ECIGABI C’OKUYIGA 11
Gurhi Amandiko Gakarhurhabalamwo lyo Rhulembera Amazibu
“Nyamuzinda, cisiki c’okulembera.”—RM. 15:5.
LWIMBO 94 Kulithamini Neno la Mungu
EBI RHWAYIGA *
1. Mazibu gahi abakozi ba Yehova bali barhimanana nago ene?
K’OLI walwisa mazibu malebe? Nkaba hali omuntu w’omu cigamba cinyu wakujirire kubi erhi akuvuna omurhima. (Yk. 3:2) Erhi nkaba abinyu mukola mweshi erhi abinyu banafunzi bali bakushekera bulya oli mukozi wa Yehova. (1 Pt. 4:3, 4) Erhi nkaba abantu bw’omu mulala gwawe banalonze okukuhanza oku orhajaga omu ntimanano erhi mpu oleke okukaganirira abandi okubiyerekire obuyemere bwawe. (Mt. 10:35, 36) Erhi wakarhimanana n’amazibu makali, hali amango wakaciyumva mpu nkaba oleke okukolera Yehova. Cikone wanayemera n’obwalagale oku ciru wakarhimanana na mazibu gahi, Yehova anakuha obwenge bw’okugalwisa, n’emisi y’okugalembera.
2. Nk’oku biyerekinwe omu lwandiko lwa Abaroma 15:4, bunguke buhi okusoma Akanwa ka Nnamahanga kwakarhulerhera?
2 Yehova aganirire kwa buliri omu Kanwa kage Bibliya, gurhi bene bantu barhali bimana bahashirilwisa amazibu makali. Bulya gurhi? Lyo rhuyiga bintu binji kugerera enyiganyo zabo. Ntyo kwo Yehova alongozagya entumwa Paolo ayandike. (Osome Abaroma 15:4.) Okusoma eyo myanzi kwanarhuha oburhulirize n’obulangalire. Cikone lyo erhulerhera obunguke, rhushinganine rhujire binji kulusha okusoma kone. Rhushinganine rhuleke amandiko gakubûle entanya zirhu, na kandi rhugaleke gahume oku mirhima yirhu. Bici rhushinganine rhujire amango rhuli rhwalonza obulongozi okubiyerekire oku rhwakalwisamw’amazibu girhu? Rhwanajira ebi bintu bini bikulikire: (1) Okusalira, (2) Okubona ebintu omu bwenge, (3) Okurhanya, (4) n’okukolesa ebi rhwayigaga. Rhuganirire gurhi rhwakajira ngasi kantu ka muli ebyo bintu. * Na kandi rhwayishikolesa eyo njira y’okuyiga lyo rhuganirira ebyahikire Mwami Daudi n’entumwa Paolo omu kalamo kabo.
1. OKUSALIRA
Embere orhondere okusoma Ebibliya, ahûne Yehova akurhabale oyunguke n’ebi oli wasoma (Olole ecifungo ca 3)
3. Bici oshinganine ojire embere orhondere okusoma Ebibliya, na bulya gurhi?
3 (1) Okusalira. Embere orhondere okusoma Ebibliya, wanahûna Yehova akurhabale oyunguke n’ebi oli wasoma. Kwa lwiganyo, erhi wakaba oli walonza amahano okubiyerekire oku wakalwisamwo amazibu gawe, wanahûna Yehova akurhabale obone amakanuni omu Kanwa kage gakakurhabala omu kanga olimo.—Fl. 4:6, 7; Yk. 1:5.
2. OKUBONA EBINTU OMU BWENGE
Ocihebe aha nafasi y’omuntu oganirirwe mw’ogo mwanzi (Olole ecifungo ca 4)
4. Bici byakakurhabala ly’obona omwanzi oli wasoma omu Bibliya oku guli gw’okuli?
4 (2) Okubona ebintu omu bwenge. Yehova arhuhîre obuhashe bw’okubona ebintu omu bwenge. Ly’obona omwanzi oli wasoma oku guli gw’okuli, orhangileka hitya obone omu bwenge ebiri byajirikana n’okuciheba oku nafasi y’omuntu oganirirwe mw’ogo mwanzi. Ocihangane nawe obone ebi oyo muntu abwîne n’okuciyumva nk’oku akagiciyumva.
