1-2. Gurhi rhuyungukamwo omu kuba rhwalemirwe n’obuhashe bw’okuba na bushagaluke bunji omu kuhâna kulusha omu kuhâbwa?

 ERHI Yehova alema bene bantu, abalemire n’obuhashe bw’okuba n’obushagaluke bunji omu kuhâna kulusha omu kuhâbwa. (Ebj. 20:35, NWT) K’oko kuli kuderha oku nta bushagaluke rhuba nabo omu kuhâbwa? Nanga. Rhumanyire kugerera ebi rhwacibwinire oku rhunaciyumve bwinja erhi rhuhâbwa engalo. Cikone, rhunayumve ciru bushagaluke bunji kulusha erhi akaba rhwe rhwahânaga. Na kobinali, Yehova arhulemire ntyo oku bunguke bwirhu. Bulya gurhi?

² Omu kurhulema omu njira ya ntyo, Yehova arhuhîre obulyo bw’okuyushula obushagaluke bwirhu. Rhwanayushula omwishingo gwirhu omu kulonza enjira rhwakahamwo abandi. Kuli kwinja bwenene okubona Yehova arhulemire omu njira ya ntyo​—Enna. 139:14.

3. Bulya gurhi Yehova ahamagirwe “Mungu w’obushagaluke”?

³ Amandiko garhuyemezize n’obwalagale oku okuhâna kunalerhe obushagaluke, co cirhumire birhasomezizi okubona Ebibliya edesire oku Yehova aba “Mungu w’obushagaluke.” (1 Tm. 1:11, NWT) Ye Muhânyi murhangiriza na mukulu bwenene. Nk’oku entumwa Paolo yaderhaga, “muli ye, rhugwerhe obuzine, n’obwikanye n’okuba ho.” (Ebj. 17:28, Mashi Bible) Kobinali, “ngasi ngalo nyinja na ngasi nshokano nkana” emwa Yehova birhenga.​—Yk. 1:17.

4. Bici byarhurhabala lyo rhucibonera bushagaluke bunji?

⁴ Nkaba rhweshi rhwanalonza rhucibonere bwenene obushagaluke bunji burhenga omu kuhâna. Rhwanacibonera obo bushagaluke  omu kuba bahânyi aka Yehova. (Ef. 5:1) Amango rhuli rhwaganirira oko, leki rhubone ebi rhwakajira erhi rhwakaciyumva nk’abandi barhashagalukiri ebi rhwabajiriraga. Oko kwarhurhabala lyo rhugendekera rhwaba n’obushagaluke burhenga omu kuhâna n’okubuyushula.

OBE MUHÂNYI AKA YEHOVA

5. Bintu bihi by’omubiri Yehova arhuha?

⁵ Njira ndebe zihi Yehova ayerekanamwo oku aba muhânyi? Rhuganirire nyiganyo nsungunu. Yehova anarhuhe ebintu by’omubiri. Nkaba arhali ensiku zoshi rhwakaba rhugwerhe ebintu by’ibeyi bwenene, cikone kugerera oburhabale bwa Yehova, banji muli rhwe bajira ebi balagirireko. Kwa lwiganyo, anarhuhashise okupata ebiryo, emishangi n’aha rhwalama. (Enna. 4:8; Mt. 6:31-33; 1 Tm. 6:6-8) Ka Yehova anarhuhikirigize amalagirire girhu g’omubiri bulya kone asezibwe okujira ntyo? Nanga ciru n’ehitya! Bici birhuma Yehova arhujirira ntyo?

