1-2. Nk’oku biyerekinwe omu lwandiko lwa 1 Timoteyo 6:20, bici Timoteyo ahabirwe?

HALI amango rhuha abantu ebintu birhu by’obulagirire oku babishibirire. Kwa lwiganyo, rhwanahakira ensaranga zirhu oku banke. Erhi rhujira ntyo, rhunabe rhulangalire oku ezo nsaranga zirhu ziri omu murhula, ntaye wakazizimba. Omu ntyo, rhwamahûgukwa okubisa omuntu akantu kirhu kw’obulagirire kw’okuderha gurhi.

² Osome 1 Timoteyo 6:20. Entumwa Paolo yakengeza Timoteyo oku ahabirwe akantu kinja kw’obulagirire, kw’okuderha obumanye okubiyerekire Nnamahanga n’omuhigo gwage okubiyerekire bene bantu. Timoteyo naye ayemire oku agwerhe omukolo ‘gw’okuyigiriza Oluderho’ na kandi ‘okujira omukolo gwawe gw’omwigiriza.’ (2 Tm. 4:2, 5) Paolo abwira Timoteyo oku alange ebi ahîrwe. Aka Timoteyo, nirhu rhwahabirwe ebintu by’obulagirire. Bintu bihi ebyo rhwahabirwe? Na bulya gurhi kuli kwa bulagirire rhulange obo buhirhi Nnamahanga arhuhire?

3-4. Bulya gurhi rhwakaderha oku okuli kw’Ebibliya kuba kwa bulagirire?

³ Yehova arhuhire olukengwa lw’okumanya okuli kw’Akanwa kage Bibliya. Okuli kw’Ebibliya kuba kwa bulagirire bulya kunarhurhabale rhube n’obwîra bwa hofi-hofi na Nnamahanga, na kandi kunarhubale rhumanye akantu kw’obulagirire kakarhuha omwishingo omu kalamo. Okuyemera n’okulama nk’oku oko okuli kudesire, kunarhukule omu bujà bw’enyigirizo z’obunywesi na kandi kunarhume rhwayaka ebijiro bibi.​—1 Kr. 6:9-11.

⁴ Akandi kantu karhuyemezize n’obwalagale oku okuli kuba omu Kanwa ka Nnamahanga kuba kwa bulagirire, kuli kubona oku Yehova akufûlulire abantu “bagwerhe irala” ly’okuba n’obuzîne bw’ensiku n’amango. (Ebijiro by’Entumwa 13:48, NWT)  Abo bantu banayemere enjira Yehova akolesa ene lyo agabira abantu ebiryo by’ekiroho. (Mt. 11:25; 24:45) Rhurhakaciyigiriza rhwene okuli, na nta kandi kantu kali ka bulagirire kulusha okuli kuli omu Bibliya.​—Mig. 3:13, 15.

5. Lundi lukengwa luhi Yehova arhuhire?

⁵ Kandi Yehova arhuhire omukolo g’okuyigiriza abandi bantu okuli kuli ye n’emihigo yage. (Mt. 24:14) Emyanzi rhuj’iyigiriza abantu eba ya ngulo ndarhi bulya enabarhabale babe baguma bw’omu mulala gwa Yehova na kandi enabahe obulyo bw’okuyishiba n’obuzine bw’ensiku n’amango. (1 Tm. 4:16) Rhube rhuli rhwageza kasanzi kanji erhi kasungunu omu mukolo gw’amahubiri, rhweshi rhunabe rhuli rhwalunga okuboko ogo mukolo gw’obulagirire guli gwajirwa mwa kano kasanzi. (1 Tm. 2:3, 4) Luli lukengwa lunene bwenene okukola haguma na Nnamahanga! ​—1 Kr. 3:9.

6. Bici byahikire bantu baguma baguma babulaga okulanga ebi bahabagwa?

⁶ Bantu baguma baguma balamaga omu kasanzi kaguma na Timoteyo barhashagalukiraga olukengwa lwabo lw’okukola haguma na Nnamahanga. Kwa lwiganyo, Dema azigira eby’en’igulu, aleka olukengwa agwerhe lw’okukola haguma na Paolo. (2 Tm. 4:10) Fijelo na Herimojeni baleka omukolo gwabo gw’okuyaliza omwanzi mwinja gw’Obwami erhi bayoboha oku bayish’ilibuzibwa aka Paolo. (2 Tm. 1:15) Himeneyo, Alexandro, na Fileto baleka okuli babà bagoma. (1 Tm. 1:19, 20; 2 Tm. 2:16-18) Bibonekine oku embere abo bantu bal’izigire Yehova, cikone bahikira ahabaheza omuhako gwabo gw’obulagirire.

