1. Bici Yehova ahîre abakozi bage boshi?

YEHOVA ahîre ngasi mukozi wage enafasi omu cigamba. Ciru akaba ngasi muguma wirhu ajira omukolo guli lubero n’og’owabo, rhweshi rhuba ba bulagirire, na ntaye muli rhwe orhaba olagirire oku wabo. Yehova alongozize Paolo oku arhuhugûlire er’isomo ly’obulagirire. Bici arhuhugûlire?

2. Nk’oku olwandiko lwa Abefezi 4:16 luyerekine, bulya gurhi kuli kwa bulagirire rhukakola haguma na bene wirhu n’okukababona oku bali ba bulagirire?

² Nk’oku biyerekinwe omu lwandiko lw’omusingi lw’eci cigabi, entumwa Paolo yayerekine oku nta mukozi wa Yehova wakabwira owabo mpu niehe “ntakulagîririkwo.” (1 Kor. 12:21) Lyo ecigamba cikola omu cinyabuguma, kuli kwa bulagirire rhukabona bene wirhu na bali birhu oku bali ba bulagirire n’okucirhohya amango rhuli rhwakola haguma. (Osome Abefezi 4:16) Erhi rhukola omu cinyabuguma ecigamba cinabemw’obuzigire n’obololoke.

3. Bici rhwaganirira mw’eci cigabi?

³ Omu njira zihi na zihi rhwakayerekana oku rhukenzire bene wirhu na bali birhu bw’omu cigamba n’oku rhubabwine oku bali ba bulagirire? Mw’eci cigabi rhwaganirira gurhi abagula bakakayerekana oku bakengine bone na nnene. Na buzinda rhwaganirira gurhi rhwakakayerekana oku rhukenzire bene wirhu na bali birhu balamba. N’oku buzinda rhwaganirira gurhi rhwakakayerekana oku rhukenzire bene wirhu na bali birhu barhamanyiri ganira olulimi lwirhu.

4. Mahano gahi gali omu lwandiko lwa Abaroma 12:10, abagula bashinganine bakulikire?

⁴ Iroho litagatifu lya Yehova lyo licishoga abagula b’ecigamba. Cikone ngasi muguma mulibo ajira obwage-bwage buhashe.  (1 Kor. 12:17, 18) Bagula baguma na baguma byanahashikana babe barhacijira nsiku nyinji bali bagula na ntyo babe barhagwerhi bulenga bunji bw’okuhikiriza omukolo gwabo bwinja. Hali n’abandi barhakacihash’ijira bintu binji bulya emyaka yabo n’amagala gabo garhacibayemeriri bahikirize bintu binji. Nta mugula yeshi-yeshi oshinganine akarhanya mpu “arhalagiriri” oku wabo. Lubero n’oko, ngasi mugula akwanine okukulikira er’ihano Yehova alongozagya entumwa Paolo mpu eyandike liri omu lwandiko lwa Abaroma 12:10.​—Osome.

5. Gurhi abagula bakayerekanamwo oku bakengine bone na nnene, na bulya gurhi oko kuli kwa bulagirire?

⁵ Abagula banayerekane oku bakenzire ababo bagula omu kasanzi baba babidu okubayumvirhiza buzira kubatwa akalimi. Oko kuba kwa bulagirire bwenene omu kasanzi bagwerhe entimanano y’embaraza y’abagula. Bulya gurhi? Olole ebi Ilabiro ly’Akalalizi lya ly’omu lusiku 1 lw’omwezi gw’Ikumi 1988 lyʼomu Ciswahiri ly’âl’idesire okubiyerekire abagula: “Abagula banayemere oku kugerera iroho litagatifu lya Yehova, Yezu anakolesa ngasi mugula erhi akaba mubidu okurhanya n’okubona amahano gw’okukolesa omu ngasi kanga lyo barhôla emihigo y’obulagirire. (Ebij. 15:6-15) Nta mugula yeshi-yeshi okwanine okurhanya oku yene y’iroho lya Nnamahanga liri lyalongoza kulusha abandi omu mbaraza.”

