1-2. Bici birhuma abakozi ba Mungu baba bantu ba mwishingo? (Yakobo 1:22-25)

 YEHOVA n’Omugala muzigirwa baba balonzize rhube n’omwishingo. Omwandisi w’Ennanga 119:2, NWT, adesire ntya: “Ab’omwishingo bali balya bashimba ebi abakengeza, balya bamulongereza n’omurhima gwabo goshi.” Yezu naye adesire n’obwalagale ntya: “Ab’omwishingo bali balya bayumvirhiza Akanwa ka Mungu n’okukashimba!”​—Lk. 11:28, NWT.

² Rhuli bakozi ba Yehova, rhuba bantu ba mwishingo. Bulya gurhi? Rhujira birhumire binji, cikone cirhumire ciguma c’obulagirire kuli kubona oku rhunasome Akanwa ka Mungu ngasi lusiku n’okucihangana okukolesa ebi rhuyiga.​—Osome Yakobo 1:22-25.

3. Gurhi rhuyungukamwo omu kukolesa ebi rhusoma omu Kanwa ka Mungu?

³ Hali njira nyinji rhuyungukamwo omu ‘kuba ba kujira akanwa ka Nnâmahanga.’ Kwa lwiganyo, erhi rhukolesa ebi rhuli rhwayiga omu Kanwa ka Mungu rhunamushagaluse, n’oko kunarhume rhwaba n’omwishingo. (Muh. 12:13) Erhi rhukolesa ebi rhusoma omu Kanwa ka Mungu kalongozibagwa n’iroho lyage, rhunajire akalamo k’omulala gwirhu kabe kinja n’okuba n’obwîra busezire haguma n’abirhu bemezi. Nkaba ko byabire ntyo omu kalamo kawe. Kandi, rhunayake mazibu manji omu mazibu gahikira abarhakulikira enjira za Yehova. Kobinali, rhuyemire ebi Mwami Daudi aderhaga. Enyuma z’okuganirira omu lwimbo irhegeko, oburhonde, n’enjira za Yehova z’okutwa emanja, ashwinja ntya: ‘Ogakenga gali mw’obunguke.’​—Enna. 19:7-11, Mashi Bible.

4. Bulya gurhi okujira ebi rhusoma omu Kanwa ka Mungu kurhaba kulembu?

 ⁴ Okuderha okuli, arhali ensiku zoshi kuba kulembu kuli rhwe okujira ebi rhusoma omu Kanwa ka Mungu. Bulya rhujira binji bya kujira, rhugwasirwe rhucihirireho akasanzi k’okusoma n’okuyiga Ebibliya lyo rhuhugûkwa ebi Yehova alonzize rhujire. Co cirhumire, lekagi rhuganirire mahano malebe gakarhurhabala lyo rhukayisoma ngasi lusiku. Kandi rhwaganirira ebyakarhurhabala lyo rhukarhanya bwenene kw’ebi rhuli rhwasoma n’okubona njira zihi rhwakabikolesamwo omu kalamo kirhu.

OKACIHIRIRAHO AKASANZI K’OKUSOMA AKANWA KA MUNGU

5. Mikolo ehi erhurhôla kasanzi kanji?

⁵ Bakozi ba Yehova banji bajira bintu binji bya kujira omu kalamo kabo. Rhunakolese kasanzi kanji lyo rhuhikiriza emikolo eri lubero Amandiko garhuhûnyire rhuhikirize. Kwa lwiganyo, banji muli rhwe banajire akazi k’omubiri lyo bahikiriza amalagirire gabo n’ag’emilala yabo. (1 Tm. 5:8) Bakristu banji banashibirire abantu b’emilala yabo balwazire, erhi bakola bashosi. Na rhweshi rhuba rhushinganine rhushibirire amagala girhu, n’oko kunarhôle akasanzi. Ahanyuma n’eyo mikolo yoshi, rhujira ebigabi omu cigamba. Ecigabi c’obulagirire rhujira kuba kujira n’obushiru omukolo gw’amahubiri. Kw’eyo mikolo yoshi oshinganine ohikirize, gurhigi wakapatamwo akasanzi k’okusoma Ebibliya ngasi lusiku, okurhanya bwenene kw’ebi oli wasoma, n’okukolesa ebi edesire?

