Rhurhashinganini rhurhanye mpu bulya kone abo banafunzi 70 barhali ho erhi Yezu arhondeza Ishega ly’Ebijingo lya Nnawirhu, kuli kuderha oku arhacir’ibayemire erhi oku bali bamuyasire. Yezu al’ilonzize kone okuba haguma n’entumwa zage mw’ako kasanzi.

Al’iyemire balya 12 n’ago 70. Yezu arhanzir’icishoga balume 12 egarhi k’abanafunzi bage banji, anabahamagala ntumwa. (Lk. 6:12-16) Ali e Galilaya erhi ‘ahamagala baganda ikumi na babirhi’ n’enyuma z’aho “abarhuma mpu baj’iyigiriza ogw’Obwami bwa Nnâmahanga n’okufumya abalwala.” (Lk. 9:1-6, Mashi Bible) Buzinda, erhi ali omu Yudeya, Yezu “acishoga bandi banafunzi 70 abarhuma babirhi babirhi.” (Lk. 9:51; 10:1, NWT) Co cirhumire, Yezu agwerhe abanafunzi omu maeneo gali lubero omwanzi gwage gwakag’iyalizibwamwo.

Abayahudi babire banafunzi ba Yezu, bakagendekire bajira Pasaka ngasi mwaka, nkaba haguma n’emilala yabo. (Lub. 12:6-11, 17-20) Bulya akasanzi k’okufâ kwage kali hofi, Yezu n’entumwa zage baja e Yeruzalemu. Cikone arhahamagalaga abanafunzi bage boshi b’omu Yudeya, e Galilaya, n’e Pereya, mpu bayishe bajire Pasaka haguma. Bibonekine n’obwalagale oku al’ilonzize abe haguma n’entumwa zage mw’ako kasanzi. Ababwira ntya: “Nal’ingwerhwe n’omwifinjo munji gw’okulya oyu Basaka [erhi Pasaka] haguma ninyu ntac’ibabala.”​—Lk. 22:15.

Agwerhe ecirhumire cinja c’okujira ntyo. Yezu ali hofi afê nka “Mwana-buzi wa Nnâmahanga okûla ecaha c’igulu.” (Yn. 1:29) Akafîrire e Yeruzalemu, hantu bakag’ihera Nnâmahanga enterekêro kurhenga mîra. Olufû lwa Yezu lwakahîre abantu obucunguke bunene kulusha obu Abaisraheli babire nabo erhi balya omwana-buzi omu budufu barhengaga e Misri. (1 Kr. 5:7, 8) Ebi Yezu ajijire byahashisize abo Ikumi na Babirhi okuba musingi gw’ecigamba c’Ecikristu. (Ef. 2:20-22) Eby’okushagalusa, Yeruzalemu, vile ntagatifu egwerhe ecôgo “cidêkerire kuli mabuye ikumi n’abirhi” gayandisirweko ‘amazîno ikumi n’abirhi g’entumwa ikumi n’ibirhi z’Omwana-buzi.’ (Maf. 21:10-14) Kobinali, entumwa nyishwekerezi zakabire n’ecigabi c’obulagirire omu kuhikirizibwa kw’omuhigo gwa Mungu. Biyumvikine bulya gurhi Yezu alonzize okuba n’entumwa zage kw’oyo Pasaka muzinda n’oku kantu arhondezagya enyuma z’aho, ko kuderha Ishega ly’Ebijingo lya Nnawirhu.

Balya 70 n’abandi banafunzi barhali haguma na Yezu kw’er’ishega. Cikone, abanafunzi boshi bayerekine obwishwekerezi bakayungusire n’ebi Yezu arhondezagya, kuli kuderha Ishega ly’Ebijingo lya Nnawirhu. Abanafunzi boshi bakabire Bakristu bashîge amavurha enyuma z’aho, bakajire omu ciragane c’obwami, Yezu ahaga entumwa zage mw’obo budufu.​—Lk. 22:29, 30.