6. Gurhi abagula bakahikira aha bakola omu cinyabuguma na bunguke buci oko kwakalerhera omu cigamba?

⁶ Omugula okenzire ababo ashinganine acihangane arhakag’iderha duba-duba amango bali omu ntimanano yabo. Arhashinganini okuba na binji by’okuderha kulusha abandi arhanashinganini aje ayerekana oku entanya zage zo zishinganine kulusha ez’ababo. Lubero n’oko, ashinganine acihangane aderhe entanya zage n’obwirhohye n’olugero. Anacihangana ayumverheze abandi omu kasanzi bwo bali baderha. Akantu kw’obulagirire bwenene kuli kucihangana amango ahâna entanya zage, zibe ziyimangire omu Bibliya erhi omu bitabu bya “mushizi mwirhonzi na mwikubagirwa.” (Mat. 24:45-47) Erhi abagula bakajira ngasi kantu omu buzigire n’omu bukenge amango bali omu ntimanano yabo, iroho lya Nnamahanga linabe  haguma nabo n’oko kwanabarhabala barhôle emihigo y’okuyololola ecigamba.​—Yak. 3:17, 18.

7. Gurhi Yezu akag’ibona abalamba?

⁷ Ecigamba cibamwo emilala n’abarholine. Cikone kandi, cibamwo bene wirhu na bali birhu balamba. Gurhi rhushinganine rhukabona bene wirhu balamba? Rhuhugûkwe gurhi Yezu akag’ibabona lyo nirhu rhuciyigiriza gurhi rhwakakababona. Yezu ali mulamba. Abezire mulamba ly’asegeza obwenge bwage oku mukolo gwa Nnamahanga. Nta lusiku ayigirizize oku Omukristu ashinganine abêre mulamba erhi oku ashinganine aje omu buhya. Cikoki, ayerekine oku hali Bakristu baguma na baguma bacishozire okubêra balamba. (Mat. 19:11, 12) Yezu arhakag’igayaguza abalamba. Arhakag’ibabona nka ba busha erhi kubabona nka babulirwe na kantu kaguma ka bulagirire bulya bali balamba.

8. Bici Paolo ahire Abakristu omurhima bajire, biganirirwe omu lwandiko lwa 1 Abakorinti 7:7-9?

⁸ Aka Yezu, Paolo naye ahikirizize omukolo gwage anali mulamba. Nta lusiku Paolo ayigirizize oku kuli kubi okuja omu buhya. Al’iyemîre n’obwalagale oku okuja omu buhya guli muhigo gwa ngasi muntu. Cikone Paolo ahîre Abakristu omurhima oku nka babwine oku banahash’ikolera Yehova banali balamba banajira ntyo. (Osome 1 Abakorinti 7:7-9) Kobinali, Paolo arhabonaga Abakristu balamba nka bali ba busha kulusha abajire omu buhya. Co carhumaga acishoga musole muguma gwakag’ihamagalwa Timoteyo mpu guhikirize omukolo gw’obulagirire. * (Flp. 2:19-22) Rhuhugûkwe bwinja oku kwanaba kucirheba erhi rhwakakarhanya mpu mwene wirhu anahikiriza mukolo mulebe bulya ajire omu buhya erhi bulya ali mulamba.​—1 Kor. 7:32-35, 38.

9. Bici rhwakaderha okubiyerekire obuhya n’obulamba?

⁹ Oli Yezu erhi Paolo, ntaye mulibo wayigirizize oku bihunyire Omukristu aje omu buhya erhi abêre mulamba. Bici rhwakaderha okubiyerekire obuhya n’obulamba? Ilabiro ly’Akalalizi ly’omu lusiku 1 lw’omwezi gw’Ikumi mwaka gwa 2012 lyʼomu Ciswahiri lihugwîre ntya: “Obuhya n’obulamba byombi luba luhembo lurhenga emwa Nnamahanga. . . . Yehova arhabona Abakritu balamba oku bali ba busha bulya barhajaga omu buhya.” Erhi rhwakahugûkwa bwinja ebi rhwaganirire eyo nyanya, rhwanabona oku rhukwanine rhukakenga bene wirhu na bali birhu balamba.

