1. Burhabale buhi bali birhu Bakristu bali bahâna omu ikubuliro lya Yehova na mazibu gahi banji ba mulibo bali balwisa? (Olole enfoto eri oku cijalada c’eyi gazeti.)

RHUSHAGALUSIRE bwenene okubona rhunakole haguma na bali birhu omu cigamba! Kwa lwiganyo, banahâne amashuzo omu ntimanano z’Ecikristu, na kandi banaje omu mukolo gw’okuhubiri. Bali birhu baguma banacese aha Nyumpa y’Entimanano n’okushibirira bene wirhu na bali birhu. Kobinali banabe bali balwisa mazibu manji. Baguma ba mulibo banabe erhi bali bashibirira ababusi babo bashosi, n’abandi banabe bali bahagalikwa n’abantu bw’omu mulala gwabo barhali Bahamirizi. Abandi banabe erhi b’iba bafîre erhi omulume wabo abalesire na ntyo binahûne bakole bwenene lyo bahikiriza amalagirire g’abana babo.

2. Bulya gurhi kuli kwa bulagirire rhukarhabala bali birhu n’okubashibirira?

² Bulya gurhi kuli kwa bulagirire rhukarhabala n’okushibirira bali birhu? Bulya er’igulu rhulamiremwo linakabolola abakazi. Na kandi Ebibliya erhubwizire oku rhukashibirira bali birhu n’okubarhabala. Kwa lwiganyo entumwa Paolo yabwira Abakristu bw’omu cigamba c’e Roma oku bayegereze Foibe “banamurhabale oku ngasi kantu ankaba alagirireko.” (Rm. 16:1, 2) Amango Paolo aciri Mufarizayo, ali muguma w’omu bantu bakagibolola abakazi n’okubabona oku barhali babulagirire. Erhi aba Mukristu ayiga olwiganyo lwa Yezu lw’okukenga abakazi n’okubajirira aminja, bulya mw’ako kasanzi ahugûkwa oku abakazi baba babulagirire.​—1 Kr. 11:1.

3. Gurhi Yezu akagijirira abakazi boshi, na gurhi akagibona abakazi bakagijira obulonza bw’Ishe?

³ Yezu akagikenga abakazi boshi. (Yn. 4:27) Arhakagibona abakazi nk’oku abakulu b’amadîni bw’omu kasanzi kage bakagibabona. Mahugûlo maguma g’Ebibliya gadesire ntya: “Nta luderho loshi-loshi lwa Yezu luyerekine oku akagibolola abakazi erhi kubagayaguza.” Yezu akagikenga abakazi boshi, cikone bwenene abakazi bakagijira obulonza bw’Ishe. Nk’oku Yezu akagibona  omulume wakagijira obulonza bw’Ishe nka mulumuna wage, kwo anakagibona omukazi wakagijira obulonza bw’Ishe nka mwali wabo.​—Mt. 12:50.

4. Bici rhwaganirira mw’eci cigabi?

⁴ Yezu ali mubidu okurhabala abakazi bakagijira obulonza bw’Ishe. Akagibayeresa oku bali babulagirire na kandi akagibahalira. Mw’eci cigabi rhwaganirira gurhi rhwakayigamwo olwiganyo lwa Yezu lw’okubona oku bali birhu bali babulagirire.

5. Bulya gurhi kuba kuzibu kuli bali birhu baguma baguma okucijirira abîra?

⁵ Rhweshi rhujira obulagirire bw’okuba n’abîra bw’okunali. Hali amango bali birhu bayabirwa okujira obwîra na muntu mulebe. Bulya gurhi? Ezi nderho rhwaganirira z’aba bali birhu ziyerekine ntyo. Mwali wirhu ohamagalwa Jordan * adesire ntya: “Bulya ndi mulamba kanji-kanji naciyumve nka ntagwerhi nafasi omu cigamba.” Mwali wirhu Kristen wajaga omu cindi cigamba lyo ayushula omukolo gwage gw’okuhubiri adesire ntya: “Erhi wakahamira omu cindi cigamba onakayumva orhakomiri.” Hali bene wirhu baguma na baguma baciyumva nk’oku abo bali birhu baciyumva. Abalama omu mulala gurhali gw’Abahamirizi ba Yehova banakaciyumva kuli kuzibu okujira obwîra n’abo bene wabo bw’omulala na kandi banakaciyumva bali kuli na bene wabo na bali babo bw’omu cigamba. Bali birhu baguma na baguma banakayumva bahugalire bulya bali bone aha mwabo erhi kandi nka bali bashibirira mwene wabo w’omulala olwazire. Annette adesire ntya: “Ntacikagija oku ntimanano zirhu z’ecigamba bulya nie nakagishibirira nyama amango ali lwazire.”

