ECIGABI C’OKUYIGA CA 37
LWIMBO 118 “Orhuyushulire Obuyemere”
Amaruba Gakarhurhabala lyo Rhulembera n’Obwishwekerezi Kuhika oku Buzinda
“Rhulange obuyemere bwirhu buzibu kuhika okufa, [kuhika oku buzinda, NWT] nka kulya rhwànarhangiraga.”—HB. 3:14.
EBI ECI CIGABI CISEGIZE
Okuyiga amasomo g’obulagirire kugerera amaruba Abahabraniya bayandikiragwa, kwarhurhabala lyo rhulembera n’obwishwekerezi kuhika oku buzinda bw’er’igulu libi.
1-2. (a) Erhi Paolo ayandikira Abakristu bali omu Yudeya amaruba, gurhi akalamo kabo kal’iyosire? (b) Gurhi ago maruba galongozibagwa n’iroho litagatifu gabonekinemwo oku gahisire oku kasanzi kashinganine?
ABAKRISTU Bahabraniya bal’ilamire e Yeruzalemu n’e Yudeya balwisize mazibu manji omu myaka yakulikiraga olufû lwa Yezu. Kasanzi kasungunu enyuma z’okurhondezibwa kw’ecigamba c’Ecikristu, Abakristu barhondera okulibuzibwa bwenene. (Ebj. 8:1) Na myaka makumi abirhi ntya enyuma z’aho, abanafunzi ba Yezu bahikirwa n’amazibu madarhi g’okubula enfaranga, nkaba ago mazibu gadwirhwe n’ishali lyabaga mw’eco cihugo embere z’aho. (Ebj. 11:27-30) Cikone kasanzi kalebe, omu mwaka gwa 61 ntya Kano Kasanzi Kirhu (K.K.K.), Abakristu barhalibuzibagwa bwenene nk’oku bakalibuzibwe omu mango gali embere. Mw’ago mango, bayankirira amaruba galongozibagwa n’iroho litagatifu entumwa Paolo yabarhumiraga, n’ago maruba gabonekine oku gahisire oku kasanzi kashinganine.
2 Amaruba gayandikiragwa Abahabraniya gahisire oku kasanzi kashinganine bulya omurhûla Abakristu bagwerhe gurhakagendekire. Paolo ahânyire amahano minja gakarhabire abo Bakristu lyo balembera amazibu gali hofi gabahikire. Okusherezibwa kwa Yeruzalemu Yezu alebaga kwali hofi. (Lk. 21:20) Kobinali, oli Paolo oli Abakristu bal’ilamire omu Yudeya, ntaye wal’imanyire bwinja amango obushereze bwakahisire. Ciru akaba ntyo, abo Bakristu bakakolesize akasanzi kal’isigire lyo bacirheganya, omu kuba n’amorhere nk’obuyemere n’obulembedu.—Hb. 10:25; 12:1, 2.
3. Ene, bulya gurhi Abakristu bashinganine basegeze obwenge bwenene oku maruba Paolo ayandikiraga Abahabraniya?
3 Rhuli hofi rhuhikirwe n’amalibuko madarhi bwenene kulusha agahikiraga Abakristu Bahabraniya. (Mt. 24:21; Maf. 16:14, 16) Lekagi rhuganirire mahano maguma na maguma Yehova ahaga abo Bakristu gakarhulerhera nirhu obunguke ene.
“RHUCÎSEZE RHUHIKE OKU [NYIGIRIZO] Z’ABÂKUZIRE”
4. Mazibu gahi Abakristu Bayahudi balwisize? (Olole n’enfoto.)
4 Abayahudi bahikiraga okuba Bakristu bal’igwasirwe bajire empindulo nnene, n’okujira ntyo kurhali kulembu. Mango malebe Abayahudi lo lwali lubaga Yehova al’icishozire. Evile y’e Yeruzalemu mwo mwali abami bakag’irhegeka omu izino lya Mungu, n’ehekalu yalimwo ho hali hantu h’obulagirire h’enterekêro ecîre. Abayahudi bishwekerezi boshi bakag’ikulikira Irhegeko lya Musa n’amarhegeko gakag’iyigirizibwa n’ebirongozi byabo by’amadîni. Hali amarhegeko lugenda ebiryo, okukembulwa, na lugenda oku bal’igwasirwe bakajirira abantu barhali Bayahudi. Cikone, enyuma z’okufâ kwa Yezu, Yehova arhacigendekeraga ayemera enterekêro z’Abayahudi. Co cirhumire kurhali kulembu oku Bayahudi babaga Bakristu, okushanja enjira yabo y’okuharamya. (Hb. 10:1, 4, 10) Ciru n’Abakristu bal’ikuzire kiroho, nk’entumwa Petro, bal’igwerhe amazibu g’okucipatanisa na mpindulo ndebe. (Ebj. 10:9-14; Gl. 2:11-14) Enyanya z’obuyemere bwabo buhyahya, abo Bakristu barhondera okulibuzibwa n’ebirongozi by’idîni ly’Eciyahudi.
