1. Lukengwa luhi rhweshi rhwakashagalukira?

LULI lukengwa lunji okubona rhuli baguma bw’omu cigamba ca Yehova! Rhuli omu Paradizo y’ekiroho eyunjwiremwo abantu bw’okulonza omurhula banali ba bushagaluke bunji. Enafasi yawe omu cigamba eri ehi?

2. Lwiganyo luhi entumwa Paolo yakolesize omu maruba gayo?

² Rhwanaciyigiriza binji okubiyerekire olwiganyo Paolo akolesagya omu marhuba ayandikaga. Mw’ago maruba Yehova amulongozagya oku ayandike, Paolo ashushanyize ecigamba, n’omubiri gw’omuntu. Ashushanya abantu bw’omu cigamba n’ebirumbu by’omubiri.​—Bar. 12:4-8; 1 Kor. 12:12-27; Efez. 4:16.

3. Masomo gahi rhwaganirira mw’eci cigabi?

³ Mw’eci cigabi rhwaganirira masomo asharhu gw’obulagirire okubiyerekire olwiganyo Paolo akolesagya. Burhangiriza rhwaciyigiriza oku ngasi muguma wirhu ajira enafasi * yage omu cigamba ca Yehova. Bwakabirhi, rhwaganirira bici rhwakajira erhi rhwakakaciyumva nka kuli kuzibu okuba n’enafasi omu cigamba ca Yehova. N’obwa kasharhu, rhwaganirira ebi rhwakajira lyo rhugendekera rhwashagalukira enafasi yirhu omu cigamba ca Yehova.

4. Bici olwandiko lwa Abaroma 12:4, 5, lurhuyigirizize?

⁴ Isomo lirhanzi rhwakakula omu lwiganyo Paolo ahanaga, kuli kubona oku ngasi muguma wirhu ajira enafasi yage omu mulala gwa Yehova. Paolo arhondera olwiganyo ahanaga ntya: ‘Nka  kula omubiri guba muguma cikone gujira birumbu binji, cikone ebyo birumbu birhajira mikolo miguma. Kwo n’oko nirhu rhuba banji, cikone rhuba mubiri muguma omu mulungano haguma na Kristu, na ngasi muguma ali cirumbu c’ababo.’ (Bar. 12:4, 5) Bici Paolo alonzagya okuganirira? Alonzagya aganirire oku ngasi muguma wirhu ajira omukolo gw’obulagirire omu cigamba.

5. “Luhembo” luhi Yehova ahîre ecigamba?

⁵ Kanji-kanji erhi rhuganirira okubiyerekire abajira enafasi omu cigamba, rhunakarhanya ho n’aho mpu bali balya baciyimangire bone. (1 Tes. 5:12; Habr. 13:17) Kobinali, kugerera Yezu, Yehova ahire cigamba ‘oluhembo omu balume.’ (Efez. 4:8) Olo ‘luhembo omu balume’ luheziremwo abalume bali omu Mbaraza eri yalongoza, abalume bali omu Makomite g’Etawi, abangalizi b’emizunguko, abayigiriza oku masomo g’eciteokrasi, abagula b’ebigamba n’abarhabazi b’abo. Iroho lya Yehova lyo licishoga abo balume boshi lyo bashibirira ebibuzi byage n’okuhira obunguke bw’ecigamba oku nafasi ntanzi.​—1 Pet. 5:2, 3.

6. Okubiyerekire olwandiko lwa 1 Abatesalonika 2:6-8, bici bene wirhu bahabirwe omukolo gwago-gwago kugerera iroho litagatifu bajira?

⁶ Bene wirhu bagwerhe omukolo gwago-gwago omu cigamba bahîzirwe ho n’iroho litagatifu lyo bahikiriza emikolo minji ejirwa omu cigamba. Nka kula omubiri gujira birumbu binji, ngasi cirumbu cinakakola oku bunguke bw’ecabo, ly’omubiri goshi guyunguka. Kwo n’oko, bene wirhu bahizirwe ho n’iroho litagatifu, banajire okwabo koshi lyo bakola oku bunguke bw’ecigamba coshi. Barhakola ntyo mpu lyo babaha irenge. Lubero n’oko, banacihangane okuyubaka n’okuzibuhya bene wirhu na bali birhu bw’omu cigamba. (Osome 1 Abatesalonika 2:6-8) Rhwanavuga Yehova omunkwa okubona arhuhîre abalume bishwekerezi nk’abo!