3. OKURHANYA
Ogerereze bwenene kw’ebi oli wasoma n’okubona gurhi ogo mwanzi gukuyerekire (Olole ecifungo ca 5)
5. Okurhanya kw’okuderha gurhi, na gurhi oshinganine okazirhanya?
5 (3) Okurhanya. Okurhanya kuli kugerereza bwenene kw’ebi oli wasoma n’okubona gurhi ogo mwanzi gukuyerekire. Kunarhabale obone gurhi entanya z’ogo mwanzi zipatine n’okurhabala oguhugûkwe bwinja. Okusoma buzira kurhanya kuli nka kula omuntu akaja alola oku nûngo buzira kuzigusha haguma. Okurhanya kuli nka kula omuntu akagusha bwinja ezo nûngo haguma n’okujira ebiryo bibe binunu bwenene. Ly’orhanya kw’ebi oli wasoma wanacidosa aga madoso n’okugashuzako: ‘Bici omuntu oganirirwe omu ajijire byamurhabire alwise amazibu gage? Gurhi Yehova amurhabiremwo? Gurhi nakakolesamwo ebi nsomire lyo bintabala ndembere amazibu?’
4. OKUKOLESA EBI RHWAYIGAGA
Okakolesa ebi oli wayiga ly’okarhôla emihigo minja, ly’oba n’omurhula, n’oko kwanazibuhya obuyemere bwawe (Olole ecifungo ca 6
6. Bulya gurhi kuli kwa bulagirire okukolesa ebi rhuli rhwayiga?
6 (4) Okukolesa ebi rhwayigaga. Yezu adesire oku erhi rhwakabula bukolesa ebi rhwaciyigirizagya, rhwanaba nka kula omuntu akayubaka enyumpa oku mushenyi. Anakole bwenene n’obu ali aheza emisi yage busha. Bulya gurhi? Bulya hano enkuba n’ecihusi bigera, eyo nyumpa yanacihongokera. (Mt. 7:24-27) Ko n’oko nirhu, erhi rhwakakasalira, rhugerereze kw’ebi rhwasomire, rhunabirhanyeko, cikone rhurhali rhwabikolesa, rhwanaba nk’abarhamire busha. Omu mango obuyemere bwirhu bwaja omu marhangulo erhi kulibuzibwa, rhwanayabirwa kulembera bulya rhwanaba erhi nta misi rhugwerhe. Lubero n’oko, erhi rhwakakakolesa ebi rhuli rhwayiga, rhwanakamanyirhôla emihigo, rhwanaba n’omurhula, n’oko kwanazibuhya obuyemere bwirhu. (Iz. 48:17, 18) Omu kukolesa ezo njira ini rhuganirire, olekage rhubone ebi rhwakaciyigiriza kugerera ebyahikiraga Mwami Daudi omu kalamo kage.
BICI OLWIGANYO LWA MWAMI DAUDI LWAKAKUYIGIRIZA?
7. Mwanzi guhi guli omu Bibliya rhukola rhwaganirira?
7 Ka hali omwîra wawe erhi muntu w’omu mulala gwawe okola okuvunire omurhima? Akaba hali ye, wayunguka omu kuyumva gurhi Mwami Daudi ajijire erhi omugala Absalomu amuvuna omurhima n’okulonza okumunyaga obwami.—2 Sam. 15:5-14, 31; 18:6-14.
8. Gurhi wakajira lyo Yehova akurhabala?
8 (1) Okusalira. Amango oli warhanya oku mwanzi mulebe, obwire Yehova gurhi oli waciyumva lugenda okubakujiriraga. (Enna. 6:6-9) Obwire Yehova n’obwalagale gurhi oli waciyumva. Buzinda ohûne Yehova akurhabale obone amakanuni gakakurhabala olwise ago mazibu gakuhikire.
9. Gurhi wakaderhera kwa bofofi omwanzi guganirire Daudi na Absalomu?
9 (2) Okubona ebintu omu bwenge. Ogerereze gurhi ebintu byajirikine mw’ogu mwanzi, na buzinda ogerereze gurhi byarhumire Mwami Daudi aciyumva. Absalomu mwene Daudi ajijire myaka minji ali ashumya abantu oku bamuzigire. (2 Sam. 15:7) Erhi Absalomu abona oku akasanzi k’okuhikiriza omuhigo gwage kamahika, arhuma abaganda bage oku bajimujirira akampanye omu cihugo coshi c’e Israheli lyo barheganya abantu bacishoge ye nka mwami wabo. Ciru ayemeza Ahitofeli mwîra wa Mwami Daudi wakagimuha amahano oku acilunge haguma naye mw’obo bugoma. Absalomu ayalagaza oku ye okola mwami, na buzinda alonza okugwarha Daudi n’okumuyirha ago mango nkaba Daudi ali lwazire bwenene. (Enna. 41:1-9) Erhi Daudi ayumva oku go muhigo omugala agwerhe ogo, alibirhira e Yeruzalemu. Buzinda abasoda ba Absalomu bajilwisa abasoda babezire bishwekerezi kuli Daudi. Abo basoda bagomaga bahimwa, na Absalomu mwene Daudi anigwa.