Abakristu bal’igwasirwe basêre oku okuli, omu kuyaka entanya z’obunywesi z’ebirongozi by’idîni ly’Eciyahudi byakag’ibahagalika (Olole ecifungo ca 4-5)
5. Bici Abakristu bal’ishinganine bacilangeko?
5 Abakristu Bahabraniya bahagalisirwe na bigusho bibirhi by’abantu. Burhangiriza, hali ebirongozi by’idîni ly’Eciyahudi byakag’ibabona nka bagoma. Kandi, bantu baguma na baguma b’omu cigamba bakag’iderha oku Abakristu bagendekere bashimba Irhegeko lya Musa, nkaba bakag’iderha ntyo lyo bayaka okulibuzibwa. (Gl. 6:12) Bici byakarhabire Abakristu bishwekerezi lyo bagendekera bacishwekera oku okuli?
6. Bici Paolo ahîre ababo bemezi omurhima bajire? (Abahabraniya 5:14–6:1, Mashi Bible)
6 Omu maruba Paolo ayandikiraga Abahabraniya, abaha omurhima bakahumbirira omu Kanwa ka Nnâmahanga. (Osome Abahabraniya 5:14–6:1, Mashi Bible.) Omu kukolesa Amandiko g’Ecihabraniya, Paolo arhabala abo bene wabo bahugûkwe oku enjira y’okuharamya y’Ecikristu yal’ilushire bwenene ey’Eciyahudi. a Paolo aha Abakristu omurhima bamanye n’okuhugûkwa bwinja okuli kurhenga omu Mandiko lyo bakamanya enyigirizo z’obunywesi n’okuziyaka.
7. Mazibu gahi rhuli rhwalwisa ene?
7 Ak’Abakristu Bahabraniya, rhunayumve emyanzi n’entanya zirhapatini n’amakanuni mashinganyanya ga Yehova. Abantu barhuhagalika, kanji-kanji banarhuderhe kubi enyanya z’ebi rhuyemire biyimangire oku Bibliya lugenda olugenzi lwinja, banaderhe oku rhurhalembera abandi n’oku rhurhajira bwonjo. Oborhere n’entanya z’abantu b’er’igulu bigendekire byaba lubero bwenene n’entanya za Mungu. (Mig. 17:15) Co cirhumire, rhugwasirwe rhuzibuhye obushashe bwirhu bw’okuhugûkwa n’okuyaka entanya abantu barhuhagalika bakolesa lyo barhuvuna omurhima, erhi ciru lyo barhurheba rhuleke okukolera Yehova.—Hb. 13:9.
8. Bici byakarhurhabala lyo rhugendekera rhwaba Bakristu bakuzire kiroho?
8 Kuli kwinja rhukakengera ihano Paolo ahaga Abakristu Bahabraniya, lidesire oku rhuciseze rhube Bakristu bakuzire kiroho. Oko kuhiziremwo okuba n’obumanye bunji bw’okuli n’okuba n’entanya ziri nk’eza Yehova. Rhunagendekere rhwajira ntyo ciru n’enyuma z’okucihâna emwa Yehova n’okubatizibwa. Ciru akaba rhugwerhe myaka inga omu okuli, rhweshi rhugwasirwe rhukasoma n’okuyiga Akanwa ka Mungu ngasi lusiku. (Enna. 1:2) Okuba n’eprograme nyinja y’ifunzo lirhu rhwene kwarhurhabala rhuzibuhye oborhere Paolo asegezagya omu maruba ayandikiraga Abahabraniya, ko kuderha obuyemere.—Hb. 11:1, 6.
