1-2. Lushangi luhi luli egarhi kw’olwandiko lwa Omuhanûzi 11:6, n’omukolo gwirhu gw’okuyaliza omwanzi mwinja gw’Obwami?

OMU bihugo biguma na biguma, abantu banayankirire omwanzi mwinja gw’Obwami n’obushagaluke. Cikone omu bindi bihugo abantu banayerekane oku barhashagalukira okuyumva emyanzi eyerekire Ebibliya erhi Nnamahanga. Emunda oba olamire, gurhi abantu bayiyankirira? Abantu bayiyankirire bwinja erhi nanga, Yehova alonzize rhugendekere rhwayaliza ogo mwanzi kuhika yene aderhe oku rhulekage.

² Yehova arheganyize amango omukolo gw’okuyaliza omwanzi mwinja gw’Obwami gurhakacijirwa, ago mango, “gw’obuzinda bwanahike.” (Mt. 24:14, 36, NWT) Embere obuzinda buhike, gurhi rhwakayerekanamwo oku rhukenzire ezi nderho zidesire: “Orhalekaga okuboko kwawe kurhamuke?” *​—Osome Omuhanûzi 11:6, NWT.

3. Bici rhwaganirira mw’eci cigabi?

³ Ecigabi c’embere caganîrire bintu bini byakarhurhabala lyo rhuhikira aha rhwaba “badubi b’abantu” bw’okunali. (Mt. 4:19) Eci cigabi caganîrira njira isharhu zakazibuhya omuhigo gwirhu gw’okuyaliza omwanzi mwinja gw’Obwami, ciru rhwakaba rhulirhwalwisa mazibu gahi. Mw’eci cigabi rhwaganîrira bintu bisharhu byabulagirire (1) okugendekera kwasegeza obwenge bwirhu oku mukolo gw’okuyaliza, (2) okuba bakulembera, na (3) okugendekera kwaba n’obuyemere buzibu.

4. Bulya gurhi rhushinganine rhusegeze obwenge bwirhu oku mukolo Yehova arhuhîre?

⁴ Yezu aganîrire bintu binji byakayerekine oku rhukola rhuli omu nsiku za buzinda n’oko kwakarhumire abanafunzi bage barhacisegeza obwenge bwabo oku mukolo gw’amahubiri. Co carhumaga ababwira oku ‘babe masu.’ (Mt. 24:42) Mwakano kasanzi kirhu hali bintu binji bishushine n’ebyakagijirikana omu mango ga Nuhu, biri byarhuma abantu barhakengera oku obuzinda buli hofi. (Mt. 24:37-39; 2 Pt. 2:5) Ciru akaba ntyo rhushinganine rhuhige okugendekera kwaseza obwenge bwirhu oku mukolo Yehova arhuhîre.

5. Nk’oku olwandiko lwa Ebijiro by’Entumwa 1:6-⁠8 luyerekine, kunganaci omukolo gw’okuyaliza omwanzi mwinja gw’Obwami gwakajijirwe?

⁵ Kulusha agandi mango goshi, ene lyo rhushinganine okuseza obwenge bwirhu oku mukolo gw’okuhubiri. Yezu adesire oku enyuma z’olufû lwage , ogo mukolo gwakajijirwe bwenene kulusha oku agujiraga. (Yn. 14:12) Erhi Yezu afâ banafunzi bage baguma baguma bagalukira omukolo gwabo gw’okuduba ensamaki. Enyuma z’okufûka Yezu ajirira abanafunzi bage ecisomerine c’okuduba nsamaki nyinji. Mw’ako kasanzi abahugûlira oku omukolo gw’okuduba abantu guli gwa bulagirire kulusha eyindi mikolo yoshi. (Yn. 21:15-17) Kasanzi kasungunu embere aje empingu Yezu abwîra abanafunzi bage oku omukolo gw’okuhâna obuhamirizi arhondezagya gwakayenire omw’igulu lyoshi. (Osome Ebijiro by’Entumwa 1:6-8.) Myaka misungunu enyuma z’aho Yezu ayereka Yowane ecibonekerezi c’ebintu byakajirikine “omu lusiku lwa Nnawirhu.” * Mw’eco cibonekerezi Yowane abona malahika ali, “ayaliza omwanzi mwinja gw’Obwami” oku bantu “b’amashanja goshi, ngasi bûko na ngasi lulimi.” (Maf. 1:10; 14:6, NWT) Oko kuyerekine oku Yehova alonzize omwanzi mwinja gw’Obwami gulumizibwe omw’igulu lyoshi kuhika aderhe oku rhulekage.