10. Gurhi rhwakayerekanamwo oku rhukenzire bene wirhu na bali birhu balamba?

¹⁰ Gurhi rhwakayerekana oku rhukenzire entanya za bene wirhu na bali birhu balamba? Rhuhugûkwe  oku hali bene wirhu na bali birhu baguma na baguma bahizire okubêra balamba bulya bagwerhe emihigo balonzize okuhikiriza omu kalamo. Hali n’abandi Bakristu balamba balonza okuja omu buhya, cikone babule owabasheba erhi babule oyu basheba. Abandi babezîre balamba bulya iba erhi mukage afîre, na ntyo banaciberera ntyo. Habe erhi hali kantu kaguma ka mw’ebyo rhuganirire erhi kandi kone karhumire, irhondo rhurhahira rhukadosa mwene wirhu erhi mwali wirhu mpu bulya gurhi arhasag’ija omu buhya, ciru orhahira wababwira mpu ka wanabarhabala obalongeze owabasheba erhi oyu basheba, bulya okujira ntyo kwanayerekana oku rhurhabakenziri! Cikoki agandi mango byanahashikana mwene wirhu erhi mwali wirhu mulamba akubwire oku omulongeze owamusheba erhi oyu asheba. Nk’akubwizire ntyo wanamulongeza. Cikone, gurhi orhanyize oyo mwene wirhu erhi mwali wirhu akaciyumva nk’arhakuhunyire obo burhabale, buzinda omubwire ntyo? (1 Tes. 4:11; 1 Tim. 5:13) Rhuganirirage ebi bene wirhu na bali birhu bishwekerezi balamba badesire.

11-12. Gurhi rhwakahikira aha rhwavuna bene wirhu na bali birhu balamba omurhima?

¹¹ Mwangalizi muguma w’omuzunguko oli mulamba adesire oku haba bunguke bunji erhi omuntu akaba mwangalizi anaciri mulamba. Cikone ayerekine oku anavunike omurhima erhi bene wirhu na bali birhu bagwerhe entanya nyinja bamudosa ntya: “Bulya gurhi orhasag’ija omu buhya?” Mwene wirhu muguma oba oku Beteli naye adesire ntya: “Agandi mango enderho za bene wirhu na bali birhu okubiyerekire obulamba, zinarhume nabona oku banyumvirhire obonjo okubona nciba mulamba. Oko kunarhume omuntu arhanya oku obulamba guba muzigo ci lurhaba luhembo.”

¹² Mwali wirhu muguma naye oba oku Beteli adesire ntya: “Bene wirhu na bali birhu baguma na baguma banakarhanya mpu nk’omuntu ali mulamba, erhi akaba ali omu cikundi c’abantu anabe erhi ali alonza owakamusheba erhi oyu akasheba. Lusiku luguma narhumwa oku njikolera handi-handi, eyo munda najaga nahika bijingo erhi bene wirhu bâli omu ntimanano. Mwali wirhu wanyegerezagya ambwira oku omu cigamba cabo muli bene wirhu balamba bagwerhe emyaka yani. Okuderha ntyo kwanyumvisa oku ali anongeza owakansheba. Erhi rhuhika aha Nyumpa y’Entimanano, ambwira oku anyereka balya bene wirhu babirhi anambwiraga. Birhahashikane nganire ebintu byoshi nabwizîrwe olo lusiku, cikone nkengire oku birhali bilembu kuli nie na kuli abo bene wirhu babirhi.”

13. Nyiganyo zihi zahaga mwali wirhu muguma ociri mulamba omurhima?

¹³ Wundi mwali wirhu muguma oli oku Beteli ayerekine ntya: “Manyire ba painiya banji bakola bakuzire banacir’ibalamba, cikone babà bashagalusire. Babà bacihânyire n’omurhima goshi omu mukolo gwa Yehova, babà balugero banaba babidu okurhabala abandi. Abo balamba guba mugisho bwenene omu cigamba. Abo bene wirhu balamba bajira entanya z’olugero okubiyerekire obulamba bulya barhabona nka bo bali ba bulagirire bwenene bulya bahashire okubêra balamba na kandi barhaciberula oku bandi mpu bulya barhagwerhi mukazi erhi bulya barhagwerhi mulala.” Co cirhumire kuba kwa bulagirire bwenene okuba omu cigamba cirimwo abantu barhukenzire banarhubwine oku rhuli ba bulagirire. Omu cigamba ca ntyo, bene wirhu na bali birhu barhakakuyumviza obonjo mpu bulya oli mulamba, barhakanakuyumviza obumvu mpu bulya wehe wahashire okubêra mulamba, ciru kandi barhakakuyibagira mpu bulya wehe ntaco cikuhangayisize omu kalamo. Omu cigamba ca ntyo, oshinganine ociyumve oku kobinali omu mulala gwawe onali.