6. Bici rhwakaciyigiriza kugerera amahano Yezu ahâga Mariya na Marta gali omu Luka 10:38-⁠42?

⁶ Yezu akagigeza akasanzi haguma n’abakazi bakagijira obulonza bw’Ishe anakagibabona nka bîra bage. Rhuganirire obwîra agwerhe haguma na Mariya na Marta, abo banyere bombi bali balamba. (Osome Luka 10:38-42.) Enderho za Yezu n’ebijiro byage byakagirhuma baciyumva bwinja. Mariya ashagalukira okudamala aha magulu ga Yezu nka mwanafunzi wage. * Marta, agaya bwenene bulya omulumuna amamulekera emikolo yene. Mwako kasanzi Yezu aha abo banyere babirhi oburhabale bw’ekiroho. Yezu ayerekana oku ashibirire abo banyere na mushinja wabo Lazaro omu kubalambagirira agandi mango. (Yn. 12:1-3) Co cirhumire birhakasomerana okuyumva oku erhi Lazaro alwala bwenene Mariya na Marta balibirhira emunda Yezu ali oku abarhabale.​—Yn. 11:3, 5.

7. Njira ehi nguma rhwakayerekanamwo oku rhushibirire bali birhu?

⁷ Hali bali birhu baguma baguma barhabuganana na bene wirhu na bali birhu okurhali oku ntimanano zirhu kone. Rhushinganine rhukolese ako kasanzi lyo rhubayegereza, rhubaganize n’okubajira baciyumve oku rhuba rhubashibirire. Mwali wirhu Jordan rhwaganiriraga omu cifungo ciri enyanya adesire ntya: “Oko kunabonekane erhi bene wirhu bamvuga omunkwa oku mashuzo nahânaga omu ntimanano na kandi erhi bayemera oku bandusa omu mukolo gw’amahubiri na kandi erhi bakayerekana oku banshibirire.” Hali ezindi njira rhwakakayerekamwo bali birhu oku baba babulagirire. Kia adesire nya: “Erhi nakabula kuja oku ntimanano zirhu nambone emesaje za bene wirhu na bali birhu z’okulonza okumanya erhi nzibuhire. Oko kunanyereke kunganaci bene wirhu na bali birhu baba banshibirire.”

8. Yindi njira ehi rhwakayigamwo olwiganyo lwa Yezu?

 ⁸ Aka Yezu nirhu rhushinganine rhukageza akasanzi haguma na bali birhu. Nkaba ciru rhwanabahamagala bayishe rhushangire haguma nabo ecijumbu. Nka rhubayegerezize aha mwirhu, rhwanacihangana rhube n’enshambalo z’okuyubaka. (Rm. 1:11, 12) Abagula bashinganine babe n’entanya Yezu agwerhe. Alihugûsirwe oku bantu baguma na baguma banayabirwa okubêra balamba. Cikone ayerekana oli obulamba oli okuba n’abana birhakarhamu omuntu aba n’obushagaluke. (Lk. 11:27, 28) Ayerekana oku omuntu anaba n’obushagaluke erhi akahira omukolo gwa Yehova oku nafasi ntanzi omu kalamo kage.​—Mt. 19:12.

9. Bici abagula bashinganine bajire lyo barhabala bali birhu?

⁹ Abagula bashinganine bakabona bali birhu nka bali babo erhi nka ba nnina. (1 Tm. 5:1, 2) Kwanaba kwinja erhi abagula bakakaciha akasanzi kw’okuganiza bali birhu embere erhi enyuma z’entimanano zirhu. Kristen adesire ntya: “Mugula muguma obona oku njira mikolo minji, ambwira oku nshinganine npange eprograme y’emikolo njira bwinja.” Kristen adesire erhi: “Namuvuga omunkwa okubona antabire mpugukwe ntyo.” Erhi abagula baciha akasanzi kw’okuganîra na bali birhu oko kunayerekana oku babà babashibirire. * Annette rhwaganiriraga  omu bifungo biri enyanya, ayerekine oku kuba kwinja haba na bunguke bunji okuganiza abagula embere erhi enyuma z’entimanano. Adesire ntya: “Okujira ntyo kwantabala nabamanya bwinja nabo bamanya bwinja. Erhi nakaja omu mazibu nambe mubidu okugendi bahûna oburhabale.”

