1. Bulya gurhi Yezu ahûnaga Yehova oku alange abanafunzi bage?

OBUDUFU buzinda bw’akalamo ka Yezu hanw’igulu, arhanya bwenene okubiyerekire amazibu abanafunzi bage bayishirhimanana nago. Obuzigire oku bîra bage bwamushumya ahûna Ishe ntya: “Obalange oku Mubi.” (Yn. 17:14, 15) Yezu alimanyire oku hanw’agaluka empingu, Shetani Ibilisi agendekera ajira ivita na balya balonzize okukolera Yehova. Co cirhumire, abakozi ba Yehova balagirire oku bulanzi.

2. Bici byakarhuyemeza n’obwalagale oku Yehova ashuza oku masala girhu?

² Yehova ashuza kw’er’isala Omugala asalirâga, bulya aba azigire Omugala. Erhi rhwakakacihangana okushagalusa Yehova, nirhu anarhuzigira, ananakayumva ensengero zirhu z’okumuhûna oburhabale na kandi anakarhulanga. Ak’Ishe w’omulala w’obuzigire, Yehova agendekera ashibirira n’okuzigira abana bage. Erhi akaba arhajijiri ntyo, izino lyage lyo lyakaderhwa kubi!

3. Bulya gurhi rhulagirire oku bulanzi kurhenga emwa Yehova muli kano kasanzi?

³ Kano kasanzi kwo rhulagirire oku bulanzi kurhenga emwa Yehova kulusha agandi mango goshi. Shetani erhi bamulibirhako empingu, ayisha “anakunire bwenene.” (Maf. 12:12, Mashi Bible) Anakalonza okuyemeza baguma baguma ba bala bakarhulibuza oku okujira ntyo kuli “kukolera Nnâmahanga.” (Yn. 16:2) N’abandi bantu barhayemiri Nnamahanga, banakarhulibuza bulya rhurhaheka nk’oku igulu lidwirhe. Cikone ciru akaba ntyo, oko kurhakarhuyobohya. Bulya gurhi? Bulya Akanwa ka Nnamahanga kadesire ntya: “Nyakasane [Yehova, NWT] arhatwa omu kanwa kage: yêne ammuzibuhya anammucinge oku Mubi.” (2 Ts. 3:3) Gurhi Yehova arhulangamwo? Rhwaganirira njira ibirhi arhulangamwo.

4. Nk’oku olwandiko lwa Abefezi 6:13-17 ludesire, bici Yehova arhuhîre byakarhulanga?

⁴ Yehova arhuhîre ebikolanwa byakarhulanga kuli Shetani. (Osome Abefezi 6:13-17, NWT.) Ebyo bikolanwa biba bizibu binanakole bwinja! Cikone byanarhulanga erhi rhwakayambala ngasi cikolanwa n’okucikolesa. Bici ngasi cikolanwa cishushanyize? Rhuganirirage ngasi cikolanwa.

5. Omukaba gw’okuli byo bici, na bulya gurhi rhushinganine okuguyambala?

⁵ Omukaba gw’okuli gushushanyize okuli kuba omu Kanwa ka Nnamahanga, Bibliya. Bulya gurhi rhushinganine okuyambala ogo mukaba? Bulya Shetani aba “ishe w’obunywesi.” (Yn. 8:44) Akola agwerhe myaka minji ali arhebana na ntyo ahikire ah’arheba “igulu lyoshi”! (Maf. 12:9, NWT) Cikone okuli kuba omu Bibliya kunarhulange rhurharhebagwa. Gurhi rhuyambalamwo ogo mukaba gw’olwiganyo? Rhunajire ntyo omu kuyiga okuli okubiyerekire Yehova, omu kumuharamya “omu iroho n’omu okuli,” n’okuba bikubagirwa omu ngasi kantu.​—Yn. 4:24, NWT; Ef. 4:25; Hb. 13:18.