“RHULI BANTU BA BUYEMERE BUCIZA OBUZINE BWIRHU”
9. Bulya gurhi Abakristu Bahabraniya bal’ilagirire oku buyemere busêzire?
9 Abakristu Bahabraniya bal’ilagirire oku buyemere busêzire lyo bacira amalibuko gali hofi gabe omu Yudeya. (Hb. 10:37-39) Yezu ali erhi arhonzire abanafunzi bage oku amango babone Yeruzalemu azungulusirwe n’emirhwe y’abasoda, bal’igwasirwe bayakire oku ntondo. Ihano lya Yezu lyal’iyerekire Abakristu boshi, babe bal’ilamire omu vile erhi omu maeneo ga kulî n’evile. (Lk. 21:20-24) Abantu b’omu maeneo gali kulî n’evile bo bakag’iyakira omu vile ezungulusirwe n’olukuta, nka Yeruzalemu, erhi bakayobohire okurherwa n’omurhwe gw’abasoda. Ihano lya Yezu ly’okuyakira oku ntondo lyakabonekine nka lirhapatini n’obwenge byakanahûnyire buyemere bunji ly’omuntu alirhumikira.
10. Bici obuyemere busêzire bwakashumize Abakristu bajire? (Abahabraniya 13:17, NWT)
10 Kandi Abakristu Bahabraniya bal’ishinganine balangalire abantu Yezu akag’ikolesa lyo balongoza ecigamba. Bibonekine oku abakag’ilongoza bahânyire obulongozi bw’obwalagale lugenda amango g’okuyaka n’oku bakajijiremwo ntyo. (Osome Abahabraniya 13:17, NWT.) Oluderho lw’Ecigiriki lwakolesibwe omu Abahabraniya 13:17 luhindwirwe “murhumikire,” luyerekine oku omuntu anashumibwe okurhumikira bulya alangalire omuhîre obulongozi. Oko kuhiziremwo binji ahanyuma n’okurhumikira kone oyo muntu bulya ayemerirwe okuhâna obulongozi. Co cirhumire, Abakristu Bahabraniya bal’ishinganine balangalire abakag’ihâna obulongozi embere amalibuko gahike. Akaba omu mango g’omurhûla abo Bakristu bakag’irhumikira amahano bakag’ihâbwa n’abakag’ilongoza, kwakabire kulembu bwenene kuli bo okujira ntyo omu mango g’amazibu.
11. Bulya gurhi okuba n’obuyemere busêzire kuli kwa bulagirire oku Bakristu ene?
11 Ak’Abakristu Bahabraniya bayankiriraga amaruba ga Paolo, nirhu ene rhulagirire oku buyemere. Rhulamire omu kasanzi bantu banji bali balahira erhi ciru kugayaguza oburhonde Ebibliya ehânyire lugenda obuzinda bw’er’igulu libi. (2 Pt. 3:3, 4) Kandi, ciru akaba Ebibliya eyerekine bintu bilebe lugenda ebyajirikana omu mango g’amalibuko madarhi, hali bintu binji rhurhamanyiri. Rhushinganine rhube n’obuyemere busêzire oku obuzinda bw’er’igulu libi bwayisha omu kasanzi kashinganine n’oku Yehova ayish’irhushibirira.—Hab. 2:3.
12. Bici byayish’irhurhabala lyo rhuyokoka amalibuko madarhi?
12 Kandi rhushinganine rhuseze obuyemere bwirhu omu njira Yehova ali akolesa ene ly’arhulongoza, ko kuderha “mushizi mwirhonzi na mwikubagirwa.” (Mt. 24:45, NWT) Hano amalibuko madarhi garhondera, nkaba rhwayish’ihâbwa obulongozi bw’obwalagale bw’okuyokola obuzine bwirhu, nk’obu Abakristu Bahabraniya bahâbagwa erhi emirhwe y’Abaroma ezunguluka evile y’e Yeruzalemu. Buno ko kasanzi rhushinganine rhulangalire bwenene obulongozi rhuhâbwa n’abantu bali balongoza omu ikubuliro lya Yehova. Erhi akaba rhurhalangalira n’okurhumikira obulongozi bwabo ene, kwayish’iba kuzibu okurhumikira obulongozi rhwayish’ihâbwa omu mango g’amalibuko madarhi.
