1. Bici Yezu ajira hano hofi-hofi?

 RHULAMIRE omu mango empindulo nnene zajirikanamwo! Hano hofi-hofi, Yezu atwira ngasi muntu olamire okw’igulu olubanja. Yezu aganirire ebyakajirikine embere ago mango g’okutwa olubanja gahike omu kuha abanafunzi bage ‘ecimanyiso’ c’okubaho kwage buzira kubonekana, n’ec’“okuhwa kw’igulu.” (Mt. 24:3) Eco cimanyiso ciganirirwe omu Mateyo cigabi ca 24 n’eca 25 n’omu myanzi eshushine n’ogo eri omu Marko cigabi ca 13 n’omu Luka cigabi ca 21.

2. Bici rhwaganirira mw’eci cigabi, na bulya gurhi okujira ntyo kwarhurhabala?

² Yezu ahânyire oburhonde kugerera nyiganyo isharhu ly’arhurhabala rhube rhucirheganyize. Ezo nyiganyo ziyerekire ebibuzi n’empene, ababikira b’obwenge n’ebingolongolo, n’amagerha. Ngasi lwiganyo lurhurhabire okuhugûkwa gurhi Yezu ayish’itwiramwo ngasi muntu olubanja kushimbana n’ebijiro byage. Omu kuganirira ezo nyiganyo, leki rhubone amasomo rhwakaciyigiriza na gurhi rhwakagakolesamwo. Olwiganyo lurhanzi rhwaganirira luyerekire ebibuzi n’empene.

EBIBUZI N’EMPENE

3. Mangaci Yezu ayish’itwira abantu olubanja?

³ Omu lwiganyo luyerekire ebibuzi n’empene, Yezu aganirire okutwirwa olubanja kw’abantu bagwerhe obulyo bw’okuyumvirhiza omwanzi mwinja n’okulunga bene wabo bashîge amavurha okuboko. (Mt. 25:31-46) Yezu ayish’ibatwira olo lubanja omu mango g’‘amalibuko [madarhi],’ kasanzi kasungunu embere z’ivita lya Harmagedoni. (Mt. 24:21) Nka kula omungere aberula ebibuzi n’empene, Yezu ayish’iberula abantu balunga okuboko  n’obwishwekerezi abanafunzi bage bashîge amavurha n’abarhabalunga okuboko.

4. Kushimbana na Izaya 11:3, 4, Mashi Bible, bulya gurhi rhwanayemera n’obwalagale oku Yezu ayish’itwira abantu olubanja omu njira y’obushinganyanya? (Olole eri oku cijalada.)

⁴ Obulebi bw’Ebibliya buyerekine oku Yezu, Mutwi w’Emanja Yehova ahizireho, ayish’itwira abantu olubanja omu njira y’obushinganyanya. (Osome Izaya 11:3, 4, Mashi Bible.) Ayish’ilolereza bwinja ebijiro by’abantu, entanya zabo, n’enderho zabo, kuhiramwo n’oku bajirira bene wabo bashîge amavurha. (Mt. 12:36, 37; 25:40) Yezu ayish’imanya ba ndi balunzire bene wabo bashîge amavurha okuboko n’omukolo gwabo. a Nguma y’omu njira z’obulagirire bwenene abantu bashushanyizibwe n’ebibuzi balungamwo bene wabo Kristu okuboko, kuli kubarhabala oku mukolo gw’amahubiri. Ababarhabala kw’ogo mukolo bayish’itwirwa olubanja nka ‘bashinganyanya’ banayish’iba n’obulangalire bw’‘obuzine bw’ensiku n’amango’ hanw’igulu. (Mt. 25:46; Maf. 7:16, 17) Olo luli luhembo lwinja bwenene abantu bishwekerezi bayish’ihâbwa! Omu kubêra bishwekerezi omu mango g’amalibuko madarhi n’enyuma z’aho, amazino gabo gayish’igendekera gaba mayandike omu “citabu c’obuzîne.”​—Maf. 20:15.