10. Bici rhwakajira byakarhabala bali birhu nabo baciyumve bashagalusire?

¹⁰ Rhweshi, rhunashagaluke bwenene erhi omuntu akarhuvuga omunkwa oku mukolo rhwajiraga. Lubero n’oko erhi abandi bakabula burhuvuga omunkwa kw’ebi rhwajijire oko kunarhuvune omurhima. Mwali wirhu Abigail oba painiya adesire oku hali amango aciyumva wabusha. Adesire ntya: “Nambonekane nka munyere wa ntya-ntya kone. N’oko kunarhume narhanya mpu nkaba ntaye onshibirire.” Rhuganirirage enderho za mwali wirhu ohamagalwa Pam. Akozire myaka minji nka misiyonere, buzinda ayishigaluka emwabo lyo ajishibirira ababusi bage. Ene akola agwerhe myaka 70 cikone acigendekire akola nka painiya. Mwali wirhu Pam adesire ntya: “Akantu nakagishagalukira bwenene kwali kubona kunganaci bene wirhu bakagimvuga omunkwa kw’ebi nakagijira.”

11. Gurhi Yezu ayerekinemwo oku avuzire omunkwa oku mikolo abakazi bishwekerezi bakagimujirira?

¹¹ Abakazi bishwekerezi bakagirhabala Yezu kugerera “ebirugu byabo,” na ntyo ashagalukira obo burhabale. (Lk. 8:1-3) Arhakagishagalukira oburhabale bakagimuha bone, cikone akakolesa ako kasanzi lyo abahugûlira okuli okubiyerekire Nnamahanga n’obulonza bwage. Kwa lwiganyo, abahugûlira oku afâ, cikone buzinda ayishifûka. (Lk. 24:5-8) Arheganya abo bakazi nk’oku anarheganyagya entumwa zage oku malibuko ga kazihikire. (Mk. 9:30-32; 10:32-34) Rhukengere oku entumwa za Yezu erhi bamugwarha zalibirha. Cikone bakazi baguma bagendekera bamukulikira kuhika erhi bamuhira oku murhi gw’amalumwa.​—Mt. 26:56; Mk. 15:40, 41.

12. Mukolo guhi Yezu ahâga bakazi baguma?

¹² Yezu aha abakazi omukolo gw’obulagirire. Kwa lwiganyo bwo bali barhanzi okuhamiriza oku Yezu anafûsire. Abarhuma oku bajibwira entumwa zage oku anafûsire. (Mt. 28:5, 9, 10) Na kandi akaba abakazi bali oku Pentekoste y’omu mwaka gwa 33 (Mwakano Kasanzi Kirhu), byanahashikana nabo babe erhi bashizirwe amavurha kugerera iroho litagatifu. Akaba bahali ago mango iroho litagatifu lya Yehova lyabaha obuhashe bw’okuderha oku ndimi n’okubwira abandi “ebirhangazo bya Nnamahanga.”​—Ebj. 1:14; 2:2-4, 11.

13. Mikolo ehi bali birhu Bakristu bali bahikiriza ene na gurhi rhwakayerekanamwo oku rhushagalukire ebyo bali bahikiriza?

¹³ Kuli kwinja okuvuga bali birhu omunkwa oku bintu byoshi bali bahikiriza omw’ikubuliro lya Yehova. Mw’eyo mikolo muli okuyubaka n’okukubula Enyumpa z’Entimanano, okurhabala ebikundi biderha olundi-lundi lulimi, n’okurhabala oku mikolo miguma na miguma ejirwa oku Beteli. Na kandi banarhabale bene wirhu bahikirwe n’obuhanya, banarhabale oku mukolo gw’okuhindula ebitabu birhu omu nzindi ndimi erhi kandi banabe bapainiya erhi bamisiyonere. Kandi bali birhu nabo banaje oku masomo g’abapainiya, oku Masomo ga ba Eneza Injili, erhi oku Masomo g’Egileyadi. Bali birhu baherusire banarhabale abalume babo lyo bahikiriza bwinja emikolo baba bahabîrwe omw’ikubuliro lya Yehova. Abo bene wirhu barhakahikiriza bwinja omukolo baba bahabirwe gw’okuba “luhembo omu balume,” buzira burhabale bwa bakabo. (Ef. 4:8, NWT) Ka hali okumanyire wakarhabalamwo abo bali birhu kw’eyo mikolo mizibu bali bahikiriza?