13. Bulya gurhi ihano liri omu Abahabraniya 13:5, Mashi Bible, lyali lya bulagirire?
13 Omu mango bakag’ilinda ecimanyiso c’okuyaka, kandi Abakristu Bahabraniya bal’ishinganine balame akalamo karhahûnyiri binji, n’okuyaka “okusîma enfaranga.” (Osome Abahabraniya 13:5, Mashi Bible.) Baguma na baguma muli bo bahikirwe n’amazibu g’ishali n’ag’obukenyi. (Hb. 10:32-34) Ciru akaba hali amango babire babidu okulembera amazibu enyanya z’omwanzi mwinja, nkaba baguma na baguma barhondire okubona nk’obuhirhi bwali bwa bulagirire bwenene lyo bapata obulanzi. Cikone enfaranga zirhakacungwire obuzine bwabo amango evile y’e Yeruzalemu yasherezibagwa. (Yk. 5:3) Kobinali, abantu boshi bal’izigire ebintu by’omubiri, kwakabire kuzibu bwenene kuli bo okuyaka n’okuleka enyumpa zabo n’obuhirhi bwabo.
14. Ene, gurhi obuyemere busêzire bwakarhurhabalamwo okurhôla emihigo minja lugenda ebintu by’omubiri?
14 Erhi rhwakaba rhugwerhe obuyemere busêzire oku obuzinda bw’er’igulu libi buli hofi bwenene, oko kwarhushumya rhuyake okuzigira ebintu by’omubiri. Omu mango g’amalibuko madarhi, enfaranga zayish’iba za busha. Ebibliya edesire oku ‘enfaranga baziyusa bazikabulira’ bulya bayish’ihugûkwa oku “enfaranga n’ennoro bagwerhe, birhâbayokole olusiku Nyamuzinda abakunirira.” (Eze. 7:19, Mashi Bible) Ahali h’okusegeza obwenge oku kulonza enfaranga nyinji bwenene nk’oku rhwakanahasha, rhushinganine rhurhôle emihigo yarhurhabala rhulame akalamo karhahûnyiri binji cikone ka lugero. Oko kuhiziremwo okuyaka omurhego gw’okurhôla amadeni garhali ga bulagirire erhi okugeza akasanzi kirhu kanji omu kushibirira ebintu birhu binji by’omubiri. Kandi, rhugwasirwe rhube masu ly’ebintu birhu by’omubiri birhabaga byo bintu by’obulagirire bwenene omu kalamo kirhu. (Mt. 6:19, 24) Obuyemere bwirhu bwanarhangulwa kugerera ebintu by’omubiri erhi kugerera ezindi njira amango rhuli rhwalinda oku obuzinda bw’er’igulu libi bwahika.
“MULAGIRIRE OKU BULEMBEDU”
15. Bulya gurhi Abakristu Bahabraniya bal’ilagirire bwenene oku bulembedu?
15 Abakristu Bahabraniya bal’ishinganine okulembera amarhangulo g’obuyemere amango ehali z’omu Yudeya zakabire mbi bwenene. (Hb. 10:36, NWT) Ciru akaba Abakristu Bahabraniya baguma na baguma bali bamalembera okulibuzibwa kudarhi, banji muli bo babire Bakristu omu mango hali omurhûla gw’olugero. Paolo ayerekine oku ciru akaba balembire amarhangulo madarhi g’obuyemere, barhahikiraga aha balibuzibwa aka Yezu, ko kuderha kulibuzibwa kuhika okufâ. (Hb. 12:4) Cikone, erhi Obukristu bulandira bwenene, Abayahudi bakag’ihagalika Abakristu bagendekera okukunira bwenene n’okuba baminya. Myaka milebe embere z’aho, okuhika kwa Paolo omu Yeruzalemu kwalerha akavulindi kadarhi. Bayahudi makumi ani na kulusha “baja ihano mpu barhalye barhananywe barhanajiyirha Paolo.” (Ebj. 22:22; 23:12-14) Ciru akaba Abakristu bakashombirwe n’okulibuzibwa, bal’ishinganine bagendekere barhimanana lyo baharamya, bal’ishinganine bagendekere bahubiri, n’okuseza obuyemere bwabo.
16. Gurhi amaruba gayandikiragwa Abahabraniya gakarhurhabalamwo lyo rhuba n’entanya nyinja lugenda okulibuzibwa? (Abahabraniya 12:7)
16 Bici byakarhabire Abakristu Bahabraniya lyo balembera amazibu g’okuhagalikwa barhimanine nago? Paolo al’imanyire oku abo Bakristu bal’ishinganine babe n’entanya nyinja lugenda amazibu gabo. Muli ntyo, ahugûla oku Mungu analeka amarhangulo g’obuyemere gahikire Abakristu lyo gabakomereza. (Osome Abahabraniya 12:7.) Oko kukomerezibwa kwanarhabala omuntu abe n’amorhere g’Ecikristu n’okugayinjihya bwenene. Omu kusegeza obwenge oku malehe minja g’ago marhangulo, kwakabire kulembu kuli abo Bakristu Bahabraniya okulembera.—Hb. 12:11.