7. Njira zihi na zihi Shetani akolesa lyo arhurheba?

⁷ Gurhi Shetani ahikiramwo ah’arhulekesa obuhirhi Yehova arhuhire? Rhulolage njira nguma nguma Shetani akolesa lyo ahikira aho. Anakolese eby’okucishagalula n’e Enterneti lyo arhuhiramwo entanya z’okurhuma rhwaleka okuzigira Yehova n’okurhumikira amarhegeko gage. Analonze okurhuyobohya omu kurhulibuza lyo rhuleka omukolo gw’amahubiri. Na kandi anakalonza rhuyumverheze “orhudali rhw’obumanye bw’obwihambe” na ntyo rhuhabuke, rhuleke okuli rhushimbe ebagoma.​—1 Tm. 6:20, 21.

8. Bici olwiganyo lwa mwene wirhu Daniel lwakarhuyigiriza?

⁸ Erhi rhwakabula kuba masu, rhwanahikira aha rhwaheza bunyi-bunyi obuhirhi bwirhu bw’ekiroho. Rhuganirire olwiganyo lwa mwene wirhu Daniel, * wakag’ishagalukira emicezo y’evideo. Adesire ntya: “Narhonderaga nacishagalula n’eyo micezo erhi ngwerhe myaka ikumi. Oku murhondero nakagicishagalula n’emicezo minja, buzinda, bunyi-bunyi  narhondera nasharha emicezo eyerekine obumînya n’eby’abazimu.” Ahikira ah’akajira nsa 15 ngasi lusiku mw’eyo micezo. Ayushwire ntya: “Omu kandalala kani, nakag’iciyumva oku ebyo ndi nasharha n’akasanzi ndi nabigezamwo, biri byarhuma naheza obwîra bwani haguma na Yehova. Cikone nal’ihûgusirwe oku ntali najira ebi Ebibliya edesire.” Co cirhumire erhi rhwakabula kuba masu, okucishagalula kwanarhuma rhwaheza bunyi-bunyi obuhirhi bwirhu bw’okuli. Erhi okwo kwakarhuhikira, rhwanahikira aha rhwaheza akantu kw’obulagirire Yehova arhuhire.

9. Paolo ashushanyize Timoteyo na ndi nk’oku biyerekinwe omu lwandiko lwa 1 Timoteyo 1:18, 19?

⁹ Osome 1 Timoteyo 1:18, 19. Paolo ashushanyize Timoteyo n’omusoda, amubwira oku: “Agendekere okulwa entambala nyinja.” Eyo ntambala erhali ya matumu ci ya kiroho. Omu njira nci Abakristu bali nka basoda bali omw’ivita? Morhere gahi rhushinganine okuba nago rhwe nka basoda ba Kristu? Rhuganirire bintu birhanu rhwakaciyigiriza kugerera olwiganyo Paolo ahânaga. Ebyo bintu byanarhurhabala rhugendekere rhwasêra omu okuli.

10. Okucihâna loshi kw’okuderha gurhi na bulya gurhi rhushinganine rhucihâne?

¹⁰ Ocihâne loshi. Omusoda mwinja aba mwishwekerezi. Anajire okwage koshi lyo alanga omuntu azigire erhi akantu ashagalukire. Paolo abwîra Timoteyo oku acihâne loshi, kw’okuderha oku abêre mwishwekerezi kuli Nnamahanga. (1 Tm. 4:7) Erhi obuzigire bwirhu n’obwishwekerezi bwirhu kuli Nnamahanga bwakagendekera bwasêra, irala lirhu ly’okusêra omu okuli lyanayushuka.​—1 Tm. 4:8-10; 6:6.

11. Bulya gurhi rhushinganine rhube ba kucihasha?

¹¹ Obe wa kucihasha. Omusoda nk’alonzize abêre omu mukolo gwage ashinganine abe wa kucihasha. Timoteyo azibuhire kiroho bulya arhumikire amahano Paolo amuhaga galongozibagwa n’iroho litagatifu. Gal’imubwizire oku ayake ngasi irala ly’obusole, alongereze amorhere minja n’okucijirira abîra binja. (2 Tm. 2:22) Lyo ahikira aho, al’ishinganine abe wa kucihasha. Rhushinganine rhube bakucihasha lyo rhuhima ivita lirhu ly’okulwisa irala ly’omubiri. (Rm. 7:21-25) Kandi rhushinganine rhube bakucihasha lyo rhuhogola omuntu wa mîra n’okuyambala omuhyahya. (Ef. 4:22, 24) Na kandi ciru rhwakarhama n’emikolo yirhu rhwajiraga omu lusiku, rhwanacihangana rhuje oku ntimanano.​—Hb. 10:24, 25.