6. Gurhi wakajira ly’ohira okusoma Ebibliya oku nafasi ntanzi omu kalamo kawe? (Olole n’enfoto.)

⁶ Okusoma Ebibliya kali kaguma k’omu ‘bintu by’obulagirire bwenene’ kuli rhwe rhuli Bakristu, co cirhumire rhushinganine rhukuhire oku nafasi ntanzi. (Fl. 1:10, NWT) Lugenda omuntu w’omwishingo, olulanga lwa burhanzi ludesire ntya: “Anasimisibwe n’irhegeko lya Yehova, ananalisome omw’izu lisungunu mushi n’obudufu.” (Enna. 1:1, 2, NWT) Oko kuyerekine n’obwalagale oku rhushinganine rhucihirireho akasanzi k’okusoma Ebibliya. Akasanzi kinja k’okusoma Ebibliya ko kahi? Ngasi muntu anahâna ishuzo liri lubero n’ely’owundi.  Cikone kwa bofofi, kanaba kasanzi wakahasha okujira ntyo ngasi lusiku. Mwene wirhu muguma ohamagalwa Victor adesire ntya: “Nsima okusoma Ebibliya sezi. Ciru akaba ntahasha okuzuka sezi-sezi, harhaba hali bintu binji byakahêka omuntu obwenge omu nsa z’esezi. Nambe ntagwerhi bintu binji omu bukengere, kunanabe kulembu kuli nie okubusegeza kw’ebi ndi nasoma.” Ka ntyo ko nawe obona? Ocidose ntya: ‘Akasanzi kinja kuli nie k’okusoma Ebibliya kaba kahi?’

OKARHANYA BWENENE KW’EBI OLI WASOMA

7-8. Bici byakarhuma rhurhayunguka bwenene n’ebi rhusomire? Ohâne olwiganyo.

⁷ Cikone okuderha okuli, rhwanasoma myanzi minji bwenene ngasi mango buzira kuyihugûkwa bwinja. K’okola osomire bintu bilebe na kasanzi kasungunu enyuma z’aho orhacikengere binji lugenda ebi wasomaga? Rhweshi oko kwarhuhikire. Eby’okugayisa kuli kubona oku byanaba ntyo lugenda obusomi bwirhu bw’Ebibliya. Nkaba rhwacihirireho omuhigo gw’okusoma bigabi bilebe by’Ebibliya ngasi lusiku. Okujira ntyo kuli kwinja bwenene. Rhushinganine rhucihirireho emihigo n’okucihangana okuyihikiriza. (1 Kr. 9:26) Cikone, lyo rhuyunguka bwenene n’ebi rhusoma omu Kanwa ka Mungu, rhushinganine rhujire binji ahanyuma n’okusoma kone.

⁸ Orhanye kw’olu lwiganyo: Emburho ziba zilagirire oku mishi g’enkuba. Cikone erhi nkuba nyinji yakania duba-duba, obudaka bunayunjule mishi. N’erhi eyindi nkuba yakania erhakacinywengerera omu budaka, n’emburho zirhakaciyunguka n’eyo nkuba. Kuba kwinja erhi enkuba enia bunyi-bunyi bulya amishi gananywengerere omu budaka n’okurhabala emburho lyo zikula. Ko n’oko, rhushinganine rhukayaka okusoma Ebibliya duba-duba, bulya okujira ntyo kwanarhuma rhwayabirwa okurhanya bwenene kw’ebi rhuli rhwasoma, okubikengera n’okubikolesa.​—Yk. 1:24.

9. Gurhi rhwakajira erhi akaba rhukola rhugwerhe enkomedu y’okusoma Ebibliya duba-duba?

⁹ Ka hali amango obona oku oli wasoma Ebibliya duba-duba? Erhi akaba ntyo, bici oshinganine ojire? Omanye oku dibi-dibi garhaba magulu. Ocihangane okurhanya bwenene kw’ebi  oli wasoma erhi ebi wamayusa wasoma. Oko kurhashinganini kukuyobohye. Nkaba wanahiga okuyushula akasanzi kawe k’okuyiga ly’oba n’akasanzi k’okurhanya bwenene. Oku bundi, wanahiga okukasoma milongo misungunu yone n’okukolesa akasanzi kasigire ly’orhanya bwenene kw’ebi wasomire. Victor, rhwaganiriraga embere, adesire ntya: “Ntasoma binji bwenene, nanasoma ciru cigabi ciguma cone. Bulya nansome sezi-sezi, nambe n’obuhashe bw’okugendekera narhanya omulegerege goshi kw’ebi nasomire.” Wene wakacishoga binganaci wasoma, cikone kuli kwa bulagirire orhasomaga duba-duba ly’ohasha okurhanya bwenene kw’ebi oli wasoma.​—Enna. 119:97; olole ecisanduku cidesire, “ Amadoso Wakarhanyako.”

