuli rhwashagalukira ogo mukolo muhyahya n’okujira emipango lyo rhugaluka e Canada, rhwahikirwa n’akantu k’okuvuna omurhima bwenene.

Sheila aburha cifîre. Doktere arhubwira oku omwana wirhu anali murhabana. Oko kwahisire hakola hali myaka 50 na kulusha, cikone nta mango rhwakuyibagire. Ciru akaba ebyo byarhuhikiraga byarhugayisize bwenene, rhwabêra omu mukolo gwirhu gw’okukolera omu cindi cihugo, bulya rhwal’iguzigire bwenene.

Kanji-kanji omu Cameroun, bene wirhu bakag’ihagalikwa enyanya z’okurhalunga kwabo okuboko olunda loshi-loshi omu bintu by’epolitike. Ebintu byakag’ibiha bwenene omu mango g’obulondozi bwa prezida. Omu nsiku 13/5/1970, rhwahikirwa n’akantu rhurhal’irhanyize oku kakarhuhikire: omukolo gw’Abahamirizi ba Yehova gwahanzibwa loshi-loshi omu cihugo. Oburhegesi bw’ecihugo bwarhunyaga ebiro birhu bihyahya binja bwenene by’etawi rhwaciyusig’ihamiramwo myezi irhanu yone embere z’aho. Omu mugobe muguma, nie na Sheila n’abandi bamisiyonere boshi, rhwafukuzibwa omu cihugo. Kwali kuzibu okusiga bene wirhu na bali birhu b’eyo munda bulya rhwal’ibashibirire bwenene rhwanakag’iyoboha lugenda ebyakabahikire omu nsiku ziri embere.

Rhwageza emyezi ndarhu yakulikiraga oku biro by’etawi y’e France. Eyo munda, nagendekera najira okwani koshi lyo nshibirira amalagirire ga bene wirhu na bali birhu b’e Cameroun. Omu Mwezi gwa 12 gw’ogo mwaka, rhwarhumwa oku biro by’etawi y’e Nigeria byarhonderaga okushibirira omukolo omu Cameroun. Bene wirhu na bali birhu b’e Nigeria barhuyegereza n’obushagaluke, rhwanashagalukira okukolera yo omu myaka milebe.

Omu mwaka gwa 1973, rhwal’ishinganine rhurhôle omuhigo muzibu bwenene. Sheila arhondera okulwisa mazibu malebe madarhi g’endwala. Erhi rhuli e New York oku ntimanano nkulu, arhondera okulaka anambwira ntya: “Ntacihashe nagendekera! Ntamire na ndi nalwala ngasi mango.” Nakozire naye omu Afrique de l’Ouest omu myaka elushire 14. Nal’ishagalukire omukolo akag’ijira n’obwishwekerezi, cikone rhwal’ishinganine rhujire mpindulo ndebe. Enyuma z’okuganirira akanga kirhu n’okusalira bwenene, rhwahiga okugaluka e Canada, hantu rhwakashibirire bwinja amagala gage. Okuleka omukolo gwirhu gw’obumisiyonere n’omukolo gw’akasanzi koshi yali mihigo mizibu bwenene na ya kugayisa omu mihigo rhwarhôzire omu kalamo.

Enyuma z’okuhika e Canada, mwîra wani muguma wa kurhenga mîra wakag’iguza emituga omu eneo y’emwenè y’e Toronto ampa akazi. Rhwapanga enyumpa, rhwagula ebintu byali byakolesibwe, rhwanahasha okurhondeza akalamo kirhu kahyahya buzira kuja omu madeni. Rhwalonza okulama akalamo karhahûnyiri binji, bulya rhwal’ilangalire oku lusiku luguma rhwanabe n’obuhashe bw’okugaluka omu mukolo gw’akasanzi koshi. Akantu k’okusomeza, ebyo rhwal’ilangalire byahikirira duba-duba kulusha oku rhwal’irhanyize.

 Ngasi Lwa Kalindarhu, nakag’iba volontere oku mukolo gw’obubasi bw’Enyumpa y’Entimanano Nkulu e Norval, omu Ontario. Enyuma za kasanzi kalebe, nahâbwa omukolo gw’okuyimangira Enyumpa y’Entimanano Nkulu. Amagala ga Sheila gaja gaba minja, rhwanaciyumva oku akahashire okuhikiriza ogo mukolo muhyahya. Muli ntyo, omu Mwezi gwa 6, 1974, rhwahamira omu nyumpa yal’iyubasirwe aha Nyumpa y’Entimanano Nkulu. Rhwashagaluka bwenene okucib’igaluka omu mukolo gw’akasanzi koshi!