12. Gurhi rhwakajira lyo rhuhikira aha rhwakubula oku rhukolesa Ebibliya?

¹² Omusoda aba ashinganine acikomereze okukolesa ebikolanwa b’ivita. Lyo aba mubidu okubikolesa aba ashinganine akacikomereze ngasi mango. Co cirhumire nirhu rhushinganine rhube babidu okumany’ikolesa Akanwa ka Nnamahanga. (2 Tm. 2:15) Rhwanacikomereza gurhi bakolesa ebikolanwa birhu erhi rhwakakaja oku ntimanano zirhu ngasi mugobe. Cikone, lyo rhurhabala abandi bayemere okuli kw’Ebibliya, rhushinganine rhukajira ifunzo lirhu ly’Ebibliya ngasi mango. Rhushinganine rhukolese Akanwa ka Nnamahanga lyo rhuseza obuyemere bwirhu. Okwo kuhiziremwo bintu binji kulusha okusoma Ebibliya. Kuli kwa bulagirire okukarhanya kw’ebi rhuli rhwasoma n’okujira obusagasi omu bitabu birhu lyo rhuhugûkwa n’okukolesa ebi rhuli rhwasoma. (1 Tm. 4:13-15) Erhi rhwakajira ntyo, rhwanakahash’ikakolesa Ebibliya lyo rhuyigiriza abandi. Kandi okwo kuhiziremwo bintu binji kulusha okusoma olwandiko lw’Ebibliya kone. Rhwanarhabala aba rhuli rhwayigiriza Ebibliya bahûgukwe lwandiko lulebe, na kandi bahugûkwe gurhi luhumire oku kalamo kabo. Erhi rhwakakajira ifunzo lirhu ly’Ebibliya ngasi mango,  rhwanahikira aha rhwahash’ikolesa Akanwa ka Nnamahanga lyo rhuyigiriza abandi.​—2 Tm. 3:16, 17.

13. Bulya gurhi rhushinganine rhube n’oburhimanya nk’oku biyerekinwe omu lwandiko lwa Abahabraniya 5:14?

¹³ Obe n’oburhimanya. Omusoda ashinganine abe n’obuhashe bw’okumanya aha omurhego gwakamuyishira na gurhi akaguyakamwo. Na nirhu rhushinganine rhube babidu okumanya akanga kakarhuhira omu mazibu na gurhi rhwakakayakamwo. (Mig. 22:3; osome Abahabraniya 5:14.) Kwa lwiganyo, rhushinganine rhube masu nka rhukola rhwacishoga eby’okucishagalula nabyo. Bulya hofi bintu binji biyerekanwa oku Televiziyo, omu mafilime manji binakalug’iganirira olugenzi lubi. Olo lugenzi lwa ntyo, lunakagayisa Nnamahanga bwenene na kandi lwanarhulerhera amazibu. Co cirhumire rhushinganine rhucihangane rhuyake ebintu by’okucishagalula byakashereza bunyi-bunyi obwîra bwirhu haguma na Nnamahanga.​—Ef. 5:5, 6.

14. Gurhi oburhimanya bwarhabiremwo Daniel?

¹⁴ Daniel rhwaganiriraga omu cifungo ciri enyanya, ahugûkwa oku micezo y’okucishagalula nayo erimo eby’obuminya n’eby’abazimu, erhali minja. Ajira obusagasi omu Watchtower Library lyo abona oburhabale bw’okuleka eyo micezo. Bunguke buhi oko kwamuhire? Aleka okucishagalula n’eyo micezo mibi. Ahûna oku bamuzaze kw’eyo site yakag’imurhumira eyo micezo, buzinda atwa obwîra haguma n’ababo bakag’icishagalula boshi. Adesire ntya: “Ahali hw’okucishagalula n’ago mavideo, nakageza akasanzi haguma na bene wirhu bw’omu cigamba.” Daniel ali painiya na mugula omu cigamba.