10. Ohâne olwiganyo luyerekine gurhi wakakolesamwo ebi oli wayiga. (1 Abatesalonika 5:17, 18)

¹⁰ Obe onasome Ebibliya kasanzi kahi na kasanzi kanganaci oyusa oli wayisoma, ocihangane okulonza enjira wakakolesamwo ebi oli wasoma. Amango oli wasoma cigabi cilebe c’Akanwa ka Nnâmahanga, ocidose ntya: ‘Gurhi nakakolesamwo ogu mwanzi ene erhi omu mango gayisha?’ Kwa lwiganyo, orhanye wasomire olwandiko lwa 1 Abatesalonika 5:17, 18. (Osome.) Enyuma z’okusoma eyo milongo yombi, wanahulika hisungunu n’okurhanya ly’omanya erhi onasalire kanji-kanji n’okuderha eby’okurhenga oku murhima. Kandi, wanarhanya oku bintu ovuzireko Yehova omunkwa. Nkaba wanahiga bintu bisharhu by’obwalagale wakavugako Yehova omunkwa. Ciru wakakolesa miniti misungunu yone ly’orhanya lugenda amasomo ociyigirizize kurhenga omu Bibliya, oko kwanakurhabala okuyumvirhiza Akanwa ka Nnâmahanga n’okujira ebi kadesire. Orhanye kunganaci wakayunguka omu kukajira ntyo ngasi lusiku lugenda ebindi bigabi by’Ebibliya osomire! Kobinali, oko kwanarhuma waba muntu ojira ebi ayiga omu Kanwa ka Nnâmahanga. Cikone, gurhigi erhi akaba bibonekine oku hali bintu binji oshinganine ojireko empindulo?

OCIHIRIREHO EMIHIGO Y’OLUGERO

11. Nkaba bulya gurhi hali amango wakaciyumva ozidohirwe? Ohâne olwiganyo.

¹¹ Amango oli wasoma Ebibliya n’okulonza enjira wakakolesamwo obulongozi bwayo, nkaba hali amango wakaciyumva ozidohirwe. Orhanye kw’aka kanga: Ene omu busomi bwawe bw’Ebibliya, wasomire ihano lugenda okuyerekana akabôlo. (Yk. 2:1-8) Obone oku oshinganine okubûle oku ojirira abandi, na muli ntyo ohige okujira mpindulo ndebe. Oko kuli kwinja! Lero irhondo osome olwandiko luyerekine obulagirire bw’okuba masu lugenda enderho zawe. (Yk. 3:1-12) Ohugûkwe oku hali amango oderha enderho zirhali nyinja na za kuvuna abandi omurhima. Na muli ntyo, ohige oku wacihangana okukaderha enderho nyinja na za kuha abandi omurhima. Olusiku lukulikire  omu busomi bwawe bw’Ebibliya, osome oburhonde lugenda okuba mwîra w’igulu. (Yk. 4:4-12) Ohugûkwe oku oshinganine obe masu lugenda okucishoga ebi ocishagalusamwo. Olusiku lwa kani nkaba wanaciyumva ozidohirwe bwenene enyanya z’ebyo bintu byoshi oshinganine ojireko empindulo.

12. Bulya gurhi orhashinganini ovunike omurhima erhi obusomi bwawe bw’Ebibliya bwakayerekana oku oshinganine ojire empindulo? (Olole n’amahugûlo g’idako.)