6. Empenzi y’obushinganyanya byo bici, na bulya gurhi rhushinganine okuyiyambala?

⁶ Empenzi y’obushinganyanya eshushanyizibwe n’amakanuni mashinganyanya ga Yehova. Bulya gurhi rhushinganine okuyambala eyo mpenzi? Nka kula empenzi elanga omurhima gw’omusoda barhagimulasha, ko n’empenzi y’obushinganya elanga omurhima gwirhu gw’olwiganyo erhi obumuntu bwirhu bw’ekandalala, lyo gurhayigaga olugenzi lubi lw’er’igulu. (Mig. 4:23) Yehova aba alonzize rhumuzigire n’okumukolera n’omurhima goshi. (Mt. 22:36, 37) Co cirhuma Shetani alonza agabe omurhima gwirhu omu kurhushumya rhuzigire ebintu biri omw’igulu n’obu biba bintu Yehova ashomba. (Yk. 4:4; 1 Yn. 2:15, 16) N’akabona oku oko kurhagwasiri, analonza okurhuyobohya lyo rhuvuna amarhegeko ga Yehova.

7. Gurhi rhuyambala empenzi y’obushinganyanya?

⁷ Rhunayambale empenzi y’obushinganyanya omu kurhumikira n’okulama nk’oku amakanuni ga Yehova lugenda ebinja n’ebibi gayerekine. (Enna. 97:10) Bantu baguma baguma banakarhanya oku amarhegeko ga Yehova ganakarhuyima oluhûma. Cikoki erhi rhwakaleka okukolesa amakanuni g’Ebibliya omu kalamo kirhu, rhwanaba nka musoda orhanyize oku empenzi yage eri nzirho na ntyo ayihogole n’obu ali omw’ivita likali. Okujira ntyo bwanaba buhwinja bunene bwenene! Abazigira Yehova barhabona nk’amarhegeko gage gali “mazirho,” cikone banabone oku gali gakucungula.​—1 Yn. 5:3.

8. Gurhi obushibirizi bw’okulumiza omwanzi mwinja bwakaba birata birhu?

⁸ Kandi Paolo arhubwizire oku obushibirizi bw’okulumiza omwanzi mwinja bibe byo birata birhu. Omu zindi nderho, rhushinganine rhube babidu okuyaliza omwanzi mwinja gw’Obwami. Erhi rhuganirira abandi okubiyerekire emwanzi eri omu Bibliya, obuyemere bwirhu bunazibuhe. Rhwanahirwa omurhima omu kubona kunganaci abakozi ba Yehova bagendekire bakolesa ngasi bulyo banagwerhe lyo bayaliza omwanzi mwinja. Kwa lwiganyo, banajire ntyo ebwa kazi, emasomo, banahubiri omu maeneo g’oburhunzi, nyumpa oku yindi, amango balambagirire bene wabo barhali bahamirizi, amango bali baganira n’abîra babo, ciru n’omu kasanzi barhayemerirwi okurhenga aha mwababwe. Erhi rhwakaleka okuhubiri enyanya z’oboba, rhwanaba nka musoda ohogwire ebirata byage omu kasanzi k’ivita likali na ntyo banamuyagaza amagulu.  Amazibu kuli kubona oku, arhakacihashilwa arhakanacihash’ikulikira amarhegeko ga komanda wabo.

9. Bulya gurhi kuli kwa bulagirire rhuyambale empenzi nnene y’obuyemere?

⁹ Empenzi nnene y’obuyemere eshushanyize obuyemere rhujira muli Yehova. Rhuba rhuyemire oku anahikirize ebiragane byage byoshi. Obuyemere bunarhurhabale “okuhaza emyampi kamole y’olya Mubi.” Bulya gurhi kuli kwa bulagirire okuyambala eyo mpenzi nnene? Bulya enarhulange lyo rhurhayemeraga enyigirizo z’abagoma na kandi enarhuhashise rhurhayobohaga amango abantu bamarhushekera enyanya z’obuyemere bwirhu. Buzira buyemere, rhurhakaba n’emisi y’okuhima enshumi z’abantu amango bamarhushumika oku rhuvune amarhegeko ga Yehova. Lubero n’oko, rhunabe erhi rhuyambire empenzi yirhu nnene erhi rhuhalira obwemere bwirhu ebwa masomo erhi ebwa kazi. (1 Pt. 3:15) Kandi rhunabe erhi rhuyambire empenzi yirhu nnene, erhi rhulahira akazi kw’omushahara munene kakarhurhôla akasanzi rhujiramw’ebintu by’ekiroho. (Hb. 13:5, 6) Na kandi rhunabe erhi rhuyambire empenzi yirhu nnene, erhi rhukolera Yehova ciru ankaba abantu bali barhuhagalika.​—1 Ts. 2:2.