5. Bici olwiganyo lw’ebibuzi n’empene lurhuhîre omurhima rhujire, na ba ndi bashinganine okujira ntyo?

⁵ Oyerekane oku oli mwishwekerezi. Olwiganyo lwa Yezu lugenda ebibuzi n’empene luyerekire bwenene abagwerhe obulangalire bw’okulama hanw’igulu. Banayerekane obuyemere bwabo, arhali omu kurhabala kone bene wabo Kristu oku mukolo gw’amahubiri, cikone kandi, n’omu kuyemera n’obwishwekerezi obulongozi bw’ecigusho cisungunu c’Abakristu bashîge amavurha Yezu acishozire lyo balongoza. (Mt. 24:45) Cikone n’abagwerhe obulangalire bw’okuja empingu nabo bashinganine bayumvirhize omwanzi gw’oburhonde guli mw’olo lwiganyo. Bulya gurhi? Bulya Yezu analabe ebijiro byabo, entanya zabo, n’enderho zabo. Nabo bashinganine babe bishwekerezi. Kobinali, Yezu aganirire zindi nyiganyo ibirhi zirimwo oburhonde bw’obwalagale buyerekire abashîge amavurha. Kandi ezo nyiganyo ziri omu Mateyo cigabi ca 25. Rhuganirirage olwiganyo lw’ababikira b’obwenge n’ebingolongolo.

ABABIKIRA B’OBWENGE N’EBINGOLONGOLO

6. Gurhi babikira barhanu bayerekinemwo oku bali ba bwenge? (Mateyo 25:6-10)

⁶ Omu lwiganyo lw’ababikira, Yezu aganirire babikira ikumi bagendig’ilinga omuhya-mulume. (Mt. 25:1-4) Boshi bal’ilangalire okulusa omuhya-mulume okw’idinye ly’obuhya bwage. Yezu adesire oku barhanu muli bo bali “benge” n’abandi barhanu bali “bingolongolo.” Ababikira b’obwenge bal’icirheganyize banali masu. Bali tayari okulinda omuhya-mulume akasanzi koshi byakanahûnyire, ciru akaba ayishire enyuma bwenene omu budufu. Muli ntyo, bagula amavurha g’amatara lyo gagendekera gabamolekera omu mwizimya. Ciru bahêka n’agandi mavurha gakabarhabire erhi omuhya-mulume akalegamire okuyisha. Omu kujira ntyo, bal’icirheganyize ly’amatara gabo gagendekera gamoleka. (Osome Mateyo 25:6-10.) Erhi omuhya-mulume ahika, ababikira b’obwenge baja haguma naye omw’idinye ly’obuhya. Ko n’oko, Abakristu bashîge amavurha bayerekine oku bali babidu omu kugendekera babêra masu na bishwekerezi kuhika amango Kristu ayisha, bayish’ihâbwa oluhembo lw’okulungana haguma n’Omuhya-mulume, Yezu, omu Bwami bwage bw’empingu. b (Maf. 7:1-3)  Gurhigi lugenda ababikira barhanu b’ebingolongolo?

7. Bici byahikire ababikira barhanu b’ebingolongolo, na bulya gurhi?

⁷ Lubero n’ababikira b’obwenge, ababikira barhanu b’ebingolongolo barhali tayari erhi omuhya-mulume ahika. Amatara gabo gali hofi gazime, barhanal’ihesire agandi mavurha g’okuhiramwo. Erhi bamanya oku omuhya-mulume akola ali hofi ahike, byabahûna bagend’igula amavurha. Erhi omuhya-mulume ahika barhal’icigaluka. Ago mango, ababikira ‘bâli bacirheganyize baja omu k’obuhya [omw’idinye ly’obuhya] haguma naye, okubundi olumvi lwahamikwa.’ (Mt. 25:10) Buzinda erhi ababikira b’ebingolongolo bayisha banalonza okujamwo, omuhya-mulume ababwira ntya: “Ntammumanyiri.” (Mt. 25:11, 12) Abo babikira barhal’icirheganyize okulinda omuhya-mulume akasanzi koshi byakahûnyire. Isomo lihi oko kuyigirizize Abakristu bashîge amavurha?