6. Bici olwandiko lwa Mateyo 6:25, 26, Mashi Bible, lurhuyigirizize?

⁶ Kwa bofofi, Yehova anarhuhikirigize amalagirire girhu g’omubiri bulya aba arhuzigire. Rhuganirire enderho za Yezu ziri omu Mateyo 6:25, 26, Mashi Bible. (Osome.) Yezu akolesize enyiganyo z’obulemi. Omu kuganirira orhunyunyi, Yezu adesire ntya: “Rhurharhwera rhurhanasarula, rhurhahakira omu nguli.” Cikone, olole ebi acibir’iderha: “Sho winyu oba empingu analîse rhwo!” Buzinda Yezu adosize ntya: “K’arhali mwe mulushire orhwo rhunyunyi?” Bici Yezu al’ilonzize okurhuyigiriza? Yehova anabone abakozi bage oku bali ba ngulo ndarhi bwenene kulusha ensimba. Co cirhumire, erhi akaba Yehova anahikirigize ensimba amalagirire gazo, rhwanayemera n’obwalagale oku arhuhikirigiza amalagirire girhu! Ak’omushamuka ohikiriza amalagirire g’omulala gwage, Yehova anahikirize amalagirire g’omulala gwage enyanya z’obuzigire.​—Enna. 145:16; Mt. 6:32.

7. Njira nguma ehi rhwakabamwo bahânyi aka Yehova? (Olole n’enfoto.)

⁷ Aka Yehova, nirhu rhwanaha abandi ebintu by’omubiri enyanya z’obuzigire. Kwa lwiganyo, k’omanyire owinyu mwemezi olagirire oku biryo erhi oku mishangi? Yehova anakukolesa ly’omuha kantu kalebe kamurhabala okuhikiriza obo bulagirire. Abantu ba Yehova baba bamanyikine oku murhima gwabo gw’okuyerekana obuhânyi erhi obuhanya burhibuka. Kwa lwiganyo, omu mango g’obulwala bw’okuyahukira bw’e COVID-19, bene wirhu na bali birhu barhabire abali omu bulagirire omu kubaha ebiryo, emishangi, n’ebindi bintu bal’ilagirireko. Na banji bahânyire emicango lyo balunga okuboko  omukolo gw’omw’igulu lyoshi. Oko kwarhumire rhwapata oburhabale bw’okuha bene wirhu na bali birhu bali omu bulagirire omw’igulu lyoshi. Bakolesize enderho ziri omu lwandiko lw’Abahabraniya 13:16, zidesire ntya: “Okujira aminja nakwo n’okushangîra ebintu n’abandi, murhakuyibagiraga; entûlo za bene ezo zo Nyamuzinda asîma.”

8. Njira zihi rhuyungukamwo n’obuhashe bwa Yehova? (Abafilipi 2:13)

⁸ Yehova anarhuhe obuhashe. Yehova anashagalukire okuha abakozi bage bishwekerezi oku misi yage erhajira lugero. (Osome Abafilipi 2:13.) Ka hali amango okola oshenzire Yehova akuhe emisi y’okuhagalika amashumi erhi akuhe obuhashe bw’okulembera mazibu malebe? Nkaba kandi wamuhûnyire akuhe emisi wal’ilagirireko ly’ogendekera ciru lundi lusiku luguma. Erhi isala lyawe ly’okuhûna emisi lishuzibwa, nkaba wayemire ezi nderho za Paolo wayandikaga ntya: “Nanahasha byoshi n’oburhabale bw’Olya onzibuhya.”​—Fl. 4:13.

9. Njira zihi rhwakayigamwo Yehova omu kukolesa emisi yirhu lyo rhurhabala abandi? (Olole n’enfoto.)

⁹ Ciru akaba rhuli bantu barhali bimana, rhwanaha abandi emisi yirhu aka Yehova. Rhurhakaha abandi emisi omu njira y’okunali. Cikone rhwanakolesa emisi yirhu lyo rhubarhabala. Kwa lwiganyo, rhwanarhabala Omukristu okola mushosi erhi olwazire omu kugend’imugulira bintu bilebe erhi kumujirira emikolo y’omu nyumpa. Erhi akaba akanga kirhu karhuyemerire, rhwanacihâna lyo rhucêsa erhi kushibirira Enyumpa y’Obwami. Okukolesa emisi yirhu omu njira za ntyo, kunalerhere abandi baharamya Yehova obunguke.