¹² Erhi akaba oshinganine ojire mpindulo ndebe erhi kukubûla bintu bilebe, orhavunikaga omurhima. Oko kuyerekine oku omurhima gwawe guli mwinja. Omuntu oli mwirhohye orhanacirheba yene, anasome Amandiko agwerhe n’entanya z’okulola aha ashinganine ajire empindulo. a Kandi, okengere oku rhugwasirwe rhugendekere rhwayambala “omuntu muhyahya.” (Kl. 3:10, Mashi Bible) Bici byakakurhabala ly’ogendekera waba muntu wa kujira ebi asoma omu Kanwa ka Nnâmahanga?

13. Gurhi wakacihiriraho emihigo y’olugero? (Olole n’enfoto.)

¹³ Ahali h’okulonza okukolesa caligumiza ebintu byoshi osomire, ocihirireho mihigo milebe y’olugero. (Mig. 11:2) Opime okujira ntya: Ojire eliste y’ebintu oshinganine ojireko empindulo, buzinda ocishoge kantu kaguma erhi bibirhi wakarhang’ijirira empindulo; oleke ezindi mpindulo ozijire omu gandi mango. Muhigo guhi wakarhangirirako?

14. Mihigo ehi wakarhangirirako?

¹⁴ Wanahiga okurhangirira oku bintu bilembu kuli we okuhikira. Erhi nkaba wanahiga okurhangirira oku kantu obwine oku oshinganine ojireko mpindulo nyinji. Enyuma z’okuhiga akantu oshinganine ojireko empindulo, ojire obusagasi omu bicapo birhu, nkaba  omu kukolesa e Index des Publications des Témoins de Jéhovah erhi ecitabu Musaada wa Kutafuta Habari kwa Ajili ya Mashahidi wa Yehova. Oshenge Yehova lugenda omuhigo gwawe, omu kumuhûna “irala n’emisi y’okujira.” (Fl. 2:13, NWT) Buzinda okolese ebi wayizire. Enyuma z’okujira amajambere lugenda omuhigo gwawe murhanzi, wanaciyumva oshumibwe okucihangana ly’ohikira ogundi muhigo. Nkaba erhi wakabona oku wahashire okujira mpindulo ndebe erhi kukubûla borhere bulebe bw’Ecikristu, wanaciyumva oshumibwe okugendekera wajira empindulo. Kandi nkaba kwanaba kulembu kuli we okujira ezindi mpindulo.

OLEKE AKANWA KA MUNGU ‘KAKOLE MULI WE’

15. Gurhi abantu ba Yehova babamwo lubero n’abandi bantu banji basoma Ebibliya? (1 Abatesalonika 2:13)

¹⁵ Bantu baguma na baguma banaderhe oku basomire Ebibliya kanji-kanji. Cikone, ka kobinali baba bayemire ebi Ebibliya eyigirizize? Ka babikolesize erhi kubileka bishanje akalamo kabo? Nanga. Kanji-kanji abantu barhakolesa amahano g’Ebibliya. Cikone, abantu ba Yehova bajira entanya ziri lubero lugenda Ebibliya! Ak’Abakristu b’omu myaka igana mirhanzi, rhuba rhuyemire Ebibliya ‘nk’oku enali, nka Luderho lwa Nnâmahanga.’ Kandi, rhunajire okwirhu koshi lyo rhuyerekana oku rhunakolese amahano gayo omu kalamo kirhu.​—Osome 1 Abatesalonika 2:13.

16. Bici byakarhurhabala lyo rhuba bantu ba kujira ebi rhusoma omu Kanwa ka Nnâmahanga?

¹⁶ Arhali ngasi mango kuba kulembu okusoma n’okukolesa Akanwa ka Mungu. Nkaba kwanaba kuzibu kuli rhwe okupata akasanzi k’okusoma. Nkaba rhwanalonza okusoma duba-duba buzira kurhanya bwenene kw’ebi rhusomire. Erhi nkaba rhwanaciyumva rhuzidohirwe n’empindulo zoshi rhushinganine okujira. Ciru wakaba ogwerhe mazibu gahi, wanahasha okugahima kugerera oburhabale bwa Yehova. Lekagi rhuhige okuyemera oburhabale bwage lyo rhurhabaga bumvirhiza bayibagira, ci rhube bantu bajira ebi basoma omu Kanwa kage. Buzira karhinda, oku rhwagendekera rhwasoma Akanwa ka Mungu bwenene n’okukakolesa omu kalamo kirhu, ko rhwanagendekera rhwaba bantu ba mwishingo bwenene.​—Yk. 1:25.