10. Gurhi akanga Daudi alimwo kakarhumire ajira?
10 Kandi, ogererezagye gurhi Daudi akaciyumvirhe erhi ebyo byoshi bimuhikira. Akag’izigira Absalomu, anal’ilangalire Ahitofeli. Cikoki, abo bira bage bamulenganya. Bamujirira kubi na buzinda balonza okumuyirha. Oko kwakarhumire Daudi abula bugendekera alangalira abandi bîra bage n’okurhanya nti nkaba nabo bacilunzire omu bugoma bwa Absalomu. Na kandi, kwakarhumire akacirhanyiza yenne, n’okulonza ayake buzira kulusibwa na muntu yeshi-yeshi. Ciru na kandi ako kanga nkaba kakarhumire ahêza obulangalire. Cikoki, ciru akaba ntyo, nta kantu ka muli ebyo byoshi Daudi ajijire. Cikone, ahikira okuhima ago mazibu madarhi. Bici byamurhabire?
11. Gurhi Daudi ajijire mw’ago mazibu?
11 (3) Okurhanya. Makanuni gahi ogu mwanzi gwakakuyigiriza? Lonza ishuzo kw’er’idoso, “Bici Daudi ajijire ly’acirhabala yenene?” Daudi arhayobohaga n’okurhôla emihigo duba-duba kandi erhi kurhôla emihigo erhali ya bwenge. Arhanayemeraga oboba burhume arhajira ebi analishinganine okujira. Lubero n’oko, ashenga Yehova omurhabale. Na kandi ahûna abîra bage oburhabale. Arhanalegereraga okuhikiriza emihigo ali amarhôla. Ciru akaba ako kanga kaligayisîze Daudi, arhalekaga okulangalira abandi, nisi erhi kubabikira akarhinda. Agendekera alangalira Yehova n’abîra bage.
12. Bici Yehova ajijire ly’arhabala Daudi?
12 Gurhi Yehova arhabiremwo Daudi? Omu kugendekera wajira obusagasi, wayish’ibona oku Yehova ahire Daudi emisi y’okulembera amazibu alimo. (Enna. 3:1-8, NWT, ebinwa by’enshokolezi) Yehova agisha emihigo Daudi akagirhôla. Anarhabala abîra bishwekerezi ba Daudi erhi babà bali balwa lyo balanga mwami wabo.
13. Gurhi wakayiga olwiganyo lwa Daudi erhi muntu mulebe akakugokeza bwenene? (Mateyo 18:15-17)
13 (4) Okukolesa ebi rhwayigaga. Ocidose ntya: ‘Gurhi nakayigamw’olwiganyo lwa Daudi?’ Nkaba byanahûna ojire duba-duba ly’oyusa mazibu malebe. Haligi n’akandi kanga kakakuhûna okolese ihano lya Yezu liri omu lwandiko lwa Mateyo 18, erhi kukolesa akanuni kalimw’er’ihano. (Osome Mateyo 18:15-17.) Cikoki, oyake okukarhôla emihigo duba-duba omu mango ogwerhe oburhe. Oshinganine ohûne Yehova akurhabale obe n’omurhima gurhuzize, n’obwenge bw’okulwisa amazibu alimo. Orhabulaga bwalangalira abîra bawe. Lubero n’oko oyemere oburhabale boshi bakakuha. (Mig. 17:17) N’akantu kw’obulagirire, okolese amahano goshi Yehova akuhîre kugerera Akanwa kage.—Mig. 3:5, 6.
BICI OLWIGANYO LWA PAOLO LWAKAKUYIGIRIZA?