15. Bulya gurhi rhushinganine rhuyake emyanzi y’abagoma?

¹⁵ Aka Timoteyo, nirhu rhushinganine rhube n’oburhimanya lyo rhubona n’okuyaka omurhego gw’enyigirizo z’abagoma. (1 Tm. 4:1, 7; 2 Tm. 2:16) Kwa lwiganyo, banalonze okulumîza emyanzi y’obunywesi okubiyerekire bene wirhu, erhi kurhuhiramwo akarhinda okubiyerekire ikubuliro lya Yehova. Obo bunywesi bwanahira obuyemere bwirhu omu mazibu. Rhushinganine rhuyake okurhebwa n’obo bwenge-hushu. Bulya gurhi? Bulya eyo myanzi enayalagazibwe n’abantu ‘b’emirhima ehusire barhishi okuli.’ Omuhigo gwabo guba gwa “kujira orhudali rhw’ebinwa.” (1 Tm. 6:4, 5) Babà balonzize rhuyemere obo bunywesi  n’okurhujira rhube n’akarhinda okubiyerekire bene wirhu.

16. Bintu bihi byakarhuma rhwabula kuba masu rhushinganine okuyaka?

¹⁶ Rhuyake ebyakarhuma rhwabula kuba masu. Nka “musirika mwinja wa Kristu,” Timoteyo al’ishinganine aseze obwenge bwage oku mukolo gw’okuhubiri cikone arhali oku mukolo gw’okulonza ensaranga n’eby’en’igulu. (2 Tm. 2:3, 4) Aka Timoteyo, rhushinganine rhuyake ngasi kantu kakarhuma rhwabula kuba masu mpu lyorhuba n’obuhirhi bw’eby’en’igulu. “Amasima mabi galerhwa n’obugale,” gananyihya obwîra bwirhu haguma na Yehova, irala lirhu ly’okuciyigiriza Akanwa kage n’ely’okuganirira abandi okubiyerekire ebi rhuli rhwaciyigiriza. (Mt. 13:22) Rhushinganine rhulame akalamo karhahunyiri okuba na bintu binji n’okukolesa akasanzi kirhu n’emisi yirhu lyo “rhugenderere okulongereza . . . Obwami,” oku nafasi ntanzi omu kalamo kirhu.​—Mt. 6:22-25, 33, NWT.

17-18. Bici rhushinganine rhujire lyo rhulanga obwîra bwirhu haguma na Yehova?

¹⁷ Rhucirheganye embere z’akasanzi. Omusoda aba shinganine acirheganye embere amazibu gamuhikire. Erhi rhwakalonza rhulange ebintu Yehova arhuhire, rhushinganine rhube babidu okubona omurhego n’okuguyaka duba-duba. Bici byakarhurhabala okujira ntyo? Rhushinganine rhuhugûkwe ebi rhwakajira embere amazibu garhuhikire.

¹⁸ Kwa lwiganyo, abantu bahinga omu mashwa g’emuzirhu, erhi aharhali bantu, banayubake ehiyumpa (cigala) eyo munda. Bulya gurhi bajira ntyo? Lyo bajikayegemamwo nk’enkuba yamarhoga. Ko n’oko nirhu nka rhuli rhwalola ebipindi biri byagera oku Enterneti erhi oku Televiziyo rhushinganine rhurheganye “aha” rhwakayakira nka rhwamarhinda oku filime eyerekine eby’enshonyi, eby’obuminya erhi eganirire enyigirizo z’abagoma. Erhi rhwakacirheganya embere z’akasanzi oku bintu byakarhuhikira, rhwanayaka ebintu byakarhusheregeza obwîra bwirhu haguma na Yehova na ntyo rhwanabera rhucire omu masu gage.​—Enna. 101:3; 1 Tm. 4:12.

19. Migisho ehi rhwakaba nayo erhi rhwakalanga ebintu Yehova arhuhîre?

¹⁹ Rhushinganine rhulange buzibu-zibu ebintu Yehova arhuhire, kw’okuderha okuli kw’Ebibliya, n’olukengwa lwirhu lw’okuyiyigiriza abandi. Erhi rhwakajira ntyo, rhwanaba n’ezamiri zicire, rhwanashagalukira obuzine na kandi rhwanaba n’omwishingo gw’okurhabala abandi bamanye Yehova. Kugerera oburhabale bwa Yehova rhwanaba n’obuhashe bw’okulanga ebi arhuhîre.​—1 Tm. 6:12, 19.