6. Gurhi rhwakagendekera rhwasegeza obwenge bwirhu oku mukolo gw’amahubiri?

 ⁶ Erhi rhwakahugûkwa kunganaci Yehova ali arhurhabala omu mukolo gw’okuhubiri, oko kwanarhurhabala rhuseze obwenge bwirhu kw’ogo mukolo. Kwa lwiganyo, ali arhuha biryo binji by’ekiroho; ebitabu, amavideyo, JW Télédiffusion, JW.org, ebyo byoshi biyerekine oku Yehova aba arhushibirire bwenene bulya ciru n’e site yirhu eri omu ndimi hofi 1000! (Mt. 24:45-47) Bantu balushire miliyoni munani bali bagendekera bakolera Yehova omu cinyabuguma n’omu buzigire ciru akaba rhuli omw’igulu lirimo akavulindi omu bintu by’epolitike, b’idîni n’enfaranga. Kwa lwiganyo, Lwakarhanu sezi, nsiku 19 z’Omwezi gwa Kani, 2019, Abahamirizi ba Yehova bw’omw’igulu lyoshi balola evideyo yaliganirire olwandiko lw’olusiku. Mw’ebyo bijingo bantu, 20919041 barhimanana lyo bakengera haguma olufû lwa Yezu. Rhushinganine rhuseze obwenge bwirhu omu kujira omukolo gw’okuyaliza omwanzi mwinja gw’Obwami bulya luli lukengwa lunene olo Yehova arhuhire omu kurhuhashisa nirhu rhujire oku cisomerine cinene ciri nk’eco.

7. Gurhi olwiganyo lwa Yezu lwakarhurhabala rhuseze obwenge bwirhu oku mukolo gw’amahubiri?

⁷ Eyindi njira yakarhurhabala rhuseze obwenge bwirhu oku mukolo gw’amahubiri, kuli kuyiga olwiganyo lwa Yezu. Nta kantu koshi-koshi kamuhanzize okuhamiriza okuli. (Yn. 18:37) Arhayemeraga enshumi za Shetani erhi amubwira oku amuharamye ly’amuha “amami goshi g’en’igulu n’irenge lyago,” na kandi arhalonzagya mpu abe mwami erhi abantu balonza okumugwarha mpu bamujire mwami. (Mt. 4:8, 9; Yn. 6:15) Arhajagamwo irala ly’okulonza abe n’ebirugu by’en’igulu na kandi arhayobohaga erhi abantu bakamuhagalika. (Lk. 9:58; Yn. 8:59) Nk’obuyemere bwirhu buli bwahagalikwa, rhushinganine rhukengere ir’ihano Yehova alongozagya entumwa Paolo oku eyandike, ayinginga Abakristu ababwira oku bakulikire olwiganyo lwa Kristu ‘lyo barhahimagwa barhanatwikaga omurhima’!​—Hb. 12:3, Mashi Bible.

8. Okulembera kw’okuderha gurhi na bulya gurhi kuli kwa bulagirire mwagano mango?

⁸ Okulembera buba buhashe bwa kulinda onarhuzize kuhika akanga olimo kashanje. Rhube rhuli rhwalinda oku ebintu bibi byahwa erhi kandi rhube rhuli rhwalinda oku ciragane cilebe cahikirira, rhweshi rhushinganine rhulembere. Omulebi Habakuki acifinja gurhi akabona obubi bwali bwamaja omu Yuda buhike ebuzinda. (Hab. 1:2) Abanafunzi ba Yezu bacishinja mpu Yezu akola alerha Obwami bwa Nnamahanga “ho n’aho,” mpu lyo bubakula omu bujà bw’Abaroma. (Lk. 19:11, NWT) Rhulangalire oku Obwami bwa Nnamahanga bwayisha buhererekeze obubi boshi na buzinda bulerhe igulu lihyahya lirimo obushinganyanya. (2 Pt. 3:13) Rhushinganine rhulinde n’okulembera oku akasanzi Yehova adesire obuzinda bwayisha kahika. Rhuganirirage njira nguma nguma Yehova akolesa lyo arhuyigiriza okulembera.