10. Gurhi rhwakakolesamwo obuhashe bw’enderho zirhu lyo rhulerhera abandi obunguke?

¹⁰ Kandi, orhayibagiraga oku enderho zijira obuhashe. Ka wanarhanya kuli muntu mulebe wakahâbwa omurhima erhi wakamubwira kurhenga oku murhima oku oshagalukire ebi ajijire? Ka hali omuntu omanyire olagirire oku burhulirize? Akaba ntyo kobiri, ojire kantu kalebe ly’oyo muntu amanya oku omushibirire. Wanalambagirira oyo muntu busu oku busu, wanamuhamagala kugerera etelefone erhi nkaba wanamurhumira akarte, amaruba erhi mesaje. Orhayobohaga bwenene lugenda eby’okuderha. Enderho nsungunu zirhenzire oku murhima, zanaba zo owinyu mwemezi alagirireko ly’abêra mwishwekerezi ciru lundi lusiku luguma, erhi kuciyumva bwinja lugenda akanga kage.​—Mig. 12:25; Ef. 4:29.

11. Gurhi Yehova akolesamwo obwenge bwage?

¹¹ Yehova anarhuhe obwenge. Entumwa Yakobo yayandisire ntya: “Obuzire obushinganyanya [obwenge, NWT] muli mwe, abushenge Nnâmahanga, oshoboza boshi burhagera na buzira karhinda; abuhâbwa.” (Yk. 1:5) Ezo nderho ziyerekine  oku Yehova arhabêrana obwenge bwage yene. Bulya aba muhânyi, anabuhe abandi. Kandi Yakobo adesire oku erhi Yehova ahâna obwenge, anajire ntyo “buzira karhinda.” Nta mango akarhujira rhuciyumve kubi erhi rhumuhûna obulongozi. Kobinali, arhuyinginzire rhukajira ntyo.​—Mig. 2:1-6.

12. Bulyo buhi rhujira bw’okushangira obwenge bwirhu haguma n’abandi?

¹² Gurhigi nirhu? Ka rhwanayiga Yehova omu kushangira obwenge bwirhu haguma n’abandi? (Enna. 32:8) Abantu ba Yehova bajira bulyo bunji bw’okushangira n’abandi ebi bayizire. Kwa lwiganyo, kanji-kanji rhunakomereze abahyahya omu mukolo gw’amahubiri. Omu njira y’obulembedu, abagula banarhabale abarhabazi b’abagula na bene wirhu babatize lyo bayiga oku bakahikirizamwo emikolo yabo omu cigamba. N’abagwerhe obulenga omu kuyubaka n’okushibirira enyumpa z’eciteokrasi, banarhabale okukomereza abandi barhagwerhi bulenga bw’okujira ogo mukolo.

13. Amango rhuli rhwakomereza abandi, gurhi rhwakayigamwo oku Yehova ashangira obwenge bwage haguma n’abandi?

¹³ Kuli kwinja abakomereza abandi bakayiga oku Yehova ahamwo abandi obwenge bwage. Okengere oku Yehova anahe abandi obwenge bwage buzira kugera. Ko n’oko, rhulonzize rhukashangira buzira kusezibwa obumanye bwirhu n’obulenga bwirhu haguma n’abali bakomerezibwa. Rhurhaleka okuyeresa aba rhuli rhwakomereza ebintu byoshi mpu bulya rhuyobohire oku buzinda bayish’irhôla enafasi yirhu. Rhurhanarhanya erhi: ‘Ntaye wankomerezagya! Naye yene acikomereze.’ Abantu ba Yehova barhashinganini babe n’entanya za ntyo. Lubero n’oko, rhunashagalukire okuha aba rhuli rhwakomereza arhali bumanye bwirhu bone “ci n’obuzine bwirhu ciru.” (1 Ts. 2:8) Rhunalangalire oku, bahasha nabo ‘okubibwiriza abandi.’ (2 Tm. 2:1, 2) Erhi ngasi muguma wirhu akakashangira obwenge bwage haguma n’abandi, anaba n’obwenge n’omwishingo munji, n’abandi nabo ko n’oko.