17. Bici Paolo aciyigirizize lugenda okulembera okulibuzibwa?
17 Paolo ayinginzire Abakristu Bahabraniya babe n’oburhwali barhanarhamaga omu kulembera amarhangulo. Paolo al’ishinganine okubaha amahano lugenda oko. Embere abe Mukristu, akag’ilibuza Abakristu anacibwinire gurhi bakag’ijirirwa kubi bwenene. Kandi al’imanyire gurhi omuntu alemberamwo okulibuzibwa. Kobinali, ahagalisirwe omu njira nyinji enyuma z’okuba Mukristu. (2 Kr. 11:23-25) Paolo al’imanyire bwinja ebyal’ihûnyirwe ly’omuntu alembera. Akengeza abo Bakristu oku amango bali balembera amarhangulo, bal’ishinganine balangalire Yehova ahali h’okulangalira obuhashe bwabo bo nnene. Paolo akadesire ntya n’oburhwali: “Nyakasane [Yehova, NWT] ye murhabazi wani; ntaco nankayoboha.”—Hb. 13:6.
18. Bici byarhuhikira rhweshi omu mango gayisha na gurhi rhwakacirheganyamwo?
18 Ene, bene wirhu baguma na baguma bali balembera okulibuzibwa. Rhwanabarhabala n’obwishwekerezi kugerera amasala girhu, n’agandi mango rhwanajira ntyo omu kubaha ebi balagirireko. (Hb. 10:33) Ciru akaba ntyo, Ebibliya edesire n’obwalagale oku, “ngasi boshi balonza okulama bwinja omu bukombêdu [bwishwekerezi] muli Kristu Yezu, babone amalibuko.” (2 Tm. 3:12) Enyanya z’oko, rhweshi rhushinganine rhucirheganye oku malibuko garhuhikira omu nsiku ziri embere. Lekagi rhugendekere rhwalangalira Yehova loshi-loshi, omu kuyemera n’obwalagale oku arhurhabala okulembera ngasi mazibu gakarhuhikira. Omu kasanzi kashinganine, alerhera abakozi bage bishwekerezi boshi oburhulirize.—2 Ts. 1:7, 8.
19. Bici rhwakajira lyo rhucirheganya oku malibuko madarhi? (Olole n’enfoto.)
19 Buzira karhinda, amaruba Paolo ayandikiraga Abahabraniya gabarhabire lyo bacirheganya oku mazibu gakabahikire. Paolo ayinginzire ababo bemezi bakayiga Amandiko kwa bulîri n’okugahugûkwa. Omu kujira ntyo, bakabire n’obuhashe bw’okumanya n’okuyaka enyigirizo zakazambanyize obuyemere bwabo. Abahîre omurhima baseze obuyemere bwabo lyo bakaba babidu okurhumikira obulongozi bwa Kristu n’obw’abali balongoza omu cigamba. Na kandi, arhabire Abakristu babe n’obulembedu omu kuba n’entanya nyinja lugenda amarhangulo, n’okugabona nka njira Ishe w’obuzigire akag’ibakomerezamwo. Nirhu rhugwasirwe rhukolese er’ihano lyage lyalongozibagwa n’iroho litagatifu. Omu kujira ntyo, rhwanahash’ilembera n’obwishwekerezi kuhika oku buzinda.—Hb. 3:14.
Abakristu bishwekerezi bagishirwe enyanya z’obulembedu bwabo. Enyuma z’okurhenga omu Yudeya n’okuyaka, bagendekire barhimanana haguma. Bici oko kwakarhuyigiriza? (Olole ecifungo ca 19)
LWIMBO 126 Obe Masu, Obe n’Emisi, Onasimike
a Omu cigabi ca burhanzi cone, Paolo agalukire enderho za mandiko nda ntya g’Ecihabraniya ly’ayerekana oku enjira y’okuharamya y’Ecikristu elushire bwenene enjira y’okuharamya y’Eciyahudi.—Hb. 1:5-13.