7. Migisho ehi abakozi b’akasanzi koshi bashagalukira?

⁷ Bigamba biguma na biguma binashagalukire okukola haguma na bamisioneri, ba painiya ba pekee erhi ba painiya b’akasanzi koshi. Bene wirhu na bali birhu banji bajijire omukolo gw’amahubiri n’okujira abanafunzi, gube gw’omukolo murhanzi na gwabulagirire omu kalamo kabo, na ntyo banarhabale bantu banji babe banafunzi ba Yezu. Rhumanyire bwinja oku abo bakozi b’akasanzi koshi barhajira bintu binji bya mubiri, cikone Yehova anabagishe bwenene. (Mark. 10:29, 30) Rhunashagaluke okukola haguma n’abo bene wirhu na bali birhu, rhunavuzire omunkwa oku buzigire bayerekana omu cigamba!

8. Bulya gurhi ngasi muhubiri w’omwanzi mwinja gw’Obwami ali wabulagirire bwenene omu masu ga Yehova?

⁸ Ka bene wirhu bagwerhe emikolo yago-yago na balya bakozi b’akasanzi koshi bone bagwerhe enafasi omu cigamba? Nanga. Ngasi muhubiri w’emyanzi minja y’Obwami ali wabulagirire omu masu ga Yehova n’omu cigamba. (Bar. 10:15; 1 Kor. 3:6-9) Bulya gurhi rhudesire ntyo? Bulya omukolo mukulu ecigamba cahabirwe kuli kujira abanafunzi ba Nnawirhu Yezu Kristu. (Mat. 28:19, 20; 1 Tim. 2:4) Ngasi boshi bali omu cigamba, babe bahubiri babatize erhi barhacibatizibwa, boshi banacihangane okuhira omukolo gw’okuyaliza Obwami oku nafasi ntanzi omu kalamo kabo.​—Mat. 24:14.

9. Bulya gurhi rhunakazigira bali birhu Bakristu?

⁹ Yehova ahîre bali birhu enafasi y’olukengwa omu cigamba. Yehova anashagalukire abakazi, abazire, abakana na bali birhu balamba bali bajira okwabo koshi lyo bamukolera. Ebibliya eganirire bakazi baguma na baguma bashagalwîre Yehova. Edesire oku abo bakazi luli lwiganyo lwinja lw’obwenge, lw’obuyemere, lw’obushiru, lw’okuhâna n’olw’ebijiro binja. (Luka 8:2, 3; Ebij. 16:14, 15; Bar. 16:3, 6; Flp. 4:3; Habr. 11:11, 31, 35) Rhuvuzire Yehova  omunkwa okurhuha abo bali birhu Bakristu bajira amorhere minja gali nk’ago!

10. Bulya gurhi rhushagalukira bene wirhu na bali birhu bakola bashosi?

¹⁰ Rhushagalusire bwenene okubona rhuli rhwakola haguma na bene wirhu na bali birhu bakola bashosihire. Bigamba biguma na biguma birimo bene wirhu na bali birhu bagezize akasanzi kabo k’obusole omu mukolo gwa Yehova. Hali n’abandi barhacijira nsiku nyinji bali omu okuli. Babe bakola bagwerhe nsiku nyinji omu okuli erhi baciri bahyahya, abakola bashosi barhahwako nguku, kw’okuderha oku bali balwisa mazibu manji, kwa lwiganyo; endwala. Ago mazibu gananyihye obushiru bwabo omu mikolo bakag’ijira omu cigamba n’omu mahubiri. Eby’okosomeza, kuli kubona oku abo bene wirhu bacigendekire bacihâna omu mukolo gw’amahubiri banali bakolesa emisi yabo lyo bakomereza abandi n’okubaha omurhima! Na ntyo rhweshi rhunayunguke n’obulenga bwabo. Yehova aba ashagalukire abo bene wirhu na nirhu okukola haguma n’abo luli lukengwa lunene bwenene.​—Mig. 16:31.