ERHI BYAKABONEKANA NK’ABANDI BARHALI BA KUVUGA OMUNKWA

14. Gurhi bantu banji bajira erhi rhubaha erhi kubajirira kantu kalebe?

¹⁴ Erhi rhwakaha erhi kujirira abandi kantu kalebe, ci bwenene bene wirhu na bali birhu, kanji-kanji banarhuvuge omunkwa. Nkaba banarhurhumira amaruba g’okurhuvuga omunkwa erhi kuyerekana oku barhuvuzire omunkwa omu yindi njira. (Kl. 3:15) Erhi barhuvuga omunkwa, oko kunarhume rhwashagaluka bwenene.

15. Bici rhushinganine rhukengere erhi akaba bantu baguma na baguma babonekine nka barhali ba kuvuga omunkwa?

¹⁵ Ciru akaba ntyo, hali amango bantu baguma na baguma barharhuvuga omunkwa kw’ebi rhwabajiriraga. Hali amango rhuha abandi akasanzi kirhu, emisi yirhu, erhi ebirugu birhu, cikone buzinda rhucidose erhi kobinali babwine ebi rhwabajiriraga. Erhi oko kwakarhuhikira, gurhi rhwakajira lyo rhurhahezagya omwishingo gwirhu erhi kuvunika omurhima? Okengere enderho z’olwandiko lwirhu lw’omusingi, Ebijiro by’Entumwa 20:35, NWT. Rhurhaba n’obushagaluke omu kuhâna mpu bulya aba rhwahaga kantu kalebe barhuvuzire omunkwa erhi nanga. Rhwanacishoga okuba n’obushagaluke burhenga omu kuhâna, ciru akaba abandi babonekine nka barhali ba kuvuga omunkwa. Gurhi rhwakajiramwo ntyo? Rhuganirire njira ndebe.

16. Bici rhushinganine rhukakengera lugenda okuha abandi?

¹⁶ Okengere oku erhi oha abandi kantu kalebe, onabe oli wayiga Yehova. Anahe abantu ebintu binja, babe bavuzire omunkwa erhi nanga. (Mt. 5:43-48) Yehova arhulaganyize oku erhi nirhu rhwakahâna ‘buzira kulangalira oku rhwalyulwa,’ rhwahâbwa “luhembo lunene.” (Lk. 6:35, Mashi Bible) Ebi rhwakalyulwa byanahiramwo okurhuvuga omunkwa. Babe barhuvuzire omunkwa erhi nanga, ensiku zoshi Yehova  arhulyula aminja rhujirira abandi omu ‘kuhâna rhunashagalusire.’​—Mig. 19:17; 2 Kr. 9:7.

17. Yindi njira ehi rhwakayigamwo Yehova nka rhwaha abandi? (Luka 14:12-14)

¹⁷ Akandi kantu rhwakajira lyo rhuyiga Yehova nka rhwaha abandi, kuli kukolesa ebi Yezu aderhaga omu Luka 14:12-14. (Osome.) Kurhali kubi okuba bahânyi omu zindi njira erhi okuyegereza aha mwabirhwe abantu bakahasha okurhujirira nabo ntyo. Cikone, gurhigi erhi rhwakahugûkwa oku kanji-kanji rhunahâne bulya rhulangalire oku rhwagalulirwa kantu kalebe? Kwanaba kwinja rhucihangane okukolesa ihano Yezu ahânaga. Rhwanayegereza aha mwabirhwe muntu mulebe orhagwerhi obuhashe bw’okurhuyegereza naye. Omu kujira ntyo, rhwanaba n’obushagaluke bulya rhuli rhwayiga Yehova. Okuba n’entanya za ntyo nako kwanarhurhabala rhugendekere rhwaba n’omwishingo amango abandi barharhuvuziri omunkwa.