14. Gurhi rhwakayerekanamwo oku rhukenzire bene wirhu balamba?

¹⁴ Bene wirhu na bali birhu balamba banaciyumva oku bali ba bulagirire erhi bakakabona oku bazigirwe kugerera oborhere bwabo  bwinja cikone arhali mpu bulya bali balamba kone. Ahali hw’okubayumviza obonjo mpu bulya bali balamba, rhwanacihangana okushagalukira obwishwekerezi bwabo. Erhi rhwakajira ntyo, bene wirhu balamba barhakakaciyumva nka ntya kwo rhubabwizire: “Ntakulagîririkwo.” (1 Kor. 12:21) Erhi rhwakakulikira ago mahano, rhwanaba erhi rhuli rhwabayereka oku nabo bajira enafasi omu cigamba.

15. Mpindûlo zihi nguma na nguma bene wirhu baguma na baguma bajijîre lyo bayushûla omukolo gwabo gw’amahubiri?

¹⁵ Omu myaka egezire bahubiri banji bacihirireho omuhigo gw’okuyiga olulimi luhyahya lyo bayushûla omukolo gwabo gw’amahubiri. Lyo bahikira aho, bajijîre mpindûlo nyinji omu kalamo kabo. Abo bene wirhu na bali birhu banarhenge emwabo lyo baj’ihâna oburhabale omu bigamba by’olundi-lundi lulimi erhi emunda eri obulagirire bunji bw’abahubiri. (Ebij. 16:9) Ntaye oseza abo bahubiri oku barhenge omu bigamba byabo lyo baj’irhabala ebindi bigamba biderha olulimi lurhali lwabo, bone banahige ntyo lyo bagendekeza omwanzi mwinja gw’Obwami. Ciru akaba hanagere myaka minji lyo bahikira aha baganîra bwinja olo lulimi luhyahya, cikoki banahikire aha barhabala ebigamba bwenene. Oborhere bwabo n’obulenga bwabo binayubake n’okuzibuhya ecigamba. Rhunashagalukire abo bene wirhu na bali birhu bagendekera bacihâna n’omurhima goshi!

16. Bici abagula basegeza lyo bamanya indi wakola nka mugula erhi murhabazi w’abagula omu cigamba?

¹⁶ Embaraza y’abagula erhakabula bwa pendekeza mwene wirhu ly’aba mugula erhi murhabazi w’abagula mpu bulya arhamanyir’iderha olulimi lw’ecigamba. Cikone bashinganine balole erhi mwene wirhu ayenezize ebi Amandiko gadesire okubiyerekire omuntu wakaba mugula erhi murhabazi w’abagula.​—1 Tim. 3:1-10, 12, 13; Tito 1:5-9.

17. Madoso gahi milala miguma na miguma ekwanine ecidose embere ehige oku yahamira omu cindi-cindi cihugo?

¹⁷ Milala miguma na miguma y’Abakristu yahikire aha yahamira omu bindi bihugo erhi kubula akazi erhi ivita birhumire. Mw’ako kanga abana babo banarhondêra bayiga ebw’amasomo olulimi lw’eco cihugo. Ababusi babo nabo lyo bakola kazi kalebe, binahûne baciyigirize olo lulimi luhyahya. Cikone gurhi byakaba erhi eyo munda yakaba eri ecikundi erhi cigamba ciderha olulimi lwabo lw’akaburhano? Cigamba ca lulimi luhi ogo mulala gushinganine gujemwo? Ka byanahûna ogo mulala guje omu cikundi erhi cigamba c’olulimi lw’ecihugo balamiremwo erhi byanahûna guje omu cigamba c’olulimi lwabo lw’akaburhano?