9. Nyiganyo zihi ziyerekine oku Yehova aba wakulembera?

⁹ Yehova lw’olwiganyo lukulu lw’okulembera. Alekera Nuhu akasanzi kw’okuyubaka esafina n’akw’okukola nka muhamirizi “w’obushinganyanya.” (2 Pt. 2:5; 1 Pt. 3:20) Yehova ayumverheza amadoso goshi Abrahamu amudosagya okubiyerekire obushereze bw’e Sodoma n’e Gomora. (Murh. 18:20-33) Yehova alembera ishanja lya Israheli lirhali lishwekerezi kasanzi ka myaka erhali minyi. (Neh. 9:30, 31) Nirhu rhuli rhwabona oku Yehova aba wakulembera bulya alekire abantu boshi akasanzi “kw’okuciyunjuza.” (2 Pt. 3:9; Yn. 6:44; 1 Tm. 2:3, 4) Olwiganyo lwa Yehova lw’okulembera lurhuhire ecirhumire cinja c’okugendekera kwalembera  omu mukolo gwirhu gw’okuhubiri n’okuyigiriza. Kandi Yehova anarhuyigirize okulembera kugerera olwiganyo luli omu Kanwa kage.

10. Bici olwiganyo lw’omuhinzi luli omu lwandiko lwa Yakobo 5:7, 8 lwakarhuyigiriza?

¹⁰ Osome Yakobo 5:7, 8. Olwiganyo lw’omuhinzi lwanarhuyigiriza rhube bakulembera. Hali mburho nyinji zikula duba-duba, cikone mirhi minji, bwenene era eleheka amalehe enakajira myaka minji lyo eleheka. Amango g’aba Israheli, emburho zakagijira myezi ndarhu omw’idaho lyo zisarulwa. Omuhinzi akagirhwera emburho omu mpondo, omu canda anazisarula. (Mk. 4:28) Ene nirhu olwiganyo lw’omuhinzi lwanarhuyigiriza bintu binji. Cikone, okulembera kurhaba kulembu.

11. Gurhi okulembera kwakarhurhabala omu mokolo gwirhu gw’amahubiri?

¹¹ Rhuli bene bantu barhali bimana, rhujira oborhere bw’okusima rhubone amalehe gw’omukolo gwirhu ho n’aho. N’obo erhi rhwakalonza rhusarule mburho nyinji rhushinganine rhushibirire ishwa lirhu buzira kurhama, kwa lwiganyo rhushinganine rhulihinge, rhuli rhwere rhunaliyufire. Kwo n’oko lyo rhurhabala omwanafunzi w’Ebibliya abe Muhamirizi wa Yehova, biba bihunyire kasanzi kanji, ly’ahikira ah’aleka nkomêdu nguma nguma bamurhweziremwo; nk’akabolo n’okurharhumikira amarhegeko ga Nnamahanga. Okulembera kwanarhurhabala rhurhavunikaga omurhima, ciru abantu bakabula kurhuyumverheza. Rhukwanine rhube bakulembera, ciru n’amango abantu bayemire oku barhuyumverheza n’okucifunza. Rhurhakaseza omwanafunzi w’Ebibliya ajire amajambere gw’ekiroho. Rhukwanine rhuhugûkwe oku abanafunzi ba Yezu nabo, hali akasanzi barhahugûkagwa ebi Yezu akagibayigiriza. (Yn. 14:9) Rhushinganine rhukakengera oku omukolo gwirhu guba gwakurhwera n’okubulagira amishi, na buzinda Nnamahanga anakuza ezo mburho.​—1 Kr. 3:6.