14. Nk’oku biyerekinwe omu Ennanga 68:11, gurhi abagula bashinganine bakabona bali birhu?

¹⁴ Abagula baba bahugûsirwe oku bali birhu baba “ngabo” banaba baguma bw’omu bahubiri bayaliza omwanzi mwinja gw’Obwami  n’obushiru. (Osome Ennanga 68:11.) Omu ntyo abagula banashagalukire okuja omu mahubiri haguma na bali birhu, lyo babona obulenga bakolesa omu ngasi cigabi c’omukolo gw’amahubiri. Mwali wirhu Abigail rhwaganiriraga omu bifungo biri enyanya, eyerekine oku anashagaluke erhi bene wirhu bamudosa njira zihi bakakolesa lyo babugana abantu omu eneyo. Adesire ntya: “Oko kunarhume naciyumva oku nani ngwerhe enafasi omw’ikubuliro lya Yehova.” Abagula banahugûkwe oku bali birhu bakola bakuzire banahash’irhabala bali birhu baciri misole. (Tt. 2:3-5) Kobinali rhushinganine okukashagalukira bali birhu n’okubavuga omunkwa kw’ebi bajijire!

15. Mangaci bali birhu baba balagirirekw’omuntu wakabahalira?

¹⁵ Hali amango bali birhu baba bali omu mazibu, n’oko kunarhume balagirira oku muntu wakabahalira. (Iz. 1:17) Kwa lwiganyo, mwali wirhu mukana erhi owavunyire obuhya, anaba n’obulagirire bw’omuntu wakakamuhalira erhi wakakamurhabala oku mikolo miguma miguma iba anakajijire. Mwali wirhu mugikulu anaba n’obulagirire bw’omuntu wakamulusa emwa munganga erhi kumudomera amishi erhi kumukula ecirhwera. Mwali wirhu painiya ojira n’eyindi mikolo omw’ikubuliro lya Yehova anaba n’obulagirire bw’omuntu wakakamuhalira, amango abandi bahubiri balibaciduduma mpu bulya gurhi arhaja oku mahubiri ngasi mugobe. Omu yindi njira ehi rhwakarhabalamwo bali birhu? Rhucibigiganirira olwiganyo lwa Yezu.

16. Nk’oku biyerekinwe omu Marko 14:3-9, gurhi Yezu ahaliremwo Mariya?

¹⁶ Yezu ali mubidu okuhalira bali babo b’ekiroho erhi abantu bakabadesire kubi kw’ebi bajiraga erhi ebi baderhaga. Kwa lwiganyo ahalira Mariya, erhi Marta aciduduma mpu bulya gurhi arhakayisha akamurhabala. (Lk. 10:38-42) Yezu acibihalira Mariya bwakabirhi erhi abandi baderha kubi ecijiro anajiraga. (Osome Marko 14:3-9, NWT.) Yezu yehe ahugûkwa ebyashumagya Mariya akujira eco cijiro anamuvuga omunkwa. Yezu aderha ntya: “Cijiro cinja anjirire. . . . Anajijire nka oku anali ahashire.” Yezu acibinaleba oku ngasi hoshi “omwanzi mwinja gw’Obwami gwanayigirizibwe omw’igulu lyoshi,” eco cijiro c’oyo mukazi cayishikakengerwa. Kwa lwiganyo, nk’oku rhwamakengera oyo mukazi n’okumuganirira mw’eci cigabi. Bibonekine oku eco cijiro Mariya ajiraga cali cinja, bulya Yezu adesire oku cakalumire omw’igulu lyoshi, nk’oku omukolo gw’okuyaliza omwanzi mwinja gw’Obwami nago gwakalumire omw’igulu lyoshi! Orhanye kunganaci ezo nderho zarhulirizize Mariya erhi abantu baciduduma mpu byo bici ebyo amajira!