14. Kanga kahi na kahi kakarhuma wasegeza obwenge bwawe kw’ebi biri biyandike omu 2 Timoteyo 1:12-16; 4:6-11, 17-22?
14 K’oli wahagalikwa n’abantu bw’omu mulala gwawe bulya oli wakolera Yehova? K’olamire omu cihugo emikolo y’Abahamirizi ba Yehova ehanzibwemo? Akaba ntyo kobiyosire, wanahâbwa omurhima omu kusoma ebi Paolo ayandikaga omu 2 Timoteyo 1:12-16 na 2 Timoteyo 4:6-11, 17-22. * Paolo ayandika eco cigabi c’Amandiko erhi anali omu mpamikwa.
15. Bici wakashenga Yehova?
15 (1) Okusalira. Embere osome ago mandiko, obwire Yehova amazibu ogwerhe n’oku gali garhuma waciyumva. Orhamufulikaga kantu ciru n’akaguma. Buzinda, ohûne Yehova akurhabale omu olwandiko wasoma luganirire amarhangulo Paolo ageziremwo, obonemo amakanuni gakakurhabala olembere amazibu olimo.
16. Gurhi wakaganirira kwa bofofi akanga Paolo alimwo?
16 (2) Okubona ebintu omu bwenge. Obone nka w’eri omu kanga Paolo alîmwo. Ashwesirwe emigufu omu mpamikwa e Roma. Embere z’aho, âli omu mpamikwa, cikone mw’ako kanga ayemera n’obwalagale oku bakola bamuniga. Abîra bage baguma baguma bamulikirire, anakola arhamire bwenene.—2 Tm. 1:15.
17. Bici Paolo akahikire aha ajira?
17 Paolo acikagisegeza obwenge bwage oku bintu byagezire, nkaba akarhondire arhanya mpu acicishogage kundi-kundi arhakajire omu mpamikwa. Akashombire bwenene balya balume bamulekaga omu eneo y’e Aziya, na kandi akalesire okulangalira abandi bîra bage. Cikoki nta kantu ka muli ebyo byoshi ajijire. Bici byamurhabire arhulirire n’okugendekera alangalira Yehova?
18. Gurhi Paolo ajijire ly’ahima amazibu akag’ilwisa?
18 (3) Okurhanya. Oshuze kw’er’idoso: “Gurhi Paolo acirhabire yenene?” Ciru akaba Paolo ali embere z’olufû, arhayibagiraga oku akantu kw’obulagirire kuli kulerhera Yehova irenge. Anagendekera arhanya gurhi akajira ly’aha abandi omurhima. Agendekera ayegera Yehova kugerera isala. (2 Tm. 1:3) Ahali hw’okugendekera asegeza obwenge bwage okubiyerekire abantu bamulekaga, agendekera ayerekana oku ashagalukire oburhabale abîra bage bishwekerezi bamuhâga. Na kandi Paolo agendekera aciyigiriza Akanwa ka Nnamahanga. (2 Tm. 3:16, 17; 4:13) N’akantu kw’obulagirire kuli kubona oku agendekire ayemera n’obwalagale oku Yehova na Yezu bamuzigire, barhamulikirire, na kandi bayish’imuhemba oku mukolo gwage gw’obwishwekerezi.
19. Gurhi Yehova arhabiremwo Paolo?
19 Yehova âli abwizîre Paolo oku abuganana n’amazibu manji enyanya z’okuba Mukristu. (Ebj. 21:11-13) Gurhi Yehova arhabiremwo Paolo? Yehova ashuza amasala gage, na buzinda amuhâ emisi. (2 Tm. 4:17) Paolo al’iyemire n’obwalagale oku akahâbirwe oluhembo akagilibûkira bwenene. Yehova naye akashumya abîra bishwekerezi ba Paolo lyo bamuha oburhabale alilagirireko.
20. Gurhi rhwakayigamw’olwiganyo lwa Paolo nk’oku olwandiko lwa Abaroma 8:38, 39 ludesire?
20 (4) Okukolesa ebi rhwayigaga. Ocidose ntya: ‘Gurhi nakayigamwo olwiganyo lwa Paolo?’ Aka Paolo, rhumanye oku rhushinganine rhulibuzibwe erhi buyemere bwirhu burhuma. (Mk. 10:29, 30) Lyo rhugendekera rhwabêra bishwekerezi ciru akaba rhuli omu malibuko, rhushinganine rhugendekere rhwalangalira n’okushenga Yehova ngasi mango n’okukayiga Ebibliya ngasi mango. Kandi, rhunashinganine rhukengere oku akantu kw’obulagirire rhwakajira kuli kulerhera Yehova irenge. Rhwanayemera n’obwalagale oku nta mango Yehova akarhulekerera na nta kantu koshi-koshi omuntu akajira kakarhuma aleka okurhuzigira.—Osome Abaroma 8:38, 39; Hb. 13:5, 6.