12. Gurhi rhwakabamwo bakulembera amango rhuli rhwayigiriza abantu bw’omu mulala gwirhu barhali Bahamirizi ba Yehova?

¹² Okulembera kwanaba kuzibu amango rhuli  rhwahubiri abantu bw’omu mulala gwirhu. Akanuni kali omu lwandiko lwa Omuhanûzi 3:1, 7 kanarhurhabala. Ako kanuni kabakadesire ntya: “Ngasi kantu kajira amango gako . . . amango gw’okuganîra n’ag’okuhulika.” Olugenzi lwirhu lwinja lwanarhuma bene wirhu bw’omulala bayumverheza ebi rhuli rhwababwira na ntyo rhwanaba n’obulyo bw’okubaganiza okubiyerekire okuli. (1 Pt. 3:1, 2) Rhushinganine rhuyigirize abantu boshi n’obushiru, cikone rhushinganine boshi rhukabalembera, ciru n’abantu bw’omu mulala gwirhu.

13-14. Nyiganyo zihi nguma nguma z’abantu balembire rhwakayiga?

¹³ Rhwanaciyigiriza okuba bakulembera kugerera enyiganyo z’abakozi ba Yehova ba mîra n’aba mwakano kasanzi kirhu. Omulebi Habakuki acifinja gurhi akabona oku obubi bwali omu cihugo cage bwahwa, cikone byahûna agendekere alembera. Aderha ntya n’obulangalire: “Niehe nkolaga nacibêrera ah’ilâbiro lyani.” (Hab. 2:1) Entumwa Paolo yacifinja gurhi yakahisa omukolo gwayo “okubuzinda.” Cikone alembera kuhika “ahâne obuhamirizi bw’okunali bw’emyanzi minja.”​—Ebj. 20:24, NWT.

¹⁴ Rhuganirirage olwiganyo lwa mwene wirhu muguma na mukage barhumagwa omu cihugo ciguma enyuma z’okurhenga oku masomo g’e Gileyadi. Babarhuma omu cihugo ciguma Abahamirizi ba Yehova barhabamwo banji n’abantu b’eyo barhalugiyemera enyigirizo z’Ecikristu. Bantu basungunu bwo bakagiyemera okucifunza Ebibliya, lubero n’oko ababo basomaga boshi bakabayandikira, bakababwira oku emunda barhumagwa abantu bali bacifunza Ebibliya na baguma bamulibo bali babà Bahamirizi ba Yehova. Ciru akaba bantu banji barhakagilonza okuyumverheza emyanzi minja eyerekire Obwami bwa Yehova, abo bene wirhu barhalekaga okuhubiri. Enyuma za myaka munani, barhabala muntu muguma ahikira ah’abatizibwa n’oko kwabaha omwishingo. Bici enyiganyo za bene wirhu ba mîra n’aba buno zakarhuyigiriza? Abo bene wirhu barhavunikaga omurhima bagendekera balembera na Yehova agisha obushiru n’okulembera kwabo. Rhushinganine rhuyige olwiganyo lwa balya “bayerekine obuyemere banalembera buzinda bayîma ebiragane.”​—Hb. 6:10-12, NWT.

15. Njira ehi nguma obuyemere buzibuhyamwo omuhigo gwirhu gw’okuhubiri?

¹⁵ Rhuba rhuyemire emyanzi rhujiyigiriza abantu, co cirhuma rhujira okwirhu koshi lyo rhuyiganirira bantu banji nka bihashikine. Rhuba rhuyemire ebiragane bya Nnamahanga biba omu Kanwa kage, Bibliya. (Enna. 119:42; Iz. 40:8) Rhuli rhwabona gurhi obulebi Ebibliya yalebaga buli bwahikirira mwakano kasanzi kirhu. Na kandi rhuli rhwabona gurhi amakanuni g’Ebibliya gali garhabala abantu bajire empindûlo omu kalamo kabo. Oko kunarhuyemeze n’obwalagale oku rhushinganine rhuyalize omwanzi mwinja gw’Obwami oku bantu b’amashanja goshi.

16. Nk’oku biyerekinwe omu Ennanga 46:1-⁠3, gurhi obuyemere rhujirako Yehova na Yezu bwakazibuhya omuhigo gwirhu gw’okugendekera kwahubiri?