Eby’okushagalusa, amagala ga Sheila gagendekera gaba minja. Enyuma za myaka ibirhi, rhwaba n’obuhashe bw’okuyemera okuja omu mukolo gw’omuzunguko. Omuzunguko gwirhu gwali omu eneo y’e Manitoba, provense y’omu Canada emanyikine enyanya z’emboho ndarhi ebamwo. Ciru akaba ntyo, rhwashagalukira bwenene obuzigire bene wirhu na bali birhu b’eyo munda barhuyeresagya. Rhwayizire oku, aha rhuli rhwakolera Yehova arhali ho haba h’obulagirire, cikone akantu k’obulagirire kuli kugendekera rhwakolera Yehova ngasi hoshi rhwakaba rhuli.

Enyuma z’okujira myaka milebe omu mukolo gw’omuzunguko, rhwalalikwa okuj’ikolera oku Beteli y’e Canada omu mwaka gwa 1978. Enyuma za kasanzi kasungunu, nayiga isomo lyambabazagya omurhima cikone lya bulagirire. Nahâbwa olukengwa lw’okugeza ehotuba ya nsa nguma n’enusu omu Cifaransa oku ntimanano yago-yago yajiragwa e Montréal. Eby’okugayisa, kwaba kuzibu oku bumvirhiza okugendekera basegeza obwenge oku hotuba yani, na mwene wirhu muguma w’omu Departema y’Omukolo ampanûla lugenda oko. Okuderha okuli, nal’ishinganine mpugûkwe oku kurhenga mîra ntaba mulenga omu by’okugeza ehotuba. Cikone ntashagalukiraga er’ihano. Enganîro zirhu zirhageraga bwinja. Nakaciyumva nk’ali wa kusegeza obwenge bwage oku bibi byone arhanali wa kuvuga abandi omunkwa. Narhogera omu murhego gw’okurhayemera ihano enyanya z’oku lyahânagwa n’oku nakag’iciyumva lugenda omuntu walihânaga.

Nsiku nsungunu enyuma z’aho, mwene wirhu muguma w’omu Komite y’Etawi anganiza lugenda ako kanga. Nayemera oku ntashagalukiraga ihano nahâbagwa nanaciyunjuza enyanya z’oko. Enyuma z’aho, naganiza olya mwene wirhu wampanûlaga. Omu njira y’olukogo, ayemera okumbabalira. Ebyo byampikiraga byanyigiriza kunganaci kuba kwa bulagirire okuba mwirhohye ntakanayibagira oko ciru n’eliguma. (Mig. 16:18) Nashenzire Yehova kanji-kanji lugenda oko, nanahizire oku ntakaciba n’entanya mbi ciru n’ehitya lugenda ihano nahâbirwe.

Hakola hali myaka elushire 40 ndi nakolera oku Beteli y’e Canada, na kurhondera omu mwaka gwa 1985, ngwerhe olukengwa lw’okukolera omu Komite y’Etawi. Omu Mwezi gwa 2, 2021, omuzigirwa wani Sheila afâ. Ahanyuma z’okulwisa amazibu g’okuheza omuzigirwa wani, ndi nalwisa amazibu gani niene g’amagala. Cikone, bulya ndi najira binji omu mukolo gwa Yehova, ngwerhe omwishingo, n’enyanya z’oko ‘ntakakârhanya ensiku z’akalamo kani.’ (Muh. 5:20, Mashi Bible) Ciru akaba nabire na mazibu malebe omu kalamo kani, omwishingo nabire nago go munji bwenene kugalusha. Okuhira Yehova oku nafasi ntanzi omu kalamo kani n’okushagalukira myaka 70 omu mukolo gw’akasanzi koshi, kwarhumire narhimukwa okunali. Nanshengere bene wirhu na bali birhu baciri misole nabo bagendekere bahira Yehova oku nafasi ntanzi, bulya nyemire oku nabo bashagalukira akalamo k’omwishingo na ka kurhimusa rhwakaba nako amango gone rhuli rhwakolera Yehova.