OCIYIGIRIZE BINJI KUGERERA EZINDI NYIGANYO Z’ABANTU BAGANIRIRWE OMU BIBLIYA
21. Bici byarhabire Aya na Hector lyo balwisa amazibu baligwerhe?
21 Enyiganyo ziri omu Bibliya zanarhuha emisi ciru rhwakaba rhuli omu kanga kahi. Kwa lwiganyo, painiya muguma olama e Japon ohamagalwa Aya, adesire oku omwanzi gwa Yona gwamurhabire ahagalike oboba agwerhe bw’okuhubiri aha bantu banji. Olwiganyo lwa Ruti lwarhabire Hector, olama e Indonésie, ly’aciyigiriza binji okubiyerekire Yehova n’okumukolera ciru akaba ababusi bage bohe barhakolera Yehova.
22. Bici wakajira ly’oyunguka n’emicezo y’Ebibliya erhi emyanzi y’ecigabi “Tuige Imani Yao?”
22 Ngahi wakabona enyiganyo z’Ebibliya zakakuha omurhima? Evideo zirhu, emicezo y’okuyumvirhiza kone, n’ecigabi cidesire “Tuige Imani Yao” binarhurhabale okuhugûkwa myanzi miguma miguma eri omu Bibliya. * Embere olabe, erhi kuyumvirhiza erhi kusoma emyanzi ya mwen’eyo, wanahûna Yehova akurhabale obone entanya z’obulagirire wakakolesa. Ocihire oku nafasi y’omuntu oganirirwe mw’ogo mwanzi oli wasoma. Orhanye kw’ebi abo bakozi bazigirwa ba Yehova bajijire na gurhi Yehova abarhabire balwise amazibu balimo. Buzinda, wanalola gurhi ogo mwanzi gwakakurhabala omu kanga kawe. Ovuge Yehova omunkwa oku burhabale akuhire. Onayerekane oku oshagalukire obo burhabale omu kulonza nawe enjira wakarhabalamwo abandi erhi kubaha omurhima.
23. Nk’oku binayerekinwe omu Izaya 41:10, 13, bici Yehova alaganyize arhujirira?
23 Akalamo mw’er’igulu lirhambwirwe na Shetani kanaba kazibu okulembera, ciru n’agandi mango rhwanahaba eby’okujira. (2 Tm. 3:1) Cikone rhurhakwanini rhuyobohe. Yehova amanyire bwinja amazibu rhuli rhwalwisa. Erhi akaba rhulagirire oku burhabale, arhubwizire oku anarhugwarha n’okuboko kwage kulyo. (Osome Izaya 41:10, 13.) Rhuyemeri n’obwalagale oku arhurhabala, n’amandiko ganarhuhe emisi y’okulembera ngasi mazibu gakarhuhikira.
LWIMBO 96 Kitabu cha Mungu Ni Hazina
^ kip. 5 Myanzi minji eri omu Bibliya eyerekine oku Yehova aba azigire abakozi bage n’oku anagendekere abarhabala ciru bakarhimanana na mazibu gahi. Eci cigabi caganirira gurhi wakajira ly’ifunzo lyawe ly’Ebibliya likurhabala oyunguke n’omwazi oli wasoma.
^ kip. 2 Eyi njira y’okuciyigiriza eganirirwe aha, eri nguma y’omu njira wakakolesa amango oli waciyigiriza. Wanabona ezindi njira z’okuciyigiriza erhi wakasoma ecitabu Musaada wa Kutafuta Habari kwa Ajili ya Mashahidi wa Yehova, olole ecirhwe cidesire “Biblia” n’ecirhwe cisungunu cidesire “Kusoma na Kuelewa Biblia.”
^ kip. 14 Murhasomaga ago mandiko omu mango gw’okuyiga Ilabiro ly’Akalalizi omu cigamba.
^ kip. 22 Oku jw.org olole ecigabi cidesire “Tuige Imani Yao—Wanaume na Wanawake Wenye Kuzungumuziwa Katika Bibliya.” (Oje aha bayandisire MAFUNDISHO YA BIBLIA > IMANI KATIKA MUNGU.)
