Amango rhuli rhwacirheganya lyo rhuyiga, rhwanacidosa ntya: ‘Bici nnonzize okumanya?’ Ciru akaba ntyo, rhushinganine rhube masu lyo rhurhalekaga ebi rhulonzize okumanya birhume rhurhahugûkwa ebi Yehova alonzize okurhuyigiriza. Gurhi rhwakajira lyo rhupata ebihyahya amango rhuli rhwayiga?

Oshenge Yehova akuhe obwenge. Ohûne Yehova akurhabale ohugûkwe ebi alonzize omanye bunola. (Yk. 1:5) Oyake okusegeza obwenge bwawe kw’ebi oyosire omanyire byone.​—Mig. 3:5, 6.

Oleke emisi y’Akanwa ka Mungu ekole omu kalamo kawe. “Akanwa ka Nnâmahanga kaba kazine.” (Hb. 4:12, Mashi Bible) Ngasi mango erhi rhwakasoma “Akanwa” ka Nnâmahanga kaba kazine, kanarhushumya omu njira eri lubero. Cikone, oko kwanahashikana erhi akaba rhulonzize okuyiga erhi kuyunguka n’ebihyahya birimwo amango rhuli rhwakasoma.

Okavuga omunkwa kw’ebi Yehova akolesa byoshi ly’arhuyigiriza. Ebiryo byage by’ekiroho biba nk’“idinye ly’ebiryo b’idobeza [binja bwenene].” (Iz. 25:6, Mashi Bible) Orhakag’iyaka “ebiryo” orhanyize oku orhashagalukire okuyiga. Kobinali washagalukira ifunzo lyawe n’okuleka Mungu akurhabale ly’oba muntu mwinja!