8-9. Isomo lihi Abakristu bashîge amavurha bakaciyigiriza kugerera olwiganyo lw’ababikira? (Olole n’enfoto.)

⁸ Muyerekane oku mucirheganyize munali masu. Yezu arhalebaga oku hakabire bigusho bibirhi by’Abakristu bashîge amavurha, ecigusho cicirheganyize okulinda kuhika oku buzinda bw’er’igulu libi n’ecigusho cirhacirheganyizi. Cikone lubero n’oko, akag’ihugûla ebyakahikira Abakristu bashîge amavurha erhi akaba barhacirheganyizi okulembera n’obwishwekerezi kuhika oku buzinda. Erhi akaba barhacirheganyizi, barhakahâbwa oluhembo lwabo. (Yn. 14:3, 4) Ako kali kantu ka kurhôla kwa buzibu-zibu! Rhube rhugwerhe obulangalire bw’okulama empingu erhi hanw’igulu, rhweshi rhushinganine rhusegeze obwenge oku burhonde buli omu lwiganyo lw’ababikira. Ngasi muguma wirhu agwasirwe abe masu n’okuba acirheganyize okulembera kuhika oku buzinda.​—Mt. 24:13.

⁹ Enyuma z’okuganirira olwiganyo lw’ababikira ly’asegeza obulagirire bw’okuba rhucirheganyize  n’okuba masu, Yezu aganirire olwiganyo lw’amagerha. Olo lwiganyo luyerekine obulagirire bw’okukola n’obushiru.

AMAGERHA

10. Gurhi baja babirhi bayerekinemwo oku bali bishwekerezi? (Mateyo 25:19-23, Mashi Bible)

¹⁰ Omu lwiganyo lw’amagerha, Yezu aganirire baja babirhi bali bishwekerezi kuli nnawabo na muja muguma orhali mwishwekerezi. (Mt. 25:14-18) Abo baja babirhi bayerekine oku bali bishwekerezi omu kukola n’obushiru lyo bayushula obugale bwa nnawabo. Embere nnawabo abalame, abaha amagerha, ko kuderha mubalè munji bwenene gw’ensaranga. Abaja babirhi bishwekerezi bali ba bushiru bwenene banakolesa ezo nsaranga n’obwenge. Malehe gahi oko kwadwirhe? Erhi nnawabo agaluka, bali bamapata obunguke buyumanine n’omubalè gw’ensaranga abahâga. Nnawabo abavuga omunkwa anabwira ngasi muguma muli bo erhi, “yisha oshagaluke haguma na nani.” (Osome Mateyo 25:19-23, Mashi Bible.) Cikone gurhigi lugenda omuja wa kasharhu? Gurhi akolesize ensaranga nnawabo amuhâga?

11. Bici byahikire omuja “mwolo,” na bulya gurhi?

¹¹ Omuja wa kasharhu ahâbirwe igerha liguma cikone ali “mwolo.” Nnawabo al’ilonzize akolese er’igerha n’obwenge. Ahali h’okujira ntyo, alibisha omu budaka. Erhi nnawabo agaluka, oyo muja yehe arhal’igwerhe bunguke bw’okumuha. Oyo muja arhal’igwerhe entanya nyinja. Ahali oyo muja ahûne obwonjo bulya ayabirwe okuyushula obugale bwa nnawabo, ahamagala nnawabo okurhashinganini oku aba “mudarhi.” Oyo muja arhayemeragwa na nnawabo. Na kandi, anyagwa igerha al’ihâbirwe anafukuzibwa omu nyumpa ya nnawabo.​—Mt. 25:24, 26-30, Mashi Bible.