10. Ensirha y’obucire byo bici, na bulya gurhi rhushinganine rhuyiyambale?

 ¹⁰ Ensirha y’obucire buba bulangalire Yehova aba arhuhîre: bulangalire bw’oku anarhucungule kurhenga omu lufû n’okuhemba balya boshi bajira obulonza bwage. (1 Ts. 5:8; 1 Tm. 4:10; Tt. 1:1, 2) Nka kula ensirha elanga irhwe ly’omusoda, obulangalire bwirhu bw’obucire bunalange obuhashe bwirhu bw’okurhanya. Omu njira nci? Obo bulangalire bunarhuhashise rhusegeze obwenge bwirhu oku biragane Nnamahanga aba arhuhîre na kandi bunarhurhabale rhulembere amazibu rhulimo. Gurhi rhuyambalamwo eyo nsirha? Rhunayiyambale omu kuba n’entanya zipatine n’entanya za Yehova lugenda oku abona bintu bilebe. Kwa lwiganyo, rhurhahira obulangalire bwirhu omu buhirhi bwa nsiku nsungunu, ci rhunacikubagire Nyamuzinda.​—Enna. 26:2; 104:34; 1 Tm. 6:17.

11. Engorho y’iroho byo bici, na bulya gurhi kuli kwa bulagirire rhuyikolese?

¹¹ Engorho y’iroho ko Kanwa ka Nnamahanga, Bibliya. Eyo ngorho ejira obuhashe bw’okutwa obunywesi boshi bwa ngasi lubero n’okukula abantu omu buja bw’enyigirizo z’obunywesi n’enkomêdu mbi. (2 Kr. 10:4, 5; 2 Tm. 3:16, 17; Hb. 4:12) Rhunahugûkwe okukolesa eyo ngorho bwinja kugerera ifunzo lirhu ly’Ebibliya na kugerera okukomerezibwa rhuhâbwa n’ikubuliro lya Nnamahanga. (2 Tm. 2:15) Na kandi, aha nyuma n’ebyo bikolanwa by’okulwa ivita, Yehova anarhuhe obundi bulanzi. Bulanzi buhi obo?

12. Bindi bici rhulagirireko, na bulya gurhi?

¹² Omusoda oyishilwa ivita ayishi oku arhakalwisa omurhwe gw’abasoda yenene: aba alagirire oku babo basoda. Ko n’oko, rhurhakahagalika Shetani n’abantu bage rhwenene, rhulagirire oku burhabale bwa bene wirhu na bali birhu. Yehova arhuhîre ‘bene wirhu’ b’omu igulu lyoshi lyo barhurhabala.​—1 Pt. 2:17.

13. Nk’oku biyerekinwe omu lwandiko lwa Abahabraniya 10:24, 25; bunguke buhi okuja oku ntimanano kurhulerhera?

¹³ Enjira nguma rhurhabalwamo kuba kuja oku ntimanano zirhu. (Osome Abahabraniya 10:24, 25.) Hali amango rhuvunika omurhima; cikoki okuja oku ntimanano kunarhurhabale rhuciyumve bwinja. Rhunahîrwemw’omurhima kugerera amashuzo garhenga oku murhima ga bene wirhu na bali birhu. Ehotuba n’eonyesho bajira zinarhurhabale rhugendekere rhwazibuhya omuhigo gwirhu gw’okukolera Yehova. N’enshambalo rhujira haguma na bene wirhu embere n’enyuma z’entimanano zinarhuhe omurhima. (1 Ts. 5:14) Na kandi, entimanano zirhu zinarhuhe obulyo bw’okuba n’omwishingo omuntu aba nago amango aha abandi. (Ebj. 20:35; Rm. 1:11, 12) N’entimanano zirhu zirhurhabale omu yindi njira. Zinarhurhabale rhube bahubiri na balimu binja. Kwa lwiganyo, entimanano zinarhuyigirize gurhi rhwakakolesa bwinja Ebikolanwa birhu by’Omwigiriza. Co cirhumire kuli kwa bulagirire okarheganya bwinja entimanano z’ecigamba. Okayumvirhiza bwinja amango g’entimanano. Enyuma z’entimanano okakolesa ebi wayigirizibagwa. Omu kujira ebyo byoshi, wanaba “musirika mwinja wa Kristu Yezu.”​—2 Tm. 2:3.