¹⁶ Rhuba rhuyemire n’obwalagale oku Yehova ye Nshôko y’omwanzi rhukayaliza na kandi rhujira obuyemere mw’oyu ashimisire oku abe Mwami w’Obwami bwage, Yezu Kristu. (Yn. 14:1) Ciru rhwakaja omu mazibu gahi rhunalangalire oku Yehova yeba lwakiro lwirhu, agendekera arhuzibuhya. (Osome Ennanga 46:1-3.) Rhuba rhuyemire n’obwalagale oku Yezu ali alongola omukolo gw’amahubiri kugerera emisi n’obuhashe Yehova amuhâga.​—Mt. 28:18-20.

17. Ohâne olwiganyo luyerekine oku kuli kwabulagirire okugendekera kwahubiri omwanzi mwinja gw’Obwami.

¹⁷ Obuyemere bunarhume rhwayemera n’obwalagale oku Yehova agisha obushiru bwirhu,  ciru n’omu njira rhurhali langalire. (Muh. 11:6) Kwa lwiganyo, ngasi lusiku emiliyoni y’abantu eja oku ma prezantware girhu lyo barhôlakwo ebitabu. K’eyo njira y’okuhubiri enalerhe obunguke? Neci! E Huduma Yetu ya Ufalme (y’omu Ciswahiri) y’omwezi gwa 11 mwaka gwa 2014 eganîrire musole muguma gw’oku Université gwal’ilonzize okuyandika emyanzi eyerekire Abahamirizi ba Yehova. Arhal’imanyire gurhi akahikamwo aha Nyumpa y’Entimanano, cikoki abona aha bene wirhu bahizire e prezantware arhôla hw’ebitabu byamurhabala okuyandika ebintu biyerekire Abahamirizi ba Yehova. Buzinda ahikira ah’aciyigiriza okuli kuhika aba Muhamirizi wa Yehova mubatize na kuhika ntya ali akola nka painiya w’akasanzi koshi. Olo lwiganyo luyerekine oku rhushinganine rhugendekere okuhubiri, bulya haciri abantu bagwerhe enyorha y’okuyumverheza omwanzi mwinja gw’Obwami.

18. Bici birhuyemezize n’obwalagale oku okujira omukolo gw’okuhubiri kwahwa omu kasanzi Yehova ahizireho?

¹⁸ Rhwanayemera n’obwalagale oku omukolo gw’okuhubiri gugwerhe obuzinda. Rhuganirire okubyabaga omu mango ga Nuhu. Yehova ayerekana oku aba ahugûsirwe bwinja okupanga akasanzi. Myaka 120 embere, Yehova ahîga oku Ecihonzi carhoga. Myaka minji embere z’aho, Yehova abwira Nuhu oku ayubake esafina. Nkaba Nuhu ajijire myaka 40 erhi 50 ali ayubaka esafina embere Ecihonzi cirhondêre carhoga. Agendekera ayigiriza ciru ankaba abantu barhakag’imuyumverheza, kuhika Yehova amubwira oku ahire ensimba omu safina. Erhi akasanzi kahika, Yehova “ahamika olumvi.”​—⁠Murh. 6:3; 7:1, 2, 16.

19. Bici rhwakalinda erhi akaba okuboko kwirhu kurharhamusiri?

¹⁹ Hano hofi-hofi Yehova aderha oku rhulekage omukolo gw’okuyigiriza omwanzi mwinja gw’Obwami. ‘Ayigala olumvi’ lw’igulu lya Shetani lyoshi, kw’okuderha oku ashereza igulu lya Shetani, buzinda alerhe igulu lihyahya lirimw’obushinganyanya. Mwakano kasanzi kuli kwabulagirire rhuyige olwiganyo lwa Nuhu, Habakuki n’abandi bakozi ba Yehova barhalekaga okuboko kwabo kwarhamuka. Rhushinganine okugendekera kwajira omukolo gw’amahubiri, rhulembere n’okuba n’obuyemere buzibu muli Yehova n’ebiragane byage.