18. Nk’oku olwandiko lwa Abagalasiya 6:5 luyerekine, gurhi rhwakayerekana oku rhukenzire omuhigo gw’ecirhwe c’omulala?

¹⁸ Ecirhwe c’omulala co cishinganine cihige cigamba ca lulimi luhi omulala gwaco gwajamwo. Ntaye wakamurhôlera omuhigo, yene ashinganine ahugûkwe obunguke bw’omula gwage buli buhi. (Osome Abagalasiya 6:5) Rhweshi rhukwanine  rhukenge ogo muhigo gw’ecirhwe c’omulala. Erhi akacishoga oku ye n’omulala gwage baja omu cigamba cilebe, rhukwanine rhukenge ogo muhigo gwage n’okubayegereza n’obushagaluke.​—Bar. 15:7.

19. Bici ebirhwe by’emilala bikwanine birhanyekwo omw’isala?

¹⁹ Omu kandi kanga, emilala yanakolera omu cigamba c’olulimi lw’ababusi ciru akaba abana babo barhamanyiri bwinja olulimi lw’abo. Erhi akaba eco cigamba ciri omu eneyo olulimi lw’ecihugo luganirwamwo, byanahashikana abana babule bwayunguka n’entimanano na ntyo kwanaba kuzibu kulibo okujira amajambere g’ekiroho. Bulya gurhi? Bulya abana banaba bali baja oku masomo baderhakwo olulimi lw’ecihugo cikone arhali olulimi lw’ababusi babo. Mw’ako kanga ka ntyo, ebirhwe by’omulala bikwanine birhanye omw’isala ebi bishinganine okujira lyo barhabala abana babo bayegere Yehova n’olubaga lwage. Ecijiro cirhanzi bakwanine bajire kuli kuyigiriza abana babo bamany’iganira bwinja olulimi lw’ababusi, n’ecijiro cakabirhi kuli kulonza gurhi bakashub’igaluka omu cigamba abana babo bakahugûkwamo ebintu bwinja. Ciru ecirhwe c’omulala cakarhôla muhigo guhi, ecigamba bajamwo, cishinganine cibayegereze n’okubakenga n’okubayeresa oku bali ba bulagirire.

20. Gurhi rhwakayerekana oku rhukenzire bene wirhu na bali birhu bali baciyigiriza olulimi luhyahya?

²⁰ Ebi rhwaganirire mw’eci cigabi biyerekine oku omu bigamba binji birimo bene wirhu na bali birhu bali bajira okwabo koshi lya baciyigiriza olulimi luhyahya. Kwanaba kuzibu okuhugûla ebiri omu ntanya zabo. Cikoki erhi rhwakalola kuli kulusha okurhamanya kwabo olulimi, rhwanabona bwinja obuzigire bwabo n’irala lyabo ly’okukolera Yehova. Erhi rhwakasegeza oborhere bwabo bwinja, rhwanahikira aha rhwabakenga bwenene. Omu ntyo, rhurhakahikira aha rhwababwira erhi; “ntakulagîririkwo” bulya arhamanyir’iderha bwinja olulimi lwirhu.

21-22. Lukengwa luhi rhweshi rhujira?

²¹ Yehova arhuhire olukengwa lw’okuba n’enafasi omu cigamba cage. Rhube balume erhi bakazi, balamba erhi bashamuka, misole erhi bashosi, rhube rhunaganire lulimi lulebe erhi rhube rhucir’irhwaciyigiriza lulimi lulebe, rhweshi rhuba ba bulagirire omu masu ga Yehova n’omu masu ga bene wirhu na bali birhu.​—Bar. 12:4, 5; Kol. 3:10, 11.

²² Bene wirhu na bali birhu, rhweshi rhucihangane bwenene rhukolese amahano gali omu lwiganyo Paolo akolesâgya lw’okushushanya ecigamba n’omubiri. Erhi rhwakajira ntyo, rhwanahikira aha rhwashagalukira enafasi yirhu omu cigamba ca Yehova n’okukenga ey’abandi.