12. Ene, ndi abaja babirhi bishwekerezi bashushanyize?

¹² Abo baja babirhi bishwekerezi bashushanyize Abakristu bishwekerezi bashîge amavurha. Nnawabo, Yezu, abalalisire ‘bayishe bashagaluke haguma naye.’ Banahâbwe oluhembo lwabo lw’okuja empingu, ko kuderha obufûke burhanzi. (Mt. 25:21, 23, Mashi Bible; Maf. 20:5b) Okubundi, olwiganyo lubi lw’omuja mwolo luhîre Abakristu bashîge amavurha oburhonde. Omu njira nci?

13-14. Isomo lihi olwiganyo lw’amagerha luyigirizize Abakristu bashîge amavurha? (Olole n’enfoto.)

 ¹³ Oyerekane oku oli muntu okola n’obushiru. Omu lwiganyo lw’amagerha n’omu lwiganyo lw’ababikira, Yezu arhalebaga oku Abakristu bashîge amavurha bakabire bwolo. Cikone, akag’iganirira oku byakabire erhi bakahezize obushiru bwabo. Bakayabirwe okuzibuha “omu kuhamagalwa n’omu kucishogwa [kwabo],” barhakanayemerirwe okuja omu Bwami bw’empingu.​—2 Pt. 1:10.

¹⁴ Enyiganyo za Yezu lugenda ababikira n’amagerha ziyerekine n’obwalagale oku Abakristu boshi bashîge amavurha bagwasirwe babe bacirheganyize, babe masu n’okukola n’obushiru. Cikone, ka hali akandi kantu Yezu adesire ly’aha Abakristu bashîge amavurha oburhonde? Neci! Enderho za Yezu ziri omu Mateyo 24:40, 41 nazo ziyerekire olubanja luzinda Abakristu bashîge amavurha bayish’itwirwa.

NDI ‘WAHÊKWE’?

15-16. Gurhi olwandiko lwa Mateyo 24:40, 41 luyerekinemwo oku kuli kwa bulagirire Abakristu bashîge amavurha babe masu?

¹⁵ Embere Yezu aganirire ezo nyiganyo isharhu, aganirire olubanja luzinda lw’Abakristu bashîge amavurha lwayish’iyerekana ndi wayemirwe. Aganirire balume babirhi bali bakola omw’ishwa na bakazi babirhi bali bashwa. Omu ngasi kanga, bombi babonekine oku bali bajira omukolo go n’ogo, cikone Yezu aderha oku ‘muguma ahêkwa n’owabo alekwe.’ (Osome Mateyo 24:40, 41.) Buzinda ayinginga abanafunzi bage omu kuderha ntya: “Kuziga mube masu, bulya murhamanyiri olusiku Nnawinyu ayîsha.” (Mt. 24:42) Yezu adesire akantu kashushine n’ako enyuma z’okuganirira olwiganyo lw’ababikira. (Mt. 25:13) K’ezo nderho zigwerhe olushangi? Bibonekine ntyo. Abakristu bashîge amavurha b’okunali na bishwekerezi, bone ‘bayish’ihêkwa,’ erhi kuyankirirwa na Yezu omu Bwami bw’empingu.​—Yn. 14:3.

¹⁶ Oyerekane oku oli masu. Abakristu bashîge amavurha boshi barhagendekiri baba masu omu hali y’ekiroho, barhakashubuzibwa haguma n’“abishogwa.” (Mt. 24:31, Mashi Bible) Oko kuyerekine oku abantu ba Mungu boshi, babe bagwerhe bulangalire buhi, bashinganine babone ezo nderho za Yezu oku buli burhonde bubayeresire oku bashinganine babe masu n’okugendekera babêra bishwekerezi.

17. Bulya gurhi rhurhashinganini rhuhangayike lugenda mango gahi Yehova acishozire okushîga bantu balebe amavurha kugerera iroho lyage litagatifu?