14. Bundi burhabale buhi rhugwerhe?

¹⁴ Na kandi rhunahâbwe oburhabale n’emilioni ya bamalahika. Orhanye hisungunu kw’ebi malahika muguma akajira! (Iz. 37:36) Na buzinda orhanye kw’ebi emiliyoni n’emiliyoni y’omurhwe gwa bamalahika bakaba n’obuhashe bw’okuhikiriza. Nta muntu na nta muzimu ogwerhe obuhashe  buli nk’obw’omurhwe gwa Yehova. Ebibliya edesire oku Omuhamirizi mwishwekerezi muguma anahima abantu banji kugerera oku burhabale bwa Yehova. (Bac. 6:16) Ezo nderho ziri z’okuli! Okarhanya kw’ezo nderho erhi wakavunika omurhima enyanya z’akantu owinyu munyakazi, owinyu mwanafunzi, erhi omuntu w’omu mulala akaderha erhi kujira. Okengere oku arhali wene oli walwa er’ivita. Oli wakulikira obulongozi bwa Yehova.

15. Nk’oku biyerekinwe omu Izaya 54:15, 17, bulya gurhi ntaye wakahanza abantu ba Yehova okujira omukolo gw’amahubiri?

¹⁵ Igulu lirhegesirwe na Shetani lijira birhumire binji birhuma ly’arhushomba. Rhurhaja omu by’epolitike, rhurhanalw’ivita. Rhunayalize izino lya Nnamahanga, n’okuyereka abandi oku Obwami bwage bone bwayishimala amazibu g’abantu, na kandi rhunarhumikire amakanuni gage. Rhunayerekane n’obwalagale oku omurhegesi w’er’igulu aba munywesi na munizi orhafabonjo. (Yn. 8:44) Na kandi rhunayalize oku obushereze bw’igulu lya Shetani buli hofi. Kobinali, nta mango Shetani n’abantu bage banarhuhanze okujira omukolo gw’amahubiri. Lubero n’oko, rhwagendekera rhwakolesa obulyo boshi rhwakanaba nabo lyo rhukuza Yehova! Shetani agwerhe obuhashe, cikone arhakahasha okuhanza oku omwanzi mwinja gw’Obwami gurhayigirizibagwa omw’igulu lyoshi. Oko kunahashikane kugerera obulanzi burhenga emwa Yehova.​—Osome Izaya 54:15, 17.

16. Gurhi Yehova ayish’icungulamwo abakozi bage omu kasanzi k’amalibuko makulu?

¹⁶ Bici biri embere zirhu? Omu kasanzi k’amalibuko makulu, Yehova ayishirhucungula omu njira ibirhi z’okusomerana. Burhangiriza, ayishicungula abakozi bage bishwekerezi omu kasanzi ayishishumika abami b’er’igulu bashereze Babiloni Mukulu, ecigusho coshi c’amadîni g’obunywesi. (Maf. 17:16-18; 18:2, 4) Na kandi, ayishicungula abakozi bage oku Armagedoni hano ashereza ebindi bigabi b’igulu lya Shetani.​—Maf. 7:9, 10; 16:14, 16.

17. Gurhi rhwakayunguka omu kubêra hofi na Yehova?

¹⁷ Erhi rhwakabêra hofi na Yehova, nta kantu kabi Shetani akarhujirira kakalama emyaka n’emyaka. Lubero n’oko, ye wayishisherezibwa emyaka n’emyaka. (Rm. 16:20) Co cirhumire rhuyambale ebikolanwa byoshi by’okulwa ivita, na kandi rhukabikolesa ngasi mango! Orhakagilwa ivita wenene. Okarhabala bene winyu na bali binyu. Okanakulikira obulongozi bwa Yehova. Erhi wakakajira ntyo, wanayemera n’obwalagale oku Sho wawe w’omu mpingu agendekera akuzibuhya n’okukucinga.​—Iz. 41:10.