17. Ohâne olwiganyo luyerekine mangaci rhwakahalira mwali wirhu.

¹⁷ Kw’onahalire bali binyu amango balagirire okw’omuntu wakabahalira? Rhuganirire aka kanga kali ahala idako. Bene wirhu na bali birhu babone mwali wirhu oba olamire n’omulume orhali Muhamirizi, bamubone ayishe n’entimanano zirhu zarhondire, buzinda bakengere oku arhanayiruk’irilerha abana bage oku ntimanano zirhu. Ho n’aho barhondere baciduduma n’okumuderha kubi mpu bulya gurhi arhabwira iba oku aheka abana oku ntimanano. N’obu anajire okwage koshi lyo ayemeza iba oku aheka abana oku ntimanano, cikone iba ahame omugushu. Arhali yene ohiga oku akolesa akasanzi kage. Anahiga oku aheka abo bana oku ntimanano, cikone iba aderhe oku abo bana bakaja eyo barhayishigigaluka ahamwage. Gurhi wakajira erhi wakayumva bene wirhu erhi bali birhu bali baderha oyo mwali wirhu kubi, buzira kuhugûkwa amazibu aba alamiremwo? Kwanaba kwinja erhi wakakamuvuga omunkwa n’okuganirira abandi oku morhere minja ajira n’amazibu aba alamiremo ahali hw’okukamuderha kubi.

18. Omu zindi njira zihi rhwakarhabalamwo bali birhu?

¹⁸ Rhwanayeresa bali birhu oku rhuba rhubashibirire omu kubaha oburhabale bashinganine.  (1 Yn. 3:18) Annette mwali wirhu wakag’iberako nnina erhi alwazire, adesire ntya: “Abîra bani bakayish’ibereko nyama kasanzi kaguma na kaguma erhi kandi barhulerhere ebiryo. Oko kwakagirhuma naciyumva oku bene wirhu banzigire na ngwerhe enafasi omu cigamba.” Mwali wirhu Jordan naye ayerekine kunganaci bene wirhu bamurhabire. Lusiku luguma mwene wirhu muguma amuha amahano gayerekire oku akakabula omutuga gwage. Adesire ntya: “Naciyumva bwinja erhi nbona kunganaci bene wirhu na bali birhu baba banshibirire.”

19. Omu zindi njira zihi abagula bakarhabalamwo bali birhu?

¹⁹ Kandi abagula banashibirire bali birhu bw’omu cigamba bulya baba bahugûsirwe gurhi Yehova aba alonzize rhukajirira abakazi. (Yk. 1:27) Banacihangane okuyiga oborhere bwa Yezu omu kuyaka okuhirira bali birhu amarhegeko garhashinganini. (Mt. 15:22-28) Erhi abagula bakaba bwo barhanzi okukarhabala bali birhu, banabarhabala bahugûkwe oku Yehova n’ikubuliro lyage baba babazigire. Erhi mwangalizi w’ecikundi c’amahubiri cabo mwali wirhu Kia amanya oku akola ahama, arhôla omuhigo gw’oku bene wirhu bakagendimurhabala okuheka ebirugu. Mwali wirhu Kia adesire oku “oko kwarhuma arhacicidosagya gurhi aheka ebirugu yene. Kugerera oburhabale n’amahano abagula bampaga narhondera naciyumva oku ndi wabulagirire omu cigamba n’oku ntaba kahumba.”

20-21. Gurhi rhwakayerekanamwo oku rhuba rhuzigire bali birhu boshi bw’omu cigamba?

²⁰ Ene omu bigamba birhu muli bali birhu banji bali bakola mikolo minji omu cigamba na ntyo balagirire oku burhabale bwirhu. Nk’oku olwiganyo lwa Yezu lwa rhuyigirizize rhwanabarhabala omu kukageza akasanzi haguma nabo n’okucihangana rhubamanye bwinja. Rhwanakabavuga omunkwa oku bintu byoshi bali bahikiriza omu mukolo gwa Nnamahanga. Na kandi rhushinganine rhukabahalira amango bihunyire okujira ntyo.

²¹ Oku buzinda bw’amaruba Paolo ayandikiraga Abakristu b’e Roma, ahiziremo mazino mwenda g’abakazi Bakristu. (Rm. 16:1, 3, 6, 12, 13, 15) Buzira karhinda abo bakazi bashagalusîre bwenene erhi bayumva baderha okubiyerekire amazino gabo n’ebi bakagijira. Nirhu rhushinganine rhukarhabala bali birhu bw’omu cigamba rhubayerese oku rhuba rhubazigire, bulya nabo baba baguma bw’omu mulala gwirhu gw’ekiroho.