¹⁷ Bulya rhwahikire okumanya Yehova bwinja, rhuba rhulangalire enjira yage y’okutwa emanja. Okubona Yehova acishozire okushîga amavurha bantu balebe bishwekerezi omu myaka yacizindig’igera, kurharhuhangayisa. c Rhunakengere ebi Yezu aderhaga omu lwiganyo lwage lw’ishwa ly’emizabibu lugenda abakozi bakolaga nsa 11. (Mt. 20:1-16) Abalalikagwa bayish’ikola mw’er’ishwa ly’emizabibu buzinda mw’olo lusiku, bakamasire kuguma n’abarhonderaga bakola sezi-sezi. Ko n’oko, ciru abashîge amavurha bakacishogwa mango gahi, bayish’ihâbwa oluhembo lw’okuja empingu erhi bakagendekera babêra bishwekerezi.

OYUMVIRHIZE OBURHONDE

18-19. Bici rhwaciyigirizize kugerera enyiganyo za Yezu?

¹⁸ Bici rhwaganirire? Oku bantu bagwerhe obulangalire bw’okulama ensiku n’amango hanw’igulu, olwiganyo lw’ebibuzi n’empene luyerekine oku kuli kwa bulagirire kuli bo okugendekera baba n’obuyemere n’okubêra bishwekerezi kuli Yehova, ene n’omu mango g’amalibuko madarhi gayisha. Mw’ago mango gayisha, Yezu ayish’itwira abantu bishwekerezi olubanja oku bashinganine okuhâbwa ‘obuzine bw’ensiku n’amango.’​—Mt. 25:46.

¹⁹ Kandi rhwaganirire nyiganyo ibirhi zihîre  Abakristu bashîge amavurha oburhonde. Omu lwiganyo lwa Yezu lw’ababikira b’obwenge n’ebingolongolo, barhanu muli bo bayerekine oku bali ba burhimanya. Bali bacirheganyize banali masu, bali tayari okulinda omuhya-mulume omu kasanzi koshi byakahûnyire okulinda. Cikone ababikira b’ebingolongolo barhal’icirheganyize. Muli ntyo, omuhya-mulume alahira okubayemerera baje omw’idinye lyage ly’obuhya. Nirhu rhugwasirwe rhube rhucirheganyize okulinda kuhika Yezu alerhe obuzinda bw’er’igulu libi, ciru byakahûna okulinda kasanzi kanganaci. Kandi omu lwiganyo lwa Yezu lw’amagerha, rhwaganirire abaja babirhi bishwekerezi bakolaga n’obushiru. Bakozire bwenene oku bunguke bwa nnawabo banayemerwa naye. Cikone, omuja mwolo alahirwa. Isomo lihi oko kurhuyigirizize? Rhugwasirwe rhube na binji bya kujira omu mukolo gwa Yehova kuhika oku buzinda. Rhwaganirire buzinda oku Abakristu bashîge amavurha bagwasirwe bagendekere baba masu lyo ‘bahêkwa’ na Yezu n’okuhâbwa oluhembo lwabo lw’empingu. Bali balindirira ‘okubuganana kwabo’ haguma na Yezu empingu. Enyuma z’ivita lya Harmagedoni, bayish’ilungana haguma na Yezu omu buhya bw’Omwana-buzi.​—2 Ts. 2:1; Maf. 19:9.

20. Gurhi Yehova ayish’ijirira abayumvirhiza oburhonde bwage?

²⁰ Ciru akaba olusiku lw’olubanja luyegerire bwenene, nta cirhumire rhugwerhe c’okuyoboha. Erhi rhwakagendekera rhwabêra bishwekerezi, Larha wirhu w’obuzigire w’omu mpingu ayish’irhuha “obuhashe [burhali bwirhu]” lyo ‘rhukwanana . . . okuyish’iyimanga embere za Mwene-omuntu.’ (2 Kr. 4:7, Mashi Bible; Lk. 21:36) Rhube rhugwerhe obulangalire bw’okuja empingu erhi bw’okulama hanw’igulu, rhwashagalusa Larha wirhu w’omu mpingu erhi rhwakayumvirhiza oburhonde buli omu nyiganyo za Yezu. Kugerera olukogo lwa Yehova lurhashinganinwi, amazino girhu gayish’iba ‘gayandisirwe omu citabu’ c’obuzine.​—Dan. 12:1; Maf. 3:5.