11-12. Gurhi omusole gw’omu cigamba cawe gwakuhiremwo omurhima?

¹¹ Orhanye okubiyerekire emisole yirhu nayo. Emisole nayo eri yalwisa mazibu manji ga mw’er’igulu lirhegesirwe na Shetani n’efilozofi zage. (1 Yne. 5:19) Ciru akaba ntyo, rhunahabwe omurhima bwenene erhi rhuyumva omusole gwahâna ishuzo omu ntimanano, erhi gucihâna omu mukolo gw’amahubiri n’erhi rhubona gwa halira obwemere bwago buzira boba. Mwe misole yirhu mizigirwa, ninyu mujira enafasi y’obulagirire omu cigamba!​—Enna. 8:2.

¹² Bene wirhu na bali birhu baguma na baguma banakaba bali barhanya mpu bohe babà babusha omu cigamba. Bici byakarhurhabala rhuyemere n’obwalagale oku ngasi muguma wirhu aba wabulagirire omu cigamba? Rhulolage ebintu byakarhuyemeza bwinja.

13-14. Bici byakarhuma bene wirhu baguma na baguma bahikira aha barhanya mpu nta mukolo bajira omu cigamba?

¹³ Rhubonage isomo lya kabirhi rhwakaciyigiriza okubiyerekire olwiganyo Paolo akolesâgya.  Asegize ebyakarhuma omuntu arhanya nk’arhali wabulagirire omu cigamba. Paolo ayandika ntya: “Okugulu erhi kwakaderha, erhi: ‘Ntali kuboko; kuziga ntali w’oku mubiri,’ k’okwola kunarhumage kurhabâ kw’oku mubiri? Nako okurhwiri erhi kwakaderha, erhi: ‘Obu ntali isu, kuziga ntali w’oku mubiri,’ k’okwola kunarhumage kurhabâ kw’oku mubiri?” (1 Kor. 12:15, 16) Bici Paolo ayigirizize kugerera olo lwiganyo?

¹⁴ Erhi wakakaciyumanyanya n’abandi bantu bw’omu cigamba, wanahikira aha wakacibona nk’orhali wabulagirire omu cigamba. Bantu baguma na baguma bw’omu cigamba bajira enshokano y’okuyigiriza, abandi ey’okumanyipanga ebintu bwinja erhi ya kuha abandi omurhima. Hali amango erhi birhakahashikana obe n’obuhashe buli nk’ob’owundi omu cigamba. Erhi wakayemera ntyo n’obwalagale, oko kwanayerekana oku oli mwirhohye na wa lugero. (Flp. 2:3) Omu ntyo, omanye oku erhi wakagendekera waciyumanyanya n’abandi bakulushire buhashe bulebe, wanahikira aha wavunika omurhima. Ciru n’omu ntyo wanahikira aha warhondera warhanya nk’oku olwiganyo Paolo aderhaga luyerekine, orhondere wabona nka nta nafasi ojira omu cigamba. Bici byakakurhabala ohagalike entanya za ntyo?

15. Nk’oku olwandiko lwa 1 Abakorinti 12:4-11 luyerekine, bici rhukwaninine rhuyemere n’obwalagale okubiyerekire enshokano rhwakaba nazo?

¹⁵ Ebibliya eyerekine oku omu myaka igana mirhanzi, Yehova ahashisize bantu baguma na baguma okujira ebisomerine kugerera iroho lyage litagatifu. Ebibliya eyerekine oku Abakristu boshi ba mw’ako kasanzi barhagwerhe nshokano nguma. (Osome 1 Abakorinti 12:4-11) Yehova al’ibahîre enshokano za ngasi lubero, cikone ciru akaba ntyo ngasi Mukristu âli wabulagirire. Mwakano kasanzi kirhu rhurhacijira enshokano y’okujira ebisomerine. Cikone ene nalyo akanuni kali mw’olo lwandiko kanacirhuyigiriza bintu binji. Rhweshi rhurhajira buhashe buguma, cikone rhweshi rhuba ba bulagirire omu masu ga Yehova.