18. Bici byakarhurhabala lyo rhuyaka okurhanyiza abandi kubi?

¹⁸ Oyake okurhanya oku abandi barhali ba kuvuga omunkwa. (1 Kr. 13:7) Erhi akaba abandi barhayerekini oku bavuzire omunkwa, rhwanacidosa ntya: ‘Ka kobinali barhali ba kuvuga omunkwa erhi bayibagire kone okuyerekana oku bavuzire omunkwa?’ Nkaba hanaba hali ebyarhumaga barharhuvuga omunkwa nk’oku rhwal’ilangalire. Baguma na baguma banaciyumva oku bavuzire omunkwa bwenene cikone babe n’amazibu g’okuderha ntyo. Nkaba banayumva enshonyi erhi akaba bahâbirwe oburhabale, ci bwenene erhi akaba omu mango gageraga bo bakag’irhabala abandi. Abe ntyo kobiri erhi nanga, obuzigire bw’Ecikristu bwarhushumya rhuyake okurhanyiza abirhu bemezi kubi n’okugendekera rhwaba n’omwishingo gurhenga omu kuhâna.​—Ef. 4:2.

19-20. Bulya gurhi obulembedu buli bwa bulagirire erhi rhwakaha abandi kantu kalebe? (Olole n’enfoto.)

¹⁹ Obe wa kulembera. Lugenda okuba bahânyi, Solomoni, mwami w’obwenge ayandisire ntya: “Kweba omugati gwawe oku mîshi, wazinda erhi washubigurhôla.” (Muh. 11:1) Ezo nderho zirhuyigirizize oku hali amango abantu bakarhuyeresa oku barhuvuzire omunkwa enyuma za kasanzi kanji. Rhuganirire olwiganyo luyerekine ntyo.

 ²⁰ Hali hamagera myaka minji kurhenga muka mwangalizi w’omuzunguko ayandikiraga mwali wirhu muguma waciyusig’ibatizibwa amaruba g’okurhenga oku murhima, amuyinginga agendekere abêra mwishwekerezi. Myaka munani ntya enyuma z’aho, oyo mwali wirhu amushuza ntya kugerera amaruba: “Kobinali, nnonzize okukumanyisa kunganaci wantabire omu myaka egezire ciru akaba orhamanyaga ntyo.” Acibir’iyushula ntya: “[Amaruba gawe] gali ga kushagalusa bwenene, cikone olwandiko lwalimwo lo lwampumire oku murhima bwenene ntakanaluyibagira ciru n’ehitya.” a Enyuma z’oyo mwali wirhu okuhugûla mazibu maguma na maguma alwisize, aderha ntya: “Hali amango nakag’iciyumva nka ndeke ngasi kantu n’okuleka okukolera Yehova. Cikone olwandiko wantumiraga lwakampuma oku murhima nanakalonza okugendekera.” Ayushwire ntya: “Nta kandi kantu koshi-koshi kabire n’obuhashe bw’okuntabala ntyo mw’eyo myaka munani.” Orhanye kunganaci oyo muka mwangalizi w’omuzunguko ashagalusire omu kuyankirira ago maruba enyuma za myaka minji! Nirhu banarhuvuga omunkwa nsiku nyinji enyuma z’okurhabala abandi omu njira ndebe.

21. Bulya gurhi ohizire okugendekera waba muhânyi aka Yehova?

²¹ Nk’oku rhwaganiriraga, Yehova arhulemire n’obuhashe bwago-bwago. Ciru akaba rhunashagalukire okuhâbwa, rhunabe na bushagaluke bunji erhi rhuha abandi. Rhunaciyumve bwinja erhi rhuba n’obuhashe bw’okurhabala abirhu bemezi. Kandi rhunabe n’obushagaluke erhi bayerekana oku bavuzire omunkwa. Cikone, ciru owahâbagwa akayerekana oku avuzire omunkwa erhi nanga, rhwanaba n’omwishingo bulya rhwajijire akantu kinja. Orhahiraga okayibagira oku ciru wakahâna kantu kahi, “Nyamubâho anayishikuhâ okulushire ahola.” (2 Nga. 25:9) Co cirhumire, nta mango wakaha abandi binji kulusha ebi Yehova akakuha! Na nta bushagaluke bunji bwakaba ho bulushire obu rhwakaba nabo omu kugalulirwa na Yehova yene. Lekagi rhugendekere rhwayiga olwiganyo lwa Larha wirhu w’omu mpingu oba muhânyi.