16. Ihano lihi ly’entumwa Paolo rhushinganine rhukolese?

¹⁶ Ahali hw’okugendekera kwaciyumanyanya n’abirhu Bakristu, kuli kwa bulagirire okukolesa er’ihano lyalongozibagwa n’iroho litagatifu  entumwa Paolo yayandikaga: “Ngasi muguma acikumbire omukolo gwage; na ntyo alongeze obukuze omu murhima gwage yene, ci arhabulongezagya oku bandi.”​—Gal. 6:4.

17. Gurhi rhwakayungukamwo n’er’ihano ly’entumwa Paolo?

¹⁷ Erhi rhwakakulikira er’ihano lyalongozibagwa n’iroho litagatifu liyerekine oku ngasi muguma akacikumbira ebijiro byage, rhwanahikira aha rhwabona oku ngasi muguma wirhu ajira enshokano n’obuhashe bwago-bwago. Kwa lwiganyo, hanaba mugula mulebe orhajira buhashe bwa kuyigiriza, cikone aba mubidu okukolesa enjira zoshi z’okuhubiri n’okujira abanafunzi. Oyo mugula anaba erhi arhayishipanga ebintu nk’abandi bagula bw’omu cigamba, cikone anaba erhi ajira obuhashe bw’okulambagirira ebibuzi na ntyo binamushagalukire bwenene okubiyerekire amahano abaha gayimangire oku Mandiko. Na kandi byanahashikana erhi aba amanyikine oku aba muhanyi bwenene. (Habr. 13:2, 16) Erhi rhwakahikira aha rhwamanya bwinja obuhashe bwirhu n’enshokano zirhu, rhwanaba n’akantu kakarhuma rhwahugûkwa oku nirhu rhuli ba bulagirire omu cigamba na ntyo rhwanajiramo akantu kakarhuma cayololoka. N’oko kwanarhurhabala rhurhakag’ibona nka bene wirhu bajira buhashe bulebe erhi nshokano ndebe bwo bali ba bulagirire kurhulusha.

18. Gurhi rhwakayushulamwo obuhashe bwirhu?

¹⁸ Ciru rhwakaba rhujira nafasi ehi omu cigamba, rhweshi rhushinganine rhube n’irala ly’okujira bintu binji omu mukolo gwa Yehova. Lyo Yehova arhurhabala okuyushûla obuhashe bwirhu, anakarhukomereza n’obuzigire kugerera ikubuliro lyage. Kwa lwiganyo, amango g’entimanano y’ecigamba y’omu kagarhi kw’omugobe; rhunahâbwe amahano okubiyerekire gurhi rhwakajira lyo rhuba n’obulenga omu mahubiri. Kw’onajire okwawe koshi ly’oyunguka ngasi mugobe n’eyo programe y’okurhukomereza?

19. Gurhi nawe wakajira ly’ohikira aha waja oku Masomo g’Abaeneza Injili bw’Obwami?

¹⁹ Kandi Yehova anakarhukomereza kugerera Amasomo g’Abaeneza Injili bw’Obwami. Bene wirhu na bali birhu bali omu mukolo gw’akasanzi koshi bagwerhe myaka 23 kuhika 65 bwo baja kw’ago masomo. Hali amango wakarhanya mpu wehe orhakahika kw’ogo masomo. Cikone ahali hw’okuyandika ebintu byakarhuma orhaja kw’ago masomo, wanacihangana oyandike ebintu byakakurhabala ly’ohika kw’ago masomo. Buzinda bw’aho, wanarhôla omuhigo gwakakurhabala ohikirize ebihûnyirwe ly’oja kw’ago masomo. Kugerera oburhabale bwa Yehova n’omukolo gwawe gw’obushiru, ebibonekine bizibu byanahikira aha byahashikana.

20. Isomo lihi olwandiko lwa Abaroma 12:6-8, lurhuyigirizize?

²⁰ Isomo lya kasharhu rhwakakula omu lwiganyo Paolo akolesagya liri omu lwandiko lwa Abaroma 12:6-8. (Osome) Mw’olu lwandiko, Paolo ashubir’iyerekana oku ngasi muguma wirhu omu cigamba ajira enshokano eri lubero n’ey’owabo. Cikone mw’aka kasanzi rhwamahugûkwa oku ngasi muguma wirhu anakolesa enshokano ajira ly’azibuhya n’okuyubaka ecigamba.

21-22. Bici olwiganyo lwa Robert na Felice lwakarhuyigiriza?

²¹ Rhuganirire olwiganyo lwa mwene wirhu ohamagalwa Robert. Enyuma z’okukolera omu cihugo ca bene, bamurhuma oku Beteli y’omu cihugo cage. Okumurhuma oku ajikolera handi-handi kurhali kuderha mpu arhakolaga bwinja eyo munda bamurhumaga. Adesire ntya: “Erhi hagera myezi minji narhondera narhanya oku ndi wabusha bulya kwo nandi nkw’owayabirwe n’omukolo. Ciru nahikira aha narhondêra naciyumva nka ntaciberaga ciru n’oku Beteli.” Bici mwene wirhu adesire byacibirirhuma  ashagalukira okukola oku Beteli? Wabo mugula muguma amukengeza oku Yehova anakarhukomereza omu mukolo rhulimwo lyo rhuyish’ihashikola ogundi mukolo muhyahya bayish’irhuha. Robert ahugûkwa oku arhashinganini agendekere asegeza eby’ajijire omu kasanzi kagerâga, cikone kuli kwa bulagirire oseze obwenge bwage kw’ebi akajira mw’aka kasanzi.

²² Mwene wirhu Felice Episcopo ahikîre ah’aba n’entanya zishushine n’ezo. Ye na mukage bahabagwa ediplome y’e Gileadi omu mwaka gwa 1956 n’enyuma z’aho barhumwa omu muzunguko gw’omu cihugo c’e Bolivie. Omu mwaka gwa 1964, baburha omwana. Felice adesire ntya: “Rhwaciyumva kubi okubona rhukola rhwaleka omukolo gwirhu rhwal’isimire bwenene. Nkengire oku nayusize omwaka goshi ndi naciyumva kubi, cikone Yehova antabala nashanja entanya zani, na ntyo nashagalukira omukolo gwani muhyahya gw’okuba mubusi.” Ka nawe okola ociyumvirhe aka Robert na Felice? Ka hali amango oyumva ovunisire omurhima bulya orhaciri omu mukolo wakag’ijira amango gagerâga? Erhi akaba ntyo kobiyosire, wanahikira aha washanja entanya zawe n’okushagalukira omukolo oli wajira ene ly’okolera Yehova n’okurhabala bene wirhu. Okolese enshokano yawe n’obuhashe bwawe omu kurhabala abandi na ntyo wanahikira aha washagalukira enafasi yawe omu cigamba.

23. Kasanzi ka kujira bici rhukwanine okuba nako na bici rhwaganirira omu cigabi cikulikire?

²³ Ngasi muguma wirhu aba wabulagirire omu masu ga Yehova. Aba alonzize rhube cigabi c’omulala gwage. Erhi rhwakaciha akasanzi kw’okurhanya okubiyerekire ebi rhwakajira lyo rhuyubaka bene wirhu na bali birhu n’okukola bwenene lyo rhuhikiriza ogo mukolo, rhurhakacikaciyumva nka rhuli ba busha omu cigamba! Cikone, gurhi rhubona bene wirhu na bali birhu bw’omu cigamba? Gurhi rhwakayerekanamwo oku rhuba rhubazigire rhunaba rhubakenzire? Ecigabi cikulikire caganirira ogo mwanzi.